Exodus 8

¹Bôbo Fɨyini ɨ bè sɨ̂ Mosìs na, “Ndù a ntoʼ ɨ bè sɨ̂ fòyn Ijìb na, ‘Mà Bôbo Fɨyini be meyn na wà visi ghelɨ̀ ghem àŋena ndu nà koʼsɨ̂ mà. ²Wà kæ faŋ tɨ̀ vìsi na àŋena lu, a mà lɨŋ ilaʼ ì zæ nɨ̀ ɨ̀nchwàmàkès, a wu fvɨ kɨ ɨlwêʼ ɨ̀ jɨ̀m, ³ɨ̀ luyn jvâ Nâyl, a ɨlvi fvɨ a ntoʼ ɨ̀ zɨ a wa nchi, kòʼ a wa ɨkuyn, a ɨlvi zɨ a ndosɨ ghê a chyeʼ shyasɨ nɨn chi ateyn ɨ̀ zɨ a ndosɨ ghê a ghelɨ̀ ghya nɨn chi ateyn ɨ̀ fì zɨ a tɨ̂chɨ ghè a ghɨ n-kfê ɨfwo ɨ yɨnɨ nɨ̀ và ateyn ɨ̀ fì zɨ a wa mɨ̂kɨ̀. ⁴Wà kæ faŋ tɨ visi na àŋena lu, a ɨ̀nchwàmàkès nâ vzɨ̀ gvi kòʼ nô a wa ɨwùyn ɨ̀ kòʼ ɨwùyn nɨ̀ ghelɨ̀ ghya ɨ̀ fì kòʼ ɨwuyn nɨ̀ chyeʼ shyasɨ nô sɨ̀ jɨ̀m.’”

⁵Bôbo Fɨyini ɨ taŋi tì ɨ kæ bè sɨ̂ Mosìs na, “Bè sɨ̂ Alòyn wù li mbàŋ ŋweyn ɨ̀ nàysɨ̀ atû jva sɨ tosɨ, ɨ̀ nàysɨ̀ atû jvasɨ ghê a ghɨ lì lî, ɨ̀ nàysɨ̀ atû mɨ̀chɨ̀m ta ka ɨ̀nchwàmàkès fvɨ ɨ̀ luyn kɨ ilaʼ i Ijìb ì jɨ̀m.”

⁶Alòyn ɨ nàysɨ̀ ɨ̀kœ ɨ ŋweyn atû jvasɨ a Ijìb, nô mɨ ɨlvɨ gha ɨ̀nchwàmàkès ɨ fvɨ̀ ɨ luyn ilaʼ i Ijìb kɨ ì jɨ̀m. ⁷Mɨtì ghelɨ ghɨ kuʼnɨ ɨ ni kɨmɨ tì nɨ̀ ìkûʼ i àŋena-i ɨ̀nchwàmàkès ɨ boŋ fvɨ a Ijìb.

⁸Fòyn ɨ tum jàŋ Mosìs ŋêyn Alòyn ɨ bè sɨ̂ àŋena na, “Yì kæ chwotɨ Bôbo Fɨyini wù nî ɨ̀nchwàmàkès wêyn mæ̂ sɨ̂ ghesɨ̀ ghelɨ̀ ghem, a mà visi ghelɨ̀ ghi a àŋena ndu fù tɨfu sɨ̂ Bôbo Fɨyini.”

⁹Mosìs ɨ bè sɨ̂ fòyn na, “Mbæ̀, yi faŋ kɨ̀ sɨ̂ và. A n-fèʼtɨ̀ kɨ và ɨlvɨ vzɨ̀ a ka mà chwotɨ Bôbo Fɨyini a wù ni a ɨ̀nchwàmàkès mæ sɨ a wa ndo ɨ̀ mæ̀ sɨ a ndosɨ nɨ̀ chyeʼ shyasɨ, ɨ̀ mæ̀ sɨ a ndosɨ nɨ̀ ghelɨ̀ ghya, a à faŋ kɨ̀ ɨvzɨ̂ a wu n-ghɨ a jvâ Nâyl.”

¹⁰Fòyn ɨ bè sɨ̂ ŋweyn na, “Chwotɨ a libɨs.”

Mosìs ɨ bè na, “Mɨ n-nî kɨ ta wà bè ta ka wà yeyn kèli na Fɨyini fɨ lifɨ bu fì ghɨ wi ta Bôbo Fɨyini, ɨ Fɨyini feyfɨ.”

¹¹“Ɨ̀nchwàmàkès ateyn ɨ nì lû sɨ a wa ɨwùyn, ɨ̀ lù sɨ a wa ntoʼ ɨ̀ vìsi chyeʼ shyasɨ, ɨ̀ vìsi ghelɨ̀ ghya ɨ̀ faŋ kɨ̀ a jvâ Nâyl.”

