Isaiah 9

Ghɨ bzɨ̂ meyn wayn sɨ̂ ghesɨ̀nà

¹Mɨtì ghelɨ ghì a ghɨ tî nà chi a mɨ̂lùmchuŋ læ̀ nà bu fâyn wì nô sakos. À nà n-ghɨ a mɨ̀chi ɨ̀nchwonɨ̂, Bôbo Fɨyini ɨ wumsɨ/ɨ nì ghelɨ Zebulòn nɨ̀ ghelɨ Naftalì ɨ nà wumi-a/ngvɨmlɨ-à. Mɨtì, ɨlvɨ nɨn koʼ kfeyna a wù ni a ghelɨ ɨtum ghì a ghɨ n-ghɨ/chi a Galìlî na koʼnɨ-à, ɨ ghelɨ ghì a ghɨ n-chɨ/chi a dzɨ ta yì n-ndû a jvâ i ghaʼnɨ a mbæ̀ jvà Jodàn.

²Ghelɨ ghì a ghɨ n-jelɨ̀/n-chî/ghɨ abe a fɨmnɨ-a læ̀ yeyn/yeyn meyn ì bayn i ghaʼnɨ-i sɨ̂ ghelɨ ghì a ghɨ n-chi ilaʼ alɨŋsɨ ikfɨ jelɨ̀ ateyn. Àŋena nì kelî ìbayn.

³Bôbo Fɨyini, wà ghaʼsɨ meyn kfèynsɨ ìlaʼ i àŋena, wà ni meyn àŋena na saŋlɨ̂ nô sɨ a ŋaŋ. Àŋena nɨn saŋlɨ̂ a wa asɨ ta ghelɨ nî ghɨ nà saŋlɨ-à ɨlvɨ ta ghɨ n-kfî ɨfwo ɨ yɨnɨ a gvêynsɨ̀. Àŋena nɨn saŋlɨ̂ ta ghelɨ ɨlvɨ ta ghɨ gwòtɨ ɨfwo ta ghɨ yɨ̀ ìwòŋ ɨ̀ lì.

⁴Wà bebsɨ meyn àdyaʼ a mbàynɨ̀ sìsɨ̀ a sɨ tî nà ghɨ ta adɨli sɨ̂ àŋena. Wà suʼsɨ meyn àdɨli ateyn sɨ a àŋena awom/atu. Wa n-bebsɨ̂ mbàŋ zɨ̀ a ghɨ tî nà fu ngeʼ sɨ̂ àŋena ateyn kɨ̀ ighel ta wà n-læ nì ɨtuʼ ta wà n-læ bebsɨ/zuetɨ sugèyʼ sɨ midìyà.

⁵Ghɨ læ̀ nyôʼ gvɨsɨ iwòŋ nɨ̀ sugèyʼ sɨ tosɨ, nyòʼ kɨ̀mɨ ndzɨsɨ iwòŋ nɨ̀ àŋena sìsɨ̀ a mɨ̀lûŋ yoʼ ɨtwaʼ iwòŋ. Ɨfwo ateyn læ̀ nà ghɨ ta nkɨsɨ ɨvɨ̀s.

⁶Yi n-ghɨ tèyn bòm ta ghɨ bzɨ̂ meyn wayn sɨ̂ ghesɨ̀nà. Ghɨ fû meyn wayn ɨ lûmnɨ̀ sɨ̂ ghesɨ̀nà, wu ghɨ sɨ nà saʼ ghesɨ̀nà. Ghɨ nà n-toŋtɨ̂ ŋweyn na, “Wùl ɨ̀ tebtɨnɨ ɨ kaynɨ/ɨ bemnɨ. Fɨyini fìfɨ̀ a fɨ n-kelɨ adyaʼ, bæ̀ vzɨ̂ a wù fàŋ meyn kɨ̀ sɨ a mɨlvɨ ɨ̀n jɨ̀m, jâŋ kɨmɨ aŋeyn na wâyn ntoʼ vzɨ̀ a wù n-gvî nɨ̀ mbôynɨ̀/wayn ntoʼ mbôynɨ̀.

