Isaiah 32

Fòyn vzɨ̀ a wù n-saʼ kɨ àtì-ati

¹(Isayà nɨn fi meyn bè sɨ̂ ghelɨ Isilæ̀ na), “Yì yeyna, fòyn ɨ̀lvɨ̀ nɨn gvì-à nà saʼ kɨ àtì-ati, ghelɨ ghɨ felɨnɨ nɨ̀ ŋweyn ɨ saʼ fyeʼtɨ̂ wì iwo.

²Nô mɨ wul ɨ tisɨnɨ ɨ̀ kfà læ̀ nà ghɨ kɨ ta alêʼ/fɨtwo fìfɨ̀ a ghɨ n-lêytɨ̀ ateyn ɨlvɨ ta afyefa nɨn chwô, fî ghɨ ta alêʼ kì a ghɨ n-leʼ lêytɨ̀ afyef ato-a ateyn. Àŋena læ̀ nà ghɨ ta jvasɨ a sɨ n-kalì a nse iyum, fî ghɨ kɨ ta alɨŋsɨ/lɨmàlɨ̀mà isas i ngòʼ ighaʼnɨ ilaʼ ghè a ɨlwêʼ nɨn lûm ateyn nô sɨ a ŋaŋ, ɨwo ɨ yɨnɨ koʼ wi ateyn.

³À læ̀ nà ghɨ ɨtuʼ nâ ghè, a ghelɨ ghì a ghɨ n-yeyn ɨlwêʼ na faytɨ̂ yeyn àwo , ghelɨ ghì a ghɨ n-kelɨ ɨtuŋlɨ ɨ faytɨ̂/tôʼ yvɨtɨ̂ àwo.

⁴Ghelɨ ghì a ghɨ n-lûm lùm nî kɨ ni awo læ̀ nà kya àfo, fî yeyn kelî àwo kì a wù n-kelɨ sɨ nì.

⁵Ghelɨ læ̀ nà bu lî wi ɨ̀ngù na à n-ghɨ ghelɨ ghɨ tisɨnɨ. Ghɨ læ̀ nà bu ngvɨmlɨ̂ wì ghelɨ ghì a ghɨ n-nî awo a bɨ-a.

⁶Ɨ̀ngu lum taŋî kɨ ìtaŋi i àngù, kfâʼtɨ̀ kɨ sɨ nà nî awo a bɨ-a. Àŋena nɨn nî kɨ àwo kì a kɨ n-ghɨ wi àtì-ati asɨ nɨ̀ Fɨyini fɨ, fî wam ɨ̀nkfaŋ kûm Bôbo Fɨyini. Àŋena nɨn fu wi ɨfwo ɨ yɨnɨ sɨ̂ ghelɨ ghì a jeŋsɨ nɨn yaf, fu wi afo na ghelɨ ghì a ɨtoŋ àŋena nɨn yum nyvɨtɨ.

⁷Ghelɨ mɨ̂tem ɨn bɨ̂ nɨn nî/baʼtɨ̂ kɨ àwo a bɨ-a. Àŋena nɨn kulɨ mɨ̀nàŋ ɨmbɨ̂ sɨ nà bebsɨ ghelɨ ànfɨf nɨ̀ ànkaŋa, nô mɨ ɔlvɨ ta ghelɨ anfɨf nɨn dzɨ̂ na ghelɨ ghɨ saʼnɨ gamtɨ àŋena.

⁸Mɨtì ghelɨ ghɨ jûŋ nɨn baʼtɨ̂ kɨ sɨ nà ni awo a juŋà sɨ̂ ghelɨ. Àŋena nɨn nî kɨ àwo a juŋà kì a àŋena chòʼnɨ sɨ nà ni-à.

Saʼgha kûm ghɨ̀ki Jèllusalèm

⁹Zɨ ghɨ̀kì ghî a yi n-kfâʼ na yi n-chî nô a jûŋ, kelɨ w afɨm, yì yvɨtɨ. Zɨ̀ woyn ghɨ̂kì ghî a yi n-dêŋsɨ̀ chi chi, yì faytɨ yvɨ̀tɨ ìwo zɨ̀ a mɨ n-bê.

¹⁰Yi n-kfâʼ na yi n-dêŋsɨ̀ chî chi lvɨ̂yn mɨtì à na ghɨ kɨ ibàm i bêŋ ìmòʼ, a yì na chɨŋtɨ̂ fâyn nô sɨ a ŋaŋ. Yi læ̀ nà kelɨ wi nô fɨ̀tam fɨ gɨ̀lêb sɨ kœ̀, kelɨ wi mɨ àfo a li-a a yi a gvêynsɨ̀ sɨ kfì.

