Jonah 3
Ŋwàʼlɨ̀ Jona
Jonà ɨ ndù a Ninevè
1Bôbo Fɨyini nɨ̀n fi meyn taŋi sɨ̂ Jonà ɨ bè na, 2“Lu kɨ lvɨ̂yn, ɨ ndù a ntèʼ ighaʼnɨ ghè a ghɨ n-toŋtɨ na Ninevè tì. Ndu làʼì ntum zɨ̀ a mà fù sɨ̂ và sɨ̂ àŋena.”
3Jonà ɨ yvɨnɨ Bôbo ɨ lù ɨ ndù a Ninevè. Ninevè nà n-ghɨ nô ntèʼ ìghaʼnɨ, ghɨ lî mɨchi ɨ̀n tal sɨ jèl sɨ toynɨ àteyn. 4Jonà ɨ ndù ɨ chem afu a nà ghɨ achi a kɨ asɨ-a wu zɨ̀tɨ̀ ɨ nà jelɨ̀ jâŋ bê na, “À na ghɨ ibàm i mɨ̂chi mɨ̀vɨm ɨ̀n kæ̀ a Fɨyini fɨ bebsɨ ntèʼ yêyn.” 5Ghelɨ Ninevè ɨ yvɨ ntum nâ zɨ̀ ɨ bɨmi Fɨyini. Ta àŋena bɨ̀mi tî ɨ kæ choʼnɨ na nô mɨ ndà, kèsa à n-ghɨ wul ɨ two, kèsa à n-ghɨ wul ɨ bol nɨn kelɨ sɨ bam ɨchfɨ̂ sɨ fì sɨ màʼ fɨ̀ntsɨ bòm mbɨsɨ àŋena.
6A nà ghɨ ta fòyn Ninivè yvɨ̀ ntum àteyn, wu làlì sɨ a achɨ a tɨ̂fòyn ɨ choʼtɨ ndzɨsɨ ŋweyn ɨ màʼ kɨ fɨ̀ntsɨ ɨ suʼi dùʼì abɨ̀l. 7Wù n-læ nì tî ɨ tum na ghɨ ndu làʼì sɨ̂ ghelɨ Ninevè na,
“Fòyn ŋêyn chyeʼsɨ ŋweynsɨ bè na,
Ka afo nɨ̂n zɨ ɨchfɨ̀ nɨ̀ wùl kèsa ɨchfɨ̀ nɨ̀ nyàm, na ka wùl kèsa nyàm nɨ̂n nyvɨ mɨ nyvɨ afo.
8Na nô ghelɨ ghɨ̀ jɨ̀m nɨ̀n kelɨ sɨ màʼ kɨ fɨ̀ntsɨ sɨ kul fɨlifɨ ɨwuyn nɨ̀ nyamsɨ, na nô mɨ̀ ndà dzɨ sɨ̂ Fɨyini fɨ ɨ̀ màʼì àwo a bɨ-a nɨ̀ ŋweyn nɨ̀ àtem a bɨ-a. 9Ghesɨ̀nà kæ nì têyn, lvɨ fɨli a Fɨyini fɨ yeyn ɨ̀ kòynsɨ ìsuyn ɨ̀ faŋ tɨ̀ fì tɨ̀ yàbsɨ ɨtoŋ sɨ zuetɨ ghesɨ̀nà.”
10A nà sɨ ghɨ ta Fɨyini fɨ yèyn iwo zɨ̀-ì a àŋena nì ɨ̀ fì yèyn na àŋena beynsɨ meyn mɨ̀tem sɨ a mbɨsɨ nɨ̀ àŋena, wu kfɨnɨ ìkfâʼtɨ̀ i ŋweyn ɨ faŋ tɨ̀ fì tɨ̀ bèbsɨ àŋena ta wu n-bè.