Genesis 22

Fɨyini fɨ mòm ìbɨmi i Abɨ̀làhâm

¹A læ nà ghɨ achi a li-a Fɨyini fɨ mòm ìbɨmi i Abɨ̀làhâm. Fɨ n-jâŋ meyn ŋweyn na, “Abɨ̀làhâm!” Wu bèynsɨ̀ na, “Mà wèyn afêyn.”

²Fɨyini fɨ ɨ bè sɨ̂ ŋweyn na, “Lì wâyn vâ vzɨ̀ kɨ ɨ̀mòʼ a wà n-kôŋ tî ma à ti Yisàk ɨ ndù abàs a Molìyà ɨ fu ŋweyn sɨ ifu i nyoʼnɨ-i sɨ̂ mà a kfɨyn afî a ka mà dyeyn sɨ̂ và.”

³Ta Bôbo tàŋi tî Abɨ̀làhâm ɨ bɨsɨ làlì ɨ sayn ɨnkâʼ mɨ kfeyn ta ka wù ndu nyòʼ ìfu ateyn. Wu baʼtɨ mèsì ɨ̀fwo vzɨ̀ a wù nà n-ghɨ sɨ lù nɨ̀ ŋweyn, ɨ kul atû njàkâs ɨ lì Yisàk nɨ̀ ghelɨ ghɨ felɨnɨ nɨ̀ ŋweyn ghɨli ghɨ̀ bò ŋêyn àŋena lù ɨ nà sɨ ndû alèʼ ghè a Fɨyini fɨ nì bè na wu n-dyèyn sɨ̂ ŋweyn tì. ⁴Àŋena jèl sɨ a mɨchi ɨ̀n tal Abɨ̀làhâm ɨ làysɨ̀ àsɨ ɨ ki ndùsɨ̀ nɨ̀ alêʼ kì a Bôbo tî bè na wu n-dyèyn sɨ̂ ŋweyn. ⁵Ta wù yèyn tî ɨ kæ be sɨ̂ ghelɨ ghɨ felɨnɨ nɨ̀ ŋweyn na, “Yì timtɨ kɨ̀ afêyn nɨ̀ njàkâs yèyn tì ghesɨ̀ wayn wom Yisàk ndu kòʼsɨ Fɨyini injɨyn izɨ-i kàsi gvì.”

⁶Abɨ̀làhâm ɨ lì ɨ̀nkâʼ mzɨ̀ a wù ndu sɨ nyòʼ ifu ateyn ɨ gèysɨ̀ atu nɨ̀ Yisàk ɨ lì àngvèl nɨ̀ fɨ̀nyuèfɨ ŋêyn Yisàk ɨ nà sɨ ndu-à. ⁷Yisàk ɨ toŋtɨ bò ŋweyn ɨ bè na, “Bàba.”

Bò ŋweyn ɨ bèynsɨ̀ na,

“Mà wêyn a wayn wom.” Wu bè na ghesɨ̀và nɨ̀n kelɨ ɨ̀nkâʼ nɨ̀ àngvèlà mɨtì ma yeyn wi wâyn njɨ̀ vzɨ̀ a ghɨ n-ndû sɨ nyòʼ sɨ ifu. ⁸Abɨ̀làhâm ɨ bè sɨ̂ ŋweyn na, “Fɨyini fɨ nɨn fu njɨ̀ zɨ̀ a ka ghesɨ̀và ndu nyòʼ sɨ a ifu a wâyn wom.” Wù nà n-taŋî tì àŋena jelɨ̀ ndû kɨ ndu.

⁹A nà sɨ ghɨ ta àŋena jèlɨ̀ ndù chèm alèʼ ghè a Fɨyini fɨ nɨ̂n bè sɨ̂ ŋweyn, Abɨ̀làhâm ɨ bàʼlɨ̀ àbaŋ ifu afu ɨ baʼtɨ ɨ̀nkâʼ mzɨ̀ sɨ atu àteyn. Ta wù bàʼtɨ mèsì nô mɨ ɨlvɨ gha ɨ ghal kul Yisàk ɨ nyɨ̀ŋsɨ̀ atû ɨ̀nkàʼ nâ ghè. ¹⁰Ta wù nyɨ̀ŋsɨ̀ tî ɨ choʼ fɨ̀nyuè ɨ nà sɨ kɨŋ sɨ sɨ wâyn ŋweyn ateyn, ¹¹nô mɨ ɨlvɨ gha Nchì Fɨyini ɨ jaŋ gvìsɨ̀ nɨ̀ ŋweyn iyvɨ na, “Abɨ̀làhâm, Abɨ̀làhâm.” Wu bèynsɨ̀ na, “Mà wèyn a Bô.”

