Judges 12

Jeftà ɨ nù Ghelɨ Eflèm

¹Ghelɨ Eflèm nɨn læ meyn yvɨ̀ŋtɨ̀ sugèyʼsɨ àŋena ɨ dyaŋ ndù a Zefòn ɨ bɨf sɨ̂ Jeftà na, “Wà tî ndù nà nû ghelɨ Amòn bula wà jâŋ ghès bòm ghà? Ghès nɨn nyòʼ ndo zyâ a wa atu.”

²Jeftà ɨ bèynsɨ̀ na, “Ghelɨ Amòn ti meyn nà yeʼtɨ̂ ghès nô sɨ a ŋaŋ, ma jâŋ zɨ̀ na yì gvi gàmtɨ̀ ghès, yi leʼ na yi n-gvì wì sɨ gàmtɨ ghes ta ka ghes tɨm yɨ àŋena. ³Mà tî yèyn na yi n-gàmtɨ̀ wì ghes ɨ̀ lèm na mɨ n-dyâŋ ndû nû ghelɨ Amòn ɨ̀ làynsɨ kfɨ kɨ̀ kfɨ, tî ndù, Bôbo gâmtɨ̀ mà, ma tɨm yɨ àŋena. Yi n-gvî layn sɨ nu ma bòm ghà?”

⁴Jeftà ɨ taŋi tì ɨ yvɨ̀ŋtɨ̀ sugèyʼsɨ Gilèd nô sɨ̀ jɨ̀m àŋena tɨm yɨ ghelɨ Eflèm. Àŋena nɨ̀n læ tɨm yɨ bòm ta à nà n-ghɨ ma ghelɨ Eflèm nɨ̀n læ meyn bè na, Ghelɨ Gilèd nɨ̀n ghɨ kɨ ghelɨ Eflèm nɨ̀ ghelɨ Mànasè ta ghɨ tî lèʼ iwoŋ ɨ̀ ndù nà chî a Gilèd. ⁵Ghelɨ Gilèd nɨn tɨm yɨ tî ɨ lì ɨ̀lwêʼ vzɨ̀ a ghɨ n-dyâŋ ateyn a jvâ Jodàn ghɨ kæ zɨ a ntèʼ Eflèm. A nà n-leʼ nô mɨ wul ɨ̀ Eflèm ɨ̀ kfà gvì be na ghɨ visi yì dyaŋ, ghelɨ Gilèd ɨ bɨf sɨ̂ ŋweyn na, wù n-ghɨ wul ɨ̀ Eflèm a. Wù kæ tuynsɨ, ⁶àŋena be sɨ̂ ŋweyn na wu be na, “Shibolèt.” Wù kæ wo sɨ bè ɨ̀ kwo bè na, “Sibolèt”, a àŋena ghal zuè ŋweyn kɨ̀ alèʼ nâ ghè a ghɨ n-dyâŋ jvâ Jodàn ateyn. Àŋena nɨ̀n læ meyn zuetɨ ghelɨ Eflèm nkam mɨ̀vɨm ɨ̀n kæ̀ njvàsɨ̀ bò. ⁷Jeftà nɨn læ meyn tisɨ ghelɨ Isìlæ̀ sɨ a bèŋsɨ̀ ntufa ɨ kfɨ, ghɨ gvɨ̀mì ŋweyn a ntèʼ Gilèd.

Ibzàn ŋêyn Elòn nɨ̀ Abdòn ɨ koʼ sɨ a ghelɨ ghɨ tisɨnɨ a Isìlæ̀

⁸À nà n-ghɨ ta Jeftà kfɨ, Ibzàn ɨ wul ɨ̀ Betɨ̀làhêm ɨ nà sɨ tisɨ̂ Isìlæ̀. ⁹Wu nà n-kelɨ woyn ghɨ lûmnɨ̀ mɨ̀vɨm ɨ̀n tal nɨ̀ woyn ghɨ̂ki kɨ̀mɨ mɨ̀vɨm ɨ̀n tal, ɨ fu woyn ghɨ̂ki nɨ̀ ŋweyn nâ ghì sɨ̂ ghɨ̀lum, a ghɨ kɨ ghelɨ ɨtum. Wu n-læ meyn ndù ghɨ̀kì sɨ̂ woyn ŋweyn ghɨ lûmnɨ̀ ghì mɨ̀vɨm ɨ̀n tal a ghɨ kɨmɨ ghɨ̀kì ɨtum. Ibzàn nɨ̀n læ tisɨ ghelɨ Isìlæ̀ sɨ a bèŋsɨ̀ nsòmbo, ¹⁰ɨ læ kfɨ ghɨ gvɨ̀mì ŋweyn a ntèʼ Betɨ̀làhêm.

¹¹Ibzàn nɨn læ kfɨ, Elòn ɨ wul ɨ̀ Zebulùn ɨ tisɨ Isìlæ̀ sɨ a bèŋsɨ ìvɨm, ¹²ɨ kfɨ. Wu n-læ kfɨ ghɨ gvɨ̀mì ŋweyn a ntèʼ Ajalòn, ilaʼ i Zebulùn.

¹³À nà n-ghɨ ta Elòn kfɨ, Abdòn ɨ wâyn Hilèl ɨ wul ɨ̀ Bilatòn ɨ nà sɨ tisɨ̂ Isìlæ̀. ¹⁴Abdòn nà n-kelɨ woyn ghɨ lûmnɨ̀ mɨ̀vɨm ɨ̀n kæ̀ nɨ̀ woyn woyn ghɨ lûmnɨ̀ mɨ̀vɨm ɨ̀n tal. Àŋena ghɨ̀ jɨ̀m nà n-jêl atû njàkâysɨ̀ mɨ̀vɨ̂m nsòmbo. Wù n-læ tisɨ ghelɨ Isìlæ̀ sɨ a bèŋsɨ̀ nfama, ¹⁵ɨ kfɨ. Abdòn ɨ wâyn Hilèl nɨ̀n læ kfɨ ghɨ gvɨ̀mì ŋweyn ntèʼ Bilatòn ilaʼ i kfɨynsɨ a Eflèm, alèʼ ghè a ghelɨ Amalèk nɨ̀n læ nà chi ateyn.