Joshua 9

Ghelɨ Gibìyòn ɨ lɨsɨ ghelɨ Isìlæ̀

¹À na n-ghɨ ta tɨfôyn tìtɨ̀ a tɨ nà n-ghɨ injɨyn i jvâ Jodàn ma à ti ɨ tîtɨ̀ a tɨ nà n-ghɨ a kfɨ̀ynsɨ nɨ̀ tɨ̀baltɨ nɨ̀ mbæ̀sɨ jvâ Medìtèlenìyà, sɨ fì sɨ koʼ sɨ ndu dzɨ a Lebanòn, ma à ti ghelɨ tɨ̂laʼ tɨ Hêt nɨ̀ Amò nɨ̀ kenàn nɨ̀ Belìz nɨ̀ Hîv nɨ̀ ghelɨ Jebùs yvɨ na Isìlæ̀ ti meyn tɨm yɨ̀ ghelɨ Ây, ²àŋena yvɨ̀ŋtɨ̀ ɨ baʼtɨ sɨ nu Joshwà ŋêyn ghelɨ Isìlæ̀.

³Mɨtì a nà ghɨ ta ghelɨ Gibìyòn yvɨ na Joshwà ŋêyn ghelɨ Isìlæ̀ tɨm meyn yɨ̀ ghelɨ ntèʼ Jèlikò nɨ̀ Ây, ⁴àŋena kwo lèm na ghɨ n-lɨsɨ̂ ghelɨ Isìlæ̀. Àŋena nɨn lèm tî, ɨ baʼtɨ ɨ̀fwo ɨ yɨnɨ sɨ ndù ijêl ɨ we ɨshwàʼ ɨ bòsɨ̀ ɨ kul atû njàkâysɨ̀ nɨ̀ àŋena ɨ we mɨlûʼ a nsàlsɨ gvɨ̂ nyàm ma sɨ baytɨ meyn ghɨ kasî tìmi timi. ⁵Àŋena nɨn tuŋ ɨshwâʼ ɨ gvɨsɨ ɨvɨ̀, ɨ màʼ ɨ̀shwâʼ ɨ ndzɨsɨ. Ɨfwo ɨ yɨnɨ nɨ̀ àŋena nô ɨ̀ jɨ̀m nà n-ghɨ ma wu fɨmtɨ meyn fì yùmtɨ. ⁶Àŋena nɨn bàʼtɨ tî, ɨ lu ndu yeyn Joshwà ŋêyn ghelɨ Isìlæ̀ alèʼ ghè a àŋena nɨn bɨ̀ ateyn a Gilgàl, ɨ bè sɨ̂ ŋweyn na, “Ghès lù ilaʼ, ndyèyn àteyn ɨ dyêf kɨ tèyn, nà chwotɨ na ghesɨ̀nà yɨ mɨkâyn.”

⁷Mɨtì ghelɨ Isìlæ̀ ɨ̀ bè sɨ ghelɨ Hîv nâ ghì na, “Yì kàʼ a yì na chi baʼsɨ̂ sɨ̂ ghès, ma yi kæ sɨ nà chi baʼsɨ sɨ̂ ghès, ghesɨ̀na kaʼ ghɨ bû yɨ̀ mɨkâyn.”

⁸Àŋena bè sɨ̂ Joshwà na, “Ghès nɨn kôŋ sɨ nà ghɨ ghelɨ ghɨ felɨnɨ nɨ̀ zɨ̀.”

Joshwà ɨ bɨf sɨ̂ àŋena na, “Yi n-ghɨ ghɨ̀ ndà a? Yì lù wo a?”

