Exodus 19

Bôbo Fɨyini ɨ dyèyn ngêŋ ŋweyn sɨ̂ Mosìs a kfɨ̂yn Sinày.

¹À nà n-ghɨ achi a kɨ asɨ-a a njoŋ sɨ̀ tal ta ghelɨ Isìlæ̀ fvɨ̀ sɨ a Ijìb, àŋena ndu chem a nse ìyum a Sinày. ²Àŋena nɨn lù a Lefidɨ̀m ɨ gvi bɨ̀ a mbæ̀ kfɨyn Sinày a nse iyum.

³Àŋena nɨn bɨ̀ tî, Mosìs ɨ koʼ atû kfɨ̀yn sɨ kòynɨ nɨ̀ Fɨyini fɨ. Bôbo Fɨyini ɨ jaŋ ɨ suʼsɨ nɨ̀ ŋweyn afu ɨ bè na, “Ndu bè sɨ̂ ghelɨ Isìlæ̀, ɨ woyn Jàkôb na, ⁴‘Yi yeyn meyn kɨ̀ nô sɨ a yi a ngeŋsɨ iwo zɨ̀ a mà tî nì sɨ̂ ghelɨ Ijìb, fì yeyn dzɨ zɨ̀ a mà tî njèsɨ zɨ ateyn ɨ̀ gvì nɨ̀ zɨ̀ afêyn kɨ̀ têyn ta mbuʼ àwùmawum nɨn nî yi njesɨ wayn a tɨ̂wò. ⁵Yì kæ sɨ nà yvɨnɨ mà kɨ̀ awo à jɨ̀m, fî lêm mɨ̀kâyn mêm, a yì na ghɨ ghelɨ̀ ghem, koʼnɨ̂ a ma asɨ chwô ghelɨ ghɨ̀ jɨ̀m a mbzɨ. Nô mɨ ta à n-kelɨ ma ghelɨ ghɨ̀ jɨ̀m a mbzɨ, ⁶a yì na ghɨ ghelɨ sɨ a nyɨŋ sɨ̂ mà, ghɨ ngàŋsɨ ndo nɨ̀ mà. À ti awo kì a ka wà ndu bè sɨ̂ ghelɨ Isìlæ̀.’”

⁷Mosìs ɨ kasi kàlì sɨ a kfɨ̀yn ɨ jàŋtɨ̀ chyeʼsɨ Isìlæ̀ ɨ fèʼtɨ̀ àwo kì a Bôbo Fɨyini bè nô à jɨ̀m sɨ̂ àŋena. ⁸Ghelɨ Isìlæ̀ ɨ chɨ̀yntɨ̀ ɨ bèynsɨ kɨ ghɨ̀ jɨ̀m na, “Ghès nɨn nì nô mɨ ghà ta Bôbo Fɨyini bè.” Mosìs ɨ kasi ndù ɨ fèʼtɨ̀ ìwo zɨ̀ a àŋena bè sɨ̂ Bôbo Fɨyini.

Mosìs ɨ baʼtɨ ghelɨ ta ka àŋena ndu asɨ nɨ̀ Bôbo Fɨyini.

⁹Bôbo Fɨyini ɨ bè sɨ̂ Mosìs na, “Mɨ n-gvî sɨ̂ và antêynɨ̀ ntuʼ mbàʼsɨ̀, nà taŋi sɨ̂ và ta ka ghelɨ Isìlæ̀ yvɨ ta mɨ n-taŋi, ɨ̀ nà samsɨ̂ và kɨ̀ mɨlvɨ ɨ̀n jɨ̀m.”

Mosìs ɨ kæ fèʼtɨ̀ iwo zɨ̀ a ghelɨ bè sɨ̂ Bôbo Fɨyini. ¹⁰Bôbo Fɨyini ɨ bè sɨ̂ Mosìs na, “Kasi kàli ɨ baʼtɨ àŋena layn nɨ̀ libɨs, ghɨ na layna asɨ nɨ̀ Bôbo Fɨyini. Bè na àŋena su ndzɨsɨ àŋena, ¹¹nà gvɨtɨ̀-à a mɨchi ɨ̀n tal bòm ta Bôbo Fɨyini nɨn suʼi atû kfɨyn Sinày a ghelɨ yeyn kɨ ghɨ̀ jɨ̀m. ¹²Chwæ jɨŋ kal nɨ̀ kfɨ̀yn nâ yèyn, ɨ fu nfàsì-fàsì ɨ bè sɨ̂ àŋena na, ‘Yì na tôʼnɨ̀-à ka wùl nɨn kòʼ a kfɨ̂yn nâ ghè, kèsa sɨ baʼsɨ a isas ateyn. À tòm nô mɨ ndà avɨ a ŋweyn afu, a ghɨ na kelɨ sɨ zue ŋweyn. ¹³Wùl kæ sɨ kùm kfɨyn àteyn kèsa à kùm nyam, a ghɨ tɨmlɨ zue nɨ̀ ngòʼsɨ̀ kèsa nɨ̀ fɨ̀nchya fɨ. Ka wùl nɨn kùm ŋweyn nɨ̀ àwu a. À kæ sɨ kùm nô mɨ ndà kèsa nyam, ghɨ zue kɨ zue.’ Yi nì kɨŋtɨ baʼsɨ kɨ a kfɨyn nâ ghàyn ɨlvɨ ta ghɨ tòŋ ndoŋ àyaʼ lòtɨ̀ kɨ̀ lotɨ.”

