Exodus 10

Ngumisɨ ɨ gvɨ̀ a Ijìb

¹Fòyn Ijìb nɨn læ tosɨ àtem tî, Bôbo Fɨyini ɨ kæ bè sɨ̂ Mosìs na, “Ndu yeyn fòyn Ijìb bòm ta ma tosɨ meyn àtem a ŋweyn ɨ̀ tòsɨ mɨ̀tem mɨ̀ chyeʼsɨ ŋweynsɨ ta ka mà dyeyn nchwæsɨ awo a kaynɨ-a nɨ̀ mà sɨ̂ àŋena. ²Mɨ n-nî tèyn ta ka yì læ̂ nà fêʼtɨ̀ sɨ̂ wôyn ghi nɨ̀ woyn wôyn ghi na à ti dzɨ zɨ̀ a mɨ n-læ kasi ghelɨ Ijìb ateyn sɨ a ɨngù, fî fêʼtɨ̀ nchwæsɨ awo sìsɨ̀ a mɨ n-læ dyèyn sɨ̂ àŋena, ta ka yì keli na mɨ n-ghɨ Bôbo Fɨyini.”

³Mosìs ŋêyn Alòyn ɨ kæ sɨ ndù a ntoʼ, ɨ bè sɨ̂ fòyn Ijìb na, “Bôbo Fɨyini, ɨ Fɨyini fɨ ghelɨ Hibɨ̀lù bɨfɨ na, ‘Wa ti n-tosɨ̂ àtem chèm ti-a jæ ta ka wà yvɨnɨ ma, ɨ̀ vìsi ghelɨ̀ ghem a àŋena lu ndù nà koʼsɨ̂ mà a? ⁴Wà kæ faŋ tɨ̀ vìsi na àŋena lu, a mà ni a ngumisɨ gvɨ a wa ilaʼ a libɨs. ⁵Mɨ n-tuma a sɨ gvɨ kɨ ɨlwêʼ ɨ̀ jɨ̀m a nse, a nô àlêʼ a nse na bu kêʼ wì. Sɨ n-gvɨ̀-à ɨ̀ kfɨl nô mɨ ghà ta awœ tî bèbsɨ kɨ faŋ baʼsɨ̂ nɨ̀ ɨ̀nkàʼ nɨ̀ ɨ̀fwo vzɨ̀ a wu n-koʼ a gvêynsɨ̀ nɨ̀ zɨ̀. ⁶Ngumisɨ ateynsɨ læ̀ zɨ luyn ndô shyasɨ, nɨ ɨsɨ chyeʼ shyasɨ, baʼsɨ̂ nɨ̀ ndosɨ ghelɨ Ijìb nô sɨ̀ jɨ̀m. Ìnki ngumisɨ nâ yèynì nɨn ghɨ bula ghɨ̀bo ghi nɨ̀ ghɨ̀bo bo ghi timî yeyn sɨ ɨtuʼ ta ghɨ n-læ ku ilaʼ i Ijìb sɨ koʼ sɨ chem layn.’” Mosìs ɨ taŋi mèsì tì ɨ bèynlɨ̀, ɨ lu kɨ lu sɨ asɨ nɨ̀ fòyn Ijìb.

⁷Chyeʼsɨ ntoʼsɨ ɨ yvɨ iwo ateyn ɨ bɨf sɨ̂ fòyn Ijìb na, “A ghesɨ̀nà ti n-visi-à a wùl ɨ̀ wèyn na fu kɨ ngeʼ sɨ̂ ghesɨ̀nà têyn? Visi à ndu kɨ ghɨ̀ lûmnɨ̀ ɨ̀ kòʼsɨ Bôbo Fɨyini, ɨ Fɨyini fɨ àŋena. Wà bû yeyn na ilaʼ yèynì sɨ ghɨ ma yi befɨ meyn a?”

⁸Fòyn ɨ kasi tum jàŋ Mosìs ŋêyn Alòyn ɨ bè sɨ̂ àŋena na, “Yì ndu kòʼsɨ Bôbo Fɨyini fifɨ. Mɨtì yì feʼtɨ sɨ̂ mà na à ndû nô ghɨ̀ ndà a?”

