Judges 1

Ghelɨ Judà nɨ̀ ghelɨ Simìyòn ɨ tɨm yɨ ghelɨ Kenàn

¹Joshwà nɨ̀n læ kfɨ, ghelɨ Isìlæ̀ ɨ bɨf sɨ̂ Bôbo Fɨyini na, “A ndù ghelɨ ndo ì kà sɨ nu ghelɨ Kenàn sɨ asɨ-a?”

²Bôbo Fɨyini ɨ bè na, “A ndû ghelɨ Judà sɨ asɨ. Ma fu meyn àdyaʼ na àŋena tɨm yɨ̀ ghelɨ Kenàn.”

³Ghelɨ Judà ɨ bè sɨ̂ woynà àŋena ɨ ghelɨ ndô Simìyòn na, “Yì gvi gàmtɨ̀, ghesɨ̀nà koʼ ɨ̀ tɨm yɨ̀ ghelɨ Kenàn ghèyn a ghɨ n-chi ilaʼ afêyn a Fɨyini fɨ fù sɨ̂ ghès têyn. Ghesɨ̀ læ̀ boŋ gàmtɨ̀ zɨ̀ ɨ̀ fsɨ fu ilaʼ ì zɨ-i sɨ̂ zɨ̀.” Àŋena bè tì, ghelɨ ndô Simìyòn ɨ ndù ŋêyn àŋena.

⁴Ghelɨ Judà nɨ̀n læ meyn ndù, Bôbo Fɨyini ɨ nì àŋena tɨm yɨ ghelɨ Kenàn nɨ̀ ghelɨ Belìz ɨ zuetɨ ghelɨ nkamsɨ ìvɨm a ntèʼ Bezèk. ⁵Àŋena nɨn læ meyn yeyn fòyn Adoni-Bezèk a ntèʼ Bezèk ɨ nù ŋweyn afu ɨ tɨm yɨ ghelɨ Kenàn nɨ̀ ghelɨ Belìz. ⁶Àŋena nɨ̀n læ se sɨ nu fòyn Adoni-Bezèk, wu nà sɨ leʼa, àŋena nyɨŋ ghal ŋweyn ɨ teyntɨ lumsɨ ɨwu nɨ̀ ŋweyn nɨ̀ lumsɨ ɨvɨ̀sɨ. ⁷Wu kæ bè na, “Mɨ n-læ meyn bè ghɨ teyntɨ lumsɨ ɨwu nɨ̀ lumsɨ ɨvɨ̀ nɨ̀ tɨfôyn tɨlitɨ mɨ̀vɨ̂m nsòmbo, àŋena nà boŋtɨ̂ yɨ nkfɨ̀là-nkfɨ̀là sɨ ɨfwo isas abaŋ ghè a mɨ nà n-yɨ ateyn. Fɨyini fɨ kasi meyn làʼ mà lvɨ̂yn sɨ iwo nâ ghè a mɨ n-læ nì sɨ̂ àŋena.” Ghɨ n-læ meyn lì fòyn Adoni-Bezèk ɨ ndù nɨ̀ ŋweyn a Jèlusalèm, wu ndu kfɨ afu.

⁸Ghelɨ Judà nɨ̀n ndu meyn ɨ tɨm yɨ kɨmɨ ntèʼ Jèlusalèm ɨ zuetɨ ghelɨ ghì a ghɨ nà n-chi ateyn ɨ nyòʼ ntèʼ àteyn.

⁹Àŋena nɨ̂n lù afu ɨ kàlì sɨ nu ghelɨ Kenàn ghì a ghɨ nà n-chi ilaʼ i kfɨynsɨ nɨ ɨghî a ghɨ nà n-chi a Negèv a nse ìyum nɨ ɨghî a ghɨ nà n-chi isas i kfɨynsɨ abàs ghè a ɨchfɨ-iyvɨ i nɨn sœ ateyn. ¹⁰Àŋena nɨn nu meyn ghelɨ Kenàn ghì a ghɨ nà n-chi a ntèʼ Heblòn ghè a ghɨ n-læ nà toŋtɨ sɨ asɨ na Kiliyat Abà ɨ tɨm yɨ woyn Sheshày nɨ ɨ ghɨ Ahimàn nɨ̀ ɨ ghɨ Talmày.

¹¹Àŋena nɨ̂n lù afu ɨ ndu kèʼ ghelɨ Debì a ghɨ ntèʼ ma ghɨ nà n-toŋtɨ̂ sɨ asɨ na Kiliyat Sefà ɨ tɨm yɨ àŋena. ¹²Kalèb ɨ kæ be sɨ̂ sugèyʼsɨ ŋweynsɨ na, “À tɨm yɨ nô mɨ nda ntèʼ Kiliyat Sefà, a mà fu wayn wom Aksà sɨ̂ ŋweyn sɨ a wi.” ¹³Onèl ɨ wâyn Kenàz ma à ti wâynà Kalèb ɨtwelâ ɨ tɨm yɨ Kiliyat Sefà. Kalèb ɨ fu Aksà sɨ̂ ŋweyn sɨ a wi.

