Exodus 27

Abaŋ kì a ghɨ n-yôʼ ifu ateyn

¹Bôbo Fɨyini nɨ̀n bê meyn sɨ̂ Mosìs na, “Bayn abaŋ ifu nɨ̀ fɨ̀kâʼ fɨ àkasìyà fɨ̀, kɨ kelɨ ɨ̀byâs ɨ̀ kfæ̀, wu ghɨ kɨ ighel ighel, njetɨ̂ iyvɨ chem ndû ntàm nɨ̀ àbeʼa, dyêf chem ndû ntàmsɨ̀ bò nɨ̀ àbeʼa, ghaʼ chem ndû kɨmɨ ntàmsɨ̀ bò nɨ̀ àbeʼa. ²Faytɨ mɨchoʼ a tɨ̂ghaŋ tɨ ateyn tɨ̀ kæ̀ mɨ ghɨ tèyn ta ndoŋsɨ nyâm mɨ̀ na ghɨ kɨ sɨ afo àmòʼ nɨ̀ àbaŋ ifu nâ kì-à. Wà nî wa yoʼ abaŋ ateyn nɨ̀ ìdyayn i. ³Faytɨ ɨfwo abaŋ nâ vzɨ̀ nô ɨ̀ jɨ̀m kɨ nɨ̀ ìdyayn i, ɨ ntòyn sìsɨ̀ a ka ghɨ na tafî àbvɨ ichi ateyn, nɨ̀ fɨsɨ àtì-atisɨ sɨ nà komi abaŋ nâ kì ateyn kɨ̀mɨ nɨ̀ ɨ̀ntwàs vzɨ̀ a ka ghɨ na chuʼ njwò ateyn baʼsɨ̂ nɨ̀ ɨ̀kfaŋ vzɨ̀ a ka ghɨ na wê ɨ̀kfêtɨ̀ ɨvɨ̀s ateyn, nɨ̀ ɨ̀kfaŋ vzɨ̀ a ghɨ nà n-we mu ateyn mɨsì-à. ⁴Bo afo ɨ lom nɨ̀ ìdyayn i kɨ ghɨ ta nchèkèlèʼ, ɨ we mɨ̀nchaʼ a tɨghaŋ tɨ ateyn tɨ̀ kæ̀ ghɨ na kwô ɨ̀nkâʼ atû àteyn. ⁵Wà faytɨ wa we kɨ suʼi tèmnɨ̀ kɨ̀ temnɨ antêynɨ̀ àbaŋ nâ ghè. ⁶Kom mbàŋsɨ̀ nɨ̀ fɨ̀kâʼ fɨ àkasìyà fɨ̀ ɨ yoʼ nɨ̀ ìdyayn i. ⁷Wà nî wa tuŋtɨ mbàŋsɨ ateyn a mɨ̂nchaʼ afî ɨbyàs ɨ̀ bwò ɨwùyn abaŋ nâ ghè ta ka ghɨ na ghal châʼsɨ̀ ateyn. ⁸Faytɨ abaŋ ateyn nɨ̀ ɨ̀byâŋ ɨnkàʼ, ɨ visi kɨ. Faytɨ kɨ ɨfyèʼ ghè a mà fù sɨ̂ và a kfɨyn afêyn.”

