Deuteronomy 26

Ifu i Mɨ̂tam mɨ̀ àsɨ

¹Mosìs nɨn læ meyn bè sɨ̂ ghelɨ Isìlæ̀ na, “Yi zɨ, ilaʼ ghè a Bôbo Fɨyini ɨ Fɨyini fifɨ nɨn fu sɨ̂ zɨ̀ na à na kelɨ kɨ nô zɨ̀, ɨ̀ nà sɨ chî ateyn, ²wùl ɨ̀ kfî nô mɨ ɨ̀fwo ɨ yɨnɨ ɨwu asɨ ɨ̀kfà, wu we ifùʼ, ɨ li ndù nɨ̀ ɨ̀ŋweyn alèʼ ghè a Bôbo Fɨyini ɨ Fɨyini fifɨ nɨn choʼ na ghɨ na koʼsɨ̂ ŋweyn ateyn.” ³Wù ndû, wu bè sɨ̂ ngàŋ ndô Fɨyini zɨ̀ a yì n-felɨ̀ achi nâ ghè na, “Mà gvì nɨ̀ ìfu yèynì sɨ be sɨ̂ Bôbo Fɨyini, ɨ Fɨyini femfɨ na, mà sɨ ghɨ (zɨ meyn) ilaʼ afî a wu n-læ chfɨ̀nɨ sɨ̂ ghɨ̀bo ghes na wù læ̀ fu sɨ̂ ghesɨ̀nà.” ⁴Wù bê tì, ngàŋ ndô Fɨyini nâ zɨ̀ ɨ fsɨ ifûʼ ateyn sɨ a ŋweyn awu, ɨ tom asɨ abaŋ ifu nɨ̀ Bôbo Fɨyini, ɨ Fɨyini fɨ ŋweyn. ⁵Ngàŋ ndô Fɨyini tom ìfûʼ ateyn asɨ, wùl ɨ̀ àteyn ɨ timi asɨ nɨ̀ Bôbo Fɨyini ɨ Fɨyini fifɨ, ɨ bè na, “Bò bò wom nɨn læ nà ghɨ wul ɨ̀ Alàm, ndû kɨ alêʼ nɨ̀ àleʼà. Wù n-læ kàli a Ijìb ŋêyn ànôyn a ŋweyn a kɨ læ̂ kɨ tèyn, ɨ ndu bzɨ ɨ dvɨ̀ ɨ nà sɨ ghɨ ìlaʼ i ghaʼnɨ-i, kelɨ àdyaʼ. ⁶Mɨtì, ghelɨ Ijìb ɨ nà sɨ nyàblɨ̀ nɨ̀ ghès, kâyntɨ̀-à ghèsɨ felɨ̀ àkôs sɨ̂ àŋena. ⁷Ghès ɨ kæ dzɨ sɨ̂ Bôbo Fɨyini, ɨ Fɨyini fɨ ghɨ̂bo ghesɨ, wu yvɨ idzɨ̂ ì yesi, ɨ yeyn ànjɨ̀ŋ à kesa, nɨ̀ ìyeʼtɨ zɨ̀ a ghɨ nà n-yeʼtɨ ghes, ⁸ɨ fvɨ̀sɨ̀ ghès sɨ a Ijìb nɨ̀ àdyaʼ a bemnɨ-a nɨ̀ ŋweyn a. Wu n-læ meyn dyèyn nchwæsɨ awo a kaynɨ-a, ɨ mòm àwo kɨ bem kɨ tèyn a Ijìb. ⁹Wu n-læ fvɨ̀sɨ̀ ghes, ɨ gvì nɨ̀ ghès a ilaʼ afêyn, yi jofà, ɨfwo ɨ koʼ ateyn kɨ̀ sɨ a idvɨ̀, ¹⁰ma na sɨ gvì nɨ̀ ɨ̀fwo ɨ yɨnɨ ɨwu asɨ vzɨ̀ a wà fù sɨ̂ mà a ilaʼ nâ ghàyn a Bôbo sɨ fu sɨ̂ và.” Wà taŋi mèsì, wa tom ifûʼ ateyn asɨ nɨ̀ Bôbo Fɨyini, ɨ Fɨyini Fyafɨ, ɨ ngvɨmtɨ a ŋweyn asɨ, ɨ koʼsɨ ŋweyn. ¹¹Wà mesì, zɨ̂ ghelɨ ndo nɨ̀ Levì, nɨ̀ ɨ̀tum vzɨ̀ a wu n-chi zɨ̂ àŋena ɨ yɨ ayɨ alèʼ nâ ghè a ghɨ n-koʼsɨ Bôbo Fɨyini ateyn bòm ɨfwo ɨ jûŋ vzɨ̀ a wù fù sɨ̂ và zɨ̂ ghelɨ ndo nɨ̀ và.

