Exodus 33

Bôbo Fɨyini ɨ bè na ghelɨ Isìlæ̀ lu sɨ a Sinày.

¹À nà n-ghɨ ta Bôbo Fɨyini fù ngeʼ sɨ̂ ghelɨ Isìlæ̀, wu bè sɨ̂ Mosìs na, “Lì ghelɨ ghèyn a wà tî fvɨ̀sɨ̀ sɨ a ilaʼ i Ijìb tèyn, zɨ̂ àŋena lu sɨ a alèʼ ghàyn ɨ̀ ndù ilaʼ afî a mɨ n-læ chfɨ̀nɨ nɨ̀ mɨ̀kàyn sɨ̂ Abɨ̀làhâm nɨ̀ Yisàk nɨ̀ Jàkôb ɨ bè na, ‘Mà læ̀ fu ìlaʼ ateyn sɨ̂ woyn ghya.’ ²Mɨ n-tum nchì a yì na ndû asɨ nɨ̀ zɨ̀, a mà saŋ fvɨ̀sɨ̀ ghelɨ Kenàn nɨ̀ ghelɨ Amò nɨ̀ ghelɨ Hît nɨ̀ ghelɨ Belìz nɨ̀ ghelɨ Hîv baʼsɨ̂ nɨ̀ ghelɨ Jebùs sɨ a ilaʼ nâ ghàyn. ³Yì koʼ ndù ilaʼ nâ ghàyn a yi n-kelɨ nse ì jùŋ tèyn, ɨfwo ɨ yɨnɨ koʼ ateyn tèyn. Mɨtì ghesɨ̀nà nɨn koʼ wi amoʼ bòm ta yi n-to nɨ̀ àtu a nô sɨ a ŋaŋ, ma mà kàʼ a mà zuetɨ zɨ a dzɨ.”

⁴À nà n-ghɨ ta ghelɨ Isìlæ̀ yvɨ̀ saʼgha i bɨ nâ yèyn, àŋena nà sɨ dzɨ̀-à sɨ dyèyn na àŋena nɨn nkumî ɨ̀wuyn iwo afî a àŋena nì, ɨ lèm na àŋena na bu wê wì nchaʼsɨ. ⁵À nà n-ghɨ tì ma Bôbo Fɨyini bè meyn sɨ̂ Mosìs na, “Bè sɨ̂ ghelɨ Isìlæ̀ na àŋena nɨn to nɨ̀ àtu a nô sɨ a ŋaŋ ma mɨ n-ghɨ sɨ jelɨ ghesɨ̀ àŋena amoʼ kɨ̀ nô sɨ a fɨlêŋʼnɨ̀ fɨ ɨlvɨ têyn, a mà zuetɨ àŋena. Yì choʼtɨ nchaʼ sisɨ lvɨ̂yn, mà yeyn na mɨ n-nì ghà nɨ̀ zɨ̀ a.” ⁶Bôbo Fɨyini nɨn tàŋi tî, ghelɨ Isìlæ̀ ɨ choʼtɨ nchaʼsɨ àŋena a kfɨ̂yn Holèb achi nâ ghè, ɨ læ faŋ tì fì tɨ̀ we.

Fɨtwotɨ̂ fìfɨ̀ a Mosìs ŋêyn Bôbo Fɨyini nà n-kôynɨ̀ ateyn.

⁷Mosìs nà nî wu fvɨ̀ sɨ a alèʼ ghè a àŋena bɨ̀ ateyn ɨ ndu kas fɨtwo nô sɨ a nje ɨ nà jâŋ na, “Fɨtwo fìfɨ̀ a ŋêyn Bôbo Fɨyini nɨn kôynɨ̀ ateyn.” Wùl nà n-se sɨ bɨf iwo sɨ̂ Bôbo Fɨyini wu fvɨ̀ sɨ alèʼ ghè a ghɨ bɨ̀ ateyn ɨ ndù afu. ⁸Mosìs nà n-fvɨ̂ nô mɨ ɨlvɨ gha sɨ ndù a fɨndo nâ ghè, nô mɨ ndà ɨ fvɨ ɨ timi kɨ ɨchfɨ ɨtwò nɨ̀ ŋweyn nô ta ka wù ndu zɨ a fɨndo nɨ̀ Bôbo Fɨyini nâ ghè. ⁹Mosìs nà ndû zɨ̂ ateyn nô mɨ ɨlvɨ gha, atuŋ a mbàʼsɨ̀ ɨ suʼi ɨ timi ɨchfɨ fɨndo nâ ghè, Bôbo Fɨyini ɨ taŋi fvɨ̀sɨ̀ ateyn sɨ̂ ŋweyn. ¹⁰Ghelɨ nâ ghi nà n-yeyn gvî nɨ̀ àtuŋ a mbàʼsɨ̀ nâ kì ɨchfɨ fɨndo nɨ̀ Bôbo nâ ghè nô mɨ ɨlvɨ gha, nô mɨ ndà ɨ timi kɨ ɨchfɨ ɨtwò nɨ̀ ŋweyn ɨ nà koʼsɨ̂ Fɨyini. ¹¹Bôbo nà ni-à wu nà taŋî kɨ nô ŋêyn Mosìs ikêʼ nɨ̀ ìkeʼ ì, kɨ̀ têyn ta wùl nɨ̀n nî wu nà taŋî ŋêyn wùl ìjèl nɨ̀ ŋweyn. Bôbo Fɨyini nà n-taŋî mesì ŋêyn Mosìs, wù se sɨ lù sɨ kasi sɨ ndù alèʼ ghè a ghɨ bɨ̀ ateyn, Joshwà ɨ wâyn Nûn ta wù nà gâmtɨ̀ ŋweyn ɨ faŋ kɨ a fɨndo nɨ̀ Bôbo Fɨyini nâ ghè.

