Genesis 3

Adàm ŋêyn Îf ɨ kòl ìsaʼ i Fɨyini

¹À nà n-ghɨ tì mbam ɨ kuŋlɨ̂ chwô nô mɨ nyam ɨ̀twaʼ ì kà ta Bôbo Fɨyini fàytɨ. Ɨtuʼ ɨ layn achi a li-a, mbam ɨ gvì sɨ̂ wùl ɨ wi vzɨ̀ ɨ bɨf nâ, “A yi ti n-ghɨ kɨ nô samoʼ na Fɨyini fɨ tî bè na ka yì kfɨl fɨtam ma fɨ lù atû fɨ̀kàʼ a gveyn afêyn?” ²Wùl ɨ wi ɨ bè sɨ̂ ŋweyn na, “Ghès kàʼ a ghɨ kfɨl mɨtam mɨ̀ ɨ̀nkàʼ nô ɨ̀n jɨ̀m a gvêyn, ³a bu kɨ fɨ̀tam ma fɨ lù atû fɨ̀kàʼ ghè itòŋ i gvêyn. Fɨyini fɨ tî bè na ka wùl nɨ̂n læ̀ kfɨl, na wùl sɨ̂ ghès læ̀ kùm kɨ̀ kum, nô mɨ achi à kà, a wù kfɨ.”

⁴Mɨtì mbam ɨ bè sɨ̂ wùl ɨ wi na, “À n-ghɨ ànkaŋ, yì kùm yi bû kfɨ̀tɨ.” ⁵“À n-ghɨ bòm ta Fɨyini fɨ nɨn kya na yì chɨ̀yn ma yi kfɨl meyn a asɨ à ki-a yasi, a yì na sɨ ghɨ kɨ ta ŋweyn kya njùŋ fi kya mbɨ.”

⁶Mbam nɨn n-taŋi tî, wùl ɨ wi ɨ se sɨ ki mɨtam nâ mzɨ̀ atû fɨ̀kàʼ nâ ghè itòŋ i gvêyn ɨ yeyn mɨ jôfɨ̀ nô isɨ, fî kêʼ foma. Wu yeyn na wùl kæ kfɨl a wù na tofa. Wu kœ̀ ɨ̀n lì ɨ kfɨl ɨ fi lì ɨ̀n lì ɨ fu sɨ̂ lum ŋweyn ta wù nà n-ghɨ ŋêyn ŋweyn, wu boŋ kfɨl. ⁷Àŋena nɨn læ kfɨl ɨntam nâ mzɨ̀ nô mɨ ɨlvɨ gha, asɨ-a àŋena ɨ yàsì, àŋena yeyn na àŋena nì nà ghɨ tì ghɨ nɨ̀ àsas a yuma, nô mɨ ɨlvɨ gha ɨ yùŋtɨ̀ tɨ̀fvɨ tɨ ɨnkàʼ mɨ̀ fîgsɨ̀ ɨ chɨytɨ àsas a àŋena ateyn.

⁸A nà ghɨ a mbol àbè, wùl ɨ lûmnɨ̀ ŋêyn wî ŋweyn ɨ yvɨ ta Bôbo Fɨyini nɨ̀n n-jelɨ̀ chwô a gvêyn, àŋena leʼ lèytɨ̀ asas ɨnkàʼ. ⁹Mɨtì, Bôbo Fɨyini ɨ jàŋ wùl ɨ lûmnɨ̀ ɨ bɨf sɨ̂ ŋweyn na, “Wà n-ghɨ wo?”

¹⁰Wu bè na, “Mà yvɨ̀ ta wà n-kûm a gvêyn ɨ̀ nà sɨ fàynà ɨ̀ lèytɨ̀ bòm ta mɨ n-ghɨ nɨ̀ ìsas i yumi.” ¹¹Bôbo Fɨyini ɨ bɨf sɨ̂ ŋweyn nâ, “À fèʼtɨ̀ ndà sɨ̂ và na wà n-ghɨ nɨ̀ ìsas i yumi a? Wà kfɨl meyn fɨ̀tam a fɨ̂kàʼ afî a mà tî tùynsɨ na ka wa n-læ̀ kfɨl tî læ̂?” ¹²Wùl ɨ lûmnɨ̀ ɨ bè na, “À nì fu wul ɨ wi vzɨ̀ a wà tî fù na ghesɨ̀ ŋweyn na ghɨ tì, ma kfɨl.”

¹³Bôbo Fɨyini ɨ bɨf sɨ̂ wul ɨ wi na, “À ti gha a wà mòm têyn a?” Wùl ɨ wi ɨ bè na, “À nì lɨ̀sɨ mbam lɨ̀sɨ mà, ma kfɨl.”

¹⁴Bôbo Fɨyini ɨ kæ bè sɨ̂ mbam na,

“Mɨ n-fu ngeʼ sɨ̂ và bòm ìwo nâ yèynì a wà nì têyn.