Ɨwe vzɨ̀ a ka ghɨ tom fɨ̀ndo fɨ Bôbo Fɨyini

⁹“Si ɨwe, ɨ tom fɨ̀ndo fɨ Bôbo Fɨyini nâ fèynfɨ̀ ateyn. Wà sî, wà nì abâs itsɨyna na dyêf chem ndû ntàmsɨ̀ mɨ̀vɨm ɨ̀n kæ̀ njvàsɨ̀ ntufa, ɨ kɨ̀ŋtɨ̀ nɨ̀ ɨ̀byâs ɨ ndzɨsɨ ma ghɨ faytɨ meyn tɨm nɨ̀ àmbyèyn a fyeynɨ-a. ¹⁰Mɨ̀kfɨ̀s mzɨ̀ a ka ghɨ ghaŋsɨ ɨbyâs ɨ ndzɨsɨ nâ vzɨ̀ ateyn na ghɨ mɨ̀vɨm ɨ̀m bò ma ghɨ faytɨ nɨ̀ ìdyayn i, ɨ̀ tòmtɨ atû ɨ̀byàŋ ɨfwo ma ghɨ faytɨ kɨ̀mɨ nɨ̀ ìdyayn i. Wà nî wa we ɨ̀nghòf ma ghɨ faytɨ nɨ̀ àso ɨkwo a fɨfâ, nɨ̀ mɨ̀bâynɨ̀ mɨ̀ ndzɨsɨ ma ghɨ nyotɨ meyn nɨ̀ àso ɨkwo a fɨfâ, ɨ dyaŋsɨ a mɨ̂kfɨ̀s nâ ghè. ¹¹Abâs ikuè-à na dyêf chem ndû kɨmɨ ntàmsɨ̀ mɨ̀vɨm ɨ̀n kæ̀ njvàsɨ̀ ntufa, kelɨ kɨmɨ ɨ̀byâs ɨ ndzɨsɨ. Mɨ̀kfɨ̀s mzɨ̀ a ka ghɨ ghaŋsɨ ɨbyâs ɨ ndzɨsɨ nâ vzɨ̀ ateyn na ghɨ kɨmɨ mɨ̀vɨm ɨ̀m bò ma ghɨ faytɨ nɨ̀ ìdyayn i, ɨ̀ tòmtɨ atû ɨ̀byàŋ ɨfwo mɨ̀vɨm ɨ̀m bò ma ghɨ faytɨ kɨ̀mɨ nɨ̀ ìdyayn i. Wà nî wa we ɨ̀nghòf ateyn nɨ̀ mɨ̀mbàŋtɨ̀ ma ghɨ faytɨ nɨ̀ àso ɨkwo a fɨfâ, ɨ dyaŋsɨ a mɨ̂kfɨ̀s nâ ghè.”

¹²“Ɨbyâs ɨ ndzɨsɨ na ghɨ abàs ghè a ɨchfɨ̂-iyvɨ i nɨn sœ ateyn ɨwe nâ ghè ghaʼ chem ntàmsɨ̀ mɨ̀vɨm ɨ̀m bò njvàsɨ̀ tal nɨ̀ mɨ̀kfɨ̀s ìvɨm, baʼsɨ̂ nɨ̀ ɨ̀byâŋ ɨfwo vzɨ̀ a ka mɨkfɨ̂s nâ mzɨ̀ na ti ateyn kɨ̀mɨ ìvɨm. ¹³Abâs ɨwe kì a ɨchfɨ̂-iyvɨ i nɨn sal ateyn na ghaʼ chem ntàmsɨ̀ mɨ̀vɨm ɨ̀m bò njvàsɨ̀ tal. ¹⁴Ɨbyâs ɨ ndzɨsɨ na ghaŋlɨ̂ abàs ɨchfɨ ɨwe a li-a dyêf chem ndû ntàmsɨ̀ nsòmbo, nɨ̀ mɨ̀kfɨ̀s ɨ̀n tal baʼsɨ̂ nɨ̀ ɨ̀byâŋ ɨfwo vzɨ̀ a mɨ̀ na ti atû àteyn kɨ̀mɨ ɨ̀ twal. ¹⁵Wu na ghaŋlɨ̂ kɨmɨ tì abàs ɨchfɨ ɨwe a li-a, dyêf chem ndû ntàmsɨ̀ nsòmbo nɨ̀ mɨ̀kfɨ̀s ɨ̀n tal baʼsɨ̂ nɨ̀ ɨ̀byâŋ ɨfwo vzɨ̀ a ka mɨ̀ na ti atû àteyn kɨ̀mɨ ɨ̀ twal.”

