Isaiah 2

This book is a draft. It has been translated but has not yet finished checking, and is published here so the community can read and respond to it.

Mbôynɨ̀ zɨ̀ a yì fàŋ meyn samoʼ

¹Ɨyêyn nɨ̀n ghɨ ntum zɨ̀ a Bôbo Fɨyini nɨn læ fu sɨ̂ Isayà ɨ wâyn Amòz kûm ghelɨ Jèlusalèm nɨ̀ ghelɨ Judà.

²Wu n-læ bè na,

“Mɨ̀chi nɨn koʼ gvi-à ta ka kfɨyn ìghaʼnɨ zɨ̀ a ndô Fɨyini nɨ̀ ti ateyn na ngaŋtɨ̂ chwô nô mɨ kfɨyn ì kà a mbzɨ. Kfɨyn ndô Fɨyini nâ yèyn læ̀ nà ti atû kfɨynsɨ nô sɨ̀ jɨ̀m bòm ta à n-ghɨ nà kfɨ̀ynsɨ. Yì læ̀ nà dyêf chwô nô mɨ kfɨyn ì kà. Ghelɨ tɨ̂làʼ læ̀ nà koʼ afu kɨ̀ sɨ idvɨ̀ sɨ koʼsɨ Fɨyini.

³Ghelɨ læ̀ lû a tɨ̂laʼ kɨ̀ sɨ idvɨ̀ gvì nà bê na, “Yì gvi ghesɨ̀nà koʼ atû kfɨyn ighaʼnɨ nɨ̀ Bôbo Fɨyini, ghesɨ̀nà ndu a ndô Fɨyini a ndô Fɨyini ghè a ghelɨ ndo nɨ̀ Jàkôb nɨn koʼsɨ Bôbo Fɨyini ateyn. Bôbo læ̀ yeʼî ghesɨ̀nà nɨ̀ dzɨsɨ ŋweynsɨ, a ghesɨ̀nà na jelɨ̀ ateyn. Ghɨ læ̀ nà yeʼî ghelɨ Zayòn kûm Bôbo. Ghelɨ læ̀ nà lû a Jèlusalèm ghɨ nà fêʼtɨ̀ ndû nɨ̀ ntum Bôbo Fɨyini.

⁴Bôbo læ̀ saʼ fu nsaʼ sɨ̂ ghelɨ tɨ̂laʼ kɨ̀ sɨ idvɨ̀. Tɨlaʼtɨ læ̀ nà kelɨ àngùmnɨ̀, Fɨyini fɨ saʼ fu nsaʼ àŋena. Ghelɨ tɨ̂laʼ tɨ mbzɨ læ̀ lî mɨ̀nyue mɨ̀ ìwòŋ nɨ̀ àŋena ɨ̀ fàytɨ fɨsɨ ɨ̀ nà felɨ̀ gveynsɨ ateyn. Àŋena læ̀ lî àwoŋ a àŋena, ɨ̀ fàytɨ tɨ̀fô nà kâŋ ɨ̀nkâʼ ateyn. Ilaʼi læ̀ bu fì lî wì ɨfwo iwòŋ sɨ keʼ ilaʼ i li, ɨ̀ læ̀ faŋ tɨ̀ fì tɨ̀ yèʼi sɨ nà tɨm iwoŋ.

⁵Ghelɨ ndo nɨ̀ Jàkôb, yì gvi ghesɨ̀nà (jel ibayn nɨ̀ Bôbo Fɨyini) na chî ta isaʼi Bôbo Fɨyini nɨ̀ bê.

Fɨyini fɨ nɨn bebsɨ̂ ghelɨ ghì a ghɨ n-ghaŋsɨ ɨwuyn

⁶Bôbo Fɨyini, wà beyn meyn jɨm sɨ̂ ghelɨ̀ ghya, ɨ ghelɨ ndo nɨ̀ Jàkôʼ (ghelɨ Isìlæ̀.) Bòm ta àŋena sɨ bimî kɨ àwo kì a ghelɨ abàs ghè a ɨchfɨ̂ iyvɨ nɨn sal ateyn nɨn bimi. Àŋena nɨn fyeŋ fɨ̀nyaʼ kɨ̀ ta ghelɨ Fìlisìyà. Àŋena nɨn (yɨnɨ̂ ŋêyn mɨyini mɨ̀ ɨ̀tum).

