Genesis 43

Woynà Josèf ɨ kasi kàlì a Ijìb

¹Jeŋ ì bemnɨ zɨ̀ a yi n-ku tî nà n-bu ghɨ kɨ ghɨ a Kenàn. ²A nà n-ghɨ ta Jàkôb ŋêyn ghelɨ ŋweyn yɨ mèsì ɨ̀fwo ɨ yɨnɨ vzɨ̀ a ghɨ n-gvi nɨ̀ ŋweyn a Ijìb tì, wu bè sɨ̂ woyn ŋweyn na, “Yì kasi ndù yuyn kfèynsɨ ɨfwo ɨ yɨnɨ ɨlvɨ sɨ̂ ghesɨ̀nà.”

³Judà ɨ bè sɨ̂ bò ŋweyn na, “Wùl ɨ̀ vzɨ̀ a wù n-saʼ ilaʼ nâ zɨ̀-i ti meyn fu nfàsì nfàsì sɨ̂ ghès na, ‘Ka isɨ ì yemi fî kù zɨ, a bu kɨ na yi gvi meyn nɨ̀ wâynà vzɨ ɨ̀twelâ.’ ⁴Wà kæ visi Benjamìn na ghesɨ̀ àŋena kali amoʼ, a ghèsɨ̀ kali ɨ̀ yuyn ɨfwo ɨ yɨnɨ. ⁵Mɨtì wà kæ faŋ tɨ̀ vìsi na ghèsɨ̀ àŋena ndu amoʼ, ghèsɨ bû ndù bòm ta wùl nâ vzɨ̀ ti meyn bè na ka isɨ ŋweyni fî ku ghes a bu kɨ na ghèsɨ gvi meyn nɨ̀ wâynà wes.”

⁶Isìlæ̀ ɨ bɨf sɨ̂ àŋena na, “À ti ngeʼ ì kà a yì we ma ateyn tèyn a, bòm ghà ta yì tî fèʼtɨ̀ sɨ̂ ŋweyn na yi n-kelɨ wâynì ɨlvɨ̀ a?”

⁷Àŋena ɨ bè na, “Wùl ɨ̀ àteyn ti meyn bɨ̀btɨ àwo sɨ̂ ghès kɨ̀ sɨ idvɨ̀ kûm ghès nɨ̀ ghelɨ̀ ghesɨ. Wù ti meyn bɨf na, ‘Bò wes bu ghɨ a,’ fì bɨf na, ‘Ghès nɨn kelɨ wâynì ɨlvɨ̀ a?’ Ghesɨ bêynsɨ̀ kɨ awo kì a wù bɨf sɨ̂ ghès. Ghesɨ bu tî nà kya na wu n-bê na ghèsɨ̀ ndu lì gvì nɨ̀ wâynà wes.”

⁸Wu n-tàŋi tî ɨ chwotɨ bò ŋweyn Isìlæ̀ ɨ bè na, “Visi wayn ateyn sɨ̂ mà ghesɨ àŋena lu kɨ̀ lvɨ̂yn bu tì a ghesɨ̀nà kfɨ jeŋ, baʼsɨ̂ nɨ̀ woyn ghesɨ. ⁹Wà vìsi ŋweyn sɨ̂ mà a mà toʼnɨ nɨ̀ ŋweyn a iwo faŋ tɨ gâyn sɨ ŋweyn. Mà kæ ɨ̀ ndù ɨ̀ faŋ tɨ kasi sɨ gvì nɨ̀ ŋweyn sɨ̂ và, a mɨ̀luŋ mɨ̀ ŋweyn faŋ a ma atu nô ta ka mà læ̂ kfɨ. ¹⁰Ghèsɨ nà n-gvî na wà visi ghesɨ̀ ghɨ̀ Benjàmìn kasi kɨ̀ kasi, ma ghèsɨ̀ sɨ ghɨ ma ghɨ ndu meyn a Ijìb nô ìngal ì bò.”