¹⁶“Ghaŋsɨ abâs a ndzɨsɨ ɨchfɨ ɨwe nâ ghè kɨ dyêf chem ndû ntàmsɨ̀ bulamòʼ ma ghɨ faytɨ meyn tɨm nɨ̀ àmbyèyn a kɨ nyêm nyêm nɨ̀ a li-a kɨ nyêm bâŋ ndû ndu nɨ a li-a kɨ bɨ̂ylɨ̀ bâŋ baŋ ma ghɨ tɨm kɨ̀ nô ta à tɨ̀m wul vzɨ̀ a wù n-tɨm ɨfwo. Ghɨ nì ghaŋsɨ̂ ndzɨsɨ nâ sèynsɨ̀ a mɨ̂kfɨ̀s ɨ̀n kæ̀ mɨ ti atû ɨ̀byàŋ ɨfwo kɨ̀mɨ ɨ̀ kfæ̀. ¹⁷Nô mɨ̀kfɨ̀s ɨ̀n jɨ̀m ta mɨ̀ n-jɨŋ kal ɨwe ateyn na ghɨ ma ghɨ ghaŋsɨ meyn mɨ̀bâynɨ̀ mɨ̀ ndzɨsɨ ma ghɨ nyotɨ meyn nɨ̀ àso ɨkwo a fɨfâ nɨ̀ ɨ̀nghòf ɨ̀ ma ghɨ fàytɨ kɨ̀mɨ nɨ̀ àso ɨkwo a fɨfâ. Mɨ̀kfɨ̀s mɨ̀ àteyn na ti atû ɨ̀byàŋ ɨfwo ma ghɨ fàytɨ nɨ̀ ìdyayn i. ¹⁸Ɨwe ateyn na dyêf chem ndû ntàmsɨ̀ mɨ̀vɨm ɨ̀n kæ̀ njvàsɨ̀ ntufa ghaʼ chem ndû ntàmsɨ̀ mɨ̀vɨm ɨ̀m bò njvàsɨ̀ tal, ma ghɨ fàytɨ nɨ̀ ɨ̀byâs ɨ ndzɨsɨ wu njetɨ̂ iyvɨ chem ndû ntàmsɨ̀ bò nɨ̀ àbeʼ a ma ghɨ faytɨ meyn tɨm nɨ̀ àmbyèyn a fyeynɨ-a baʼsɨ̂ nɨ̀ ɨ̀byâŋ ɨfwo vzɨ̀ a ka mɨ̀kfɨ̀s na ti atû àteyn ma ghɨ fàytɨ nɨ̀ ìdyanyn i. ¹⁹Nô mɨ gha ɨ̀lvì vzɨ̂ a kɨ na ghɨ a fɨndo nɨ̀ Bôbo Fɨyini nâ ghè, kèsa ghɨ nî nô mɨ ghà ateyn, baʼsɨ̂ nɨ̀ mɨ̀choʼ mɨ̀ fɨ̀ndo nɨ̀ Bôbo nô ɨ̀n jɨ̀m nɨ ɨmzɨ̂ ɨ̀wè na ghɨ ma ghɨ fàytɨ kɨ nɨ̀ ìdyayn i.”

Mɨ̀vɨ̂l mzɨ̀ a ka ghɨ na wê a lâm

²⁰Bôbo Fɨyini nɨ̀n be meyn sɨ̂ Mosìs na, “Lèm sɨ a isaʼ sɨ̂ ghelɨ Isìlæ̀ na àŋena na gvî nɨ̀ mɨ̀vɨ̂l mɨ̀ olìfsɨ̀ ɨ̂n jùŋ ta ghɨ kam, ghɨ wê a lâmsɨ̀ afî ta ka sɨ na bayn kɨ bayn mɨlvɨ ɨ̀n jɨ̀m. ²¹Alòyn ŋêyn woyn ŋweyn nɨn kelɨ sɨ nà fvɨsɨ̀ afo kì a ghɨ n-tomtɨ lâmsɨ̀ ateyn tom ibàm abàs a ndzɨsɨ ghè a kɨ n-kɨ̂ŋtɨ̀ àntayntayn a mɨ̂kàyn nɨ̀ mà. Àŋena nɨn kelɨ sɨ nà dyayn lâmsɨ̀ ateyn, sɨ nà bayn kɨ mɨlvɨ ìn jɨ̀m asɨ nɨ̀ Bôbo Fɨyini. Nô mɨ àjâŋ a Isìlæ̀ à kà læ̀ nà koʼa, kɨ nà lèm ìsaʼ nâ yèynì.”