Joshua 16

Ɨlwêʼ vzɨ̀ a Joshwà nɨn læ fu sɨ̂ Eflèm ŋêyn Mànasè

¹Ɨlwêʼ vzɨ̀ a ghɨ n-fu sɨ̂ ghelɨ isas i ndo nɨ̀ Josèf nà n-zɨ̂tɨ̀ a Jèlikò asɨ alɨmàlɨ̀mà afî a kɨ nà n-ghɨ injɨyn i jvâ Jodàn, lû afu koʼ ndû dzɨ a nse ìyum ilaʼ afî a yi nà n-ghɨ atû kfɨ̀yn ghɨ toŋtɨ̂ na Betèl. ²Ighami ateyn i nà n-lû a Betèl ma à ti Lûz, dyâŋ chem ighami nɨ̀ ghelɨ Akì, a Atalòt, ³yi kàli ndu dzɨ abàs nɨ̀ ghelɨ Jaflèt ɨ ndu chem nô abàs itsɨyn a Bet-Holòn ɨ chwò ɨ ndu chem a Gezà, ɨ ndu gòʼsɨ̀ a jvâ ìghaʼnɨ a Medìtèlenìyà.

⁴Yi ti n-dyêyn na ghɨ n-læ fu ɨ̀lwêʼ nâ wèyn sɨ̂ Mànasè nɨ̀ Eflèm, ɨ woyn Josèf.

⁵Ɨwêyn nɨn ghɨ ɨ̀lwêʼ vzɨ̀ a ghɨ n-læ fu sɨ̂ ìsas i ndo nɨ̀ Eflèm ì kɨ̀ ɨchfɨ ndo ɨchfɨ ndo;

Ighami i àŋena nà n-zɨ̂tɨ̀ a Atalot Adà abàs ghè a ɨchfɨ iyvɨ i nɨn sal ateyn, ndû chem a Uba Bet-Holòn, ⁶chwô ndû chem a jvâ ìghaʼnɨ Mèdìtèlenìyà. Lû a Mikmetàt dzɨ abàs ikuè, ngol ndù dzɨ a Tanat Shilò, dyâŋ ndû chem a Janòwà, abàs ghè a ɨchfɨ iyvɨ i nɨn sal ateyn. ⁷Yi nà n-lû a Janòwà, yi ndu chem a Atalòt, ɨ ndu chem a Nalà ɨ fi ndu chem a Jèlikò, ɨ̀ lù afu yi fvɨ̀ dzɨ a jvâ Jodàn. ⁸Ighami ateyn i nà n-lû a Tabùwà, yi ndù dzɨ abàs ghè a ɨchfɨ iyvɨ i nɨn sœ ateyn, dzɨ a Kana Lavìn ɨ ndu gòʼsɨ̀ a jvâ ìghaʼnɨ a Mèdìtèlenìyà. À ti ɨlwêʼ vzɨ̀ a ghɨ n-læ fu sɨ̂ ìsas i ndo nɨ̀ Eflèmì kɨ̀ ɨchfɨ ndo ɨchfɨ ndo. ⁹Ɨlwêʼ nâ weyn nà n-kelɨ kɨmɨ ntèʼsɨ ghaʼlɨnɨsɨ nô sɨ̀ jɨ̀m nɨ sɨtelâ sìsɨ̀ a ghɨ n-læ fu sɨ̂ ìsas i ndo nɨ̀ Eflèmì antêynɨ̀ ɨ̀lwèʼ nɨ̀ ghelɨ isas i ndo nɨ̀ Mànasè.

¹⁰Ghelɨ isas i ndo nɨ̀ Eflèm nɨn bu læ saŋ fvɨ̀sɨ ghelɨ Kenàn ghì a ghɨ nà n-chi a Gezà, àŋena na bu chî kɨ ŋêyn ghelɨ isas i ndo nɨ̀ Eflèm mɨtì kelɨ kɨ sɨ nà felɨ̀ akôs sɨ̂ àŋena.