Judges 10

Tolà ɨ koʼ sɨ a wûl ɨ tisɨnɨ a Isìlæ̀

¹À nà n-ghɨ ta Abimelèk kfɨ, Wul ɨ̀ Isakà ɨlvɨ̀ izɨyn i ŋweyn ɨ ghɨ Tolà ɨ koʼ sɨ a wûl ɨ tisɨnɨ a Isìlæ̀ ɨ gàmtɨ̀ àŋena. Tolà nà n-ghɨ wâyn Buwà, Buwà ɨ ghɨ wâyn Dodò. Wù nà n-chî a ntèʼ Shamì ilaʼ i kfɨynsɨ a Eflèm. ²Tolà nɨ̀n læ tisɨ Isìlæ̀ sɨ a bèŋ mɨ̀vɨm ɨ̀m bò njvàsɨ̀ tal ɨ kfɨ ghɨ gvɨ̀mì ŋweyn a Shamì.

Jayì ɨ koʼ sɨ a wûl ɨ tisɨnɨ a Isìlæ̀

³À nà n-ghɨ ta Tolà kfɨ, Jayì ɨ wul ɨ̀ Gilèd ɨ koʼ sɨ a wûl ɨ tisɨnɨ a Isìlæ̀ ɨ saʼ sɨ a bèŋ mɨ̀vɨm ɨ̀m bò njvàsɨ̀ bò. ⁴Jayì nà n-kelɨ woyn ghɨ lûmnɨ̀ mɨ̀vɨm ɨ̀n tal, nô mɨ ɨ̀kfà ɨ kelɨ njàkâs zɨ̀ a wù n-jelɨ̀ atu àteyn. À nà n-ghɨ mɨ wayn ɨ̀ kfà antêynɨ̀ nɨ̀ woyn Jayì nâ ghì saʼ ntèʼ abàs a Isìlæ̀ ghè a ghɨ nà n-toŋtɨ na Gilèd. Sɨ koʼ sɨ chem layn, ghɨ bu toŋtɨ̂ kɨ ntèʼ nâ sìsɨ̀ ta ghɨ nà n-toŋtɨ ɨtuʼ nâ ghè na Havot Jayì. ⁵Jayì nɨ̀n læ kfɨ ghɨ gvɨ̀mì ŋweyn a ntèʼ Kamòn.

Jeftà ɨ koʼ sɨ a wûl ɨ tisɨnɨ a Isìlæ̀

⁶Ghelɨ Isìlæ̀ nɨn fi meyn nì mbɨ asɨ nɨ̀ Bôbo Fɨyini, ɨ kasi nà koʼsɨ̂ ɨ̀nfyèʼsɨ̀ ɨ Bâl nɨ̀ ɨ̀nfyèʼsɨ Ashtolèt. Àŋena nà n-koʼsɨ̂ kɨmɨ mɨyini mɨ̀ Alàm nɨ̀ mɨyini mɨ̀ Sidòn nɨ̀ mɨyini mɨ̀ Mowàb nɨ̀ mɨyini mɨ̀ ghelɨ Amòn nɨ̀ ɨmzɨ ghelɨ Fìlisìyà. À nà n-ghɨ tì ta ghelɨ Isìlæ̀ nì mbɨ nà bu koʼsɨ̂ wì Bôbo Fɨyini, ⁷Bôbo nyòʼsɨ̀ ɨ̀toŋ ɨ visi ghelɨ Fìlisìyà nɨ̀ ghelɨ Amòn ghɨ tɨm yɨ àŋena. ⁸Ghelɨ Amò nɨ̀ ghelɨ Fìlisìyà nɨ̀n zuetɨ meyn sugèyʼsɨ Isìlæ̀ nô sɨ̀ jɨ̀m a bêŋ nâ ghè ɨ fu ngeʼ sɨ̂ ghelɨ Isìlæ̀ ghì nô ghɨ̀ jɨ̀m a ghɨ nà n-chi a Gilèd injɨyn i jvâ Jodàn ilaʼ nɨ̀ ghelɨ Amò dzɨ abàs ghè a ɨchfɨ̂-iyvɨ nɨn sal ateyn. Ghɨ n-læ meyn fu ngeʼ sɨ̂ àŋena sɨ a bèŋsɨ̀ njvàsɨ̀ nfama. ⁹Ghelɨ Amòn nɨn læ meyn dyàŋ jvâ Jodàn ɨ boŋ gvì sɨ nu ghelɨ Judà nɨ̀ ghelɨ Benjamìn nɨ̀ ɨ ghɨ Eflèm, ghelɨ Isìlæ̀ ɨ nà sɨ ghɨ a ngeʼ i bemnɨ, ¹⁰ɨ kæ dzɨ̀ sɨ̂ Bôbo Fɨyini sɨ bè na, “Ghèsɨ ni meyn mbɨ sɨ̂ và a Fɨyini feyfɨ ɨ̀ faŋ tɨ̀ kòʼsɨ vâ ɨ̀ ndù nà koʼsɨ̂ ɨ̀nfyèʼsɨ Bâl.”

