Isaiah 26

Njàŋ sɨ koʼ Bôbo Fɨyini

¹Ìsayà nɨn læ meyn fi bè na, “À læ̀ nà ghɨ ɨtuʼ nâ ghè a ghɨ na yem njàŋ yèyn kɨ̀ ilaʼ i Judà ì jɨ̀m na,

‘Ntèʼ yes nɨn kelɨ àdyaʼ. Bôbo Fɨyini nɨ̀n kɨ̂ŋtɨ̀ ghès kɨ̀ ta mbàyn zɨ̀ a ghɨ tɨm jɨ̀n kal ntèʼ àteyn.

²Yì dzɨsi achfɨ̂ a mbàyn, yì visi ilaʼ zɨ̀ a yi n-ghɨ atì-ati zɨ ilaʼ zɨ̀ a ghelɨ ateyn nɨn chî nchînɨ̀ sɨ àtì-ati.

³Bôbo Fɨyini nɨn kɨ̂ŋtɨ, wà n-tôʼnɨ̀ nɨ̀/kɨ̂ŋtɨ̀ ghelɨ ghì a ghɨ faŋ nà yeʼtɨ kɨ a wa ɨwùyn, wà n-fu mbôynɨ̀ sɨ̂ àŋena bòm ta àŋena nɨn samsɨ kɨ vâ.

⁴Yì na samsɨ̂ Bôbo Fɨyini kɨ̀ mɨlvɨ ɨ̀n jɨ̀m bòm ta Bôbo Fɨyini ɨ Fɨyini fɨ ghesɨ̀nà nɨn ghɨ ìwu zɨ̀ a yi fàŋ meyn kɨ̀ samoʼ.

⁵Wù suʼsɨ meyn ghelɨ ghì a ghɨ n-ghaŋsɨ ɨwuyn, ghɨ na ngvɨmlɨ-à. Wù bebsɨ meyn ntèʼ sɨ to sìsɨ̀ a àŋena nɨn chi ateyn. Wù ni meyn sɨ bɨ̂ytɨ̀ sùʼi nô sɨ̀ jɨ̀m nà nyɨŋ kɨ ta abɨ̂l a nse.

⁶Ghelɨ ànfɨf nɨ̀ ghelɨ ghì a ghɨ tî nà yeʼtɨ àŋena nɨn jelɨ̀ chwô a ntèʼ afu, ghelɨ ghɨ jɨŋnɨ jêylɨ̀ kɨ nô ntèʼ àteyn nɨ̀ ɨ̀vɨ.

⁷Dzɨ sìsɨ̀ a ghelɨ àtì-ati nɨn jelɨ̀ ateyn nɨn (nâyn kɨ tèyn) n-jofɨ̀ kɨ tèyn. Bôbo Fɨyini, wà ni-à dzɨsɨ ghelɨ àtì-atisɨ leyn jofɨ̀ kɨ tèyn.

⁸Bôbo Fɨyini, ghès nɨn jelɨ̀ kɨ ta isaʼ ì zæ nɨn kɨŋ, chîtɨ̀ kɨ và na wà gamtɨ ghes. Ghès nɨn kôŋ sɨ nà koʼsɨ izɨyn ì zæ kɨ nɨ̀ mɨ̀têm mês ɨ̀n jɨ̀m.

⁹Mɨ n-kfâ nyɨŋì nɨ̀ntuʼ ma nà kôŋ kɨ sɨ yeyn vâ, ɨ̀ bɨs làlì/ɨtuʼ layn, ayvɨs à kema nà kɨŋ kɨ và. Wà læ̀ gvî sɨ saʼ mbzɨ yeyn, a ghelɨ ghì a ghɨ n-chi ateyn kæ keli sɨ nà ni awo kì a kɨ n-ghɨ àtì-ati.

¹⁰Wà dyêyn meyn àtem a juŋà sɨ̂ ghelɨ awo a bɨ-a mɨtì àŋena yeʼî wì sɨ nà nî awo kì a kɨ n-ghɨ àtì-ati, àŋena nî kɨ àwo a bɨ-a ateyn. Àŋena nɨn yeyn wi mɨ na Bôbo Fɨyini nɨn ghɨ Fɨyini fɨ ngaŋtɨnɨfɨ.

¹¹Bôbo Fɨyini wà laysɨ meyn àwu sɨ fu ngeʼ sɨ̂ ghelɨ awo a bɨ-a, mɨtì àŋena na yeyn/kya wi. Ni àŋena keli/yeyn na wà n-kôŋ ghelɨ̀ ghya nô sɨ a ŋaŋ. Wumsɨ àŋena, ni àŋena fɨ ɨvɨ̀s afî a wà bàʼtɨ sɨ̂ mbàynɨ̀ shyasɨ.

