Exodus 22

Tɨsaʼ kûm ɨfwo vzɨ̀ a ghelɨ nɨn kelɨ

¹Wùl kæ sɨ choŋ mbòŋ kèsa njɨ̀ ɨ̀ sɨ kèsa wù bèyʼlɨ beyʼlɨ, ghɨ ghal ŋweyn a wù laʼ mbòŋ àteyn nɨ̀ nyamsɨ mbòloʼ sɨ̀ tâyn, ɨ̀ laʼ njɨ̀ nɨ̀ njɨ̀sɨ̀ kæ̀.

²Wùl kæ ghal wul ɨ choŋnɨ wu kolɨ̀ ndo, ɨ̀ leŋ zuè, ghɨ bû ghàl ŋweyn ta wul ɨlvɨ ta wù zuè wul. ³Mɨtì wul kæ sɨ leŋ sɨ zue wul ɨ choŋnɨ ta wù n-kôl ndo ŋweyn sɨ zɨ nɨ̀nchuè ghɨ ghal ŋweyn bòm ta wù zue meyn wul.

“Wùl kæ sɨ choŋ afo ghɨ ghal, wù làʼ. Wù kæ sɨ nà kelɨ wi ɨkwo sɨ làʼ ghɨ beyʼlɨ ŋweyn sɨ akòs ɨ làʼ àfo kì a wù choŋ.”

⁴“Ghɨ kæ sɨ yeyn nyam zɨ̀ a ghɨ choŋ kèsa mbòŋ kèsa njàkâs kèsa bzɨ njɨ̀ sɨ̂ wùl ɨ̀ choŋnɨ nâ vzɨ̀, yi bu ghɨ i to, ghɨ ghal ŋweyn wù laʼ yòmtɨ.”

⁵“Wùl kæ sɨ nà yɨsɨ̂ nyamsɨ ŋweyn ɨtwaʼ kèsa a gvêyn gɨ̀lêbsɨ̀ ɨ̀ vìsi sɨ zɨ ɨtwaʼ kèsa a gvêyn gɨ̀lêbsɨ̀ nɨ̀ wùl ɨ lvì a wù na kelɨ sɨ làʼ nɨ̀ ɨfwo ɨ jûŋ vzɨ̀ a wu fvɨ̀ a ŋweyn a gvêyn.”

⁶“Wùl kæ sɨ dyàyn ɨvɨs a ŋweyn a gvêyn, wu fɨ ɨ̀ dyàŋsɨ̀ ɨtwaʼ sùnjoŋ-njoŋsɨ ɨ̀ ndù nyòʼ àsaŋ a wûl ta ghɨ kfì ɨ̀ lèm, kèsa akî a kɨ bu lema lema kèsa gveyn àteyn ì jɨ̀ma, a wùl vzɨ̀ a wù kwò ɨvɨs ateyn na kelɨ sɨ làʼ ɨfwo vzɨ̀ a ɨvɨs ateyn bèbsɨ̀.”

⁷“Wùl kæ sɨ fu aso ɨkwo a fɨfâ kèsa ɨfwo na wâynà ŋweyn faytɨ lèm sɨ̂ ŋweyn, ghɨ choŋ ɨ̀fwo ateyn a ndo nâ ghè ghɨ kæ sɨ ghal wul ɨ choŋnɨ àteyn a wù laʼ yòmtɨ. ⁸Mɨtì ghɨ kæ sɨ faŋ tɨ̀ ghàl wul ɨ choŋnɨ àteyn, ghɨ li ndù nɨ̀ wùl vzɨ̀ a wù tî nà lêm ɨfwo ateyn sɨ̂ ghelɨ ghɨ saʼnɨ a àŋena kitɨ ɨ̀ yeyn nâ à chòŋ ŋweyn ma. ⁹Ghelɨ ghɨ̀ bo kæ sɨ nà gûmnɨ̀ atû àfo àmoʼ ta kɨ lè kèsa à n-ghɨ mbòŋ kèsa njàkâs kèsa bzɨ njɨ̀ kèsa ndzɨsɨ kèsa nɨ̀ ɨ̀fwo ɨlvi, nô mɨ ndà ɨ ghɨ kɨ na à n-kelɨ zɨ̀, ghɨ li ndù nɨ̀ àŋena asɨ nɨ̀ ghelɨ isaʼ. Ghɨ kæ sɨ yeyn a wam nô mɨ ndà a wù laʼ yòmtɨ sɨ̂ wùl ɨ̀ vzɨ̀ a wù n-kelɨ.”

