Isaiah 41

Fɨyini fɨ ɨ nì/nɨn gâmtɨ̀ ghelɨ Isìlæ̀

¹Zɨ̀ ghelɨ tɨlaʼ tɨ ndyèynsɨ̀, yì chimi kɨ̀ têyn moŋ nà yvɨtɨ̂ kɨ sɨ̂ mà.

²À tî tùsɨ/tfɨ̀tɨ nda fòyn vzɨ̀ a wù n-saʼ abàs ghè ɨchfɨ̂ iyvɨ nɨn sal ateyn ɨ̀ nì wù na ndù nô mɨ wo wu tɨm yɨ kɨ yɨ a? À nì ndà na wù na tɨm yɨ tɨ̀fôyn, tɨm yɨ tɨ̀laʼ a? Wù n-zuetɨ̂ àŋena nɨ̀ mɨ̀nuè kêʼ kɨ ta àŋena nɨn ghɨ wi afo. Awoŋ a ŋweyna nɨn sâytɨ̀ ghelɨ kɨ̀ ta afyefa sàytɨ̀ ɨ̀ywaŋsɨ asaŋ.

³Wù n-nyɨŋ ibàm nɨ̀ ghelɨ nô àfo a ɨ fu wi ngeʼ sɨ̂ ŋweyn, a ghɨ tì wu nyɨŋ a dzɨ bula wù timi chwò/jèl ateyn.

⁴À n-nî ndà na awo nâ kèynà na gayna. À n-choʼnɨ̂ ndà awo kì a kɨ n-kelɨ sɨ nà gâyn nô mɨ ajàŋ à kà kɨ̀ sɨ a nzɨ̀tɨ a? A n-nî mà Bôbo Fɨyini. Mà Bôbo Fɨyini ti meyn nà ghɨ kɨ̀ sɨ a nzɨ̀tɨ, ghɨ sɨ nà ghɨ sɨ chem a ngòʼsɨ.”

⁵Tɨlaʼ tìtɨ̀ a tɨ n-ghɨ a ndyèynsɨ̀ yeyn meyn àwo nâ kèynà nà faynà. Ghelɨ tɨghaŋ tɨ mbzɨi nô tɨ̀ jɨ̀m ɨ chɨŋtɨ̂ faynà, yvɨ̂ŋtɨ̀ akaʼ àmòʼ sɨ fvɨ̀ sɨ gvì.

⁶Àŋena nɨn gâmtɨ̀ ngeŋsɨ àŋenasɨ, kè ɨ bê kɨ sɨ̂ kè na, “Wa kelɨ àtem a to-a/wa to-a.

⁷Wùl ɨ̀ vzɨ̀ a wù n-faytɨ ɨfwo nɨ̀ ɨ̀wu ɨ tôʼtɨ̀ ɨvzɨ̂ a wù n-tsɨ alâm. Ɨvzɨ̂ a wù n-bayn lesɨ ɨfwo nɨ̀ mbe ɨ tôʼtɨ̀ ɨvzɨ̂ a wù n-bayn yûŋtɨ̀ ɨfwo ateyn. Àŋena nɨn nî tì bê kɨ sɨ a àŋena ngeŋsɨ na, “Ghesɨ̀nà nɨn nî kɨ nò ìfêl i juŋì/ifêl i ghesɨ̀nà i nɨn jofa.” Àŋena bê tì ghɨ faytɨ bayn ànfèʼsɨ̀ ateyn a nɨ̀ mbaynsɨ kɨ nà to ma kɨ kàʼ kɨ bû fe.

⁸Mɨtì, zɨ̀ ghelɨ Isìlæ̀ nɨn ghɨ ghelɨ ghɨ felɨnɨ nɨ̀ mà. Yi n-ghɨ ghelɨ ndo nɨ̀ Jàkôb ma à chòʼ ma chòʼ zɨ. Yi n-ghɨ kɨ nô woyn Abɨ̀làhâm ɨ wul ìjèl nɨ̀ mà.

⁹Mɨ n-læ lì zɨ ɨlwèʼ ɨ ndyèynsɨ̀ /ndyèynsɨ̀ ɨ jaŋ fvɨ̀sɨ̀ zɨ̀ sɨ ɨlwèʼ ndyèynsɨ̀ ɨ bè sɨ̂ zɨ̀ na, “Yi n-ghɨ ghelɨ ghɨ felɨnɨ nɨ̀ mà. Ma choʼ meyn zɨ̀ (na yì na ghɨ ghelɨ̀ ghem.) Ma bû màʼì/bèyn jɨm sɨ̂ zɨ̀.