¹²Bèŋsɨ̀ na chwò sɨ̀ tal, yi gwòtɨ̀ ɨ̀fwo ɨ yɨnɨ vzɨ̀ a yì kfì nô ɨ̀ jɨ̀m ɨlwêʼ ìvɨm, ɨ fu alêʼ àmòʼ sɨ̂ ghelɨ ndo nɨ̀ Levì nɨ̀ ɨ̀tum vzɨ̀ a wu n-chi a yi antêynɨ̀, nɨ̀ woyn kfɨ, baʼsɨ̂ nɨ̀ ghɨ̀ki kfɨ. Yì na fu-a ta ka àŋena na kelɨ ɨ̀fwo ɨ yɨnɨ a yi a ntèʼsɨ nô sɨ̀ jɨ̀m wu dvɨ̂ kfeynɨ̂ ta ka ghɨ na yɨ kula. ¹³Yi fu, yi bè sɨ̂ Bôbo Fɨyini ɨ Fɨyini fifɨ na, “Ma fvɨsɨ meyn ɨ̀fwo ɨ laynɨ vzɨ̀ a wu n-ghɨ a ma ndo nô ɨ̀ jɨ̀m, ɨ̀ fù sɨ̂ ghelɨ ndo nɨ̀ Levì, nɨ̀ ghelɨ ɨtum, baʼsɨ̂ nɨ̀ woyn nkfɨ nɨ̀ ghɨ̀ki nkfɨ, kɨ̀ ighel ta wà bè na mà fu. Ma bû chàs nô ìwo ìmòʼ ta wà bè, ɨ̀ faŋ tɨ̀ lèsɨ nô ìmòʼ. ¹⁴Ma bu tî se sɨ dzɨ̀ ikfɨ ɨ̀ yɨ afo a laynɨ-a, ɨ̀ faŋ tɨ̀ kùm afo ta mɨ nà n-layn wi ta isaʼi nɨn dyêyn. Ma bu tî fu afo a laynɨ-a sɨ̂ nkfɨsɨ nsesɨ. Ma yvɨnɨ meyn và a Bôbo Fɨyini ɨ̀ nì nô mɨ ghà ta wà bè na mà ni. ¹⁵Ki suʼsɨ nɨ̀ ghelɨ Isìlæ̀ alèʼ ghè a wà n-duʼ ateyn iyvɨ a Bôbo, ɨ boysɨ àŋena. Wa n-læ meyn chfɨ̀nɨ̀ ghɨ̀bo ghes na wà læ̀ fu ìlaʼ sɨ̂ ghès yi jofà ɨfwo ɨ yɨnɨ ɨ koʼ ateyn kɨ̀ sɨ a idvɨ̀.”

Bôbo Fɨyini nɨn ghɨ Fɨyini fifɨ, yi ghɨ ghelɨ ŋweyn

¹⁶Mosìs nɨn læ meyn bè sɨ̂ ghelɨ Isìlæ̀ na, “Bôbo Fɨyini nɨ̀n bê sɨ̂ zɨ̀ layn na yì na yvɨnɨ tɨ̀saʼ tèyntɨ̀ nô tɨ̀ jɨ̀m. Yì na tôʼnɨ̀-à sɨ nà yvɨnɨ tɨsaʼ tɨ ateyn nɨ̀ àtem à ki-a à jɨ̀mà, nɨ̀ àdyaʼ à ki-a à jɨ̀mà. ¹⁷Yi be meyn layn na Bôbo Fɨyini nɨ̀n ghɨ Fɨyini fifɨ, ɨ̀ chfɨ̀nɨ̀ na yì na jelɨ̀ kɨ ta wù n-kɨŋ, yvɨnɨ̂ ŋweyn, lêm tɨ̀saʼ tɨ ŋweyn kɨ tɨ̀ jɨ̀m, wu bê nô mɨ na gha, yi nî kɨ tì. ¹⁸Bôbo Fɨyini be meyn layn na yi n-ghɨ ghelɨ ŋweyn wu kôŋ zɨ̀ kɨ̀ ta wù n-læ chfɨ̀nɨ, kɨŋ na yì na lèm tɨ̀saʼ tɨ ŋweyn kɨ tɨ̀ jɨ̀m. ¹⁹Wù be meyn na yì kæ yvɨnɨ ŋweyn a wù ni a yì na ngaŋtɨ̂ chwô nô mɨ ìlaʼ ì kà a mbzɨ, ɨ̀ nì a tɨlaʼtɨ na ngvɨmlɨ̂ Bôbo Fɨyini, fî koʼsɨ̂ ìzɨyn i ŋweyn. Yì na ghɨ ghelɨ sɨ a nyɨŋ asɨ nɨ̀ Bôbo Fɨyini ɨ Fɨyini fifɨ, kɨ̀ ighel ta wù n-læ chfɨ̀nɨ.”