Genesis 49

Jàkôb ɨ boysɨ woyn ŋweyn njvàsɨ̀ bò

¹A nà n-ghɨ ta Jàkôb boysɨ Mànasè ŋêyn Eflèm, wu jàŋtɨ̀ woyn ghɨ lûmnɨ̀ nɨ̀ ŋweyn ɨ bè sɨ̂ àŋena na, “Yì yvɨŋtɨ gvì mà feʼtɨ iwo zɨ̀ a yi n-gàyn sɨ̂ zɨ̀ a mɨchi ɨngvinɨ̂.”

²“Yì yvɨŋtɨ gvì yvɨ̀tɨ a woyn Jàkôb ɨ̀ yvɨ̀tɨ ìwo zɨ̀ a ka mà be a wôyn ghem.

Yì yvɨtɨ iwo zɨ̀ a ka bò vzɨ Isìlæ̀ be.

³Lubèn, wà n-ghɨ wayn ɨ̀kuŋ nɨ̀ mà,

kɨ̀ nô ɨkœ ɨ two nɨ̀ mà ɨ nchwæ àdyaʼ nɨ̀ mà ɨ yî àsɨ.

Wà n-kelɨ àdyaʼ chwô woynà ghya nô ghɨ̀ jɨ̀m fî kelɨ ìkfɨmtɨ.

⁴Wà n-ghɨ tèyn ta jva ì to ma wùl kàʼ wu bû tìsɨ.

Wà læ̀ chem wi a dzɨ bòm ta wà ti meyn yɨ a kel nɨ̀ bò vâ.

Wà ti meyn nùʼ ɨ̀kuyn wom.

⁵Simìyòn ŋêyn Levì nɨ̀n chî kɨ nchînɨ̀ ìmòʼ, faŋ wi tɨ̀ làysɨ̀ inû alèʼ nɨ̀ mɨ̀nyuè.

⁶Mɨ n-bè wi iwo sɨ̂ àŋena,

mɨ n-zɨ̂ wì a àŋena iwo,

bòm ta àŋena zuetɨ meyn ghelɨ kɨ̀ ɨtoŋ ɨ yafɨnɨ.

Àŋena nɨn sɨ teyntɨ̂ àfyeyn a nyâmsɨ̀ kɨ̀ ta àŋena nɨn kôŋ.

⁷Fɨyini fɨ nɨn te àŋena bòm ta ɨtoŋ ɨ yafɨnɨ nɨ̀ àŋena nɨn jofɨ̀ wì.

Woyn ghi læ̀ nà chi wì alêʼ àmòʼ.

Fɨyini fɨ læ̀ sâs àŋena kɨ̀ ilaʼ i Isìlæ̀ ì jɨ̀m.

⁸Sɨ và a Judà, woynà ghya læ̀ nà bemsɨ̂ và.

Wà læ̀ tɨm yɨ mbàynɨ̀ shyasɨ a

woynà ghya na beyn và.

⁹Ô wayn wom Judà, Wà n-ghɨ ta wâyn bzɨ̀kem

ɨlvɨ ta yì seʼ ku nyam ɨ̀ nà kasî kfâ.

Wà læ̀ nà ghɨ ta bzɨ̀kem ɨlvɨ ta yì yɨ kul ɨ̀ nyìŋì nà yvɨ̂tɨ̀-à,

ghɨ ta bzɨ̀kem iki ma wùl kàʼ wu bû bàʼsɨ a wa ngùŋ.

¹⁰Tɨfôyntɨ̀ læ̀ nà lum fvɨ kɨ a ɨntweŋ nɨ̀ Judà.

À læ̀ nà saʼ kɨ woyn ghya saʼ ɨ̀fôyn,

nô ta ka wul ɨ̀ vzɨ̀ a wù n-kelɨ ɨfôyn ateyn læ gvì a

tɨlaʼtɨ na yvɨ kɨ sɨ̂ ŋweyn.