¹²Bôbo Fɨyini, ni ghès na kelɨ mbôynɨ̀ nô mɨ ghà ta ghès nɨn nî nɨn ghɨ ma à gàmtɨ̀ kɨ̀ và na ghèsɨ̀ ni.

¹³Bôbo Fɨyini, Fɨyini feyfɨ, tɨfôyn tɨ tɨ̂laʼ tɨ litɨ saʼ meyn ghès, mɨtì ghès ɨ ngvɨmlɨ̂ kɨ và ɨ Fɨyini feyfɨ.

¹⁴Tɨfôyn tɨ litɨ kfɨtɨ meyn bu ghɨ wi sɨ làlì sɨ nà chi-à. Ɨyvɨs ɨ àŋena læ̀ bu làlì wì. Wà ti meyn fù ngeʼ sɨ̂ àŋena, ɨ̀ bebsɨ àŋena. Nô wùl ɨ̀ bu fiì kfâʼtɨ̀ wì iwo kûm àŋena.

¹⁵Wà ghaʼsɨ meyn kfèynsɨ ìlaʼ ì yesi a Bôbo Fɨyini. Wà ni meyn akôyn a ghelɨ kì a kɨ n-chi ilaʼ nâ ghàyn fî dvɨ̀ kfèynsɨ. Ghelɨ na koʼsɨ̂ và. Wà nî meyn ghɨ ghaʼsɨ kfèynsɨ tɨ̀ghami tɨ ilaʼ nɨ̀ ghès kɨ̀ ɨbyâs ɨ̀ jɨ̀m.

¹⁶Bôbo Fɨyini, ghelɨ̀ ghya nɨn gvî sɨ̂ và ɨlvɨ ta àŋena nɨn ghɨ a ngeʼ na wà gamtɨ àŋena, wa. Wà n-fu ngeʼ sɨ̂ àŋena nô mɨ ɨlvɨ gha, àŋena nà jêm dzɨ̂ na wà lesɨ fu àŋena.

¹⁷Ghès nɨn dzɨ̂ asɨ nɨ̀ và a Bôbo, kɨ̀ ta wul ɨ wi nî wu nà dzɨ-à ɨlvɨ ta wù n-kɨŋ sɨ bzɨ wayn na lum ŋweyn.

¹⁸Ghès nɨn luŋlɨ̂ dzɨ̂ kɨ ta wul ɨ wi a wù n-kɨŋ sɨ bzɨ / a wàyn lum ŋweyn, mɨtì ma iluŋlɨ ì yesi kàʼ yi bû nì nô ìwo sɨ̂ ghès. Ghèsɨ bû tɨm yɨ̀ mɨ ìwoŋ sɨ bœ̀sɨ ilaʼ ì yesi (ɨ̀ faŋ tɨ̀ nì nô mɨ ìwo ili a mbzɨ). Ghèsɨ bû tɨm yɨ̀ mɨ ghelɨ ghì a ghɨ n-chi a mbzɨ.

¹⁹Mɨtì ghelɨ̀ ghya ghì a ghɨ kfɨ̀tɨ (a Bôbo Fɨyini) læ̀ nà kasî chi-à. Tɨgvɨyn tɨ àŋena tɨ læ̀ kasî lalì sɨ ikfɨ. Zɨ̀ ghî a yi n-nyɨŋ a tɨ̂sè, yì lali nà yem njàŋsɨ̀ saŋlɨ-à. Bôbo Fɨyini læ̀ ni-à a ghelɨ ghì a ghɨ kfɨ̀tɨ ghɨ gvɨmì kasi làlì sɨ ikfɨ, kɨ̀ ta amyâʼ kì a kɨ sùʼi nɨ̀ bɨsì bɨsì nî kɨ nà yvɨ̂sɨ̀ ɨ̀lwêʼ.

²⁰Ghelɨ̀ ghem, yì ndu zɨ a yi a ndosɨ ɨ̀ kɨ̀ŋ àchfɨ̂ ateyn, yì lèytɨ̀ ngêŋ sisɨ sɨ aleŋ ɨlvɨ, sɨ chem ta ka ɨtoŋ ɨ yafɨnɨ nɨ̀ Bôbo Fɨyini mæ.

²¹Yì yeyna, Bôbo Fɨyini nɨ̀n fvɨ̂ gvî alèʼ ghè a wù n-ghɨ ateyn iyvɨ. Wù n-gvî sɨ fu ngeʼ sɨ̂ ghelɨ a mbzɨi bòm mbɨsɨ àŋena. Nse(yèyn) læ̀ dyêyn mɨ̀luŋ mɨ̀ ghelɨ ghì a ghɨ zuètɨ atu àteyn. Yì læ̀ bu lêytɨ̀ wì ghelɨ ghì a ghɨ tî zuètɨ a n-lèytɨ.