Isaiah 38

Fòyn Hèzèkayà ɨ fe ìkoʼi/ ikoʼi i ɨ ku Hèzèkayà

¹À nà n-ghɨ ɨtuʼ nâ ghè a fòyn Hèzèkayà nɨ̀n saʼ, ikoʼi i bemnɨ-i i li ɨ ku ŋweyn wu nà ndû sɨ kfɨ. Nfèʼtɨ̀ i ghaʼnɨ ɨ Ìsayà ɨ wâyn Amòs ɨ ndu bè sɨ̂ ŋweyn na, “Bôbo Fɨyini bè na, ‘ Tef ikfɨ ì zæ bòm ta wa n-to wi, wa n-kfɨ-a.”

²Hèzèkayà ɨ bèynsɨ̀ ɨ nà ki ndùsɨ̀ nɨ̀ ìbàm i ɨkuyn i ɨ jèm ɨ bè sɨ̂ Bôbo Fɨyini na, ³Bôbo Fɨyini ka wa n-lèsɨ̀ na ma ti meyn nà yvɨnɨ̂ và, felɨ̀ sɨ̂ và kɨ nɨ̀ àtem à kema à jɨ̀mà nî kɨ àwo kì a kɨ n-ghɨ àtì-ati asɨ nɨ̀ và.” Hèzèkayà nɨn jèm tî ɨ dzɨ̀ nô sɨ a ŋaŋ.

⁴Bôbo Fɨyini ɨ kæ be sɨ̂ nfèʼtɨ̀ Isayà na, ⁵“Ndu bè sɨ̂ Hèzèkayà na, Bôbo Fɨyini ɨ Fɨyini fìfɨ̀ a bò vâ Devìt nɨn koʼsɨ bè na ma yvɨ meyn ìjêm ì zæ, ɨ̀ yèyn ta wà n-dzɨ̂. Mɨ n-kfeynsɨ̂s bèŋsɨ̀ njvàsɨ̀ tâyn a mɨchi nɨ̀ và. ⁶Mɨ n-nì fsɨ và ɨì fsɨ ntèʼ yèyn sɨ awu nɨ̀ fòyn Asilìyà. Mɨ n-nì kɨ̂ŋtɨ̀/tôʼnɨ̀ nɨ̀ ntèʼ nâ yèyn.

⁷Ɨyêyn nɨn ghɨ nchwæ sɨ dyèyn na Bôbo Fɨyini nɨn nî ìwo zɨ̀ a wù chfɨ̀nɨ sɨ nì. ⁸Mɨ n-nì-à a alɨŋsɨ a chuê kì a kɨ sùʼi a mbaŋi sɨ ndo nɨ̀ Ahàz kasi koʼ nɨ̀ ìbam i sɨ a mbaŋisɨ ìvɨm.” Wu n-bè tî ɨ nì alɨŋsɨ a chuê nâ kì ɨ kasi koʼ ibàm sɨ a mbaŋisɨ ìvɨm kɨ̀ ta wù bè.

⁹À nà n-ghɨ ta Hèzèkayà kòʼi ɨ̀ to, wu nyàʼ njàŋ ìkòʼsɨ ɨ bè na,

¹⁰Mɨ nà n-sɨ kfàʼ kɨ na mɨ n-kfɨ-a ma mà chi chem kɨ abeʼ a mɨchi ghè a mɨ n-kelɨ sɨ chi a mbzɨ. Mɨ nà n-sɨ kfâʼ kɨ na mɨ ndù ilaʼ i n-kfɨsɨ nse, ɨ̀ chi mèsì mɨ̀chi ɨ̀n lì afu.”

¹¹Mɨ nà n-sɨ kfâʼ kɨ na mà læ̀ bu yeyn wi Bôbo Fɨyini ta mà bu chi. Na mà læ̀ bu yeyn wi ghelɨ ghì a ghɨ n-chi a mbzɨ, ɨ̀ læ̀ faŋ tɨ̀ fì tɨ̀ chi ghesɨ̀ àŋena.