¹⁴A nà ghɨ ta Mosìs kasi kàlì sɨ a kfɨyn wu baʼtɨ àŋena, ghɨ nà layna asɨ nɨ̀ Fɨyini fɨ, ɨ fi sù ndzɨsɨ àŋena kɨ̀ ta Mosìs bè. ¹⁵Wu bè sɨ̂ àŋena na, “Yì baʼtɨ ngêŋ sisɨ sɨ a mɨchi ɨ̀n tal. Ka wùl nɨ̂n chi nɨ̀ wùl ɨ wi.”

¹⁶Mɨ̀chi ɨ chwò ɨ̀m bò, ɨtuʼ nà bɨs layn gvi-à na à na sɨ ghɨ mɨchi ɨ̀n tal, ivɨ i nà myaynà, byaytɨ-à, ntuʼ mbàʼsɨ̀ ɨ ghɨ ma yì chɨl meyn kfɨyn nâ zɨ̀. Ghɨ toŋ ndoŋ àyaʼ nô sɨ a ŋaŋ, ghelɨ Isìlæ̀ nô ghɨ̀ jɨ̀m ɨ nà sɨ chɨŋtɨ̂ faynà alèʼ ghè a àŋena nɨn bɨ̀ ateyn. ¹⁷Mosìs ɨ kæ sɨ lì sɨ fvɨ̀ nɨ̀ àŋena sɨ a alèʼ ghè a àŋena nɨn læ bɨ̀ ateyn sɨ ndù nɨ̀ àŋena asɨ nɨ̀ Fɨyini fɨ. Àŋena ndù ɨ timi kɨ isas i kfɨyn. ¹⁸Fɨleʼ fɨ nɨn læ chɨl kfɨ̂yn Sinày kɨ ì jɨ̀m bòm ta Bôbo Fɨyini nɨn suʼi kàlì a kfɨyn afu antêynɨ̀ ɨvɨs. Fɨleʼ fɨ ateyn fɨ nà n-fvɨ̂ koʼ nô sɨ a ŋaŋ kɨ̀ têyn ta fɨ fvɨ̀ ichɨ i ɨvɨ̀s, kfɨ̀yn ɨ nèʼa kɨ ì jɨ̀m nô sɨ a ŋaŋ, ¹⁹ghɨ toŋ ndoŋ àyaʼ yi koʼtɨ̂ ndû kɨ asɨ. Mosìs nà n-taŋî nô mɨ ɨlvɨ gha, Fɨyini fɨ ɨ bèynsɨ̀ nɨ̀ gyà ì to kɨ̀ têyn ta ivɨ i byaytɨnɨ-i.

²⁰Bôbo Fɨyini ɨ suʼi kàlì atû kfɨyn Sinày, ɨ jàŋ Mosìs wu koʼ atû kfɨ̀yn afu. ²¹Mosìs nɨn kòʼ tî Bôbo Fɨyini ɨ bè sɨ̂ ŋweyn na, “Kàli ndu fu nfàsì-fàsì sɨ̂ ghelɨ ghì bùla tì a àŋena na to kɨ sɨ koʼ sɨ yeyn Bôbo Fɨyini, ɨ̀ se sɨ koʼ, a ndvɨ̀ kfɨtɨ. ²²Nô mɨ ngàŋsɨ ndô Fɨyini sìsɨ̀ a sɨ n-kelɨ sɨ gvì sɨ baʼsɨ asɨ nɨ̀ mà nɨn kelɨ sɨ baʼtɨ ngeŋsɨ àŋena sɨ nà layn kfeynɨ-a asɨ nɨ̀ Bôbo Fɨyini bùla tì a mà fu ngeʼ sɨ̂ àŋena.”

²³Mosìs ɨ bè sɨ̂ Bôbo Fɨyini na, “Ghelɨ ateyn kàʼ ghɨ bû kòʼ a kfɨyn Sinày bòm ta à tî chwòsɨ̀ kɨ̀ nô và isaʼ na mà chwæ kal nɨ̀ kfɨyn àteyn ta ka yì na ghɨ nɨ̀ ìlayn i.”

²⁴Bôbo Fɨyini ɨ bè sɨ̂ ŋweyn na, “Kàli ndu lì Alòyn zɨ̂ ŋweyn koʼ gvì, mɨtì ka ngàŋsɨ ndô Fɨyinisɨ baʼsɨ̂ nɨ̀ ghelɨ ghɨli nɨn to koʼ sɨ gvì sɨ yeyn ma bùla tì a mà fu ngeʼ sɨ̂ àŋena.”

²⁵Bôbo Fɨyini nɨn taŋi tî, Mosìs ɨ kali ndu fèʼtɨ̀ àwo ateyn sɨ̂ ghelɨ ateyn.