Joshua 11

Joshwà ɨ tɨm yɨ tɨfôyn tɨ abàs ikuè

¹À nà n-ghɨ ta Jabìn ɨ fòyn Hazò yvɨ tɨwoŋ tìtɨ̀ a ghelɨ Isìlæ̀ tɨm yɨ, wu tum ntum sɨ̂ Jobàb ɨ fòyn Madòn ɨ fi tum sɨ̂ fòyn Shimlòn nɨ̀ fòyn Akshàf. ²Wù n-tum meyn kɨmɨ ntum sɨ̂ tɨ̀fôyn tìtɨ̀ a tɨ nà n-ghɨ a kfɨynsɨ abàs ikuè nɨ ɨ tîtɨ̀ a tɨ nà n-ghɨ afoŋlɨ a Jodàn abàs ɨluè ɨ Galìlî, ɨ tum kɨmɨ sɨ̂ tɨ̀fôyn tìtɨ̀ a tɨ n-ghɨ a tɨ̂bàl nɨ̀ ntèʼ Nafot Dô. ³Wù n-tum meyn kɨmɨ ntumsɨ a Kenàn kɨ̀ ɨbyâs ɨ Jodàn ɨ̀ jɨ̀m. Wu n-tum sɨ̂ ghelɨ Amò nɨ̀ ghelɨ Hêt nɨ̀ ghelɨ Belìz nɨ̀ ghelɨ Jebùs atû kfɨ̀yn ɨ fi tum kɨmɨ sɨ̂ ghelɨ Hîv abàs a Mizbà dzɨ a isas i kfɨ̂yn Hemòn. ⁴Tɨfôyn tɨ ateyn tɨ ɨ fvɨ gvì ŋêyn ìnôyn i sugèyʼsɨ nɨ̀ àŋena nô ì jɨ̀m baʼsɨ̂ nɨ̀ mɨ̀nchaʼ mɨ̀ àŋena nɨ̀ nyamsɨ kfaŋsɨ kɨ̀ sɨ idvɨ̀. Sugèyʼsɨ ateynsɨ nà n-dvɨ̂ kɨ tèyn ta asese a mbæ̀ jvà. ⁵Tɨfôyn nâ tèyntɨ̀ nô tɨ̀ jɨ̀m nɨn fvɨ gvi ŋêyn ghelɨ iwòŋ nɨ̀ àŋena ɨ chɨ̀yntɨ ɨ tas iwoŋ a mbæ̀ jvà Melòm sɨ nu ghelɨ Isìlæ̀.

⁶Bôbo Fɨyini ɨ bè sɨ̂ Joshwà na, “Ka wa n-fàyn àŋena. À læ̀ nà ghɨ kɨmɨ aleŋ ɨlvɨ ghâyn a libɨs a mà ni a yì tɨm ɨ̀ yɨ àŋena ɨ̀ kòytɨ̀ àfyeyn a nyamsɨ kfaŋ nɨ̀ àŋena ɨ̀ fì nyòʼ mɨ̀nchaʼ mɨ̀ àŋena.”

⁷Joshwà ŋêyn sugèyʼsɨ ŋweynsɨ nô sɨ̀ jɨ̀m ɨ kæ gvɨ̀tɨ sɨ fvɨ̀ sɨ nu àŋena a mbæ̀ jvà Melòm. ⁸Bôbo ɨ gàmtɨ̀ ghelɨ Isìlæ̀ ɨ tɨm yɨ àŋena ɨ nyɨŋ a àŋena ibàm ɨ ndu chem a ntèʼ Sidòn ighaʼnɨ nɨ̀ Mislefot-Mêm ɨ fi ndu chem afoŋlɨ a Mizbà. Ghelɨ Isìlæ nɨn bu læ visi nô wul afu tɨ̀ zue. ⁹Joshwà nɨn ni kɨ iwo zɨ̀-ì sɨ̂ àŋena a Bôbo nɨ̂n bè, ɨ kòytɨ̀ àfyeyn a nyamsɨ kfaŋ nɨ̀ àŋena ɨ fi nyòʼ mɨ̀nchaʼ mɨ̀ àŋena.

¹⁰Joshwà ɨ kasi ndù ɨ tɨm yɨ ntèʼ Hazò ɨ zue fòyn àteyn. Wu n-ni tî bòm ta fòyn Hazò nà n-ghɨ àtu sɨ̂ tɨ̀laʼ tìtɨ̀ a tɨ nà n-nu ghelɨ Isìlæ̀ ɨtuʼ nâ ghè. ¹¹Ghelɨ Isìlæ̀ ɨ zuetɨ nô ghelɨ ghɨ̀ jɨ̀m ta ghɨ nà n-chi a ntèʼ Hazò nɨ̀ mɨ̀nyuè ɨ faŋ tɨ̀ vìsi nô wul ɨ̀mòʼ ɨ fi nyòʼ ntèʼ àteyn.