⁹Àŋena bè sɨ̂ Joshwà na, “Ghès nɨn ghɨ ghelɨ ghɨ felɨnɨ nɨ̀ zɨ̀, ma ghèsɨ̀ lù ilaʼ ili ndyèyn àteyn dyêf kɨ tèyn. Ghèsɨ̀ gvì bòm ta ghèsɨ yvɨ meyn àwo a kaynɨ-a kì a Bôbo Fɨyini fifɨ nì, ɨ̀ gàmtɨ fvɨ̀sɨ̀ zɨ̀ sɨ a Ijìb. ¹⁰Ghèsɨ yvɨ meyn kɨ̀mɨ àwo à jɨ̀m ta Fɨ tî nì yi tɨm yɨ tɨfôyn tɨ Amò tɨ̀ bò injɨyn i jvâ Jodàn, ma à ti Sihòn ɨ fòyn Heshbòn nɨ̀ Ôg ɨ fòyn Bashàn vzɨ̀ a wu na n-saʼ a Ashtalòt. ¹¹Chyeʼsɨ ilaʼ nɨ̀ ghèsɨ nɨ̀ ghelɨ ilaʼ nɨ̀ ghès nô ghɨ̀ jɨ̀m bê na ghès li ɨfwo ɨ yɨnɨ nà yɨ gvî a dzɨ ɨ̀ gvì yèyn zɨ ghelɨ Isìlæ̀ ɨ̀ bè sɨ̂ zɨ na, ‘Ghès nɨn kɨŋ sɨ nà ghɨ ghelɨ ghɨ felɨnɨ nɨ̀ zɨ̀, chwotɨ̂ na ghesɨ̀nà yɨ mɨkâyn.’ ¹²Ghès tî we ɨ̀fwo ɨ yɨnɨ wèyn a bòsɨ̀ wu bu lûm kɨ tèyn nchuŋ, mɨtì wu na sɨ ghɨ lvɨ̂yn ma wu fɨmtɨ meyn fì yùmtɨ. ¹³À n-ghɨ mɨ nsàl sɨ gvɨ̂ nyàm sêynsɨ̀ ma ghès tî we mɨ̀lûʼ ateyn sɨ bu ghɨ kɨ sɨ fɨ, mɨtì sɨ na sɨ ghɨ ma sɨ baytɨ meyn. Nô mɨ ndzɨ seynsɨ nɨ̀ gvɨsɨ nɨn ghɨ ma sɨ bàytɨ̀ kɨ̀ ijèl nâ ghàyn tèyn.”

¹⁴Ghelɨ Isìlæ̀ ɨ ki kɨ ɨfwo vzɨ̀ a ghelɨ nâ ghì dyèyn ɨ bɨmi kɨ na àŋena nɨn bê samoʼ, bula ghɨ bɨf ìwo zɨ̀-ì a Bôbo Fɨyini nɨn kɨŋ na àŋena ni. ¹⁵Joshwà ɨ yɨ mɨkâyn ŋêyn ghelɨ Gibìyòn ɨ lèm na ghelɨ Isìlæ̀ nɨn zuetɨ wi àŋena, ghelɨ ghɨ tisɨnɨ nɨ̀ ghelɨ Isìlæ̀ ɨ bɨmi ìchfɨ̂nɨ̀ nâ zɨ̀-ì

¹⁶A nà ghɨ ibàm i mɨchi ɨ̀n tal ta àŋena yɨ̀ mɨkâyn ŋêyn ghelɨ Gibìyòn, ghelɨ Isìlæ̀ ɨ yvɨ na ghelɨ ateyn nɨn chi baʼsɨ̂ sɨ̂ àŋena. ¹⁷Ghelɨ Isìlæ̀ ɨ lù, a nà ghɨ ibàm i mɨchi ɨ̀n tal, àŋena ndu chem a ntèʼsɨ nâ ghè. Ntèʼsɨ ateynsɨ nà n-ghɨ Gibìyòn nɨ̀ Kefilà nɨ̀ Belòt nɨ̀ Kiliyat-Jalìm. ¹⁸Àŋena nɨn ndù tî ɨ faŋ tɨ̀ nu ntèʼ sɨ ateyn bòm ta ghelɨ ghɨ tisɨnɨ a Isìlæ̀ nà n-ghɨ ma ghɨ n-chfɨnɨ meyn sɨ̂ àŋena sɨ izɨyn nɨ̀ Bôbo, ɨ Fɨyini Fɨ Isìlæ̀ na ghɨ n-zuetɨ wì ghelɨ Gibìyòn.