¹¹Bò àŋena Isìlæ̀ ɨ kæ bè na, “Yi kæ nà sɨ ghɨ kɨ na zɨ̂ àŋena nɨn lù kɨ amoʼ, yi kini læ̂ nô ɨfwo ɨ jûŋ vzɨ̀ a ghesɨ̀nà nɨn kelɨ ilaʼ afêyn ɨ we a yi a bòsɨ̀, ɨ ndù fu sɨ̂ wùlɨ̀ nâ vzɨ̀. Yì li mɨyisi ɨ̀nlɨ̀mtɨnɨ̂ nɨ̀ ɨ̀lû baʼsɨ̂ nɨ̀ mɨ̀tam ɨ̀n lì ɨ̀ ndù nɨ̀ ɨ̀mêyn. ¹²Yì li ɨ̀ yòmtɨ ɨ̀kwo, bòm ta yi n-kelɨ sɨ ndù sɨ fu ɨkwo ɨfwo ɨ yɨnɨ vzɨ̀ a ghɨ n-læ kasi we a yi a bòsɨ̀ tî. À kàʼ a à na ghɨ ma ghɨ n-læ jas jasɨ. ¹³Yì li kɨ̀mɨ wâynà vzɨ Benjamìn nyàŋsɨ kasi ndù yeyn wul ateyn kɨ̀ lvɨ̂yn. ¹⁴Mɨ n-jêm na Fɨyini fɨ ɨ bò ɨ̀dwaʼ ɨ̀ jɨ̀m ni wùl ɨ̀ nâ vzɨ̀ koynsɨ isuyn ɨ̀ vìsi wâynà vzɨ vzɨ̂ ŋêyn Benjamìn, zɨ̂ àŋena kasi kfa kɨ̀ amoʼ. Wùl ɨ̀ kfɨ, wù kfɨ meyn.”

¹⁵Jàkôb nɨn taŋi tî nô mɨ ɨlvɨ gha, àŋena ɨ lì ɨfwo ateyn ɨ fi li yomtɨ ɨ̀kwo ɨfwo ɨ yɨnɨ ŋêyn ghɨ̀ Benjamìn ɨ nyaŋsɨ lù kɨ lu ɨ kàlì sɨ yeyn Josèf a Ijìb. ¹⁶A nà ghɨ ta Josèf yeyn Benjamìn ŋêyn àŋena nô mɨ ɨlvɨ gha ɨ bè kɨ sɨ̂ wùl vzɨ̀ a wu nà n-tisɨ ghelɨ ghɨ felɨnɨ a ŋweyn a ndo na, “Li ndu nɨ̀ ghelɨ ghèyn a ma ndo. Wà ndû wa sɨ nyam ɨ kfè ɨ̀fwo ɨ yɨnɨ bòm ta mɨ n-yɨ ghesɨ̀ àŋena amoʼ nɨ̀nchùe.”

¹⁷Wùl àteyn ɨ lì ɨ ndù nɨ̀ àŋena a ndo nɨ̀ Josèf kɨ̀ ta wù bè. ¹⁸Woynà Josèf ɨ nà sɨ faynà kfâʼ na, ghɨ n-ndû nɨ̀ àŋena afu bòm ɨ̀kwo vzɨ̀ a ghɨ n-læ kasi we a àŋena bòsɨ̀ tî. Àŋena nà n-kfâʼ na wù n-kɨŋ sɨ fsɨtɨ njàkâysɨ àŋena, sɨ ghal sɨ lem àŋena sɨ ɨkòs.

¹⁹A nà ghɨ ta ifayn ì ku àŋena tî, àŋena ɨ ndù ɨ nà sɨ taŋî sɨ̂ wùl ɨ̀ vzɨ̀ a wù n-tisɨ ghelɨ ghɨ ɨ̀ felɨnɨ nɨ̀ Josèf ɨchfɨ ndo bê na, ²⁰“Ghès nɨn kumî ɨ̀wuyn a bôbo na, ghès nɨn gvi meyn ɨ yuyn ɨfwo ɨ yɨnɨ afêyn sɨ asɨ, ²¹ɨ kasi se sɨ kfa ɨ jèl ɨ ndu chem alèʼ a li-a ɨtuʼ jɨ, ghèsɨ timi sɨ chi, ɨ se sɨ yàsɨ bò seysɨ ɨ kasi yeyn kɨ ɨkwo vzɨ̀ a ghès nì yuyn ɨfwo ɨ yɨnɨ ateyn a ghès a bòsɨ̀. Ghèsɨ kasi meyn gvì nɨ̀ ɨ̀ŋweyn sɨ fu. ²²Ghès nɨn kya wi na à n-læ kasi we nda ɨkwo ateyn a ghès a bòsɨ̀ a. Ghesɨ gvi meyn kɨmɨ nɨ̀ ɨ̀kwo ɨlvɨ sɨ yuyn ɨfwo ɨ yɨnɨ ateyn.”

²³Wùlɨ̀ àteyn ɨ bè sɨ̂ àŋena na, “Ngeʼ nɨn ghɨ wi, ka yì fî fàyn. Mɨ n-læ meyn fsɨ ɨkwo vzɨ̀ a yì n-læ gvì nɨ̀ ɨ̀ŋweyn. À n-læ we Fɨyini fifɨ, ɨ Fɨyini fɨ bò vzɨ ɨ we ìghaʼ nâ zɨ̀ a yi a bòsɨ̀.” Wu n-taŋi tî nô mɨ ɨlvɨ gha ɨ ndu fvɨsɨ gvì nɨ̀ Simìyòn.