⁷Aso ɨkwo a baŋnɨ-a nɨ a fɨfâ nɨn ghɨ(kɨ ɨlwêʼ ɨ̀ jɨ̀m) a Isìlæ̀ kɨ̀ sɨ idvɨ̀, ighaʼ i àŋena nɨn kelɨ wi ngòʼsɨ, nyamsɨ kfaŋsɨ nɨn ghɨ a Isìlæ̀ kɨ sɨ idvɨ̀ ma mɨ̀nchaʼ mɨ̀ iìwoŋ nɨ̀ àŋena kàʼ mɨ bû læ̀ mæ̀.

⁸Ilaʼ i Isìlæ̀ i nɨn ghɨ ma à luyn kɨ ɨ̀nfyèʼsɨ̀ ateyn. Ghelɨ Isìlæ̀ nɨn koʼsɨ̂ ɨ̀fwo ma à fàytɨ kɨ̀ nô àŋena, ɨfwo a ghɨ kɨ nô (ngèsɨ ɨwu nɨ̀ àŋena) ifêl i ɨwu nɨ̀ àŋena.

⁹Yi ti ndyêyn na Fɨyini fɨ nì suʼsɨ̂ ghelɨ ghì a ghɨ n-ghaŋsɨ ɨwuyn ɨ̀ wùmsɨ kɨ̀ ghelɨ ghɨ̀ jɨ̀m. Ka wa n-gàmtɨ̀ àŋena a Bôbo.

¹⁰Yì ndu zɨ/lètɨ̀ a tɨ̂fò a tɨ̂wù a kfɨynsɨ. Yì ndu lèytɨ̀ ɨbùʼ/a tɨ̂bɨ̀ a nse bòm ngeʼ zɨ̀ a yi faŋ na Bôbo Fɨyini nɨn fu sɨ̂ zɨ̀. Yì ndu lèytɨ̀ bòm ìŋwâʼ i ŋweyn nɨ̀ àdyaʼ a ŋweyna.

¹¹Ghelɨ ghì a ghɨ n-ghaŋsɨ ɨwuyn ɨ nì ngvɨmlɨ̂ ngeŋsɨ àŋena. Ighaŋsɨ ɨwùyn nɨ̀ àŋena i nì kasî sɨ a ingvɨmlɨ. À læ̀ nà ngaŋtɨ̂ kɨ Bôbo Fɨyini ɨtuʼ/achi nâ ghè.

¹²Bôbo Fɨyini ɨ bò ɨ̀dwaʼ ɨ̀ jɨ̀m sɨ ghɨ ma wù lem meyn àchi kì a ka wù læ̀ saʼ ghelɨ̀ ghì ateyn a ghɨ n-ghaŋsɨ ɨwuyn, lêm wì na nô wùl ɨ̀ nɨ̀n ghɨ àfo tì, ɨ ghelɨ ghì a ghɨ n-bemsɨ ngeŋsɨ àŋena, àŋena ngvɨmlɨ̂ ngeŋsɨ àŋena (a àŋena kæ yeyn na ghɨ n-ghɨ wi nô àfo.)

¹³Wu læ̀ suʼsɨ̂a àŋena kɨ̀ ta ghɨ nî ghɨ nà gvêytɨ̀ ɨ̀nkâʼ mɨ̀ sedà a Lebanòn mɨ dyêblɨ̀ kɨ tèyn fî to. Wu læ̀ suʼsɨ̂ àŋena kɨ̀ ta ghɨ nî ghɨ gvèytɨ̀ ɨ̀nkâʼ mɨ̀ ôksɨ̀ a Bashàn, mɨ ghaʼlɨ̂ kɨ tèyn.

