Esther 1

Fòyn Zekzès ɨ yɨ achɨ a ghaʼnɨ-a a ŋweyn a ntoʼ.

¹Iyeynì nɨn ghɨ ìwo zɨ̀ a yi n-læ gàyn ɨtuʼ nɨ̀ fòyn Zekzès. Wu nà nsaʼ ìlaʼ ma ghɨ gwotɨ meyn ɨbyâs ɨvɨ nɨ̀ ɨ̀byâs mɨ̀vɨm ɨ̀m bò njvàsɨ̀ nsòmbo zɨ̂tɨ̀ a Indìyà ndû chem a Ètobìyà. ²Wu nà nsaʼ ɨ̀fôyn ŋweyn chî a Suzà ɨ ntèʼ ì ghaʼnɨ. ³À nà n-ghɨ a bêŋ sɨ̀ tal ta wù nsaʼ, wu làʼì ghelɨ ghɨ tisɨnɨ nɨ̀ chyeʼsɨ ŋweynsɨ na ghɨ gvi yɨ ayɨ. Wu n-laʼi meyn kɨmɨ ɨ̀tu sugèyʼsɨ Besìyà nɨ̀ ɨwu Midìyà nɨ̀ ghelɨ ghɨ felɨnɨ baʼsɨ̂ nɨ̀ chyeʼ sìsɨ̀ a sɨ n-lù ɨbyàs ilaʼ nâ ghè.

⁴Ghɨ n-læ yɨ ayɨ ateyn sɨ a mɨchi ɨvɨ nɨ̀ mɨ̀chi mɨ̀vɨm nfama. À nà ghɨ a mɨchi nâ ghàyn wu dyèyn ìghaʼ i bemnɨ-i zɨ̀ a yi n-ghɨ a ŋweyn a ntoʼ nɨ̀ ndzɨsɨ ntoʼ sɨ jûŋsɨ̀ nɨ̀ ŋweyn. ⁵Ayɨ nâ kì nɨn læ mæ̀, wu fi làʼì àyɨ a ghaʼnɨ-a ɨwe njaŋ sɨ a mɨchi nsòmbo kɨ̀ sɨ̂ ghelɨ ghɨ̀ jɨ̀m. Wu n-làʼi meyn ghelɨ ghɨ bolɨ nɨ̀ ghɨ to a ntèʼ ì ghaʼnɨ a Suzà. ⁶Ɨwe njaŋ nâ wèyn nà n-ghɨ ma ghɨ ghaŋsɨ meyn kal nɨ̀ ɨ̀byâs ɨ ndzɨsɨ ɨ fɨfâ nɨ̀ ɨ nyemnɨ ateyn. Ɨbyâs ɨ ndzɨsɨ nâ wèyn nà ghɨ ma ghɨ chfɨŋ ghàŋsɨ nɨ̀ nkfɨ̀sɨ fɨfâsɨ̀ nɨ̀ sɨlisɨ sɨ nyêm bâŋ ndû ndu kul ghàŋsɨ a nchasɨ ɨtòʼ ma ghɨ bàʼlɨ̀ nɨ̀ ngòʼsɨ̀ ghɨ toŋtɨ̂ na mabèl. Mɨ̀chɨ̂ nà n-ghɨ ɨwe nâ ghè ma ghɨ lom nɨ̀ àso ɨkwo a baŋnɨ-a, lom ɨ̀n lì nɨ̀ àso ɨkwo a fɨfâ. Mɨ̀chɨ̂ mɨ̀ àteyn nà n-ti alèʼ ma ghɨ nyòtɨ̀ nɨ̀ ngòʼsɨ lisɨ ghɨ toŋtɨ̀ na bofilì nɨ̀ sɨlisɨ ghɨ toŋtɨ̂ na mabèl, nɨ̀ ɨ̀fwo ɨlvɨ wu ghɨ ta ngoysɨ ɨtwàʼ ghɨ fvɨsɨ̀ a jvâ baʼsɨ̂ kɨmɨ nɨ̀ mɨ̀ngòʼtɨ ɨnjùŋ ɨ̀nlì. ⁷Ghelɨ ghɨ felɨnɨ nɨ̀ fòyn nà gwôtɨ̀ mɨlûʼ sɨ̂ ghelɨ ayɨ nâ ghàyn a bomsɨ ma ghɨ fàytɨ nɨ̀ àso ɨkwo a baŋnɨ-a, nô mɨ bom ì kà ɨ ghɨ kɨ sɨ a nyɨŋ. Fòyn nɨ̀n læ fu mɨlûʼ sɨ ghelɨ mɨ dvɨ̀ kɨ tèyn kɨ̀ ta wù lum fu. ⁸Nô mɨ ndà nà nyvɨ mɨ̀lûʼ kfeyn kɨ ta wù n-kôŋ bòm ta fòyn nɨ̀n be meyn sɨ̂ ghelɨ ghì a ghɨ nà n-gwôtɨ̀ mɨlûʼ na àŋena fu mɨlûʼ nô mɨ sɨ̂ ndà chem kɨ̀ ta wù n-kôŋ.