⁷Ɨfôyn ŋweyn læ̀ nà lemâ ndû kɨ nɨ̀ àsɨ-a, mbôynɨ̀ ŋweyn ɨ ghɨ wi sɨ læ̀ sɨ mæ̀ nô ta ka ghɨ̀ læ̂ ghɨ̀. Wu læ̀ nà saʼ/duʼ achɨ a tɨ̂fòyn nɨ̀ Devìt, saʼ ìlaʼ i fòyn Devìt. Wù læ̀ nà saʼ ìlaʼ ateyn kɨ àtì-ati, saʼ fyeʼtɨ̂ wì iwo. Wù læ̀ nà lum saʼ kɨ saʼ nô ta ka ghɨ̀ læ̂ ghɨ̀. Bôbo Fɨyini ɨ bò Ɨdwaʼ ɨ̀ jɨ̀m læ̀ ni-à a awo nâ kèynà gayn bòm ta wù n-kôŋ ghelɨ ŋweyn.

Bôbo Fɨyini nɨ̀n nyôʼsɨ̀ ɨ̀toŋ sɨ̂ ghelɨ Isìlæ̀.

⁸Bôbo Fɨyini tum meyn saʼgha ibɨ sɨ̂ ghelɨ Jàkôb, iwo ateyni ɨ ghɨ sɨ fe atu nɨ̀ ghelɨ Isìlæ̀.

⁹Ghelɨ Isìlæ̀ ghì a ghɨ n-chî a Eflèm nɨn ɨghî a ghɨ n-chî a Sàmalìyà ɨ nt̀ʼ i ghaʼnɨ nì kelî na à nì Bôbo Fɨyini iwo nâ yèynì. Àŋena læ̀ nà ghaŋsɨ̂ ɨ̀wuyn bê na,

¹⁰“Ghèsɨ̀ nɨn kasî bâʼlɨ̀ ɨ̀lwêʼ ɨ̀ wesɨ vzɨ̀ a ɨchwaʼ bɨ̀ytɨ̀ ateyn nɨ̀ ngòʼsɨ̀ ma ghɨ faytɨ meyn chuyn. Ghès nɨn kasî yelɨ ɨ̀nkâʼ mɨ̀ sedà alèʼ ghè a ɨ̀nkàʼ mɨ̀ fîksɨ̀ fèlɨ ateyn.

¹¹Mɨtì, Bôbo Fɨyini nɨn ghɨ sɨ nì na mbàynɨ̀sɨ Lezìnsɨ̀ kei adyaʼ gvì nù Isìlæ̀. Wù ni meyn mbàynɨ̀sɨ Isìlæ̀sɨ keli àdyaʼ.

¹²Ghelɨ Alàm abàs ghè a ɨchfɨ̂ iyvɨ i nɨn sal ateyn nɨ̀ ghelɨ Fìlisìyà abàs ghè a ɨchfɨ̂ iyvi i nɨn sœ ateyn gvî meyn tɨm yɨ ghelɨ Isìlæ̀. Wù nì mɨtì ɨtoŋ Bôbo Fɨyini na bu yafɨ kɨ yaf sɨ̂ àŋena. Wù bu kɨŋ kɨ dzɨ sɨ fu ngeʼ sɨ̂ àŋena.

¹³Mɨtì ghelɨ Isìlæ̀ bû dzɨ̀ ìkumi iwùyn kûm àwo a bɨ-a nɨ̀ àŋena nò mɨ ta Bôbo Fɨyini fu ngeʼ sɨ̂ àŋena nô sɨ a ŋaŋ. Àŋena bû dzɨ̀ mɨ sɨ̂ Bôbo Fɨyini ɨ Bò Ɨ̀dwaʼ ɨ̀ jɨ̀m na wù gamtɨ àŋena

¹⁴À ti iwo zɨ̀ a Bôbo Fɨyini ɨ nì sâŋ/bebsɨ fvɨsɨ̀ ghelɨ ghɨ tisɨnɨ a Isìlæ̀ baʼsɨ̂ nɨ̀ ghelɨ ghì a àŋena nɨn tisɨ kɨ̀ achi àmòʼ. Wu n-læ̀ sâŋ fvɨsɨ̀ ghelɨ ghì a ghɨ n-ghɨ a tɨ̂kœ tɨ asom baʼsɨ̂ nɨn ɨghî a ghɨ n-ghɨ ta ɨyol a mbæ̀ jvà.

