Deuteronomy 23

Wùl ɨ̀ vzɨ̀ a wù n-kelɨ wi sɨ nà ghɨ anòyn nɨ̀ ghelɨ Fɨyini

¹Mosìs nɨn læ meyn bè sɨ̂ ghelɨ Isìlæ̀ na, “Wùl ɨ lûmnɨ̀ kæ nà ghɨ ma ghɨ teyn meyn ànam a ŋweyn a wù na kelɨ wi sɨ nà ghɨ anòyn nɨ̀ ghelɨ Bôbo Fɨyini.”

²Ka wùl nɨn læ̀ nà ghɨ a nchɨ̀yntɨ nɨ̀ ghelɨ Bôbo Fɨyini ma ghɨ bzɨ salû, kèsa wul ɨ̀ wayn nɨ̀ ŋweyn, sɨ kàlì sɨ chem ɨjwàŋ ìvɨm.

³Ka wul ɨ̀ Amòn, kèsa wul ɨ̀ Mowàb nɨn læ̀ nà ghɨ anòyn nɨ̀ ghelɨ Bôbo Fɨyini, baʼsɨ̂ nɨ̀ woyn àŋena, sɨ kàlì sɨ chem ɨjwàŋ ìvɨm. ⁴Yi n-ghɨ tèyn bòm ta àŋena nɨn bu læ fu afo a yɨnɨ-a nɨ̀ mu sɨ̂ zɨ̀ ta yi n-fvɨ̀ a Ijìb ɨ nà ndû a Kenàn. Àŋena nɨ̂n kwo yuyntɨ Balàm ɨ wâyn Beyò ɨ wul ɨ̀ Betò a Mèsòbòtemìyà na wù te zɨ. ⁵Bôbo Fɨyini, ɨ Fɨyini fifɨ ɨ faŋ tɨ̀ yvɨ̀tɨ iwo zɨ̀ a Balàm nɨ̀n bê, ɨ kwo bèynsɨ̀ ndi àteyn sɨ a njùŋ bòm ta wù n-koŋ zɨ. ⁶Ka yi n-læ̀ yɨ mɨkâyn zɨ̂ àŋena sɨ nà gâmtɨ àŋena, awo a àŋena ɨ ndû a jûŋ nô ta ka ghɨ̀ læ̂ ghɨ̀.

⁷Ka yi n-læ̀ yèʼtɨ wul ɨ̀ Edòm bòm ta àŋena nɨn ghɨ woynà ghi. Ka yi n-læ̀ yèʼtɨ wul ɨ̀ Ijìb bòm ta yi n-læ meyn nà ghɨ ghelɨ ɨtum a àŋena ilaʼ. ⁸Woyn woyn àŋena kàʼ a ghɨ na ghɨ a nchɨ̀yntɨ nɨ̀ ghelɨ Bôbo Fɨyini sɨ koʼ sɨ chem ɨjwâŋ ɨ̀ twal.

Alêʼ kì a sugèyʼsɨ̀ bɨ̀ ateyn

⁹Mosìs nɨn be meyn sɨ̂ ghelɨ Isìlæ̀ na, “Yì na seʼ sɨ nu mbàynɨ̀ sisɨ, ɨ̀ ndù bɨ̀ alèʼ, ka yi na nî àwo kì a kɨ nî na yì na layn wi ta isaʼi nɨn dyêyn. ¹⁰Wùl ɨ̀ sɨ̂ zɨ kæ nà layn kfeynɨ̂ wì ta isaʼi nɨn dyêyn bòm ta wù tî chi ɨ̀ màʼtɨ̀ mu mɨ̀ wàyn a jem, (bòm ta jem tî chɨ̀ ŋweyn mu mɨ̀ wayn fvɨ̂) a wù na kelɨ sɨ fvɨ̀ sɨ alèʼ ghè a yì bɨ̀ ateyn sɨ achi a fɨ̂blɨ̀-à. ¹¹À chem a mbol àbè, wu sù ɨ̀wuyn ŋweyn, ɨchfɨ̂-iyvɨ i sœ, wu kasi zɨ. /À na ghɨ aleŋ ɨlvɨ ikfa wu sù ɨ̀wuyn ɨ kasi zɨ alèʼ ghè a ghɨ bɨ̀ ateyn.”

¹²Yi bɨ̂ alèʼ, yi kini àlêʼ a kɨ lu-à, ɨ nà ndû ɨ̀twaʼ ateyn. ¹³Yi se sɨ baʼtɨ ɨfwo yi lì àfo ma yì kàʼ a yì tɨmtɨ alêʼ ɨ̀ ndù ɨ̀twaʼ ɨ̀ kàsi chɨ̀ytɨ. ¹⁴Yi n-kelɨ sɨ nà ni tî bòm ta Bôbo Fɨyini, ɨ Fɨyini fifɨ nɨn ghɨ a yi antêynɨ̀, kɨ̂ŋtɨ̀ zɨ̀, fî gâmtɨ̀ zɨ̀ na yì tɨm yɨ mbàynɨ̀ sisɨ. Alêʼ kì a yì bɨ̀ ateyn nɨn kelɨ sɨ nà layn ta isaʼi nɨn dyêyn a bu tì a Bôbo Fɨyini ɨ Fɨyini fifɨ yeyn ilɨŋ a yi antêynɨ̀, ɨ̀ kàsi sɨ a yi ibàm.