⁹A nà n-ghɨ kɨmɨ a mɨchi nâ ghè Vashtì ɨ wî ntoʼ ɨ làʼì àyɨ a ghaʼnɨ-a sɨ̂ ghɨ̀ki ghelɨ ghɨ felɨnɨ a ntoʼ nɨ̀ fòyn Zekzès.

¹⁰A nà ghɨ a mɨchi nsòmbo ta ghɨ n-yɨ ayɨ nâ kì ma fòyn nyvɨ meyn mɨ̀lûʼ nà saŋlɨ-à, wu bè sɨ̂ ghelɨ ghɨ felɨnɨ nɨ̀ ŋweyn nsòmbo, ɨ Mèhumàn nɨ̀ Bistà nɨ̀ Hàbonà kɨ̀mɨ nɨ̀ Bigità nɨ̀ Abagtà nɨ̀ Zetà baʼsɨ̂ nɨ̀ Kakàs, ¹¹na àŋena ndu lì gvì nɨ̀ Vashtì ɨ wî ntoʼ. Wu n-bè na ghɨ ndu bè Vashtì ɨ wî ntoʼ su afol a ghɨki ntoʼ ghɨ gvì nì ŋweyn ayɨ fòyn dyèyn ijôf i ŋweyn sɨ̂ chyeʼsɨ baʼsɨ̂ nô nɨ̀ ghelɨ ghɨ̀ jɨ̀m, bòm ta wù nà faytɨ̂ jôf kɨ nô jofɨ. ¹²Mɨtì a nà ghɨ ta ghelɨ ghɨ felɨnɨ nâ ghèyn ndù be iwo zɨ̀ sɨ̂ Vashtì ɨ wî ntoʼ a fòyn bè, wu teyn na wu ndù wì. Wu n-teyn tî iwo ateyn i yafɨ fòyn nô sɨ a ŋaŋ.

¹³À nà n-ghɨ tì fòyn ɨ lum bɨf àwo sɨ̂ ghelɨ ghì a ghɨ n-faytɨ kya isaʼ ilaʼ jæ ta ka wù chwosɨ isaʼ. Wu bɨf sɨ̂ ghelɨ ghɨ tofɨnɨ ghì a ghɨ nà n-tebtɨ ŋweyn na yì kàʼ a yì ni gha. ¹⁴Ghelɨ ghɨ tofɨnɨ nâ ghèyn a ghɨ nà baʼsɨ̂ sɨ̂ fòyn, nà ghɨ Kàshenà nɨ̀ Shetà nɨ̀ Admatà nɨ̀ Tashìsh kɨ̀mɨ nɨ̀ Melès nɨ̀ Masenà baʼsɨ̂ nɨ̀ Memukàn. Chyeʼ nâ sèynsɨ̀ nsòmbo nà n-ghɨ ghelɨ Medìyà nɨ̀ ghelɨ Besìyà ghì a ghɨ nà n-kelɨ mɨchɨ ɨ̀ngaŋtɨnɨ̂ ilaʼ nâ ghàyn fî kelɨ àdyaʼ sɨ yeyn fòyn nô mɨ ɨlvɨ gha.

