Genesis 30

¹A nà ghɨ ta Liyà sɨ bzɨ tî, Lashèl ɨ nà sɨ ghèʼ ŋweyn bòm ta wu nà n-kelɨ wi nô wayn ɨ̀ mòʼ ɨ kæ bè sɨ̂ Jàkôb na, “Fu wayn sɨ̂ mà a bu tì a mà kfɨ.”

²Jàkôb ɨ nyòʼsɨ̀ ɨ̀toŋ ɨ bɨf na, “Wa bê tì ma mɨ n-ghɨ Fɨyini fìfɨ̀ a fɨ nì na ka wà na bzɨ-à ma?”

³Lashèl ɨ bè sɨ̂ Jàkôb na, “Lì Bilhà ɨ wayn ɨ̀ felɨnɨ nɨ̀ mà wêyn ɨ chi nɨ̀ ŋweyn ta ka wù bzɨ woyn sɨ̂ mà, mà na boŋ kelɨ-a.”

⁴Wu taŋi tì ɨ li fu Bilhà Jàkôb ɨ chi nɨ̀ ŋweyn, ⁵wu timi ɨlvâ ɨ bzɨ wayn ɨ̀ lûmnɨ̀ ŋêyn ŋweyn. ⁶Lashèl ɨ kæ bè na, “Fɨyini fɨ saʼ meyn fù nsaʼ yem. Wù yvɨ meyn ijêm ì yemi ɨ̀ fù wayn ɨ̀ lûmnɨ̀ sɨ̂ mà.” Wu taŋi tèyn ɨ kæ chfɨ̀ izɨyn i wayn àteyn na Dan.

⁷Bilhà ɨ fi timi ɨlvâ ɨ bzɨ kfeynsɨ wayn ɨ̀ lûmnɨ̀ ŋêyn Jàkôb. ⁸Wu n-bzɨ tî Lashèl ɨ kæ bè na, “Ghesɨ̀ wâynà wom nû meyn chwòsɨ̀. Ma to meyn ɨ̀ chwò ŋweyn.” Wu taŋi tì ɨ kæ fu izɨyn i wayn àteyn na Naftalì.

⁹À nà n-ghɨ ta Liyà yeyn na yi bu bzɨ̂ wì ɨ lì Zilbà ɨ wayn ɨ̀ felɨnɨ nɨ̀ ŋweyn ɨ fu sɨ̂ Jàkôb sɨ a wi. ¹⁰Zilbà ɨ bzɨ wayn ɨ̀ lûmnɨ̀ ŋêyn Jàkôb. ¹¹Liyà ɨ bè na, “Iwo i lù wo a yi n-jofɨ̀ têyn a?” Ta wù tàŋi tî ɨ kæ chfɨ̀ izɨyn i wayn àteyn na Gâd.

¹²Zilbà ɨ fi bzɨ kfeynsɨ wayn ɨ̀ lûmnɨ̀ ŋêyn Jàkôb. ¹³Liyà ɨ bè na, “Iwo i nɨn fom ti a ma ɨwùyn teyn a? Ghɨ̀ki na sɨ toŋtɨ̂ kɨ mà lvɨ̂yn na isaŋlɨ-i.” Ta wù tàŋi tî ɨ chfɨ̀ ìzɨyn i wayn àteyn na Ashà.

¹⁴A nà ghɨ ta ghɨ n-sɨ wît, Lubèn ɨ seʼ a gvêyn ɨ yeyn afûʼ a li-a ghɨ toŋtɨ̂ na mandɨ̀lèk, kɨ nî na ghɨ̀ki na bzɨ-à ɨ kɨŋ kfa fu sɨ̂ nà ŋweyn Liyà. Lashèl ɨ bè sɨ̂ Liyà na, “Fu ma nɨ̀ àfûʼ a mandɨ̀lèk nɨ̀ wâyn vâ a li-a.”