⁹Mosìs ɨ bèynsɨ̀ na, “Ghès nɨn ndû kɨ ghɨ̀ jɨ̀m. Woynda nɨn ndù-à, a ghɨ̀lema ndu, a wôyn ghes ghɨ lûmnɨ̀ nɨ ghɨki ndu baʼsɨ̂ nɨ̀ nyâm seysɨ nô sɨ̀ jɨ̀m bòm ta ghès nɨn kelɨ sɨ yɨ ayɨ sɨ koʼsɨ Bôbo Fɨyini.” ¹⁰Fòyn Ijìb ɨ bè na, “Yi n-kelɨ ìwo i bzɨ-i ta yi n-lêytɨ̀. Mà kæ sɨ visi yi lî ghɨ̀kì nɨ̀ woynda zɨ̂ àŋena lû, a à na ghɨ Bôbo Fɨyini ɨ ti kɨ nô a yi atu samoʼ. ¹¹Ɨ̀ngaŋ! Mà kàʼ ma bû vìsi. Yì li kɨ ghɨ̀lûmnɨ̀ zɨ̂ àŋena ndu kòʼsɨ Bôbo Fɨyini bòm ta à n-ghɨ ìwo zɨ̀ a yi n-kɨŋ.” Wu taŋi tì ɨ sàŋ kɨ saŋ Mosìs ŋêyn Alòyn sɨ a ŋweyn asɨ.

¹²Bôbo Fɨyini ɨ bè sɨ̂ Mosìs na, “Nàysɨ awu à kya atû Ijìb ta ka ngumisɨ gvɨ kɨ ɨlwêʼ ɨ̀ jɨ̀m ɨ̀ kfɨl ɨfwo vzɨ̀ a wu n-koʼ a gvêynsɨ̀ nɨ ɨvzɨ̂ a awœ a tî bèbsɨ wu faŋ nô ɨ̀ jɨ̀m.”

¹³Mosìs ɨ nàysɨ mbàŋ ŋweyn atû Ijìb, Bôbo Fɨyini ɨ nì afyef a ɨ fvɨ̀ abàs ghè a ɨchfɨ-iyvɨ nɨn sal ateyn ɨ yisɨ chwo kɨ ilaʼ afu tèyn, ɨ ni kfa chwò nɨ̀ntuʼ. Ɨtuʼ ni se sɨ layn ma afyef ateyn a gvi meyn nɨ̀ ngumisɨ ateynsɨ. ¹⁴Ngumisɨ ateynsɨ nɨn læ zɨ a Ijìb kɨ̀ sɨ idvɨ̀, ɨ gvɨ kɨ ɨlwêʼ ɨ̀ jɨ̀m. Ìnkì isèŋnɨ̀ i ngumisɨ i bemnɨ-i nâ zɨ̀-ì nɨn bû læ timi ɨ gvɨ̀ a Ijìb, ghɨ wi sɨ læ̀ sɨ fì sɨ gvɨ̀. ¹⁵Sɨ n-læ gvɨ̀, nse ɨ fɨm ndu kɨ ì jɨ̀m ɨ kfɨl nô mɨ ghà ta awœ a nɨn bèbsɨ kɨ faŋ. Sɨ n-kfɨl meyn ɨ̀fwo vzɨ̀ a wu nà n-koʼ a gvêynsɨ̀ nɨ̀ mɨ̀tâm mɨ̀ ɨ̀nkàʼ, nô ìfvɨ i nà bu kalɨ wi a fɨ̂kàʼ, nô mɨ a gvêyn, kɨ̀ ilaʼ i Ijìb ì jɨ̀m.

