Isaiah 6

Fɨyini fɨ ɨ jàŋ Isayà

¹À n-læ nà ghɨ a bêŋ ghè a Uzayà ɨ fòyn Judà kfɨ, ma Isayà yeyn meyn Bôbo Fɨyini wu duʼ achɨ a tɨ̂fòyn nɨ̀ ŋweyn alèʼ a ngaŋtɨnɨ-a ghɨ koʼsɨ̂ ŋweyn. Ighaŋ i dàla/ndzɨsɨ nɨ̀ ŋweyni nà n-ghɨ ma yi chɨytɨ meyn ndô Fɨyini/luyn meyn kɨ̀ ndô Fɨyini ì jɨ̀m. ²Ɨfwo ɨ zuesɨnɨ ɨlvɨ nà n-ghɨ ma wu jɨŋ meyn kal achɨ a tɨ̂fòyn nâ kì, nô mɨ à kà a ɨ kelɨ tɨ̀wô ntufa. Nô mɨ àfo a zuesɨnɨ-à à kà nà n-chɨytɨ̂ ìkêʼ ateyn nɨ̀ tɨ̀wô tɨ̀ bòtɨ, chɨytɨ̂ ɨ̀vɨ ateyn nɨ̀ tɨ̀wô tɨ litɨ tì bò, tâyn nɨ̀ tɨ̀wô tɨ litɨ titɨ̀ tɨ̀ bò. ³Ɨfwo nâ wèyn nà n-jâŋ bê sɨ̂ ngeŋsɨ àŋenasɨ (kɨ̀ mɨlvɨ ɨ̀n jɨ̀m) na, “Iŋwâʼ i Bôbo Fɨyini ɨ Bò ɨ̀dwaʼ ɨ̀ jɨ̀m nɨ̀n ŋwaʼà. Iŋwâʼ i ŋweyni nɨn ghɨ ma yi luyn meyn kɨ̀ mbzɨ ì jɨ̀m.

⁴Ɨfwo nâ vzɨ nɨn se sɨ jàsɨ sɨ bè awo ateyn tì, gyasɨ àŋenasɨ nèʼ tɨ̀wuwu baʼsɨ̂ nɨ̀ mɨ̀nbêʼsɨ̀ mɨ̀ ndô Fɨyini, fɨleʼ fɨ ɨ luynn kɨ ndô Fɨyini ì jɨ̀m.

⁵Mɨ n-yeyn tî ɨ byalɨ dzɨ̀ bê na, “Iyemi mæ̂ meyn, ngeʼ koli meyn mà. Mɨ n-ghɨ wul ɨ bɨ/à luyn kɨ awo a bɨ-a a ma ɨchfɨ̀) chì antêynɨ̀ nɨ̀ ghelɨ ghɨ bɨ (ma asɨ à kema yeyn meyn fòyn) mɨtì ma ma yeyn meyn fòyn nɨ̀ àsɨ à kema ɨ Bôbo Fɨyini ɨ Bò ɨ̀dwaʼ ɨ̀ jɨ̀m.

⁶Nchì Fɨyini î lì/afo a zuesɨnɨ-a a li-a tâyn gvì dzɨ a ma ngùŋ nɨ̀ àkê ɨvɨ̀s awum ma kɨ chuf/lì abaŋ ifu a ndô Fɨyini nɨ̀ ànfal ɨvɨ̀sɨ a. ⁷Kɨ n-gvì tî ɨ kùm ɨ̀chfɨ̂ wom nɨ̀ àkê ɨ̀vɨ̀s nâ kì ɨ bè na, “Yyeyna, akê ɨbɨ̀s keyna kûm meyn ɨ̀chfɨ̂ vâ, Fɨyini fɨ lêsɨ̀ fù mbɨ shyasɨ, kàsi yuyn atu à ki-a.

⁸Ma kæ yvɨ gyâ Bôbo Fɨyini ta wù bɨfɨ na, “Mɨ n-ti n-tum nô ndà a? A ti ndû ndà alèʼ nɨ̀ ghesɨ̀nà a? Ma bèynsɨ̀ ɨ bè na, ‘Mà wêyn/mɨ n-ghɨ afêyn a Bô, tum ma.

⁹Wu bè na mà ndu bè sɨ̂ ghelɨ nâ ghì na,

“Yi na yvɨ kɨ yvɨ awo, kelî wì na kɨ n-bê na gha a. Yì na yeyn kɨ yeyn awo kya/kelî wì na à n-gâyn ghà a.

¹⁰Ni ghelɨ nâ ghèyn tosɨ mɨtem mɨ̀ àŋena, ɨ nì ɨtuŋlɨ àŋena kfɨtɨ àŋena na yvɨ wi awo. Ni àŋena fef. Wa n-nî tèyn ta ka àŋena faŋ tɨ̀ yeyn tɨ keli awo kì a kɨ n-gâyn, ɨ̀ faŋ tɨ̀ yvɨ tɨ̀ kèli awo nɨ̀ ɨ̀tuŋlɨ àŋena, ɨ̀ faŋ tɨ̀ kfàʼtɨ awo kì a ka àŋena ni sɨ bœ bœ sɨ a mbɨsɨ nɨ̀ àŋena.

¹¹Ma kæ bɨf sɨ̂ ŋweyn na, “Awo nâ kèynà læ̀ gaynà ndù mæ̀ ɨtuʼ gha a Bôbo?” Wu bèynsɨ̀ ɨ bè na, ‘Kɨ læ̀ gaynà sɨ chem ta ka ghɨ bebsɨ mèsì ntèʼsɨ ateyn nô wùl na bu chî wì ateyn. Yi læ̀ gâyn tèyn sɨ chem ta ndosɨ na ghɨ kɨ sɨ yum a Judà, nô mɨ gveynsɨ àŋenasɨ ɨ ghɨ kɨ ta nse iyum.

¹²Kɨ læ̀ mæ̂ kɨ ɨlvɨ ta Bôbo Fɨyini nì ghelɨ leʼ lù sɨ a Isìlæ̀ nô ghɨ̀ jɨ̀m, ilaʼ ateyn nô ì jɨ̀m na sɨ ghɨ kɨ ta nse iyum.

¹³À kæ faŋ mɨ wul ɨ̀mòʼ antêynɨ̀ nɨ̀ ghelɨ ìvɨm, a ghɨ boŋ zuè ŋweyn. Mɨtì ghelɨ Isìlæ̀ ghì a ghɨ faŋ nà ghɨ ngœ̀ i laynɨ/kɨ ta atôŋ a fɨ̂kàʼ fɨ ôksɨ̀ kèsa nɨ̀ àtôŋ a fɨ̂kàʼ fɨ telebìn ɨlvɨ ta ghɨ gvèlɨ̀ fɨkâʼ kɨ faŋ.