Genesis 40

Josèf ɨ fèʼtɨ̀ jemsɨ

¹A læ nà ghɨ achi a li-a, wul ɨ̀ vzɨ̀ a wù n-we mɨlûʼ a bom nɨ̀ fòyn Ijìb, nɨ̀ wùl ɨ̀ vzɨ̀ a wu nà n-ghayn ɨfwo ɨ yɨnɨ sɨ̂ fòyn ɨ nì ɨ bebsɨ ìwo sɨ̂ ŋweyn. ²Fòyn ɨ nyòʼsɨ̀ ɨ̀toŋ sɨ̂ ghelɨ ghɨ felɨnɨ nɨ̀ ŋweyn nâ ghì ghɨ̀bò, ³ɨ bè ghɨ ndu fò àŋena a ndô nchaʼ ghè a atu a nchìsɨ ntoʼ nà n-kini ghelɨ ndô nchaʼ ateyn, a ghɨ kɨmɨ àlêʼ kì a ghɨ n-fò Josèf ateyn. ⁴Àŋena chi afu sɨ aleŋ ɨlvɨ, atu a nchìsɨ̀ nâ kì-à ɨ choʼ Josèf na wù na kinî àŋena. ⁵A læ nà ghɨ nɨ̀ntuʼ achi a li-a, jemsɨ ɨ chɨ ghelɨ ghɨ felɨnɨ nɨ̀ fòyn nâ ghì ghɨ̀ bò, nô mɨ ɨ yi ndà ɨ dyêyn kɨ ìwo sɨ a nyɨŋ.

⁶Ɨtuʼ ɨ layn, Josèf ɨ gvi yeyn àŋena koynsɨ̂ kêʼ kɨ tèyn. ⁷Wu bɨf sɨ̂ àŋena na, “Yi n-koynsɨ̂ kêʼ tèyn bòm ghà?”

⁸Àŋena bè na, “Jemsɨ tî kfa ɨ̀ chɨ̀ ghes mɨtì wùl ɨ ghɨ wi sɨ fèʼtɨ na sɨ n-bê na gha a?” Josèf ɨ bè sɨ̂ àŋena na, “À n-ghɨ kɨ Fɨyini a fɨ kàʼ a fɨ feʼtɨ na jemsɨ nɨn bê na gha a? Yì feʼtɨ na jemsɨ ateynsɨ tî chɨ̀ zɨ na gha a?”

⁹Wùlɨ̀ vzɨ̀ a wù n-we mɨlûʼ a bom nɨ̀ fòyn ɨ kæ be sɨ̂ Josèf na, “Jèm tî chɨ̀ ma, ma yeyn fɨ̀kâʼ fɨ gɨ̀lêbsɨ̀ a ma asɨ, ¹⁰fɨ kelɨ tɨ̀fyas tɨ̀ tal. Fɨkâʼ fɨ ateynfɨ sâm ɨ̀ kòla mɨ̀tam, mɨ̀ bâŋ kɨ̀ sɨ ɨlvɨ. ¹¹A ghɨ tì bom fòyn Ijìb ɨ ghɨ a ma awu, ma kœ̂ mɨ̀tam mɨ̀ àteyn ɨ̀ kàm a bom nâ ghè ɨ̀ fù sɨ̂ fòyn.”

¹²Josèf ɨ kæ be sɨ̂ ŋweyn na, “Tɨfyas tìtɨ̀ tɨ̀ tal nɨn dyêyn mɨ̀chi ɨ̀n tal. ¹³À na ghɨ ibàm i mɨchi ɨ̀n tal, a fòyn fvɨsɨ vâ sɨ a nchaʼ ɨ̀ kàsi lèm và kɨ̀ ɨchfɨ ifèl nɨ̀ và, a wà na wê mɨ̀lûʼ mɨ̀ ŋweyn kɨ̀ ta wà tî nà we. ¹⁴Mɨtì wà fvɨ̂ sɨ a nchaʼ awo à kya na sɨ jelɨ̀ kɨ nô a jûŋ, ka wa n-lèysɨ̀ mà. Dyèyn atem a juŋà sɨ̂ mà ɨ taŋi sɨ̂ fòyn kûm mà ta ka mà fvɨ sɨ a nchaʼ afêyn. ¹⁵Ghɨ n-læ ghal ma sɨ adyaʼ a ghès ilaʼ ɨ gvì nɨ̀ mà afêyn bula ma bebsɨ ìwo. À na sɨ fì ghɨ afêyn ghɨ fô mà a nchaʼ bula ma bebsɨ ìwo.”

¹⁶A nà ghɨ ta wùl ɨ̀ vzɨ̀ a wù n-ghayn ɨfwo ɨ yɨnɨ nɨ̀ fòyn yvɨ̀ ta Josèf fàytɨ fèʼtɨ jem wùl ɨ̀ vzɨ̀ a wù n-we mɨlûʼ mɨ̀ fòyn, wu bè sɨ̂ Josèf na, “Jem ti meyn boŋ chɨ̀ ma. Yì tî chɨ ma ghɨ nɨ̀ kelsɨ abayn sɨ̀ tal a ma atu. ¹⁷Kel zɨ̀ a yì koʼ gòʼsɨ̀ ɨ kelɨ tɨ̀nki tɨ ɨfwo ɨ yɨnɨ nɨ̀ fòyn kɨ̀ sɨ a idvɨ̀. Mɨtì mɨ̀nyûyn gvî yɨ kɨ antêynɨ̀ kel nâ ghè a ma atu.” ¹⁸Josèf ɨ bè sɨ̂ ŋweyn na, “Kel nâ sìsɨ̀ sɨ̀ tal nɨn dyêyn mɨ̀chi ɨ̀n tal. ¹⁹À na ghɨ ibàm i mɨchi ɨ̀n tal, a fòyn fvɨsɨ vâ sɨ a nchaʼ ɨ̀ teyn atu à kya ɨ̀ ghàŋsɨ ìgvɨyn ì zæ atû fɨ̀kàʼ, a mɨ̀nyûyn na chufa.”

²⁰A nà ghɨ ibàm i mɨ̂chi ɨ̀n tal a ghɨ àchi i bzɨ nɨ̀ fòyn, wu jàŋ ghelɨ ghɨ felɨnɨ nɨ̀ ŋweyn na àŋena gvi yɨ achi ibzɨ nɨ̀ ŋweyn. A nà ghɨ ta àŋena nɨn yɨ, wu fvɨ̀sɨ̀ ghelɨ ghɨ felɨnɨ nɨ̀ ŋweyn ghì ghɨ̀bò sɨ a nchaʼ. ²¹Ta wù fvɨ̀sɨ̀ tî ɨ kasi lèm wul vzɨ̀ a wù tî nà wê mɨlûʼ a bom nɨ̀ fòyn ɨchfɨ ifèl nɨ̀ ŋweyn ta ka wù na wê mɨ̀lûʼ a bom nɨ̀ fòyn kɨ̀ ta wu nà n-we. ²²Mɨtì ɨ bè na ghɨ teyn atu a wûl vzɨ̀ a wù nà n-ghayn ɨfwo ɨ yɨnɨ sɨ̂ ŋweyn tì ɨ̀ ghàŋsɨ ìgvɨyn i ŋweyn atû fɨ̀kàʼ kɨ ighel ta Josèf nɨ̂n bè ta wù nà n-fêʼtɨ jem sìsɨ̀ sɨ̂ àŋena.

²³Yi n-gàyn tî, wùl ɨ̀ vzɨ̀ a wù nà n-we mɨlûʼ a bom nɨ̀ fòyn ɨ lèsɨ kɨ lesɨ Josèf.