Ma te meyn và antêynɨ̀ nyàmsɨ̀ nô sɨ̀ jɨ̀m,

ɨ sɨ maʼnɨsɨ

nɨ sɨ ɨtwaʼsɨ.

Wa n-faŋa nà gûf kɨ ɨ̀lvâ va a nse,

mûʼ kɨ àbɨ̂l

nô ta ka wà læ kfɨ.

¹⁵Mɨ ni-à, a zɨ̂ wùl ɨ wi na bâyn ngêŋ sisɨ.

Woyn ŋweyn nɨ̀ wôyn ghya nɨn faŋa nà bâyn kɨ ngeŋsɨ.

Wâyn ŋweyn læ̀ gvâsɨ̀ àtu à kya,

a wà lum ichɨŋlɨ avɨ̀ nɨ̀ ŋweyn.”

¹⁶Bôbo Fɨyini ɨ fi bè sɨ̂ wùl ɨ wi na,

“Wà na boŋ wayn, wa yeyn ngeʼ,

wù nî se sɨ lum vâ, wa yvɨ iyaf nô sɨ a ŋaŋ jæ na wà bzɨ,

mɨtì kôŋ kɨ sɨ nà duʼ zɨ̂ lûm vâ,

yvɨ kɨ ìwo zɨ̀ a wù n-bê.”

¹⁷Bôbo Fɨyini ɨ kæ bè sɨ̂ wùl ɨ lûmnɨ̀ na, “Ta wà nì yvɨtɨ iwo zɨ̀ a wî vâ bè ɨ̀ kfɨl fɨtam fɨ fɨ̂kàʼ fîfɨ̀ a mà tî bè na ka wa n-læ̀ kfɨl tî,

“Ma te meyn nse.

Nô ta ka wà læ̂ kfɨ afo læ̀ nà se sɨ fvɨ̀ a nse nâ ghàyn na wà yɨ, a nà ghɨ ma wà felɨ meyn ɨ̀ yùʼsɨ.

¹⁸Wà læ̀ nà felɨ̀ nse àteyn a koʼ kɨ sùnjoŋ-njoŋsɨ,

wa yɨ kɨ ɨ̀fwo vzɨ̀ a wu n-koʼ ɨtwaʼ.

¹⁹Sɨ yaʼi ta ka wà læ̂ kfɨ ɨ̀ kàsî ndù a nse alèʼ ghè a

wà n-læ fvɨ̀ ateyn, wà læ̀ nà se sɨ yɨ a nà ghɨ ma wà felɨ meyn tèyn ɨ̀ yùʼsɨ.

Ghɨ n-læ faytɨ vâ nɨ̀ nse,

wa ghɨ kɨ sɨ læ̀ sɨ kasi sɨ ndù a nse, alèʼ ghè a wa n-læ lù ateyn.”

²⁰Izɨyn i wul ɨ lûmnɨ̀ ì nɨn læ nà ghɨ Adàm. Wu fu izɨyn i wî ŋweyn na “Îf”, Yi dyêyn na, wù læ̀ nà ghɨ nì sɨ̂ ghelɨ ghɨ̀ jɨ̀m.

²¹Bôbo Fɨyini nɨn læ meyn faytɨ ndzɨsɨ nɨ̀ gvɨsɨ nyâmsɨ̀ ɨ màʼ ɨwùyn nɨ̀ Adàm ŋêyn wî ŋweyn. ²²Bôbo Fɨyini ɨ kæ be kɨ sɨ a ngeŋ na, “Tèyn ti sɨ ghɨ wul ma wù sɨ ghɨ kɨmɨ ta ghesɨ̀nà, kya njùŋ, kya mbɨ. Ka ghesɨ̀nà nɨ̂n fì vìsi wù kœ fɨtam atû fɨ̀kàʼ afî a fɨ n-nî na ghɨ chî faŋ tî ɨ̀ kfɨl, bu tì wù bû læ̀ fì kfɨ. ²³Bòm tèyn Bôbo Fɨyini ɨ sàŋ fvɨ̀sɨ̀ wul sɨ a gvêyn Edèn ɨ lèm na wù na kasî felɨ̀ kɨ nse zɨ̀ a wu n-læ fvɨ̀ ateyn jæ yɨ.” ²⁴Wu n-læ saŋ fvɨ̀sɨ wul tì ɨ ndù a gvêyn, abàs ghè a ɨchfɨ-iyvɨ i nɨn sal ateyn, ɨ lèm nchì sɨlisɨ afu kɨ̀mɨ nɨ̀ ìfô i li yi bali-à, bâŋ kɨ tèyn nkàŋ. Yi nà n-balî tì, bêynlɨ̀ kêʼ kɨ ɨbyâs ɨ gvêyn ɨ̀ jɨ̀m sɨ kɨ̀ŋtɨ̀ na ka wùl nɨ̂n læ̀ fì zɨ ɨ̀ kœ̀ fɨ̀tam atû fɨ̀kàʼ afî a fɨ nà n-fu ichi zɨ̀ a yi læ̀ mæ wi tî.