¹⁵Fòyn nɨn bɨf meyn sɨ̂ àŋena na, “Isaʼ i nɨn ndyêyn na ghɨ ni gha sɨ̂ Vashtì ɨ wî ntoʼ ta wù tèyn na wu yvɨnɨ̂ wì iwo zɨ̀ a fòyn Zekzès tùm ghelɨ ghɨ felɨnɨ ghɨ ndû bè sɨ̂ ŋweyn a?”

¹⁶Memukàn ɨ bèynsɨ̀ ɨ bè sɨ̂ fòyn ŋêyn chyeʼsɨ ŋweynsɨ na, “Vashtì ɨ wî ntoʼ bû nì sœ̀ kɨ̀ sɨ̂ fòyn, wù ni meyn sœ̀ kɨ̀mɨ sɨ̂ chyeʼsɨ ŋweynsɨ nɨ̀ ghelɨ ghì nô ghɨ̀ jɨ̀m a ghɨ lù a ɨbyàs ilaʼ afî a fòyn nɨ̀n saʼ. ¹⁷Nô ghɨ̀ki ghɨ̀ jɨ̀m nɨn yvɨ ìwo nâ yèynì a wù mòm têyn ɨ̀ nà sɨ to nɨ̀ àtu a sɨ̂ ghɨ̀lum àŋena bê na, ‘Fòyn Zekzès tî tùm na ghɨ ndu lì gvì nɨ̀ Vashtì ɨ wî ntoʼ a ŋweyn asɨ mɨtì wù teyn na yi n-gvì wì.’ ¹⁸Kɨ̀ nô layn wèyn tèyn ghɨ̀ki ghelɨ Midìyà nɨ̀ ghɨ ghelɨ Besìyà ghì a ghɨ n-felɨ̀ a ntoʼ afêyn nɨn yvɨ ìwo nâ yèynì a wî ntoʼ mòm têyn ɨ̀ nà sɨ boŋ nì kɨ tì sɨ̂ chyeʼ shyasɨ a mbæ̀, a atu a tonɨ-a nɨ̀ ìyoli faŋ kɨ̀ faŋ ilaʼ afêyn.

¹⁹“Yi kæ nà kfeynɨ̂ sɨ̂ và a mbæ̀ wa chwòsɨ̀ ìsaʼ na, ka Vashtì nɨn læ̀ fì gvì asɨ nɨ̀ và a mbæ̀, ghɨ nyaʼ a ŋwàʼlɨ̀ tɨ̀saʼ nɨ̀ ghelɨ Besìyà nɨ ɨ ghɨ Midìyà ma wùl kàʼ wu bû fì kfɨ̀nɨ. Ghɨ nyâʼ a mbæ̀ wà choʼ wul ɨwi vzɨ̀ a wù n-kelɨ igvɨmlɨ chwô Vashtì ta ka wù li alêʼ a ŋweyn sɨ a wî ntòʼ. ²⁰Ghɨ n-jàŋ fèʼtɨ̀ isaʼ i fòyn nâ yèynì kɨ̀ ilaʼ i ìjɨ̀m, a nô ghɨ̀ki ghɨ̀ jɨ̀m na ngvɨmlɨ̂ ghɨ̀lum àŋena zɨ̂tɨ̀ kɨ a ghɨ̀kì ghɨ bolɨ sɨ chem ateyn nɨ ghɨ to.”

²¹Memukàn nɨn be tî iwo ateyn i ɨ fom sɨ̂ fòyn ŋêyn chyeʼsɨ ŋweynsɨ, fòyn ɨ ni kɨ ighel ta Memukàn bè, ²²ɨ tum ŋwàʼlɨ̀sɨ̀ ɨbyàs ilaʼ nâ ghè nô ɨ̀ jɨ̀m. Wu nà n-tum ŋwàʼlɨ̀ nô mɨ abàs ilaʼ à kà ma ghɨ nyàʼ kɨ̀ itaŋi nɨ̀ ghelɨ nâ ghì. Ŋwàʼlɨ̀ ateyn nà bê na nô mɨ bòbe ɨ̀ kfà nɨn kelɨ sɨ nà saʼ abe a ŋweyn.