¹²A nà ghɨ ta Mosìs ŋêyn Alòyn lù meyn sɨ a asɨ nɨ̀ fòyn, Mosìs ɨ dzɨ̀ sɨ̂ Bôbo Fɨyini ɨ bè na, “Ô Bôbo Fɨyini, ni ɨ̀nchwàmàkès wêyn a wà lɨŋ fòyn Ijìb nɨ̀ ɨ̀ŋweyn têyn mæ.” ¹³Bôbo Fɨyini ɨ ni kɨ ta Mosìs bè, ɨ̀nchwàmàkès ateyn ɨ kfɨtɨ sɨ a ndosɨ nɨ̀ mbæ̀sɨ ndosɨ, ɨ kfɨ̀tɨ sɨ a gvêynsɨ̀. ¹⁴Ghɨ nà yvɨ̂ŋ kɨ ɨtweʼ ɨtweʼ kɨ̀ ɨlwêʼ ɨ̀ jɨ̀m, ilaʼ ì jɨ̀m ɨ nà sɨ lɨ̂m kɨ ɨ̀nchwàmàkès. ¹⁵Fòyn Ijìb ɨ yeyn na ɨ̀nchwàmàkès ateyn mæ meyn, wu fi tosɨ kɨ àtem a ŋweyn ɨ faŋ tɨ̀ yvɨ iwo zɨ̀ a Mosìs ŋêyn Alòyn bè, kɨ̀ ighel ta Bôbo Fɨyini nɨn læ bè.

Bôbo ɨ lɨŋ ilaʼ i Ijìb nɨ̀ ɨ̀mbɨ̂m

¹⁶À nà n-ghɨ ta fòyn fì tòsɨ kɨ atem a ŋweyn tì, Bôbo Fɨyini ɨ bè sɨ̂ Mosìs na, “Bè sɨ̂ Alòyn na, ‘Nàysɨ mbàŋ zyâ ɨ leŋ abɨ̀l a nse,’ a ka abɨl à kasi kɨ̀ sɨ a ɨmbɨm nô mɨ wo a Ijìb.” ¹⁷Àŋena nɨn læ meyn yvɨnɨ Bôbo Fɨyini, Alòyn ɨ nàysɨ̀ mbàŋ ŋweyn ɨ leŋ abɨ̀l, ɨ̀mbɨ̂m ɨ fvɨ̀ ɨ koʼ ɨwùyn nɨ̀ ghelɨ baʼsɨ̂ nɨ̀ nyamsɨ. Nô àbɨ̂l à jɨ̀m a Ijìb ɨ kasi kɨ sɨ a ɨmbɨm. ¹⁸Mɨtì ghelɨ ghɨ kuʼnɨ ghì ɨ mòmsɨ̀ sɨ nì na abɨl à kasi sɨ a ɨmbɨm nɨ̀ ìkûʼ i àŋena-i, yi to ghaʼ. Ɨ̀mbɨ̂m mɨ̀ àteyn ɨ faŋ kɨ ɨwuyn nɨ̀ ghelɨ baʼsɨ̂ nɨ̀ nyamsɨ.

¹⁹Ghelɨ ghɨ kuʼnɨ nâ ghì ɨ yeyn tî ɨ bè sɨ̂ fòyn na, “À n-ghɨ àdyaʼ a Fɨyini tèyn.” Mɨtì fòyn Ijìb ɨ tosɨ kɨ tosɨ atem a ŋweyn ɨ faŋ tɨ̀ yvɨ iwo zɨ̀ a àŋena bè kɨ ighel ta Bôbo Fɨyini nɨn læ bè.

Fɨyini fɨ ɨ lɨŋ ilaʼ i Ijìb nɨ̀ mɨ̀njæ̂njæ̀

²⁰À nà n-ghɨ ta fòyn Ijìb tòsɨ atem a ŋweyn tì, Bôbo Fɨyini ɨ bè sɨ̂ Mosìs na, “Ɨtuʼ bɨs ɨ̀ layn wa ndù ɨ timi ɨ chìtɨ̀ fòyn Ijìb a dzɨ jvà ɨ bè sɨ̂ ŋweyn na Bôbo Fɨyini bè na, ‘Visi ghelɨ̀ ghem àŋena lu ta ka àŋena ndu nà koʼsɨ̂ mà. ²¹Wà kæ sɨ faŋ tɨ̀ vìsi na ghelɨ̀ ghem lu, a mà tum tɨseŋnɨ tɨ mɨnjæ̀njæ̀ sɨ̂ và zɨ̂ chyeʼ shyasɨ nɨ̀ ghelɨ̀ ghya, ɨ̀ tum a ndosɨ nɨ̀ và. Nô ndosɨ ghelɨ Ijìb sɨ̀ jɨ̀m na ghɨ ma à luyn kɨ mɨnjæ̀njæ̀, baʼsɨ̂ nô mɨ nɨ̀ àlêʼ a nse à kà ta àŋena nɨn ghɨ ateyn. ²²Achi ateyn a nɨn kfeyna, a mà ni iwo sɨ a nyɨŋ abàs a Ijìb afî a ghelɨ̀ ghem nɨn chi ateyn ghɨ toŋtɨ̂ nâ Goshèn. Nô fɨ̀njæ̂njæ̀ fɨ̀ læ̀ zɨ̂ wì afu ta ka yì yeyn ɨ̀ kèli na à nî mà Bôbo Fɨyini nî àwo kèynà a Ijìb afêyn. ²³Mà læ̀ dyêyn baynsɨ̂ na ghelɨ̀ ghem nɨn ghɨ sɨ a nyɨŋ nɨ̀ ghelɨ̀ ghya. Mà læ̀ dyêyn nchwæ ìkaynɨ nâ yèyn a libɨs.’”