¹¹Wù læ̀ na kelɨ ɨ̀nkâʼ mɨ̀ gɨ̀lêbsɨ̀ kɨ̀ sɨ idvɨ̀,

chfɨŋ njàkâysɨ ŋweyn kɨ̀ nô a tɨfyas tɨ jûŋtɨ̀.

Wù læ̀ nà sû ndzɨsɨ ŋweyn nɨ̀ mɨ̀lùʼ,

sû dàla sɨ ŋweyn kɨ nɨ̀ mɨ̀lùʼ mɨ̀ gɨ̀lêbsɨ̀.

¹²Wù læ̀ nyvɨ mɨ̀lûʼ a asɨ a ŋweyna na ghɨ kɨ mɨ̀lûʼ,

Wù læ̀ nyvɨ ìgheyn i nyâm a asoŋ a ŋweyna nà fɨf kɨ tèyn.

¹³Zebulùn læ̀ nà chî a mbæ̀ jvà ighaʼnɨ,

a ngùʼsɨ ghaʼlɨnɨsɨ na sɨ gvi timi afu.

Ighami i ŋweyni læ̀ nà ndû chem a Sidòn.

¹⁴Isakà nɨ̀n kelɨ àdyaʼ ta njàkâs

ɨlvɨ ta yì bèʼì ɨfwo ɨ̀ bol ɨ̀ nyìŋì a nse nà yvɨ̂tɨ̀-à.

¹⁵Wù læ̀ yeyn na alêʼ a yvɨtɨnɨ-a nɨ̀ ŋweyna nɨn jofà, nse ateyn fî jofà ɨ̀ bɨ̀mi sɨ nà felɨ akôs.

¹⁶Dan læ̀ nà saʼ fu nsaʼsɨ ghelɨ ŋweyn kɨ̀mɨ ta ntèʼsɨ Isìlæ̀ sɨ lisɨ.

¹⁷Dan læ̀ nà ghɨ tèyn ta mbam a mbæ̀ dzɨ, nyam kfaŋ se sɨ chwò yi lum ichɨŋlɨ ateyn yi làŋ wul vzɨ̀ a wù n-ghɨ atu àteyn, wu fe nɨ̀ ìbam i.”

¹⁸Jàkôb nɨn læ taŋi tî ɨ jèm ɨ bè na, “Ô Bôbo, mɨ n-chwotɨ̂ na wà bœsɨ ma.”

¹⁹Wù n-be meyn na, “Anôyn a ghelɨ ghɨ choŋnɨ a li-a læ̀ gvî sɨ nu Gâd

mɨtì a wù to chwò àŋena ɨ̀ nyɨŋ a àŋena ibàm.

²⁰Ɨfwo ɨ yɨnɨ nɨ̀ Ashà læ nà jofà.

Wù læ nà felɨ̀ ɨ̀fwo ɨ yɨnɨ wu jôf kfeynɨ̂ na tɨfôyntɨ̀ na yɨ-a.

²¹Naftalì læ̀ nà ghɨ tèyn ta fɨchue fɨ ki fɨ, bzɨ̂ woyn ghɨ jôblɨ̀ kɨ tèyn, jelɨ̀ kɨ ta wù n-kôŋ.

²²Josèf læ̀ nà ghɨ ta fɨkaʼfɨ gɨ̀lêbsɨ̀ fìfɨ̀ a fɨ n-faytɨ kola a mbæ̀ jvà

ma tɨfyaytɨ ateyn tɨ lo meyn kòʼ a ɨwùm.

²³Mbàynɨ̀sɨ ŋweynsɨ læ̀ gvî nû ŋweyn nô nɨ̀ ɨ̀toŋ ɨ yafɨnɨ ɨ̀ tɨ̀mlɨ ŋweyn nô nɨ̀ àdyaʼa.

²⁴Mɨtì wù læ̀ nà to kɨ to bòm àdyaʼ a Fɨyini fɨ ngaŋtɨnɨ fɨ nɨ̀ Jàkôb ɨ nchì ŋweyn nɨ̀ àlêʼ a leytɨnɨ-a nɨ̀ ghelɨ Isìlæ̀.