²⁴Wu n-nì tî ɨ li zɨ nɨ̀ àŋena a ndo nɨ̀ Josèf ɨ fu mu àŋena sù ɨ̀vɨ ateyn, ɨ fu kɨmɨ ɨ̀fwo ɨ yɨnɨ sɨ̂ njàkâysɨ àŋenasɨ. ²⁵Àŋena yvɨ na Josèf nɨn gvì yɨ ŋêyn àŋena amoʼ nɨ̀nchùe, ɨ baʼtɨ tìfu tìtɨ̀ a àŋena nà n-kelɨ sɨ̂ Josèf ta ka wu gvi a àŋena fu sɨ̂ ŋweyn.

²⁶Josèf ɨ ni gvì a ndo nô mɨ ɨlvɨ gha àŋena ɨ fu tɨfu tìtɨ̀ a àŋena nì gvì nɨ̀ ɨ̀nteyntɨ sɨ̂ ŋweyn ɨ timi a ŋweyn asɨ, ɨ chfɨŋsɨ ɨ̀tu àŋena a nse. ²⁷Wu toŋtɨ àŋena ɨ bɨf na, “Bò vzɨ vzɨ̀ bà a yì tî bè na wù dvɨyn meyn tì a? Wù bu ghɨ a?”

²⁸Àŋena ɨ be na, “Bò wes ɨ wul ɨ̀ felɨnɨ nɨ̀ và bu ghɨ, ghɨ kɨ nô ɨwuyn ɨtwo.” Ta àŋena tàŋi tî ɨ ngvɨmtɨ a nse sɨ gvɨmlɨ ŋweyn.

²⁹Josèf ɨ ki ndùsɨ̀ ɨ yeyn Benjamìn, kɨ̀ nô wâynà ŋweyn ɨlvâ ɨ̀mòʼ ɨ bɨf na, “Ɨwêyn nɨ̀n ghɨ àngòʼsɨ̀ à ki-a kì têyn ma?” Wu n-bɨf tî ɨ bè sɨ̂ Benjamìn na, “Fɨyini fɨ boysɨ vâ a wayn wom.” ³⁰Josèf nɨn læ yeyn Benjamìn nô mɨ ɨlvɨ gha, isuyn i kola ŋweyn nô sɨ a ŋaŋ, mɨ̀sɨ̂ ɨ nà sɨ gvì a ŋweyn asɨ, wu nyaŋsɨ fvɨ̀ ɨ ndu zɨ dùʼì a ndo ì chinɨ nɨ̀ ŋweyn, ɨ dzɨ̀.

³¹A nà ghɨ ta wù dzɨ̀ chìmi, wu sù ìkêʼ ɨ ghal ngeŋ ŋweyn ɨ fvɨ gvì ɨ bè na, “Yì chwosɨ ɨfwo ɨ yɨnɨ vzɨ̀.”

³²Ghɨ chwòsɨ̀ ɨfwo ɨ yɨnɨ nɨ̀ Josèf sɨ a nyɨŋ ɨ chwòsɨ̀ ɨ wu woynà ŋweyn sɨ a nyɨŋ, ɨ chwòsɨ̀ ɨ wu ghelɨ Ijìb ghì a ghɨ nà n-yɨ ŋêyn àŋena kɨ̀ sɨ a nyɨŋ. Àŋena nɨn læ ni tî bòm ta ghelɨ Ijìb nà n-lum yɨ wi ŋêyn ghelɨ Hibɨ̀lù amoʼ bòm ta àŋena nà n-kôŋ wì ghelɨ Hibɨ̀lù. ³³A nà n-ghɨ tì ma woynà Josèf duʼi meyn asɨ nɨ̀ Josèf kɨ̀ sɨ a ibzɨ, sɨ zɨ̀tɨ̀ kɨ a wul ɨlwema sɨ kàlì sɨ chem a àngòʼsɨ̀. Àŋena nà sɨ ki ngeŋsɨ, ghɨ nɨ̀ ìkayni. ³⁴Ghɨ se sɨ yɨ, Josèf ɨ bè na ghɨ li ɨfwo ɨ yɨnɨ a ŋweyn asɨ ɨ gwòtɨ̀ sɨ̂ woynà ŋweyn. Ghɨ gwòtɨ̀ ɨ we ɨ wu Benjamìn wu dvɨ̂ chwô nô mɨ wu nda sɨ chem ìngal ì tâyn. Àŋena ɨ yɨ ɨ nyvɨ ŋêyn ghɨ̀ Josèf ɨ kfeyn kɨ ta àŋena nɨn kôŋ.