¹²Joshwà nɨn tɨm yɨ ntèʼ nâ sèynsɨ̀ ɨ zuetɨ tɨ̀fôyntɨ ateyn nɨ̀ ghelɨ ateyn nô ghɨ̀ jɨ̀m kɨ̀ ighel ta Mosìs ɨ wul ɨ̀ fèlɨnɨ nɨ̀ Bôbo Fɨyini nɨn læ bè sɨ̂ ŋweyn. ¹³Ghelɨ Isìlæ̀ nɨn nyòʼ mɨ ntèʼ sɨ ateyn tì ɨ faŋ tɨ̀ nyòʼ ɨsîsɨ̀ a sɨ nà n-ghɨ atû mɨ̀ kfɨ̀yntɨ̂ a bu kɨ ntèʼ Hazò ta Joshwà nɨn nyòʼ. ¹⁴Ghelɨ Isìlæ̀ nɨn nì tî ɨ kumtɨ nô ɨ̀fwo ɨ jûŋ ɨ̀ jɨ̀m ta wu nà n-ghɨ a ntèʼsɨ nâ ghè baʼsɨ̂ nɨ̀ nyamsɨ mɨtì ɨ zuetɨ nô ghelɨ ghɨ̀ jɨ̀m nɨ̀ mɨ̀nyuè ɨ faŋ tɨ̀ vìsi nô wul ɨ̀mòʼ. ¹⁵À nà n-ghɨ tì ma Bôbo nɨn læ meyn bè sɨ̂ Mosìs na wù zuetɨ ghelɨ Kenàn nô ghɨ̀ jɨ̀m, Mosìs ɨ læ kæ be sɨ̂ Joshwà na wù zuetɨ, wu zuetɨ kɨ ighel ta Bôbo nɨ̂n bè sɨ̂ Mosìs. Wù n-bu faŋ nô ìwo ìmòʼ tɨ̀ nì ta Bôbo nɨn bè na Mosìs ni.

¹⁶Joshwà nɨn tɨm meyn yɨ abâs ilaʼ nâ kì nô à jɨ̀m. Wu n-tɨm yɨ ghelɨ ghì a ghɨ nà n-chi ilaʼ i kfɨynsɨ nɨ ɨghî a ghɨ nà n-chi a nse iyum nô ghɨ̀ jɨ̀m nɨ̀ ɨghî a ghɨ nà n-chi abàs a Goshèn nɨ̀ ɨ̀lwêʼ vzɨ̀ a wu nà n-ghɨ ibal isas i kfɨynsɨ nɨ ɨ ghɨ Alabà nɨ ɨghî a ghɨ nà n-ghɨ a kfɨynsɨ nɨ̀ mɨ̀fòŋlɨ a Isìlæ̀. ¹⁷Àŋena nɨn tɨm meyn yɨ nô ɨlweʼ ɨ̀ jɨ̀m sɨ zɨtɨ̀ kɨ a kfɨ̂yn Halàk dzɨ abàs a Edòm sɨ ndù sɨ chem a Bal-Gâd ibal i Lebanòn isas i kfɨ̂yn Hemòn ɨ ghaytɨ tɨ̀fôyn tɨ ɨlwèʼ nâ tìtɨ̀ nô tɨ̀ jɨ̀m ɨ zuetɨ. ¹⁸Joshwà nɨn nu tɨfôyn nâ tèyntɨ̀ nô sɨ a ndyèyn idyà. ¹⁹Nô ntèʼ ìmòʼ nɨn bu læ yɨ mɨkâyn sɨ nà chi nɨ̀ mbôynɨ̀ ŋêyn ghelɨ Isìlæ̀, a bu kɨ ghelɨ Hîv ghì a ghɨ nà n-chi a Gibìyòn. Ghelɨ Isìlæ̀ nɨn tɨm yɨ ntèʼsɨ kɨ sɨ̀ jɨ̀m a faŋ kɨ Hîv. ²⁰Yi n-gàyn tî bòm ta Bôbo nà n-ghɨ ma wù tosɨ meyn mɨ̀tem mɨ̀ àŋena, àŋena na kwo kɨŋ kɨ sɨ nà nu Isìlæ̀ ta ka Isìlæ̀ faŋ tɨ̀ kèli ikoynsɨ isuyn ɨ bebsɨ àŋena nô ghɨ̀ jɨ̀m kɨ̀ ighel ta Bôbo nɨ̂n bè sɨ̂ Mosìs.

²¹À nà n-ghɨ kɨmɨ ɨtuʼ nâ ghè, Joshwà ɨ zuetɨ ghelɨ Anàk nô ghɨ̀ jɨ̀m. Ghelɨ Anàk nâ ghèyn nà n-chi a kfɨynsɨ a Heblòn nɨ̀ Debì nɨ̀ Anàb nɨ ɨghî a ghɨ n-chi a kfɨynsɨ Judà nɨ̀ Isìlæ̀. Joshwà nɨn zuetɨ àŋena nô ghɨ̀ jɨ̀m ɨ fi bebsɨ ntèʼsɨ àŋena. ²²Ghɨ n-zuètɨ ghelɨ Anàk nô ghɨ̀ jɨ̀m a Isìlæ̀ a faŋ kɨ ɨghî a ghɨ nà n-ghɨ a Gazà nɨ̀ Gât nɨ̀ Ashdòd. ²³À ti dzɨ zɨ̀ a Joshwà nɨn læ tɨm yɨ ɨlwêʼ nâ wèyn ateyn nô ɨ̀ jɨ̀m kɨ̀ ighel ta Bôbo nɨn læ bè sɨ̂ Mosìs ɨ gwòtɨ̀ sɨ̂ àsas a ndosɨ a Isìlæ̀.

Mbôynɨ̀ ɨ nà ghɨ ilaʼ nâ ghè.