¹²Fɨyini fɨ ti nà sɨ ghɨ ma wù/fɨ lisi meyn ìchi ì yemi a nse kɨ̀ ta ɨtwo wul ɨ̀ nchì a ghɨ choʼ lìsì. Mɨ nà n-sɨ yeyn kɨ na Fɨyini fɨ mesi meyn nɨ̀ ìchi ì yemi kɨ̀ ta abâs a ndzɨsɨ/afo a tɨmnɨ-a ɨlvɨ ta ghɨ teyn ɨ̀ tɨm mèsì.

¹³Mà tî nà yvɨ ìlûm, chî dzɨ̂ kɨ tèyn ɨtuʼ layna, yi kêʼ kɨ nà ghɨ zuetɨ/koytɨ meyn ɨ̀vɨf ɨ̀ wom kɨ̀ ta à zuèlɨ bzɨ̀kem. Mà tî nà sɨ kfâʼ kɨ na Fɨyini fɨ li /mesi meyn ìchi ì yemi.

¹⁴Mà ti nà sɨ dzɨ̂ kɨ ta fɨ̀nyòŋànchwô, koynsɨ̂ dzɨ̂ ta fɨ̀nlàynɨ̀. Ma ti meyn dzɨ̀ ɨ̀ bol, loyn ìgâmtɨ̀ sɨ̂ Fɨyini fɨ na fɨ gamtɨ ma.”

¹⁵Mà ti kàʼ ma bè na gha? Fɨyini fɨ taŋi meyn sɨ̂ mà. À nì kɨ̀ nô ŋweyn iwo nâ yèynì sɨ̂ mà. Mɨ n-yvɨ ìlûm, mbini bu koʼ wi a ma isi/yi bu boynɨ̂ wi sɨ buni.

¹⁶Awo nâ kèynà a wà nì têyn a Bôbo nɨn nî na ghelɨ na chi-à. Awo kì a wà n-nî nɨn fu ìchi sɨ̂ mà. Wà n-fu ɨ̀wuyn ɨtwo sɨ̂ mà, ni-à ma chi-à.

¹⁷Ngeʼ nâ yèyn a mà tî nà̀ yeyn têyn nɨ̀n ghɨ kɨ sɨ a njùŋ sɨ̂ mà. Wà fsɨ meyn ma sɨ awu nɨ̀ ìkfɨ-i bòm ta wà lesɨ meyn fù mbɨ semsɨ.

¹⁸Wùl ɨ kfɨ wù bû nà fî koʼsɨ̂ và. Wùl kàʼ wu bû nà fî koʼsɨ̂ và ghɨ ilaʼ i nkfɨsɨ nse. Wùl nɨ̀n kfɨ-a wù bû nà fî yeʼtɨ̂ a vâ na wà gamtɨ ŋweyn.

¹⁹Ghelɨ ghì a ghɨ n-chi nɨn koʼsɨ̂ và kɨ̀mɨ ta mɨ n-koʼsɨ layn. Ghɨ̀bo woyn nɨn fêʼtɨ̀ kûm samoʼ zyâ sɨ̂ woyn àŋena.

²⁰Bôbo Fɨyini gamtɨ meyn mà. Ghès na yem njàŋsɨ̀ buʼ tɨ̀luŋ tɨ mɨchaʼ a ndô Fɨyini sɨ yaʼi ta ghès bu chi./ nò ta ka ghès læ̂ kfɨ.

²¹À nà n-ghɨ tì ma Isayà bê meyn sɨ̂ ghelɨ ghɨ felɨnɨ nɨ̀ fòyn na, “Yì kam/gva mɨtam mɨ̀ figsɨ̀ ɨ̀ yòʼtɨ fɨmɨ fɨ fòyn Hèzèkayà ateyn ta ka wù to.”

²²Hèzèkayà nɨ̀n bɨfɨ meyn sɨ̂ Ìsayà na, “A n-dyêyn ghà na mɨ n-læ̀ koʼ a ndô Fɨyini a?