¹⁶Fòyn ɨ yeyn tî ɨ fɨlɨ tum jàŋ Mosìs ŋêyn Alòyn ɨ bè sɨ̂ àŋena na, “Ma jas meyn sɨ̂ Bôbo Fɨyini ɨ Fɨyini fifɨ, ɨ̀ fì jàs nô sɨ̂ zɨ̀. ¹⁷Yì fî lèsɨ̀ fù mbɨ yem kɨ ɨlvɨ ɨ̀mòʼ lvɨ̂yn, ɨ̀ jèm sɨ̂ Bôbo Fɨyini, ɨ Fɨyini fifɨ wù lisi ngeʼ i bemnɨ yèyn sɨ a ma atu.” ¹⁸Mosìs ɨ kæ lù sɨ asɨ nɨ̀ fòyn Ijìb ɨ ndu jèm sɨ̂ Bôbo Fɨyini. ¹⁹Bôbo Fɨyini ɨ bèynsɨ̀ afyef ateyn a, ɨ nì kɨ kasi sɨ afyef a to-a ɨ nà sɨ gvì dzɨ abàs ghè a ɨchfɨ-iyvɨ i nɨn sœ ateyn, ɨ bèʼì ɨ lù nɨ̀ ngumisɨ ateynsɨ ɨ tsɨyn zɨsɨ a Jvâ ì Baŋnɨ. Nô ngumi nà bu kalɨ wi a Ijìb. ²⁰Mɨtì Bôbo Fɨyini ɨ fi tosɨ kɨ tosɨ atem a fòyn Ijìb, wu faŋ tɨ̀ vìsi na ghelɨ Isìlæ̀ lu.

Bôbo Fɨyini ɨ jɨsɨ ɨ̀tuʼ a Ijìb

²¹Bôbo Fɨyini nɨn tosɨ atem a fòyn Ijìb tì, ɨ bè sɨ̂ Mosìs na, “Làysɨ koʼsɨ nɨ̀ àwu à kya iyvɨ a ka ɨlwêʼ fɨm kɨ ɨ̀ jɨ̀m a Ijìb, ghelɨ na mômtɨ̀ momtɨ ɨlwêʼ sɨ jèl.” ²²Mosìs ɨ làysɨ̀ àwu a ŋweyn iyvɨ ɨlwêʼ ɨ fɨm kɨ ɨ̀ jɨ̀m a Ijìb sɨ a mɨchi ɨ̀n tal, ²³wùl ɨ nà yeyn wi wul ɨ̀lvì, wùl ɨ fvɨ̂ wì a ndo sɨ a mɨchi ɨ̀n tal. Mɨtì ɨlwêʼ ɨ bayn kɨ bayn ɨlwèʼ ghè a ghelɨ Isìlæ̀ nà n-chi ateyn.

²⁴Fòyn Ijìb ɨ yeyn tî ɨ tum jàŋ Mosìs ɨ bè sɨ̂ ŋweyn na, “Yì ndu kòʼsɨ Bôbo Fɨyini. Yi se sɨ ndù yi lì ghɨ̀ki ghi nɨ̀ wôyn ghi mɨtì ka yi n-lì nyâm sisɨ.”

²⁵Mɨtì Mosìs ɨ bè na, “Wà n-kelɨ sɨ visi na ghesɨ̀ ndu nɨ̀ nyâm seysɨ ta ka ghèsɨ̀ ndu fu tɨfu tɨ nyoʼnɨtɨ nɨ̀ tɨ̀fu tɨlitɨ sɨ̂ Bôbo Fɨyini, ɨ Fɨyini feyfɨ. ²⁶Ghès nɨn lù nɨ̀ nyâm seysɨ kɨ sɨ̀ jɨ̀m, nô nyam ìmòʼ nɨn faŋ wi ibàm. Ghès nɨn kelɨ sɨ fu sɨ lisɨ sɨ ifu sɨ̂ Bôbo Fɨyini, ɨ Fɨyini feyfɨ. Ghès nɨn ndù kelî kɨ afu nâ à n-ghɨ sɨ̀ kà a ghès nɨn kelɨ sɨ koʼsɨ Bôbo Fɨyini ateyn a.”

²⁷Mɨtì Bôbo Fɨyini ɨ tosɨ àtem a fòyn Ijìb, wu nà kôŋ wì sɨ visi na àŋena lu, ²⁸ɨ bè sɨ̂ Mosìs na, “Leʼ sɨ a ma asɨ nyas! Wa tôʼnɨ̀ ghesɨ̀và! Ka mɨ n-læ̀ fì yèyn vâ! Mà kæ læ̀ fì yeyn vâ afêyn nô mɨ achi à kà, a wa n-kfɨ.”

²⁹Mosìs ɨ bè sɨ̂ ŋweyn na, “Kɨ ighel ta wà bè, wà læ̀ bu fì yeyn wi ma a wa asɨ.”