Genesis 14

Ablàm ɨ fsɨ Lôt awu nɨ̀ tɨ̀fôyn tɨlitɨ tɨ̀ kæ̀

¹À n-læ nà ghɨ ɨtuʼ ta Amlafèl nɨ̀n ghɨ fòyn Shinà, Alìyòk ɨ ghɨ fòyn Elasà, Kèdòlàwomà ɨ ghɨ fòyn Elàm, Tidàl ɨ ghɨ fòyn Goyìm, ²ɨtuʼ ɨ layn achi a li-a àŋena têyn ghɨ̀ kæ̀ ɨ chɨ̀yntɨ tas iwoŋ sɨ seʼ sɨ nu tɨfôyn tɨlitɨ tɨ̀ tâyn ma à ti Belà ɨ fòyn Sodòm nɨ̀ Bishà ɨ fòyn Gòmolà nɨ̀ Shinàb ɨ fòyn Admà nɨ̀ Shemebà ɨ fòyn Zeboyìm nɨ̀ fòyn Zuwà. ³Tɨfôyn nâ tèyntɨ̀ tɨ̀ tâyn nɨn læ chɨ̀yntɨ tas iwoŋ Ɨfyayn Sìdîm ma à ti Ɨfyayn Jvâ Ànkfɨyn. ⁴A ghɨ tì ma àŋena chi meyn isas isaʼ nɨ̀ Kèdòlàwomà sɨ a bèŋsɨ̀ njvàsɨ̀ bò. Mɨtì a nà ghɨ a bêŋ njvàsɨ̀ tal, àŋena choʼnɨ sɨ nù sɨ timi sɨ a àŋena ngeŋ.

⁵A nà ghɨ a bêŋ njvàsɨ̀ kæ̀, Kèdòlàwomà ŋêyn tɨ̀fôyn tɨli tìtɨ̀ ɨ fvɨ̀ ɨ ndu tɨm yɨ ghelɨ Lefà a Ashtelot Kànèm nɨ̀ ghelɨ Zûs a Hâm nɨ̀ ghelɨ Êm a Shave Kìlìyatèm, ⁶nɨ̀ ghelɨ Hôl. Àŋena nɨ̀n læ tɨm yɨ iwoŋ nâ yèynì kɨ̀ sɨ zɨ̀tɨ̀ ɨlweŋ kfɨynsɨ Seyì sɨ ndù sɨ chem a El Bàlân a ngùŋ nse ì yum. ⁷Àŋena nɨ̀n læ meyn kasi ndù a En Mishbàt ma à ti a Kadèsh ɨ tɨm yɨ ilaʼ i Amalèk nô ì jɨ̀m ɨ fi ndu tɨm yɨ ghelɨ Amò ghì a ghɨ nà n-chi a Hazezon Tamà. ⁸Àŋena yɨ tî ɨ se sɨ kasi sɨ gvì ma fòyn Sodòm nɨ̀ fòyn Gòmolà nɨ̀ fòyn Admà nɨ̀ fòyn Zeboyìm nɨ ɨwû Belà boŋ meyn tas ìwoŋ ɨfyayn Sìdîm. ⁹Àŋena tas tî Kèdòlàwomà ma à ti fòyn Elàm nɨ̀ Tidàl ɨ fòyn Goyìm nɨ̀ Amlafèl ɨ fòyn Shinà nɨ̀ Alìyòk ɨ fòyn Elasà ɨ kasi se sɨ gvì ŋêyn àŋena na sɨ nu-à. Yi ti n-dyêyn na tɨfôyn tɨ̀ kæ̀ tɨ nà n-nû tɨ̀fôyn tɨ̀ tâyn. ¹⁰À nà n-ghɨ tì ɨfyayn Sìdîm ɨ kelɨ tɨ̀bɨtɨ ale tɨ dvɨ̂ kɨ tèyn. Fòyn Sodòm ŋêyn fòyn Gòmolà ɨ se sɨ nyɨŋ ghelɨ ghɨli ɨ felɨ a tɨ̂bɨ̀ nâ ghè, ghɨli nyɨŋ koʼ a kfɨynsɨ. ¹¹Tɨfôyn tì tɨ̀ kæ̀ ɨ kumtɨ nô ɨ̀fwo ɨ̀ jɨ̀m a Sodòm nɨ̀ Gòmolà baʼsɨ̂ nɨ̀ ɨ̀fwo ɨ yɨnɨ ɨ lù nɨ̀ ɨ̀ŋweyn. ¹²Àŋena nɨ̀n læ meyn li kɨmɨ Lôt ɨ wâyn waynà Ablàm baʼsɨ̂ nô mɨ nɨ̀ ghà ta wu nà n-kelɨ bòm ta wu nà n-chi a Sodòm. ¹³Wùl ɨ lvì ta wù lèʼ iwoŋ ateyn ɨ gvì ɨ fèʼtɨ̀ sɨ̂ Ablàm ɨ wul ɨ̀ Hibɨ̀lù vzɨ̀ na ghɨ ghal meyn Lôt. A ghɨ tì Ablàm ɨ chî a ngùŋ ɨ̀nkàʼ mɨ̀ ôksɨ̀ nɨ̀ Mamlè ɨ wul ɨ̀ Amò vzɨ̀ a à nà n-ghɨ wâynì sɨ̂ Eshkòl ŋêyn Anà tì. A ghi tì àŋena chɨ̂yntɨ̀ tôʼ kɨ Ablàm. ¹⁴A nà sɨ ghɨ ta Ablàm yvɨ na ghɨ ghal meyn lù nɨ̀ Lôt, wu choʼtɨ sugèyʼsɨ ŋweyn sɨ jûŋ sɨ lisɨ ighɨ ì tal nɨ̀ sugèyʼsɨ̀ njvàsɨ̀ nfama ma ghɨ n-læ bzɨ kɨ nô a ŋweyn abe, ŋêyn àŋena ɨ nyɨŋ kɨ ibàm nɨ̀ tɨ̀fôyn titɨ tɨ̀ kæ̀ tèyn ɨ ndu chem nô a ntèʼ Dan. ¹⁵A ni nà ghɨ nɨ̀ntuʼ wu gwòsɨ̀ sugèyʼsɨ ŋweyn sìsɨ̀ kɨ̀ inòyn inòyn, ŋêyn àŋena nà sɨ nû tɨ̀fôyn tɨ ateyn kɨ ɨbyâs ɨ̀ jɨ̀m ɨ ni yɨ àŋena ɨ fi nyɨŋ kɨ a àŋena ibàm têyn ɨ ndu chem a Hobà atû Dàmaskòs. ¹⁶Ablàm ɨ kasi ghal fsɨ nô mɨ̀ ghà ta àŋena tî lì ɨ lù nɨ̀ ànkeyna ɨ kasi fsɨ kɨmɨ wâyn waynà ŋweyn Lôt nɨ̀ ɨ̀fwo ŋweyn baʼsɨ̂ nɨ̀ ghɨ̀ki nɨ̀ ghelɨ ghɨli.