¹⁴A læ nà ghɨ achi a li-a, Aksà ɨ bè sɨ̂ lûm ŋweyn Onèl na, “Yi n-jôf na wà loyn gveyn sɨ̂ bò wom.” Aksà ɨ læ ndù sɨ yeyn bò ŋweyn ɨ nà suʼi gvî kɨ atû njàkâs tèyn, bò ŋweyn ɨ bɨf kɨ na, “Wà n-kɨŋ na mà ni gha sɨ̂ và a?”

¹⁵Aksà ɨ bèynsɨ̀ ɨ bè na, “Mɨ n-chwotɨ̂ và, fi boysɨ ma nɨ̀ àfo a. Wà ti meyn fù alêʼ sɨ̂ mà abàs itsɨyn a nse ì yum; fu kɨmɨ tɨ̀bɨ tɨ mu nɨ̀ và tɨ litɨ sɨ̂ mà.” Kalèb ɨ kæ fu ibɨ i mu nɨ̀ ŋweyn zɨ̀ a yi nà n-ghɨ abàs ikuè nɨ izɨ-ì a yi nà n-ghɨ abàs itsɨyn sɨ̂ ŋweyn.

¹⁶Wôyn wul ɨ̀ Kên vzɨ̀ a à nà n-ghɨ bò wi nɨ̀ Mosìs tì nɨ̂n læ meyn lù a ntèʼ Jèlikò ŋêyn ghelɨ Judà ɨ kàli nà chî ŋêyn ghelɨ nse ìyum a Judà dzɨ a ngùŋ ntèʼ Alàd a Negèv.

¹⁷Àŋena nɨn ndù tî, ghelɨ Judà ŋêyn woynà àŋena ɨ ghelɨ ndô Simìyòn ɨ ndu kèʼ ghelɨ Kenàn ghì a ghɨ nà n-chi a Zefàt ɨ bebsɨ ntèʼ àteyn nô ì jɨ̀m ɨ kæ fu izɨyn i fɨ-i sɨ̂ ntèʼ nâ zɨ̀ na Homà. ¹⁸Ghelɨ Judà nɨ̀n læ meyn tɨm yɨ kɨmɨ ntèʼ Gazà, nɨ̀ ntèʼ Ashkelòn, nɨ̀ ntèʼ Eklòn, tɨm yɨ nô mɨ ghelɨ ntèʼ ì kà, lî nse àŋena baʼsɨ̂ nɨ̀ ɨ̀lwêʼ vzɨ̀ a wu n-ghɨ a mbæ̀sɨ ateyn.

¹⁹Bôbo Fɨyini nɨn læ meyn gàmtɨ̀ ghelɨ Judà àŋena ghaytɨ fsɨ ntèʼ sîsɨ̀ a sɨ nà n-ghɨ a kfɨynsɨ. Àŋena nà n-fsɨtɨ̂ mɨtì, yi to ghaʼ kɨ ghaʼ àŋena sɨ sàŋ sɨ fvɨ̀sɨ ghelɨ ghì a ghɨ nà n-chi a tɨ̂bàl bòm ta ghelɨ tɨ̂bàl nâ ghi nà n-nû nɨ̀ mɨ̀nchaʼ mɨ̀ ìwoŋ ma ghɨ faytɨ nɨ̀ àkas a. ²⁰Ghɨ n-læ meyn fu ntèʼ Heblòn sɨ̂ Kalèb kɨ ighel ta Mosìs nɨn læ chfɨ̀nɨ. Kalèb ɨ saŋ fvɨ̀sɨ̀ woyn Anàk ghì ghɨ̀ tal a ghɨ nà n-chi afu. ²¹Mɨtì ghelɨ Benjamìn ɨ faŋ tɨ̀ sàŋ sɨ fvɨ̀sɨ ghelɨ Jebùs ghì a ghɨ nà n-chi a Jèlusalèm. À ti iwo zɨ̀ a ghelɨ Jebùs bu chi ŋêyn ghelɨ Benjamìn a Jèlusalèm sɨ koʼ sɨ chem layn.

²²Ghelɨ ndo nɨ̀ Josèf nɨn læ meyn ndu nù ntèʼ Betèl, Bôbo Fɨyini ɨ gàmtɨ̀ àŋena. ²³Àŋena nɨ̀n læ meyn tum gvèsɨ̀ na sɨ ndu nyàʼtɨ ki ntèʼ Betèl zɨ̀ a ghɨ nà n-toŋtɨ sɨ asɨ na Lûz tì. ²⁴Àŋena se sɨ ndù ɨ yeyn wul wu fvɨ̂ gvî a ntèʼ nâ ghè ɨ bè sɨ̂ ŋweyn na, “Dyèyn dzɨ zɨ̀ a yì n-zɨ a ntèʼ afêyn sɨ̂ ghès. Wà kæ dyèyn dzɨ àteyn, ghesɨ bû fù ngeʼ sɨ̂ và.” ²⁵Ta àŋena bè tî, wu dyèyn àŋena zɨ ɨ zuetɨ ghelɨ ghì a ghɨ nà n-chi ateyn nô ghɨ̀ jɨ̀m mɨtì ɨ faŋ tɨ̀ zue wul àteyn ŋêyn ghelɨ ŋweyn. ²⁶Wùl àteyn ɨ lù ɨ ndù ilaʼ nɨ̀ ghelɨ Hêt ɨ bàʼlɨ̀ ntèʼ afu ɨ chfɨ̀ ìzɨyn ateyn na Lûz. Ghɨ bu toŋtɨ̂ kɨ ntèʼ nâ zɨ̀ na Lûz sɨ koʼ sɨ chem layn.