¹⁵Liyà ɨ bèynsɨ̀ ɨ bè na, “Ba wà ti sɨ fî kɨŋ sɨ fsɨ afûʼ a mandɨ̀lèk nɨ̀ wâyn wom na wà tî fsɨ̀ lûm wom wù faŋ tɨ kfeyn sɨ̂ và ma?” Lashèl ɨ be sɨ̂ ŋweyn na, “Wà kæ fu sɨ̂ mà, a mà visi a Jàkôb nî kfa chi nɨ̀ và layn.”

¹⁶Wu n-tàŋi tî, Jàkôb ɨ ni kfa sɨ a gvêyn, Liyà ɨ ndu bè sɨ̀ ŋweyn na, “Wà n-kelɨ sɨ chi nɨ̀ mà layn. Mà sɨ ghɨ ma ma ni meyn laʼ na wà chi nɨ̀ mà nɨ̀ àfûʼ a mandɨ̀lèk nɨ̀ wâyn wom a.” Jàkôb ɨ ni kfa chi nɨ̀ ŋweyn achi nâ ghè.

¹⁷Fɨyini fɨ ɨ yvɨ ijêm i Liyà wu timi ɨlvâ ɨ bzɨ kfeynsɨ wayn ɨ̀ lûmnɨ̀ ɨlvɨ̀ ŋêyn Jàkôb na ghɨ na sɨ ghɨ ghɨ̀ tâyn. ¹⁸Wu n-bzɨ tî ɨ bè na, “Fɨyini fɨ maʼtɨ meyn mà ta mà tî fù wayn ɨ̀ felɨnɨ nɨ̀ mà sɨ̂ lûm wom sɨ a wi.” Wu taŋi tì ɨ chfɨ̀ ìzɨyn i wayn àteyn na Isakà.

¹⁹Liyà nɨ̀n fi meyn timi ɨlvâ ɨ bzɨ kfeynsɨ wayn ɨ̀ lûmnɨ̀ ŋêyn Jàkôb na à na sɨ ghɨ woyn ntufa. ²⁰Wu kæ bè na, “Fɨyini fɨ fu meyn ìfu i juŋì sɨ̂ mà. Lûm wom na sɨ ngvɨmlɨ̂ mà lvɨ̂yn bòm ta ma bzɨ meyn woyn ghɨ lûmnɨ̀ ntufa ghesɨ̀ ŋweyn.” Liyà ɨ taŋi tì ɨ kæ chfɨ̀ izɨyn i wayn àteyn na Zebulùn.

²¹Wu n-bzɨ Zebulùn tì ɨ chitɨ kɨ têyn ɨ bzɨ kfeynsɨ wayn ɨ wi ɨ chfɨ̀ ìzɨyn i ŋweyn na Dinà.

²²Fɨyini fɨ koynsɨ̂ ìsuyn sɨ̂ Lashèl ɨ nì wu nà sɨ bzɨ-à, ²³Lashèl ɨ timi ɨlvâ ɨ bzɨ wayn ɨ̀ lûmnɨ̀. Wu n-bzɨ tì ɨ kæ bè na, “Fɨyini fɨ lisi meyn ìwumi sɨ a ma atu.” ²⁴Wu n-tàŋi tî ɨ kæ chfɨ̀ izɨyn i wayn àteyn na Josèf bê na, “Mɨ n-jêm na Bôbo fu kfèynsɨ wayn ɨ̀ lûmnɨ̀ sɨ̂ mà.”

Jàkôb ɨ keli kfeynsɨ bzɨsɨ

²⁵À nà n-ghɨ ta Lashèl bzɨ Josèf tì, Jàkôb ɨ ndu bè sɨ̂ Labàn na, “Visi ma mà kasi kfa a ghès ilaʼ. ²⁶Fu ghɨ̀ki ghem nɨ̀ wôyn ghem ghesɨ̀ àŋena lu. Ma felɨ meyn sɨ̂ và sɨ keli ghɨ̀kì nâ ghèyn. Nô và n-kya dzɨ zɨ̀ a ifêl ì yemi gàmtɨ̀ vâ ateyn.”