¹¹Zɨ ghɨ̀kì ghî a ghɨ n-dêŋsɨ̀ chi chi ti, kelɨ wi afɨm, yì na chɨŋtɨ̂ faynà. Yì choʼtɨ ndzɨsɨ jûŋsɨ̀ sɨ a yi ɨwùyn ɨ̀ tam/màʼ fɨ̀ntsɨ.

¹²Yi na koynsɨ̂ dzɨ̂ nô sɨ a ŋaŋ bòm ta ghɨ bèbsɨ gveyn sɨ jûŋsɨ̀ nɨ̀ zɨ̀ baʼsɨ̂ nɨ̀ ntàŋ sɨ/ɨ̀nkâʼ mɨ̀ gɨ̀lêbsɨ̀ nɨ̀ zɨ̀ sìsɨ̀ a sɨ kòla mɨtam nô sɨ idvɨ̀ tì.

¹³Ɨtwaʼ sùnjonjoŋsɨ nɨ̀ àfûʼ a bɨ-a a li-a koʼ meyn ilaʼ nɨ̀ ghelɨ̀ ghem. Samoʼ yì na dzɨ̂ nô sɨ a ŋaŋ bòm ta ghɨ bebsɨ meyn ndo sisɨ nô sɨ̀ jɨ̀m a ntèʼ afî a yì tî nà yɨ ayɨ ateyn, bèbsɨ̀ kɨ̀m ntèʼ ì jùŋ nɨ̀ zɨ̀.

¹⁴Samoʼ, fòyn (Judà) læ̀ leʼ visî ntoʼ ŋweyn. Ntèʼ zɨ̀ a ghelɨ nɨn chi ateyn kɨ̀ sɨ idvɨ̀ læ̀ nà ghɨ kɨ iyum. Ntèʼ ìghaʼnɨ nɨ̀ ɨ̀bwaŋ nchì læ̀ faŋ kɨ ta nse iyum nô ta ka ghɨ̀ læ̂ ghɨ̀. À læ̀ nà ghɨ kɨ nô àlêʼ a juŋà sɨ̂ njàkâysɨ̀ ɨtwaʼsɨ, a ghɨ ɨ̀twaʼ vzɨ̀ a bzɨsɨ nɨ̀ nyam sɨ lisɨ nɨn yɨ ateyn.

¹⁵Yi læ̀ nà ghɨ kɨ tì sɨ chem ta Fɨyini fɨ tum ayvɨs a ŋweyn (atu nɨ̀) sɨ̂ ghesɨ̀nà. Wù læ̀ tum àyvɨs a ŋweyn a nse iyum kasi sɨ a gvêyn sɨ (jûŋsɨ) ɨfwo ɨ yɨnɨ, a gveynsɨ jûŋsɨ̀ kasi nà ghɨ ta aku ɨnkàʼ.

¹⁶Ghɨ læ̀ nà saʼ fyeʼtɨ̂ wì nsaʼ wùl a nse iyum, nî kɨ àwo kì a kɨ n-ghɨ àtì-ati asɨ nɨ̀ Fɨyini fɨ ɨlwèʼ ɨ gvêyn sɨ jûŋsɨ̀ ghê/afî a ɨfwo ɨ yɨnɨ nɨn koʼ ateyn.

¹⁷Ghelɨ̀ ghem læ̀ se sɨ nì awo kì a kɨ n-ghɨ àtì-ati, nà chî kɨ nô nɨ̀ mbôynɨ̀ iwo i ɨ bu fu wi ngeʼ sɨ̂ àŋena. Àŋena læ̀ nà kelɨ mbôynɨ̀ zɨ̀ a yì fàŋ meyn kɨ̀ samoʼ.

¹⁸Ghelɨ̀ ghem læ̀ nà dêŋsɨ̀ chî kɨ nô nɨ̀ mbôynɨ̀ a ɨlwèʼ/ilaʼ nɨ̀ àŋena, mbôynɨ̀ ɨ ghɨ a ndosɨ nɨ̀ àŋena. Àŋena læ̀ nà chî ilaʼ nô ìwo i ɨ fu wi ngeʼ ateyn.

¹⁹À læ̀ suʼî nô mɨ ìvɨ awœ, (afyefa) kôytɨ̀ nyɨ̂ŋsɨ̀ àku ɨnkàʼ a nse, ɨ̀ bɨ̀ytɨ bèbsɨ nô mɨ ntèʼ zɨ̀, ²⁰a Bôbo Fɨyini na bôysɨ̂ kɨ boysɨ zɨ. Yì na tôʼ ɨ̀fwo ɨ yɨnɨ nɨ̀ zɨ̀ kɨ̀ a mbæ̀sɨ jvâ, ɨtwaʼ ghɨ ta nyamsɨ mbòloʼ nɨ̀ zɨ̀sɨ nɨ̀ njàkây sisɨ na dêŋsɨ̀ yɨ kɨ nô ateyn.