²⁷Ghelɨ Mànasè nɨn bu læ saŋ fvɨ̀sɨ ghelɨ ntèʼ Bet Shàn nɨ̀ ghelɨ ntèʼ Tanàk nɨ̀ ɨ ghɨ Dô nɨ̀ ghelɨ ntèʼ Iblìm nɨ̀ ɨ ghɨ Megidò nɨ̀ ghelɨ mɨ̂ntèʼtɨ̂ mzɨ̀ a mbæ̀sɨ nɨ̀ àŋena. Yi nà n-ghɨ tì bòm ta ghelɨ Kenàn nà n-ghɨ ma ghɨ kâyn meyn àkfɨtɨ na ghɨ n-faŋ kɨ a ilaʼ nâ ghè. ²⁸Ghelɨ Isìlæ̀ nɨn læ meyn keli àdyaʼ mɨtì ɨ faŋ tɨ̀ sàŋ sɨ fvɨ̀sɨ àŋena ghɨ̀ jɨ̀m. Àŋena nà n-kâyn kɨ na ghelɨ Kenàn na felɨ̀ sɨ̂ àŋena. ²⁹Nô mɨ ghelɨ ndo nɨ̀ Eflèm nɨn bu læ saŋ fvɨ̀sɨ ghelɨ Kenàn ghì a ghɨ nà n-chi a ntèʼ Gezà. Ghelɨ Kenàn nâ ghì ɨ faŋ ɨ nà chî kɨ ŋêyn àŋena. ³⁰Ghelɨ Zebulòn nɨ̀n faŋ meyn kɨmɨ tɨ̀ saŋ ghelɨ Kenàn ghì a ghɨ na n-chi a ntèʼ Kitɨ̀lòn nɨ̀ ɨghî a ghɨ nà n-chi a ntèʼ Nahalòl. Ghelɨ Kenàn nâ ghì ɨ faŋ nà chî kɨ ŋêyn àŋena, mɨtì ghelɨ Zebulòn ɨ kaynà ghelɨ Kenàn nâ ghì ɨ felɨ̀ sɨ̂ àŋena. ³¹Nô mɨ ghelɨ Ashà nɨn bû læ saŋ fvɨ̀sɨ ghelɨ Kenàn ghì a ghɨ nà n-chi a ntèʼ Akò nɨ̀ ɨghî a ghɨ nà n-chi a ntèʼ Sidòn nɨ̀ ɨghî a ghɨ nà n-chi a ntèʼ Alàb nɨ̀ ɨghî a ghɨ nà n-chi a ntèʼ Akzìb nɨ̀ ɨghî a ghɨ nà n-chi a ntèʼ Helbà nô mɨ nɨ̀ ɨghî a ghɨ nà n-chi a ntèʼ Afèk nɨ̀ ɨghî a ghɨ nà n-chi a ntèʼ Lehòb. ³²À ti iwo zɨ̀ a ghelɨ Ashà nɨn læ faŋ ɨ nà sɨ chî kɨ ŋêyn ghelɨ Kenàn ghì a ghɨ nà n-chi ilaʼ nâ ghè. ³³Ghelɨ Naftalì nɨn bu læ boŋ sàŋ ghelɨ Kenàn ghì a ghɨ nà n-chi a ntèʼ Bet Shemèsh nɨ̀ ɨghî a ghɨ nà n-chi a ntèʼ Bet Anàt. Ghelɨ Naftalì ɨ faŋ ɨ nà sɨ boŋ chî kɨmɨ ŋêyn ghelɨ Kenàn ghì a ghɨ nà n-chi ilaʼ nâ ghè, mɨtì ɨ nà kaynà ghelɨ Bet Shemèsh ghì nɨ̀ ghelɨ Bet Anàt ɨ felɨ̀ sɨ̂ àŋena. ³⁴Ghelɨ Amò nɨ̂n koʼ meyn fèyn ghelɨ Dân ilaʼ i kfɨynsɨ ɨ nà visî wì na àŋena kali ibal. ³⁵Àŋena nɨn læ meyn kàyn àkfɨtɨ ɨ faŋ kɨ a kfɨ̂yn Helès nɨ̀ kfɨ̂yn Ayjalòn nɨ̀ kfɨ̂yn Shalbìm. Woyn Josèf ɨ læ keli àdyaʼ ɨ nà kaynà ghelɨ Amò ɨ felɨ̀ sɨ̂ àŋena. ³⁶Ighami i Amò i nà n-zɨ̂tɨ̀ a dzɨ ta yì n-chwô atû kfɨ̂yn Akɨlabìm, ndû chem a ntèʼ Selà, yi fi koʼ ndù asɨ.