¹⁰“Wùl kæ sɨ fu njàkâs kèsa mbòŋ kèsa njɨ̀ kèsa nô mɨ nyam ì kà na wâynà ŋweyn lem nà tôʼnɨ̀ nɨ̀ ɨ̀nyeyn, yì kfɨ kèsa yì kèli àlemtɨ kèsa à gvì wul ɨ̀ lì lù nɨ̀ nyeyn wùl ɨ̀ faŋ tɨ̀ yeyn, ¹¹a àŋena ndu nɨ̀ wùl vzɨ̀ a wù tî nà tôʼnɨ nɨ̀ nyàm ateyn asɨ nɨ̀ Bôbo Fɨyini, a wù nyvɨ gvɨ na yi bû choŋ. Wù kæ sɨ nyvɨ, wùl vzɨ̀ a wù n-kelɨ nyam àteyn bɨmi kɨ̀ tî, wù faŋ tɨ̀ làʼ. ¹²Mɨtì a kæ sɨ nà ghɨ ma ghɨ tî chòŋ choŋ nyam àteyn abe nɨ̀ wâynà ŋweyn, a wù na kelɨ sɨ laʼ sɨ̂ wùl ɨ̀ vzɨ̀ a wù n-kelɨ. ¹³À kæ sɨ nà ghɨ ma à tî zue nyam ɨ̀twaʼ zuè nyam àteyn, wu lì àsâs ateyn ɨ̀ gvì nɨ̀ ànkeyna ɨ dyèyn, ta ka ghɨ faŋ tɨ̀ ghàl ŋweyn na wù laʼ.”

¹⁴“Wùl kæ sɨ sam nyam sɨ̂ wâynà ŋweyn, yì keli àlemtɨ kèsa yì kfɨ̀ kfɨ wùl ɨ̀ vzɨ̀ a wù n-kelɨ nyam àteyn ɨ ghɨ wi afu a wù laʼ. ¹⁵Mɨtì yì kæ sɨ kfɨ wùl ɨ̀ vzɨ̀ a wù n-kelɨ nyam àteyn ɨ ghɨ afu a wùl vzɨ̀ a wù tî sam faŋ tɨ̀ làʼ. À kæ sɨ nà ghɨ ma wù ti meyn fu ɨkwo sɨ̂ ŋweyn sɨ lì sɨ aleŋ ɨlvɨ, a ɨkwo nâ vzɨ̀ ndu sɨ atu nyàm nâ ghè.”

Tisaʼ kûm dzɨ zɨ̀ a ka ghelɨ na chî ateyn.

¹⁶Wùl ɨ lûmnɨ̀ kæ sɨ lɨsɨ wul ɨ wi bula ghɨ timi chi nɨ̀ ŋweyn, bula ghɨ fu àfo a ŋweyn atu ɨ̀ chi nɨ̀ ŋweyn a wù na kelɨ sɨ fu afo a ŋweyn atu sɨ li sɨ a ŋweyn a wi. ¹⁷Bò wùl ɨ wi nâ vzɨ̀ kæ sɨ teyn na wu n-fu wi wâyn ŋweyn sɨ̂ wùl nâ vzɨ̀, a wùl àteyn na kelɨ kɨ sɨ fu afo kì a ghɨ n-fu atu nɨ̀ wùl ɨ wi bula ghɨ timi chi nɨ̀ ŋweyn.