²⁴Bôbo Fɨyini nɨ̀n læ meyn ni kɨ ighel ta Mosìs nɨ̀n bè sɨ̂ fòyn Ijìb. Tɨseŋnɨ tɨ mɨnjæ̀njæ̀ tɨ bemnɨtɨ nɨn suʼi meyn a ntoʼ nɨ̀ ndo sìsɨ̀ a chyeʼsɨ ŋweynsɨ nà n-chi ateyn ɨ bebsɨ ilaʼ i Ijìb kɨ ì jɨ̀m.

²⁵Fòyn ɨ kæ sɨ tum sɨ jaŋ Mosìs ŋêyn Alòyn ɨ bè sɨ̂ àŋena na, “Yì ndu fu tɨfu sɨ Fɨyini fifɨ kɨ̀ ìlaʼ afêyn.”

²⁶Mɨtì Mosìs ɨ bè sɨ̂ ŋweyn na, “Yi n-jofɨ̀ wì na ghesɨ̀ fu afêyn. Ghelɨ Ijìb ɨ kæ sɨ yeyn tɨfu tìtɨ̀ a ghesɨ̀ nɨn fu sɨ̂ Bôbo Fɨyini, ɨ Fɨyini feyfɨ, a àŋena na kôŋ wì nô sakos. A ghès ti fu tɨfu ghelɨ Ijìb ɨ kôŋ wì, a àŋena faŋ tɨ̀ tɨ̀mlɨ ghes nɨ̀ ngòʼsɨ̀ a? ²⁷Ghès nɨn kelɨ sɨ jèl sɨ a mɨchi ɨ̀n tal sɨ zɨ a nse ìyum sɨ fu tɨfu sɨ̂ Bôbo Fɨyini, ɨ Fɨyini feyfɨ, kɨ ighel ta wù bè na ghèsɨ̀ ni.”

²⁸Fòyn Ijìb ɨ kæ bè na, “Mɨ n-visi-à a yì ndu fù tɨfu sɨ̂ Bôbo Fɨyini, ɨ Fɨyini fifɨ a nse ìyum mɨ̀tì yi kelɨ wi sɨ ndù a ndyèyn. Yì jem læ̂ sɨ̂ mà lvɨ̂yn.”

²⁹Mosìs ɨ bè sɨ̂ ŋweyn na, “Mɨ n-lù sɨ afêyn nô mɨ ɨlvɨ gha ɨ̀ jèm sɨ̂ Bôbo Fɨyini a à na ghɨ a libɨs a wù ni a mɨ̀njæ̂njæ̀ mɨ̀ àteyn visi vâ zɨ̂ chyeʼ shyasɨ nɨ̀ ghelɨ̀ ghya. Yi n-ghɨ kɨ na ka wà na fî wam wam ɨ̀ faŋ tɨ̀ vìsi na ghès ndu fu tɨfu sɨ̂ Bôbo Fɨyini.”

³⁰Mosìs ɨ taŋi tì ɨ lù sɨ asɨ nɨ̀ fòyn Ijìb, ɨ jèm sɨ̂ Bôbo Fɨyini, ³¹Bôbo Fɨyini ɨ nì ìwo zɨ̀ a Mosìs bɨf. Mɨ̀njæ̂njæ̀ mɨ̀ àteyn ɨ visi fòyn Ijìb ŋêyn chyeʼsɨ ŋweynsɨ nɨ̀ ghelɨ ŋweyn. Nô fɨ̀njæ̂njæ̀ fɨ̀ mòʼ fɨ nà bu kal wi a Ijìb. ³²Mɨtì fòyn Ijìb ɨ fi tosɨ kɨ tosɨ atem a ŋweyn ɨlvɨ nâ ghàyn ɨ faŋ tɨ̀ vìsi na ghelɨ ateyn lu.