²⁵Yi n-læ̀ nà ghɨ tì bòm ta Fɨyini femfɨ ɨ bò ɨ̀dwaʼ ɨ̀ jɨ̀m nɨn læ̀ gâmtɨ̀ và, fì bòysɨ và. Wu n-læ̀ boysɨ̂ và ɨ̀ sùʼsɨ ìvɨ ɨ̀ nì a jvasɨ fvɨ a nse. Wà læ̀ nà kelɨ woyn kɨ̀ sɨ idvɨ̀ baʼsɨ̂ nɨ̀ nyamsɨ. ²⁶Ɨfwo vzɨ̀ a mɨ n-jêm na Fɨyini fɨ boysɨ vâ nɨ̀ ɨ̀ŋweyn nɨn jôf chwô tɨ̀boysɨ tìtɨ̀ a tɨ n-læ meyn nà sɨ ghɨ a kfɨynsɨ nô sɨ ɨtuʼ ɨmu. Tɨboysɨ nâ tèyntɨ̀ gvi sɨ̂ Josèf nô tɨ̀ jɨ̀m bòm ta wù n-ghɨ sɨ a nyɨŋ antêynɨ̀ nɨ woynà ŋweyn.

²⁷Benjamìn nɨn ghɨ kɨ ta bɨ ɨ̀twaʼ.

Wù n-bɨsɨ seʼ tɨm zue mbàynɨ̀ ŋweyn,

à nî nà ghɨ aleŋ ɨlvɨ ikfa wu gwòtɨ̀ ɨ̀fwo vzɨ̀ a wù kfa nɨ̀ ɨ̀ŋweyn.”

²⁸Woyn Jàkôb nâ ghèyn nô ghɨ̀ jɨ̀m tèyn ti n-ghɨ ntèʼsɨ Isìlæ̀ njvàsɨ̀ bò nɨ̀ àtef kì a bò àŋena nɨn læ tef àŋena nɨ̀ ànkeyna. Wu nà n-bê nô mɨ na gha sɨ̂ wùl, yi kfeynɨ̂ kɨ sɨ̂ ŋweyn.

Jàkôb ɨ kfɨ

²⁹Jàkôb nɨn læ taŋi mèsi ɨ bè sɨ̂ woyn ŋweyn na, “Ɨlvɨ̂ wom kfeyn meyn ta ka mà kfa yèyn ghelɨ̀ ghem. Ma kfɨ yi gvɨ̀mì kɨ ma a ngùŋ nɨ̀ ghɨ̀bo ghem a ifò ghè a yi n-ghɨ a gvêyn nɨ̀ Eflòn ɨ wul ɨ̀ Hêt tì. ³⁰Abɨ̀làhâm nɨn læ yuyn ifô ateyn sɨ a gvɨ̀misɨ a Makbelà baʼsɨ̂ kɨ nɨ̀ gvèyn a ngùŋ Mamlè a Kenàn. Wu n-læ yuyn sɨ̂ Eflòn ɨ wul ɨ̀ Hêt. ³¹Ghɨ n-læ gvɨ̀mi Abɨ̀làhâm afu ŋêyn wî ŋweyn Sèla ɨ gvɨ̀mì kɨmɨ Yisàk afu ŋêyn wî ŋweyn Làbikà. Liyà ɨ læ kfɨ, ma gvɨ̀mi kɨ afu. ³²Alêʼ nâ kì baʼsɨ̂ nɨ̀ ìfô nâ zɨ̀ nɨn ghɨ ma ghɨ n-læ yuyn sɨ̂ ghelɨ Hêt.” ³³À nà n-ghɨ ta Jàkôb tèbtɨ mèsì woyn ŋweyn nô mɨ ɨlvɨ gha ɨ koʼsɨ ɨ̀vɨ ŋweyn a ɨkuyn, ɨ tɨm azue a goʼsɨnɨ-a ɨ kfa yeyn ghɨ̀bo ŋweyn.