¹⁴Bôbo Fɨyini læ̀ suʼsɨ̂ àŋena kɨ̀ ta wù sùʼsɨ kfɨynsɨ ghaʼlɨnɨsɨ nɨ̀ sɨ dyeblɨnɨsɨ sɨ na ghɨ ta tɨbal.

¹⁵Wù læ̀ bebsɨ̂ àŋena kɨ̀ ta wùl nî wu bɨ̀ytɨ suʼsɨ àbaŋ a nchì a kɨ dyefɨ̀ kɨ tèyn. Wù læ̀ bebsɨ̂ àŋena kɨ̀ ta wùl ɨ̀ nî wu bɨ̀ytɨ suʼsɨ nɨ̀ mbàyn ntèʼ ma ghɨ tɨm/baʼlɨ meyn yì na to kɨ tèyn.

¹⁶Bôbo Fɨyini lem meyn ɨ̀lvɨ vzɨ̀ a ka wù saʼ sùʼsɨ ghelɨ ghì a ghɨ n-ghɨ ta ngùʼsɨ ghaʼlɨnɨ sìsɨ̀ a sɨ n-beʼì ɨfwo ɨ beyʼlɨnɨ a Tashìsh, fî ghɨ kɨmɨ ta ngùʼ sɨ jûŋ sɨ lisɨ.

¹⁷Wu læ̀ ni-à a ghelɨ ghì a ghɨ n-koʼsɨ ngeŋsɨ àŋena yeyn na àŋena nɨn ghɨ wi nô àfo, ɨ̀ nì a ghelɨ ghì a ghɨ n-ghaŋsɨ ɨwuyn na ngvɨmlɨ-à. Ghɨ læ̀ nà koʼsɨ̂ kɨ Bôbo Fɨyini achi nâ ghè.

¹⁸À læ̀ nà ghɨ achi nâ ghè a ɨ̀nfyèʼsɨ̀ mæ nô ɨ̀ jɨ̀m./Ghɨ læ̀ bebsɨ̂ ɨ̀nfyèʼsɨ̀ achi nâ ghè nô ɨ̀ jɨ̀m/ Ghelɨ læ̀ bebsɨ̂ ɨ̀nfyèʼsɨ̀ àŋena nô ɨ̀ jɨ̀m achi nâ ghè.

¹⁹Bôbo Fɨyini læ̀ gvi-à/lali-à, nèʼsɨ̀ mbzɨ a ghelɨ na leʼ lêytɨ̀ a tɨ̂fò iwu, ghɨli leʼ lêytɨ̀ ɨbùʼ/nse, ta ghɨ n-fâyn ɨtoŋ ɨ yafɨnɨ nɨ̀ Bôbo Fɨyini, nɨ̀ ìŋwâʼ i ɨfòyn nɨ̀ ŋweyni/nɨ̀ àdyaʼ a ŋweyna.

²⁰A læ̀ nà ghɨ achi (a nsaʼ) nâ ghè, a ghelɨ maʼi ɨ̀nfyèʼsɨ àŋena vzɨ̀ a ghɨ fàytɨ nɨ̀ àso ɨkwo a baŋnɨ-a nɨ̀ ɨwu aso ɨkwo a fɨfâ. Ghɨ maʼì-à a chwokùʼsɨ̀ nɨ̀ njwòsɨ ifòsɨ̀ bebsɨ.

²¹Bôbo Fɨyini læ̀ gvî sɨ saʼ mbzɨ a àŋena leʼ ndù lèytɨ̀ a tɨ̂fò iwu, a ghɨli lèytɨ a mɨ̂fòŋlɨ. Àŋena læ̀ leʼ lêytɨ̀-à bòm ɨ̀toŋ ɨ yafɨnɨ nɨ̀ Bôbo Fɨyini ɨ̀ lèytɨ̀ bòm ìŋwâʼ i ɨfòyn nɨ̀ ŋweyn.

²²Ka yì na (ɨwuyn nɨ̀) samsɨ̂ wul ɨ̀ mɨ̀sòŋ, wùl ɨ̀ nɨn ghɨ kɨ tèyn ta afyef. Àŋena kàʼ ghɨ bû gàmtɨ̀ zɨ.