Tɨsaʼ tɨ litɨ

¹⁵Mosìs nɨn læ meyn be kɨmɨ na, “Wùl ɨ felɨnɨ ɨ lûmnɨ̀ nɨ̀ wùl kæ leʼ ɨ̀ gvì lèytɨ̀ a Isìlæ̀, yi nà tôʼnɨ̂ nɨ̀ ŋweyn ka yi n-fì vìsi wù kasî ndù sɨ̂ bò ìfèl nɨ̀ ŋweyn (Ka yi n-kàsi fù ŋweyn sɨ̂ bò ìfèl nɨ̀ ŋweyn).” ¹⁶Wùl ɨ̀ leʼ ɨ̀ gvì a Isìlæ̀, yi visi wù na chî nô mɨ a ntèʼ ì kà ta wù n-kôŋ. Ka yî n-fù ngeʼ sɨ̂ ŋweyn.

¹⁷Ka wùl ɨ̀ Isìlæ̀ ɨ lûmnɨ̀, kèsa ɨ wi, læ nà chî nchînɨ̀ àkfàlà alèʼ ghè a ghɨ n-koʼsɨ Bôbo Fɨyini ateyn. ¹⁸Bôbo Fɨyini ɨ Fɨyini fifɨ nɨn bâyn wùl ɨ lûmnɨ̀ kèsa wul ɨ wi ɨ̀lvì ta wù n-beyʼlɨ ngêŋ ŋweyn sɨ ɨkwo. Ka wùl nɨn læ̀ gvì nɨ̀ ìnkì ɨkwo nâ yèynì a ndô Fɨyini sɨ fu sɨ ifu, nô mɨ ɨlvɨ ta à n-ghɨ ifu sɨ luynsɨ ichfɨ̂nɨ̀.

¹⁹Wùl ɨ̀ sɨ̂ zɨ samsɨ ɨ̀kwo sɨ̂ wâynà ŋweyn, kèsa ɨfwo ɨ yɨnɨ, kèsa wù sàmsɨ nô mɨ ghà, ka wû n-læ̀ bɨf ɨ̀tu (sæ) ateyn ²⁰Wùl ɨ̀ samsɨ àfo sɨ̂ waynà ŋweyn, ka wu n-læ̀ bɨf ɨtu, mɨtì sàmsɨ sɨ̂ wùl àtum, wu bɨf ɨtu (sæ) ateyn. Yì kæ nà ni tî, a Bôbo Fɨyini, ɨ Fɨyini fifɨ boysɨ zɨ kɨ̀ dzɨ sɨ̀ jɨ̀m a ilaʼ ghè a yi n-ndû sɨ lì.

²¹Mosìs nɨn læ meyn fi be kɨmɨ sɨ̂ ghelɨ Isìlæ̀ na, “Ka wùl nɨn læ̀ chfɨ̀nɨ̀ sɨ ni iwo sɨ̂ Bôbo Fɨyini, ɨ̀ faŋ tɨ̀ ni kɨ ɨlvɨ ghê a wù chfɨ̀nɨ̀ sɨ nì ateyn. Wù kæ faŋ tɨ̀ nì, a à na ghɨ ma wù n-ni meyn mbɨ.” ²²Mɨtì ma wùl ɨ̀ kæ faŋ tɨ̀ chfɨ̀nɨ iwo sɨ̂ Bôbo Fɨyini a à na ghɨ bula wù nî mbɨ. ²³Wùl ɨ̀ chfɨ̂nɨ̀ ìwo sɨ a ŋweyn a ngeŋ sɨ ni sɨ̂ Bôbo Fɨyini, wu nì.

²⁴Wùl ɨ̀ na toynɨ̂ a gvêyn gɨ̀lêbsɨ̀ nɨ̀ wâynà ŋweyn, ɨ̀ nà kôŋ sɨ kfɨlɨ gɨ̀lêbsɨ̀ nô mɨ ti, wu kfɨl. Mɨtì, ka wu n-mòm sɨ we gɨ̀lêb a ŋweyn a bò, sɨ kfa kfa nɨ̀ ɨ̀nyeyn. ²⁵Wùl ɨ̀ na toynɨ̂ a gvêyn àsàŋ a wît nɨ̀ wâynà ŋweyn, kòŋ wu nà yolî ɨ̀tu ateyn kfɨla, mɨtì ka wu n-sɨ asaŋ sɨ kfa nɨ̀ ànkeyn a.