¹⁵Ghelɨ ghɨ tisɨnɨ a Isìlæ̀ nɨ̀ ghelɨ ghɨ to ghɨ li nɨn ghɨ ɨ̀tu nfèʼtɨ sɨ ghaʼnɨ sìsɨ̀ a sɨ n-wam kɨ ànkaŋ tì ɨ ghɨ ànkùyn.

¹⁶Ghelɨ ghì a ghɨ n-tisɨ ghelɨ Isìlæ̀ jɨŋsɨ meyn àŋena, ghɨ n-yeʼî wì awo kì sɨ̂ àŋena a kɨ n-ghɨ samoʼ.

¹⁷À ti iwo zɨ̀ a Bôbo Fɨyini nɨn saŋlɨ wi kûm woynda tɨ̂kùŋ nɨ̀ àŋena, koynsɨ̂ wì isuyn sɨ̂ ghɨ̀ki nkfɨ nɨ̀ woyn nkfɨ. Ghelɨ nâ ghèyn nô ghɨ̀ jɨ̀m chasɨ meyn Bôbo Fɨyini , nà nî kɨ àwo a bɨ-a. Àŋena nɨn taŋî kɨ ta ɨ̀ngù. Àŋena nɨn bê àwo kɨ kelɨ wi itof i Bôbo Fɨyini nyôʼsɨ̀ ɨ̀toŋ sɨ̂ àŋena bòm àwo nâ kèynà, bu gvɨ̂tɨ̀ kɨ sɨ fu ngeʼ sɨ̂ àŋena.

¹⁸Yi n-ghɨ samoʼ na awo a bɨ-a kì a ghelɨ nɨn nî ɨ bebsɨ̂ ɨ̀fwo kɨ̀ ta ɨvɨs. Ɨvɨsɨ nyôʼ bebsɨ̂ ɨ̀twaʼ sùnjoŋnjoŋsɨ, nyôʼ àmbyèyn akù, nyôʼ ɨ̀twaʼ ɨtwo nɨ̀ ɨ̀nkâʼ akù. Wu na bali-à fɨkâʼ fɨ̀ ɨ fvɨ̂ koʼ ateyn.

¹⁹Bôbo Fɨyini ɨ Bò Ɨ̀dwaʼ ɨ̀ jɨ̀m nɨn nyôʼsɨ̀ ɨ̀toŋ nô sɨ a ŋaŋ. Wu nì bebsɨ̂ ghelɨ Isìlæ̀ nɨ̀ ɨ̀vɨsɨ, ghelɨ ateyn ni nà ghɨ ta nkɨsɨ ɨvɨ̀s. Wùl ɨ̀ læ̀ nà visî wì nô mɨ wâynà ŋweyn.

²⁰Àŋena læ̀ nà jelɨ̀ sâʼ/ghal fsɨ ɨ̀fwo ɨ yɨnɨ sɨ̂ ghelɨ kɨ̀ ilaʼ ì jɨ̀m, yɨ-a mɨtì (jeŋsɨ bu yafɨ kɨ yafɨ àŋena) kulɨ wì. Àŋena læ̀ nà kasî kfê kfɨlɨ woyn àŋena.

²¹Ghelɨ ndo nɨ̀ Efɨ̀lèm læ̀ nà kutɨ̂ kfɨl ghelɨ ndo nɨ̀ Mànasè, ghelɨ Mànasè ɨ kutɨ̂ kfɨl ghelɨ Eflèm. Àŋena chɨ̂yntɨ̀ kutɨ̂ kfɨl ghelɨ Judà. Àŋena læ̀ nî mɨ tì ɨtoŋ Bôbo Fɨyini ɨ bu yafɨ kɨ yafɨ sɨ̂ àŋena, wu gvɨ̂tɨ̀ kɨ gvɨtɨ sɨ fu.