¹⁰Ka yi n-fàyn. Mɨ n-ghɨ ghesɨ̀nà amoʼ. Ka ikfâʼtɨ̀/iwo i nɨn fù ngeʼ sɨ̂ zɨ̀. Mɨ n-nì gâmtɨ̀ zɨ̀ ɨ ̀ nì a yì na to/kelɨ àdyaʼ. Mɨ n-nì kɨ̂ŋtɨ̀ zɨ̀ nɨ̀ àdyaʼ a bemnɨ-a nɨ̀ mà.

¹¹Samoʼ, ghelɨ ghì a ghɨ n-nu zɨ ɨ nì wumi-à. Mɨ n-nì wumsɨ̂ àŋena. Ghelɨ ghì a ghɨ n-nu zɨ ɨ nì kfɨtɨ-à ɨ̀ lè kɨ̀ salû.

¹²Yi n-nì nà kɨŋ mbàynɨ̀ sisɨ yeyn wi. Ghelɨ ghì a ghɨ n-nu zɨ ɨ nì nà bu kfeyn wi afo.

¹³Yi n-nì gâyn tèyn bòm ta mɨ n-ghɨ Bôbo Fɨyini ɨ Fɨyini fifɨ. Ma bê meyn sɨ̂ zɨ̀ na, “Ka yì na fàynà bòm ta mɨ n-nì gâmtɨ̀ zɨ̀.

¹⁴Zɨ̀ ghelɨ ndo nɨ̀ Jàkôb ka yi n-fàyn. Zɨ̀ ghelɨ Isìlæ̀, yi n-læ̂ mɨtì ma ghɨ sɨ gàmtɨ zɨ.” À bè Bôbo Fɨyini ɨvzɨ̂ a wù n-yuyn atu à ki-a. Mɨ n-ghɨ Fɨyini fɨ laynɨfɨ nɨ̀ ghelɨ Isìlæ̀.

¹⁵Yì yeyna! Mɨ n-nì-à a yì na ghɨ ta àmbuʼ a fɨ-a kɨ kelɨ àsoŋ kɨ tofɨ kɨ tèyn. Yi n-nì (leŋ zuetɨ̂ mbàynɨ̀ sisɨ) leʼ beʼlɨ̂ beʼlɨ̂ kfɨynsɨ ɨ̀ zuèlɨ/gvàsɨ̀ ɨ̀ nì a ɨlwêʼ ɨ koʼnɨ kasi kɨ sɨ abɨ̀l.

¹⁶Yi n-nì gwôsɨ̀ kfɨynsɨ nɨ̀ ɨ̀lwêʼ ɨ koʼnɨ a afyefa taynsɨ, a nkeylɨ waŋ ndù nɨ̀ àbɨ̂l ateyn a. Mɨtì a yì na saŋlɨ-à kûm Bôbo Fɨyini, koʼsɨ̂ ŋweyn ɨ Fɨyini fɨ laynɨfɨ nɨ̀ ghelɨ Isìlæ̀.

¹⁷Ghelɨ ànfɨf nɨn nî ghɨ nà kɨŋ mu sɨ yvɨ, ghelɨ ghɨ bolɨ ɨ kɨŋ mu sɨ nyvɨ mɨtì mu ɨ ghɨ wi. Ɨtoŋ mu læ̀ yum àŋena ɨ̀ chèm aleŋ a li-a aa tɨlemi tɨ àŋena tɨ na yum kɨ tèyn nkfas. Mɨtì a mà Bôbo Fɨyini yvɨ ijêm i àŋena i. Mà ɨ Fɨyini fɨ Isìlæ̀ læ̀ bêyn wì jɨm sɨ̂ àŋena.

¹⁸Mɨ n-læ̀ ni-à a jvasɨ na kàlì a kfɨynsɨ nô àfo a ɨ koʼ wi ateyn. Mɨ n-læ̀ ni-à a tɨsɨ tɨ lɨmàlɨ̀mà na fvɨ̂ a mɨ̂fòŋlɨ. Mɨ n-læ̀ ni-à a mɨ̀chɨ̂m fvɨ a nse iyum, ɨ̀ nì a mu na fvɨ̀ ɨlwèʼ ɨ nse wu yum kɨ tèyn nkfas.

¹⁹Mɨ n-læ̀ ni-à a ɨ̀nkàʼ na koʼ/lemâ a nse iyum. Ɨ̀nkàʼ mɨ̀ sedà nɨ̀ ɨ̀nkàʼ mɨ̀ àkasìyà kɨ̀mɨ nɨ̀ ɨmzɨ̂ mitɨ̀l baʼsɨ̂ nɨ̀ ɨmzɨ̂ mɨ̀tam mɨ̀ Olìfsɨ̀. Ɨ̀nkàʼ mɨ̀ àgùm læ̀ nà koʼ a nse iyum baʼsɨ̂ nɨ̀ tɨ̀nkì tɨ ɨnkàʼ tɨ litɨ kɨ̀ sɨ idvɨ̀.

