Exodus 31

Bôbo Fɨyini ɨ choʼ Bèzalèl ŋêyn Oholìyàb.

¹Bôbo Fɨyini nɨn fi meyn bè sɨ̂ Mosìs na, ²“Yeyna ma choʼ meyn Bèzalèl ɨ wâyn Yulì ɨ wâyn Hûl ɨ wul ìsas i ndo nɨ̀ Judà. ³Ma luynsɨ meyn ŋweyn nɨ̀ Àyvɨs à kema, ɨ̀ fu itof sɨ̂ ŋweyn nɨ̀ àdyaʼ a ta ka wù na kya sɨ faytɨ tɨ̀nkì tɨ ɨfwo kɨ tɨ̀ jɨ̀m. ⁴Mà nì tèyn ta ka wù na kya sɨ kfàʼtɨ̀ afo, sɨ fèl sɨ fvɨ̀sɨ̀ nɨ̀ àso ɨkwo a baŋnɨ-a, nɨ̀ àso ɨkwo a fɨfâ, kɨ̀mɨ nɨ̀ ìdyayn i, ⁵kya sɨ chuyn ngòʼsɨ̀ sɨ nyàʼ ɨfwo ateyn, kya sɨ chuf ɨfwo nɨ̀ ɨ̀nkàʼ, kya sɨ faytɨ nô mɨ ìnkì afo a jûŋ à kà. ⁶Ma choʼ meyn kɨ̀mɨ Oholìyàb ɨ wâyn Ahisamàk ɨ wul isas i ndo nɨ̀ Dân ta ka wù na gâmtɨ̀ ŋweyn. Ma fu meyn kɨ̀mɨ ìtof sɨ̂ ghelɨ ghɨ felɨnɨ na àŋena na kya sɨ faytɨ sɨ fèl nô ghɨ̀ jɨ̀m ta ka àŋena fel nô mɨ ghà kɨ ighel ta mà bè sɨ̂ và. ⁷Àŋena nɨn bàʼlɨ̀ fɨ̀ndo fɨ Bôbo Fɨyini, ɨ̀ fàytɨ àntayntayn a mɨ̂kàyn baʼsɨ̂ nɨ̀ nchɨl àteyn nɨ̀ ɨ̀fwo vzɨ̀ a wu na ghɨ a fɨndo nâ ghè nô ɨ̀ jɨ̀m, ⁸nɨ̀ abaŋ abayn a laynɨ-a baʼsɨ̂ nɨ̀ ɨ̀fwo vzɨ̀ a wu na ghɨ abaŋ nâ ghè nô ɨ̀ jɨ̀m kɨ̀mɨ nɨ̀ àfo kì a ghɨ na tomtɨ lâmsɨ̀ ateyn ma ghɨ fàytɨ kɨ nɨ̀ àso ɨkwo a baŋnɨ-a kɨ kelɨ wi ilɨŋ nɨ̀ ɨ̀fwo vzɨ̀ a wu na ghɨ a ngùŋ àteyn nɨ̀ abaŋ kì a ka ghɨ na nyôʼ ileŋ atû àteyn, ⁹nɨ̀ àbaŋ kì a ka ghɨ na nyôʼ ifu ateyn nɨ̀ ɨ̀fwo abaŋ nâ vzɨ̀ nô ɨ̀ jɨ̀m nɨ̀ àkaŋ a baʼsɨ̂ nɨ̀ àfo kì a ka kɨ na ti atû àteyn, ¹⁰kɨ̀mɨ nɨ̀ ndzɨsɨ ngàŋ ndô Fɨyini sɨ tɨmnɨsɨ sɨ̂ Alòyn ɨ ngàŋ ndô Fɨyini nɨ̀ sɨ lisɨ sɨ̂ woyn ŋweyn ta ka àŋena na se sɨ fèl a ndô Fɨyini, àŋena màʼ, ¹¹nɨ̀ mɨ̀vɨ̂l mzɨ̀ a ghɨ n-yisi ngàŋsɨ ndô Fɨyini ateyn mɨ lɨ̂mtɨ̀ fom Alèʼ a Laynɨ-a. Àŋena nɨn kelɨ sɨ faytɨ ɨfwo nâ wèyn kɨ ighel ta mà bè sɨ̂ và.”

Tɨsaʼ kûm àchi ɨtuʼ ilaʼ

¹²Bôbo Fɨyini nɨ̀n be meyn sɨ̂ Mosìs na wù be sɨ̂ ghelɨ Isìlæ̀ na, ¹³“Yi n-kelɨ sɨ nà yɨ achi ɨtuʼ ilaʼ nɨ̀ mà. Achi nâ kèyna na ghɨ sɨ a nchwæ sɨ̂ mà, nɨ̀ zɨ̀ baʼsɨ̂ nɨ̀ ɨ̀jwâŋ vzɨ̀ a wu n-læ̀ koʼ ibàm ta ka yì na kya na à n-ghɨ mà Bôbo Fɨyini vzɨ̀ a mà chòʼ zɨ, ɨ̀ nì na yì na ghɨ ghelɨ ghɨ laynɨ.

¹⁴“Yì na yɨ àchi nâ kèynà bòm ta à n-ghɨ àchi a laynɨ-a sɨ̂ zɨ̀. À fàŋ nô mɨ ndà tɨ̀ yɨ achi nâ kèynà a ghɨ na kelɨ sɨ zue ŋweyn. À fèl nô mɨ ndà iwo achi nâ ghàyn, a mà na kelɨ sɨ fvɨ̀sɨ ŋweyn sɨ a antêynɨ̀ nɨ̀ ghelɨ̀ ghem. ¹⁵Yì na fêl sɨ a mɨchi ntufa ɨwe, à na ghɨ a mɨchi nsòmbo, yi bam bòm ta à n-ghɨ àchi ɨtuʼ ilaʼ, achi a yvɨtɨnɨ-a, layna sɨ̂ Bôbo Fɨyini. À fèl nô mɨ ndà iwo achi nâ ghàyn a ghɨ na kelɨ sɨ zue ŋweyn. ¹⁶À læ̀ koʼ nô mɨ àjâŋ à kà a Isìlæ̀, kɨ nà bam kɨ bam achi nâ kèynà, yɨ-a sɨ a nchwæ mɨ̀kàyn mzɨ̀ a mà yɨ̀ ghesɨ̀và mɨ̀ faŋ kɨ sɨ amoʼ. ¹⁷Achi nâ kèynà nɨn faŋ sɨ a nchwæ sɨ̂ mà nɨ̀ ghelɨ Isìlæ̀, nɨ̀ ɨ̀jwâŋ vzɨ̀ a wu n-læ̀ koʼ ibàm sɨ a mɨlvɨ ɨ̀n jɨ̀m. Achi ateyn a na bêtɨ̀ sɨ̂ zɨ̀ na Bôbo Fɨyini nɨn læ faytɨ iyvɨ nɨ̀ nse sɨ a mɨchi ntufa a nà ghɨ a mɨchi nsòmbo, wu faŋ tɨ fêl iwo, ɨ yvɨ̀tɨ̀.”

¹⁸A nà n-ghɨ ta Bôbo Fɨyini taŋi mèsì sɨ̂ Mosìs a kfɨyn Sinày, wu fu ɨbwâŋ ngòʼsɨ̀ vzɨ̀ ɨ̀ bwò a wu n-nyàʼ tɨsaʼ tìtɨ̀ ateyn kɨ̀ nô sɨ a ŋweyn a ngeŋ tî sɨ̂ Mosìs.