²⁷Labàn ɨ bè sɨ̂ ŋweyn na, “Mɨ n-chwotɨ̂ và, wà na kôŋ kɨ nô mà, ka wa n-lù. Ma kitɨ meyn ɨ̀ yeyn kɨ̀ nô samoʼ na Bôbo Fɨyini boysɨ meyn mà toynɨ̂ a vâ.” ²⁸Wù n-fi meyn bè sɨ̂ Jàkôb na, “Fèʼtɨ afo kì a wà n-kɨŋ na mà laʼ vâ nɨ̀ ànkeyna mà laʼ sɨ̂ và.”

²⁹Jàkôb ɨ bè sɨ̀ ŋweyn na, “Nô và n-kya ìfêl zɨ̀ a mà fèlɨ̀ sɨ̂ và, kya ta mà tòʼnɨ̀ nɨ̀ nyâm shyasɨ. ³⁰Mɨ n-læ gvì afêyn nyam shyasɨ læ̂ kɨ tèyn, à na sɨ ghɨ lvɨ̂yn wa kelɨ nyamsɨ kɨ̀ sɨ a idvɨ̀. Nô mɨ a wo ta mà fèlɨ̀ sɨ̂ và, Bôbo boysɨ meyn và. Mà sɨ boŋ kɨŋ sɨ nà felɨ sɨ̂ ghelɨ ndo nɨ̀ mà lvɨ̂yn.”

³¹Labàn ɨ bɨf sɨ̂ Jàkôb na, “Wà n-kɨŋ na mà laʼ nô và nɨ̀ ghà?” Wu bèynsɨ̀ ɨ bè na, “Ka wa n-fu afo a li-a sɨ̂ mà, mɨtì iwo i nɨn ghɨ ìmòʼ a wà kæ nì sɨ̂ mà, a mà faŋ kɨ̀ afêyn nà tôʼnɨ̀ nɨ̀ nyâm shyasɨ. ³²Visi mà ndu antêynɨ̀ nyàmsɨ nɨ̀ và ɨ̀ tètɨ fvɨ̀sɨ̀ bzɨsɨ nyaylɨnɨsɨ nɨ̀ woyn njɨ̀sɨ fɨmlɨnɨsɨ nô sɨ̀ jɨ̀m kɨ̀mɨ nɨ̀ bzɨsɨ nyaylɨnɨsɨ nô sɨ̀ jɨ̀m ɨ̀ lì ta ka à na ghɨ na wà laʼ meyn mà.” ³³Mɨ n-lɨsɨ̂ wì lɨsɨ vâ, mà kæ sɨ tetɨ nyam nâ sèynsɨ̀, wà læ̂ yèyn bzɨ ateyn yi nyâl wì nyal kèsa njɨ̀ yi fɨ̂m wì fɨm, wa keli na mà chòŋ choŋ.