²⁰Awo nâ kèynà læ̀ gaynà ta ka ghelɨ yeyn nà kya na à nì Bôbo Fɨyini. Àŋena nɨn yeyna ɨì fàytɨ kfàʼtɨ̀ ɨ̀ kèli na à nì Bôbo Fɨyini na awo nâ kèynà na gàynà. Àŋena nɨn keli-à na à nì kɨ̀ nô Fɨyini fɨ laynɨfɨ nɨ̀ ghelɨ Isìlæ̀ nì ìwo nâ yèynì.

²¹Bôbo Fɨyini be meyn na, “Yì gvi nɨ̀ ngeʼ sisɨ. Yì gvi nɨ̀ àngùmnɨ̀ kì a yi n-kelɨ. À n-bê fòyn(vzɨ̀ a wù n-saʼ) ghelɨ ndo nɨ̀ Jàkôb.

²²Zɨ mɨyini mèyn, yì feʼtɨ læ̂ àwo kì a kɨ n-ghɨ sɨ gàyn. Yì feʼtɨ akî a kɨ sɨ ghɨ ma kɨ gâyn meyn ta ka ghès na kya, fî kya àwo kì a kɨ gàyn bòm àwo nâ kèynà. Yì jaŋ làʼì àwo kì sɨ̂ ghès a kɨ læ̀ jæ gàyn.

²³Yì feʼtɨ læ̂ àwo kì sɨ̂ ghès a kɨ læ̀ jæ gàyn ta ka ghèsɨ̀ keli (samoʼ) na yi n-ghɨ mɨyini. Yì ni iwo i juŋì kèsa i bzɨ-i ta ka achfɨ̂ à kesa yum a ghès na fàynà.

²⁴Mɨtì zɨ mɨyini mèyn, yi n-kfeynɨ̂ wì afo, awo kì a yi n-nî ɨ kfeyn wi iwo. Nô mɨ ndà ta wù chòʼnɨ sɨ nà koʼsɨ zɨ nɨn chaʼnɨ-à.

²⁵Ma choʼ/tfɨtɨ meyn wul wu chî abàs ghè a ɨchfɨ̂ iyvɨ i nɨn sal ateyn. Mɨ n-nì-à a wù gvi kèʼ zɨ̀ kɨ̀ sɨ zɨ̀tɨ̀ abàs ikuè. Wu nì nûʼ tɨ̀fôyn kɨ̀ ta ghɨ nùʼ àchaʼ. Wu n-nî nɨ̀ àŋena kɨ̀ ta wul ɨ vzɨ̀ a wù n-bom ntòynsɨ̀ nî wu nì nɨ̀ àchaʼ a ntòynà.

²⁶À tìmi fèʼtɨ̀/bè ndà awo nâ kèynà a nzɨ̀tɨ ta ka ghèsɨ̀ na kya a? À tî bè ndà awo nâ kèynà sɨ asɨ ta ka ghesɨ̀nà na sɨ bê na, “Wu n-læ be kɨ nô samoʼ a?” Nô wùl nɨ̀n bu læ bè iwo nâ yèynì, bula wùl timi bè, bula wùl ɨ̀ timi yvɨ iwo nâ yèynì.

²⁷À n-læ bè ma sɨ asɨ sɨ̂ ghelɨ Zayòn na, “Ma tum meyn wul ɨ̀ ntum a Jèlusalèm na wù gvi bè na, ‘Ghelɨ ghi nɨn gvi-à, àŋena gheyn kfâ gvî.’

²⁸Ma ki meyn ɨ̀ yeyn na nô fɨyini/wùl nɨ̀n ghɨ wi antêynɨ̀ nɨ̀ àŋena. Nô wùl nɨ̀n ghɨ wi a fɨ kàʼ a fɨ tebtɨ àŋena. Nô fɨyini fɨ nɨn ghɨ wi a mà bɨf iwo a fɨ beynsɨ.

²⁹Mɨyini nâ mèyn nɨ̀n gyôʼ kɨ mɨyini mɨ̀ ànkaŋ, awo kì a mɨ n-nî ɨ kfeyn wi nô iwo. Ɨ̀nfyèʼsɨ̀ ɨfwo nɨ̀ àŋena nâ vzɨ̀ nɨn ghɨ kɨ àfyef, jɨ̂ŋsɨ̀ kɨ jɨŋsɨ ghelɨ.