¹⁸Yì zue nô mɨ wul ɨ wi ɨ̀ kfà ta wù n-fyeŋ fɨnyaʼ.

¹⁹Yi n-kelɨ sɨ zue nô mɨ ndà ta wù chi nɨ̀ nyàm.

²⁰Yi n-kelɨ sɨ zue nô mɨ̀ ndà ta wù fu ifu sɨ̂ fɨyini fɨ lifɨ a bu kɨ sɨ̂ mà Bôbo Fɨyini.

²¹Ka wùl nɨ̂n læ̀ nyàblɨ̀ nɨ̀ wùl àtum bòm ta yì tî nà ghɨ ghelɨ ɨtum a Ijìb.

²²Ka wùl nɨ̂n fu ngeʼ sɨ̂ wî nkfɨ kèsa wâyn nkfɨ. ²³Yì kæ sɨ mòm àŋena dzɨ̂ sɨ̂ mà, a mà yvɨ idzɨ̂ i àŋena, ²⁴ɨ̀ nyòʼsɨ̀ ɨ̀toŋ ɨ̀ nì a yì kfɨtɨ iwòŋ ta ka ghɨ̀ki ghi na sɨ ghɨ ghɨ̀ki nkfɨ, woyn ghi ɨ ghɨ woyn nkfɨ.

²⁵Yì kæ sɨ samsɨ ɨkwo sɨ̂ wùl antêynɨ̀ nɨ̀ ghelɨ̀ ghem ta wù n-wo ka yî n-fàytɨ sɨ a mbèʼì nkùm sɨ na bɨf ɨtu ɨkwo nâ vzɨ̀ sɨ̂ ŋweyn. ²⁶Wùl kæ sɨ tisɨ awaf a ŋweyn sɨ̂ zɨ̀ sɨ afo, yi kasi fu sɨ̂ ŋweyn jæ ta ka ɨchfɨ̂-iyvɨ i sœ, ²⁷bòm ta wù n-kelɨ kɨ àwaf nâ kì-à sɨ chɨytɨ. Yì kæ sɨ faŋ tɨ̀ fu, wù dzɨ̂ sɨ̀ mà a mà gamtɨ ŋweyn bòm ta mɨ n-ghɨ Fɨyini fìfɨ̀ a fɨ n-koynsɨ isuyn.

²⁸Ka wùl nɨ̂n te Fɨyini kèsa wul ɨ̀ vzɨ̀ a wù n-tisɨ ghelɨ Isìlæ̀.

²⁹Yi keli ɨ̀fwo ɨ̀ lèm a tɨkàŋ nɨ̀ zɨ̀ kèsa yì we lèm mɨ̀lûʼ a nsàlsɨ̀ kèsa mɨvɨl a nshɨ̀ŋsɨ̀ ka yi n-faŋ tɨ̀ lì sɨ gvì nɨ̀ ɨfwo ateyn sɨ fu sɨ̂ mà. Yi n-kelɨ sɨ fu woyn ghɨ lûmnɨ̀ ɨ ghɨ asɨ nɨ̀ zɨ̀ sɨ̂ mà.

³⁰Yì ni kɨ̀mɨ tèyn nɨ̀ woyn nyâmsɨ mbòloʼ sɨlûmnɨ̀sɨ̀ ɨ sɨ asɨsɨ baʼsɨ̂ nɨ̀ woyn njɨ̀sɨ̀ ɨ sɨ asɨsɨ. Nyamsɨ na bzɨ-à, yi visi woyn ateyn na ghɨ a ngùŋ nɨ̀ ghɨ̀na ateyn sɨ a mɨchi nsòmbo. À na ghɨ a mɨchi nfama yi li gvì nɨ̀ woyn ateyn ɨ fu sɨ̂ mà.

³¹Nyamsɨ ɨtwaʼsɨ zue nyâm zɨ, yi maʼ kɨ sɨ̂ bɨsɨ. Ka wùl nɨ̂n kfɨl bòm ta yi n-ghɨ ghelɨ sɨ a nyɨŋ sɨ̂ mà.