Bôbo Fɨyini ɨ chfɨ̀nɨ sɨ nà ghɨ ŋêyn ghelɨ ŋweyn.

¹²Mosìs nɨ̀n bê meyn sɨ̂ Bôbo Fɨyini na, “Wà n-bê kɨ na mà li ɨ̀ lù nɨ̀ ghelɨ ghèyn mɨtì fêʼtɨ̀ wì sɨ̂ mà nâ ghesɨ̀ ndà nɨn ndû amoʼa. Wà bê meyn na wà n-faytɨ̂ kya mà fî saŋlɨ̂ kûm mà. ¹³Wà kæ sɨ nà saŋlɨ̂ kûm mà samoʼ, wa nì mà na kya dzɨ̂ shyasɨ ta ka mà toʼ kèli bàynsɨ và, a wà na saŋlɨ̂ kɨ saŋlɨ̂ kûm mà. Ka wa n-lèsɨ̀ na ghelɨ ghèyn nɨn ghɨ tèyn a ghɨ ìlaʼ ma à chòʼ vâ.”

¹⁴Bôbo Fɨyini ɨ bèynsɨ̀ ɨ̀ bè sɨ̂ Mosìs na, “Ghesɨ̀và nɨn ndû kɨ nô amoʼ, a mà ni a wà keli atem a yvɨtɨnɨ-a.”

¹⁵Bôbo Fɨyini ɨ taŋi tì Mosìs ɨ bè sɨ̂ ŋweyn na, “Wà kæ sɨ nà ghɨ wi sɨ ndu ghesɨ̀nà amoʼ, ka wa n-vìsi ghèsɨ̀ lu sɨ a alèʼ ghàyn. ¹⁶Wùl ti kàʼ wu keli sɨ a gha na wà n-saŋlɨ-à kûm mà fî saŋlɨ-à kûm ghelɨ ghya a bu kɨ na wà n-ghɨ ghesɨ̀nà amoʼ a? Wà kæ faŋ tɨ̀ ndu ghesɨ̀nà amoʼ, ghelɨ bû nà kya na ghès nɨn ghɨ ghelɨ sɨ a nyɨŋ a mbzɨ.”

¹⁷Mosìs ɨ taŋi tì, Bôbo Fɨyini ɨ bè sɨ̂ ŋweyn na, “Mɨ n-lutɨ̂ nî kɨ ìwo zɨ̀ a wà n-kɨŋ bòm ta mɨ n-saŋlɨ-à kûm và fî faytɨ̂ kya và.”

¹⁸Bôbo Fɨyini ɨ taŋi tì, Mosìs ɨ bè sɨ̂ ŋweyn na, “Mɨ n-jêm na wà dyeyn ibayn i ghaʼnɨ-i nɨ̀ và sɨ̂ mà lvɨ̂yn.”

¹⁹Bôbo Fɨyini ɨ bè sɨ̂ ŋweyn na, “Mɨ n-chwô a wa asɨ ta ka wà yeyn njùŋ yem nô ì jɨ̀m, a mà feʼtɨ ɨ̀ bàynsɨ sɨ̂ và na à n-ghɨ mà Bôbo Fɨyini a wa asɨ. Mɨ n-dyêyn ìkoynsɨ isuyn sɨ̂ wùl ɨ̀ vzɨ̂ a mɨ n-kôŋ, ɨ̀ dyèyn àtem a juŋà sɨ̂ wùl ɨ̀ vzɨ̂ a mɨ n-kôŋ. ²⁰Mɨtì ghɨ wi sɨ visi na wà yeyn ikêʼ ì yemi bòm ta à yèyn nô mɨ ndà ikêʼ ì yemi a wù kfɨ.”

²¹Bôbo Fɨyini ɨ taŋi tì ɨ fi bè na, “Iwu i li nɨn ghɨ a ngùŋ nɨ̀ mà afêyn ta ka wà timi atû ateyn. ²²Mɨ nì se sɨ chwò a ibayn i ghaʼnɨ-i nɨ̀ mà, ɨ̀ we và abùʼ iwu ɨ̀ chɨ̀ytɨ nɨ̀ àwu à kema sɨ chem ta ka mà chwo. ²³À na ghɨ ta mà chwò mèsì, ɨ̀ lìsi àwu à kema, a wà yeyn jɨ̂m yem mɨ̀tì ɨ̀ fàŋ tɨ yeyn ikêʼ ì yemi.”