¹²Nchì Fɨyini nâ zɨ̀ ɨ bè sɨ̂ Abɨ̀làhâm na, “Ka wa n-kùm wayn vzɨ̀. Ma yeyn meyn kɨ̀ nô samoʼ lvɨ̂yn na wà n-fâyn Fɨyini bòm ta wà bû lèʼsɨ sɨ fu wâyn vâ, kɨ ɨ̀mòʼ vzɨ̀ a wà n-kelɨ, sɨ̂ mà.” ¹³Abɨ̀làhâm ɨ se sɨ ki ɨ yeyn ayaʼ ma ntàŋsɨ ghalɨ meyn ɨtwaʼ kɨ̀ a ndoŋsɨ. Wu ndu yàytɨ̀ àyaʼ ateyn ɨ kwo sɨ ɨ nyòʼ sɨ a ifu sɨ̂ Fɨyini fɨ. ¹⁴Abɨ̀làhâm ɨ kæ chfɨ̀ izɨyn alèʼ nâ zɨ̀-ì na, Bôbo nɨn fu-a. À ti iwo zɨ̀-ì a sɨ chem layn, ghɨ nî ghɨ nà bu bê kɨ na, “À n-ghɨ a kfɨyn nɨ̀ Bôbo wu fu ɨfwo vzɨ̀ a ghesɨ̀nà nɨn kɨŋ.”

¹⁵Nchì Bôbo Fɨyini ɨ fi taŋi gvìsɨ̀ sɨ̂ Abɨ̀làhâm ɨ bè na, ¹⁶“Wà bɨmi meyn sɨ fu wâyn vâ sɨ̂ mà, kɨ ɨ̀mòʼ vzɨ̂ a wà n-kelɨ, ma na chfɨ̂nɨ̀ sɨ̂ và samoʼ na, ¹⁷mɨ n-boysɨ̂ và ɨ̀ nì a wôyn ghya na dvɨ̂ kɨ ta mɨnjêyn iyvɨ, ghɨ kɨ ta asese a mbæ̀ jvà ìghaʼnɨ. Woyn ghya læ̀ tɨm yɨ mbàynɨ̀sɨ àŋena ɨ̀ ghal fsɨ̀tɨ tɨ̀laʼ tɨ àŋena. À n-taŋî mà Bôbo. ¹⁸Mà læ̀ boysɨ̂ ghelɨ tɨ̂laʼ tɨ̀ jɨ̀m a mbzɨ toynɨ̂ a woyn nɨ̀ và bòm ta wà yvɨ̀nɨ ma.”

¹⁹Bôbo nɨn tàŋi tî, Abɨ̀làhâm ŋêyn Yisàk ɨ lù ɨ kasi ndu koli ghelɨ ghɨ felɨnɨ nɨ̀ ŋweyn ghì, ŋêyn àŋena kasi kfa a Beshebà. Abɨ̀làhâm ɨ faŋ ɨ nà chî kɨ afu.

Woyn Nahò

²⁰A læ nà ghɨ achi a li-a Abɨ̀làhâm ɨ yvɨ na Milkà ɨ wî waynà ŋweyn Nahò sɨ boŋ kelɨ woyn woyn ghɨ lûmnɨ̀. ²¹Wàyn ɨwû àsɨ nɨ̀ Nahò nà n-ghɨ Uz, ànkùmtɨ̀-a ɨ ghɨ Bûz, ɨlvɨ̀ ɨ ghɨ Kemwèl ɨ bò Alàm. ²²Woyn Nahò ghɨ li nà n-ghɨ Kesèd nɨ̀ Hazò nɨ̀ Bildàsh nɨ̀ Jilàf ŋêyn Betwèl. ²³Betwèl ɨ læ bzɨ Làbikà. Woyn woyn ghɨ lûmnɨ̀ nâ ghèyn nfama têyn nɨn læ chɨ̀yntɨ bzɨ kɨ Milkà ŋêyn lûm ŋweyn Nahò ɨ wâynà Abɨ̀làhâm. ²⁴Nahò nɨ̀n læ meyn bzɨ kfeynsɨ kɨmɨ woyn woyn ghɨ lûmnɨ̀ ghɨli ŋêyn wî ŋweyn ɨlvɨ̀ ghɨ toŋtɨ̂ na Lumà. Woyn ateyn nà n-ghɨ Tebà nɨ̀ Gahàm ŋêyn Tahàsh nɨ̀ Makà.