Mèlkizedèk ɨ boysɨ Ablàm

¹⁷À nà n-ghɨ ta Ablàm tɨm yɨ fòyn Kèdòlàwomà nɨ̀ tɨ̀fôyn tìtɨ̀ a tɨ nà n-tôʼ ŋweyn tì ɨ̀ se sɨ kfa, fòyn Sodòm ɨ fvɨ kòynɨ̀ ŋêyn Ablàm Ɨfyayn Shavè ma à ti Ɨfyàyn nɨ̀ Fòyn. ¹⁸Mèlkizedèk ɨ fòyn Salèm vzɨ̀ a à nà n-ghɨ kɨmɨ ngàŋ ndô Fɨyini fɨ ngaŋtɨnɨ fɨ ɨ boŋ fvɨ gvì nɨ̀ ɨ̀fwo ɨ yɨnɨ nɨ̀ mɨ̀lùʼ sɨ̂ Ablàm. ¹⁹Ta wù fvɨ̀ tî ɨ boysɨ ŋweyn ɨ bè na,

“Fɨyini fɨ ngaŋtɨnɨ fìfɨ̀ a fɨ fàytɨ iyvɨ nɨ̀ nse boysɨ vâ.

²⁰Ikoʼsɨ-i nɨn ndû sɨ̂ Fɨyini fɨ ngaŋtɨnɨ fìfɨ̀ a fɨ nì wà tɨm yɨ mbàynɨ̀ shyasɨ.”

Ablàm ɨ gwòtɨ̀ ɨfwo vzɨ̀ a wu n-kasi ghal fsɨtɨ tî nô ɨ̀ jɨ̀m ɨlwêʼ ìvɨm ìvɨm ɨ nà sɨ ndû nô mɨ ateyn nɨ̀ à ka fu àlêʼ àmoʼ sɨ̂ Mèlkizedèk.

²¹À nà n-ghɨ ta Ablàm kòynɨ̀ ŋêyn fòyn Sodòm tì, wu bè sɨ̂ Ablàm na, “Li ɨfwo vzɨ̀ a wà kàsi kfa nɨ̀ ɨ̀ŋweyn nô ɨ̀ jɨ̀m ɨ fu kɨ ma nɨ̀ ghelɨ ghem.” ²²Mɨtì Ablàm ɨ bèynsɨ̀ sɨ̂ ŋweyn na, “Ma chfɨnɨ meyn sɨ izɨyn nɨ̀ Bôbo Fɨyini fɨ ngaŋtɨnɨ fìfɨ̀ a fɨ fàytɨ iyvɨ nɨ̀ nse, nɨ̀ àwu à kema iyvɨ ta mà làysɨ̀ sɨ̂ ŋweyn ²³na mɨ n-lî wì nô àfo antêynɨ̀ ɨ̀fwo nɨ̀ và, à kôŋ a nà ghɨ kɨ nkàyn àmbyèyn kèsa à n-ghɨ nkfɨ̀ gvɨ̂ àvɨ̀ bu tì a wà læ̂ bè na, ‘À tî nì mà Ablàm ghaʼ.’ ²⁴Mɨ n-lî wì nô àfo a bu kɨ ɨ̀fwo vzɨ̀ a sugèyʼ semsɨ sɨ ghɨ ma sɨ yɨ meyn nɨ̀ ɨvzɨ̂ a ghɨ n-kelɨ sɨ fu sɨ̂ Anà ŋêyn Eshkòl nɨ̀ Mamlè ta àŋena tî seʼ iwoŋ ghesɨ̀ àŋena amoʼ. Yi n-jôf na ghɨ fu ɨwu àŋena ɨfwo.”