³⁴Labàn ɨ bè na, “Ma bɨmi meyn, mɨ ni kɨ ta wà bè.” ³⁵A nà ghɨ kɨ achi nâ ghè, Labàn ɨ tetɨ fvɨ̀sɨ̀ tɨ̀fef tɨ nyaylɨnɨtɨ nô tɨ̀ jɨ̀m baʼsɨ̂ nɨ̀ tɨ̀kfɨ tɨ bzɨsɨ, nô tɨ̀ jɨ̀m tɨ kelɨ ɨ̀lwêʼ ɨ fɨfâ. Wu n-læ meyn tetɨ kɨmɨ woyn njɨ̀sɨ fɨmlɨnɨsɨ nô sɨ̀ jɨ̀m ɨ baʼsɨ ateyn ɨ lèm woyn ŋweyn ɨ nà kini-à. ³⁶Wu n-læ tetɨ tî ŋêyn woyn ŋweyn ɨ lì nyamsɨ ateyn ɨ ndù nɨ̀ ɨ̀nseynsɨ a alèʼ ndèyn àteyn ɨ ghɨ ìjêl i mɨchi ɨ̀n tal sɨ lù alèʼ ghè a Jàkôb nà n-ghɨ ateyn. Jàkôb ɨ dùʼì ɨ nà kinî ɨsîsɨ̀ a sɨ faŋ. ³⁷Wu n-dùʼi tî ɨ teyntɨ àkœ ɨnkàʼ ayvɨ-à a fɨ̂kàʼ fɨ boblà nɨ̀ fɨ̀kâʼ fɨ almòn fɨ̀ kɨ̀mɨ nɨ̀ àkœ a fɨ̂kàʼ fɨ blanè ɨ chɨyntɨ yùmtɨ̀ jɨmsɨ ateyn kɨ̀ ɨlwèʼ ɨlwèʼ, ³⁸ɨ màʼ asɨ a mɨ̂kɨ̀ ghê a nyamsɨ nà n-nyvɨ mu ateyn ta ka sɨ na gvi-à ɨ̀ se sɨ nyvɨ akœ ɨnkàʼ ateyn a nà ghɨ kɨ a àŋena asɨ. Ɨlvɨ nà sɨ ni-à kfeyn ta ka nyamsɨ na ku-a, sɨ gvî sɨ yvɨ mu, ³⁹sɨ nà sɨ ku asɨ ɨnkàʼ nâ ghè. Sɨ nà n-ku tì, sɨ nà bzɨlɨ̂ woyn ghɨ nyâylɨ̀ kɨ tèyn ghɨli fɨblɨ-à fî fɨ̂mlɨ̀-à, ghɨ a wàmisɨ-a-wàmisɨ. ⁴⁰Sɨ nà n-bzɨ tì Jàkôb ɨ gwòsɨ̀ woyn ateyn ɨ lèm abâs àmòʼ ɨ lì ɨsîsɨ̀ a sɨ kfèyn meyn ɨ lèm abàs a li-a. Wù nà n-lêm tì sɨ nà se sɨ ku, wu nì sɨ kèʼnɨ̀ bzɨsɨ Labàn sìsɨ̀ a sɨ nà n-fɨ̂mlɨ̀ fî fɨblɨ-à tì. À ti ta wù nà n-nî kelî bzɨsɨ ngeŋ nɨ̀ ŋweyn. Wù nî tì wu tetɨ fvɨ̀sɨ̀ sɨ a antêynɨ̀ bzɨsɨ nɨ̀ Labàn. ⁴¹À nà n-ghɨ nô mɨ ɨlvɨ gha ta tɨkfɨ tɨ bzɨ tìtɨ̀ a tɨ n-kûylɨ̀ fî to-a nɨn ku, Jàkôb ɨ màʼ àkœ ɨnkàʼ kì asɨ a fɨ̂kɨ̀ afî a sɨ nà n-nyvɨ mu ateyn ta ka sɨ na se sɨ ku kɨ nà ghɨ kɨ a àŋena asɨ. ⁴²Wù nà n-bɨmî wì na ɨ sîsɨ̀ a sɨ n-jebtɨ̂ kêʼ keʼ na baʼsɨ̂ a ngùŋ àkœ ɨnkàʼ nâ ghè. Wù nà n-nî kɨ tì, bzɨsɨ Labànsɨ̀ ɨ læ nà sɨ jebtɨ̂ kêʼ kɨ tèyn ɨ sɨ ŋweynsɨ ɨ to kɨ tèyn fî kûylɨ̀-à. ⁴³Wù nà n-nî kɨ tì ɨ læ ghaʼ ɨ nà sɨ kelɨ ɨ̀fwo nô sɨ a ŋaŋ, kelɨ ìnôyn i bzɨsɨ nɨ̀ ghelɨ ghɨ felɨnɨ ghɨki nɨ ghɨ lûmnɨ̀ ghɨ dvɨ̂ kɨ tèyn fî kelɨ kàmêlsɨ̀ nɨ̀ njàkâysɨ̀ nô sɨ idvɨ̀.