Ghelɨ Isìlæ̀ nô ghɨ̀ jɨ̀m ɨ nà sɨ ghâm ghelɨ ghɨ tisɨnɨ nɨ̀ àŋena. ¹⁹Mɨtì ghelɨ ghɨ tisɨnɨ ɨ bè sɨ̂ àŋena na, “Ghèsɨ ti meyn chfɨ̀nɨ̀ sɨ̂ àŋena sɨ izɨyn nɨ̀ Bôbo ɨ Fɨyini fi Isìlæ̀, à na sɨ ghɨ lvɨ̂yn ma ghès kàʼ ghɨ bû nì ìwo sɨ àŋena. ²⁰Ghesɨ̀nà nɨn kelɨ kɨ sɨ visi na àŋena na chi-à, a bu tì a Bôbo fu ngeʼ sɨ̂ ghesɨ̀nà bòm ìchfɨ̂nɨ̀ i ghesɨ̀nà. ²¹Ghesɨ̀nà visi àŋena na chi-à, sɨ ɨ̀nkâʼ fî tu mu sɨ̂ ghelɨ Isìlæ̀ ghɨ̀ jɨ̀m.” À ti iwo zɨ̀-ì a ghelɨ ghɨ tisɨnɨ nɨn lèm.

²²Joshwà ɨ jàŋtɨ̀ ghelɨ Gibìyòn ɨ bɨf sɨ̂ àŋena na, “Bòm ghà ta yì tî lɨ̀sɨ ghes ɨ̀ bè na yi n-chi baʼsɨ̂ wì sɨ̂ ghès a? ²³Ndòyn nɨn ghɨ a yi atu bòm ànkaŋ nâ kèynà. Yì læ̀ nà lum ghɨ kɨ ɨ̀kôs sɨ̂ ghès, sɨ ɨ̀nkâʼ fî tu mu a ndô Fɨyini nɨ̀ ghelɨ Isìlæ̀.”

²⁴Ghelɨ ateyn ɨ bè sɨ̂ Joshwà na, “Ghès tî wàm tî a bô bòm ta ghès tî meyn yvɨ kɨ̀ nô samoʼ na Bôbo Fɨyini fifɨ nɨ̂n læ meyn bè sɨ̂ Mosìs ɨ wul ɨ̀ felɨnɨ nɨ̀ ŋweyn na, yi ni-à a yì tɨm yɨ tɨlaʼ nô tɨ̀ jɨ̀m ɨ̀ fì zuètɨ ghelɨ ghì a ghɨ n-chi ateyn. Ghèsɨ yvɨ tì ɨ̀ nà sɨ fâyn na yi n-zuetɨ ghès. ²⁵Yì ni nô mɨ ghà sɨ̂ ghès lvɨ̂yn ta yi n-kôŋ. Ghès sɨ ghɨ kɨ a yi awu.”

²⁶Joshwà ɨ kæ gàmtɨ ghelɨ Gibìyòn ɨ faŋ tɨ̀ visi na ghelɨ Isìlæ̀ zuetɨ àŋena. ²⁷Mɨtì sɨ zɨtɨ achi nâ ghè, Joshwà ɨ lem na ghelɨ Gibìyòn na lum tu kɨ mu, sɨ ìnkâʼ sɨ̂ ghelɨ Isìlæ̀ nô ghɨ̀ jɨ̀m. Àŋena nà n-ghɨ sɨ nà sɨ kɨmɨ ɨ̀nkâʼ, tu mu a ndô Fɨyini. Àŋena nɨn nî kɨ àwo nâ kèynà sɨ chem layn.