¹¹Bôbo ɨ bè sɨ̂ àŋena na, “À n-læ nà ghɨ ta ghelɨ Ijìb nɨ̀ ghelɨ Amò nɨ̀ ghelɨ Amòn, nɨ̀ ghelɨ Fìlisìyà, ¹²nɨ̀ ghelɨ Sidòn nɨ̀ ghelɨ Amalèk baʼsɨ̂ nɨ̀ ɨ ghɨ Màwûn nɨn fu ngeʼ sɨ̂ zɨ̀, yi dzɨ̀ sɨ̂ mà, ma gàmtɨ̀ zɨ̀. ¹³Yi fi meyn vìsi mà ɨ̀ kàsi ndù nà koʼsɨ̂ mɨyini ɨ mɨ̂nlù. Mɨ n-bu fì gâmtɨ̀ wì zɨ lvɨ̂yn. ¹⁴Yì ndu nà dzɨ̂ kɨ sɨ̂ mɨyini nâ mzɨ̀ a yì chòʼnɨ sɨ nà koʼsɨ̂ tì, mɨ̀ gamtɨ zɨ a ngeʼsɨ ghê a yi n-ghɨ ateyn.”

¹⁵Mɨtì ghelɨ Isìlæ̀ ɨ bè sɨ̂ Bôbo na, “Ghèsɨ ni meyn mbɨ. Fu nô mɨ ngeʼ ì kà zɨ̀ a wà yeyn yi kfeynɨ̂ sɨ̂ ghès, mɨtì ghès nɨn chwotɨ̂ kɨ na wà gamtɨ ghes a ngeʼ nâ ghàyn a ghès nɨn ghɨ ateyn lvɨ̂yn.” ¹⁶Àŋena taŋi tì ɨ màʼì mɨyini mɨ̀ ɨ̀tum mzɨ̀ a àŋena nà n-koʼsɨ ɨ kasi ndù ɨ nà koʼsɨ̂ Bôbo Fɨyini. Bôbo nɨ̀n yeyn meyn ànjɨ̀ŋ a ghelɨ Isìlæ̀ nâ kì ɨ nà koynsɨ ìsuyn sɨ̂ àŋena nô sɨ a ŋaŋ.

¹⁷A nà ghɨ ta sugèyʼsɨ Amònsɨ̀ ndù bɨ̀ a Gilèd, ghelɨ Isìlæ̀ ɨ boŋ yvɨ̀ŋtɨ̀ ɨ ndu bɨ̀ a Mizbà. ¹⁸Ghelɨ ghɨ tisɨnɨ a Gilèd ɨ nà sɨ bê kɨ sɨ a àŋena ngeŋsɨ na, “À tìmi mɨ ndà asɨ ta ghesɨ̀nà nɨn ndû sɨ nu ghelɨ Amòn, a wù na ghɨ wul ɨ tisɨnɨ sɨ̂ ghelɨ ghì a ghɨ n-chi a Gilèd nô ghɨ̀ jɨ̀m.”