Isaiah 61
This book is a draft. It has been translated but has not yet finished checking, and is published here so the community can read and respond to it.
Bèŋ zɨ̀ a ka Bôbo Fɨyini bœsɨ ghelɨ ŋweyn ateyn
1Ayvɨs a Bôbo Fɨyini a nɨn ghɨ a ma atu bòm ta wù choʼ meyn mà na mà na fêʼtɨ̀ ntum ì jùŋ sɨ̂ ghelɨ ghɨ bolɨ. Wù tum meyn mà na mà laʼi sɨ̂ ghelɨ ghì a ghɨ n-læ ghaytɨ ghɨ nà chî a kfɨyn ta ka ghɨ visi àŋena. Wù n-fi meyn tum ma na mà laʼi kɨ̀mɨ sɨ̂ ɨ̀nfeynfɨ na achi-a kfeyn meyn na àŋena na yeyn ɨ̀lwêʼ ɨ fi tum ma na mà fvɨsɨ ghelɨ ghì a ghɨ n-nyâblɨ̀ nɨ̀ àŋena sɨ a ngeʼ.
2Wù tùm ma na mà feʼtɨ sɨ̂ ghelɨ na bèŋ yèyn nɨn ghɨ bèŋ zɨ̀ a ka Bôbo Fɨyini bœsɨ ghelɨ ŋweyn ateyn fì sɨ̀sɨ̀ mɨ̀kfɨ̂. Wù n-fi meyn tum ma na mà kfɨmtɨ ghelɨ ghì nô ghɨ̀ jɨ̀m a ghɨ n-dzɨ̂ dzɨ.
3Bôbo Fɨyini bè na mà chɨmsɨ ghelɨ ghì a ghɨ n-dzɨ̂ a Zayòn ɨ̀ yès àbvɨ sɨ a àŋena ɨwùyn ɨ̀ sù àfol idyal nɨ̀ ìsaŋlɨ-i a àŋena atu ɨ̀ nì àŋena na saŋlɨ̂ ta ghelɨ a ghɨ yìsi ayisi a lɨmtɨnɨ-a a juŋà nà bu fì dzɨ̂ wì. Àŋena læ̀ nà yem njàŋsɨ̀ koʼsɨ̂ mà bu fì dzɨ̂ wì a gyâ ìkfɨ. Àŋena læ̀ nà ghɨ ghelɨ nî àwo àtì-ati ma à lèm kɨ̀ nô mà Bôbo Fɨyini ta ka ghelɨ yeyn nà koʼsɨ̂ mà.
4Àŋena læ̀ kasî bâʼlɨ̀ ɨ̀lwêʼ vzɨ̀ a ghelɨ bu chi wi ateyn. Àŋena læ̀ kasî bâʼlɨ̀ ɨ̀lwêʼ vzɨ̀ a ghɨ n-læ bebsɨ nô sɨ ɨtuʼ mu. Àŋena læ̀ kasî faytɨ̂ ntèʼ sɨ ghaʼlɨnɨ sisɨ̀ a ghɨ n-bebsɨ ɨ̀ kàsi fàytɨ nô ɨ̀fwo ɨ̀ jɨ̀m.
5Ghelɨ ghì a ghɨ gvì gvi nà chî a yi ilaʼ læ̀ nà chî nyâm sisɨ, felɨ̀ gveynsɨ ɨfwo ɨ yɨnɨ nɨ̀ zɨ̀, felɨ̀ a gvêynsɨ mɨtam nɨ̀ zɨ̀.
6Ghɨ læ̀ nà toŋtɨ̂ zɨ̀ na ngàŋsɨ ndô Fɨyini nɨ̀ Bôbo Fɨyini. Ghelɨ læ̀ nà bê na yi n-ghɨ ghelɨ felɨ̀ sɨ̂ Fɨyini fɨ. Yi læ̀ nà yɨ ìghaʼ i tɨ̂laʼ tɨ ɨtum. Yi læ̀ nà ghaŋsɨ̂ ɨ̀wuyn bòm mɨ̀kwo mzɨ̀ a tɨlaʼ tɨ lûtɨ̀ nɨn kelɨ.
7Nô mɨ ta yi n-wumi lvɨ̂yn, ghelɨ̀ ghem læ̀ nà kelɨ ìboysɨ kɨ̀ ingal ingal. Ghɨ læ̀ bu fì wumsɨ̂ wì ghelɨ̀ ghem. Àŋena læ̀ nà kwo saŋlɨ̂ kɨ saŋlɨ bòm àlêʼ kì a Bôbo Fɨyini ɨ nì fu sɨ̂ zɨ̀. Fɨyini fɨ ɨ nì boysɨ̂ zɨ̀ ɨ̀ kfèynsɨ ìlaʼ ì zɨ-i a yi na saŋlɨ̂ kɨ saŋlɨ nô ta ka ghɨ̀ læ̂ ghɨ̀.
8Yi n-læ̀ nà ghɨ tèyn bòm ta nô mà Bôbo Fɨyini nɨn kôŋ ghelɨ ghì a ghɨ n-kôŋ ngeŋsɨ fî saʼ nsaʼsɨ àtì-ati. Ghelɨ læ̀ se sɨ samsɨ a ma, a mà maʼtɨ àŋena a ghesɨ̀ àŋena yɨ mɨkâyn mzɨ̀ a mɨ̀ fàŋ meyn kɨ̀ samoʼ.
9Ghelɨ tɨlaʼ tɨ ɨtum læ̀ nà yeyn kelî woyn woyn ghi nà ngvɨmlɨ̂ àŋena. Ghɨ læ̀ nà yeyn kelî woyn àŋena a tɨ̂tumà. Nô mɨ ndà vzɨ̂ a wù n-læ nà yeyn àŋena wu nà kya (bimi) na à n-ghɨ ghelɨ ma Fɨyini fɨ boysɨ meyn àŋena kɨ̀ a dzɨsɨ a dzɨsɨ.
10Mɨ n-nì nà saŋlɨ̂ sɨ̂ Bôbo Fɨyini nô sɨ a ŋaŋ. Atem à kema ɨ nì nà tɨm tɨ̀kfɨm sɨ̂ Fɨyini femfɨ bòm ta wù n-ghɨ ta wù màʼ meyn dzɨsɨ a ma ɨwùyn a ghɨ ìbœsɨ̂ zɨ̀ a wù bœ̀sɨ̀ ma fì ghal fsɨ̀ ma sɨ ɨwu nɨ̀ mbàynɨ̀ semsɨ. Wù maʼ meyn ndzɨsɨ dyâsɨ̀ a ma ɨwùyn a ghɨ nchînɨ̀ àtì-ati ma na ghɨ kɨ ta wî lum ɨlvɨ ta ghɨ làbsɨ achi a malâ nɨ̀ ŋweyn.
11Kɨ ighel ta nse nɨn nî yi nì ngœ̀ ɨ fvɨ̀ ɨchoʼ ateyn ɨ lema, gvêyn mbàs ɨ ni ngœsɨ lema, Bôbo Fɨyini ɨ Bò Ɨ̀dwaʼ ɨ̀ Jɨ̀m læ̀ boysɨ̂ ghelɨ ŋweyn a àŋena sesɨ nà chi àtì-ati a mbzɨ yèyn na koʼsɨ̂ ŋweyn.