Deuteronomy 11

Awo ɨchfɨ̀ ɨ yumnɨ kì a Bôbo nɨn læ nì sɨ̂ ghelɨ ŋweyn

¹Mosìs nɨn læ meyn bè sɨ̂ ghelɨ Isìlæ̀ na, “Yi n-kelɨ sɨ nà koŋ Bôbo Fɨyini ɨ Fɨyini fifɨ kɨ̀ mɨlvɨ ɨ̀n jɨ̀m yvɨnɨ̂ tɨ̀saʼ tɨ ŋweyn nô tɨ̀ jɨ̀m. ²Ka yî n-lèsɨ̀ layn na a n-læ yeyn zɨ awo kì a Bôbo Fɨyini ɨ Fɨyini fifɨ nɨn læ nì nɨ̀ àdyaʼ a bemnɨ-a nɨ̀ ŋweyn ɨ yeʼi zɨ̀ na yì na nî àwo àti-ati, a ghɨ wi woyn ghi. ³Wù n-læ meyn dyèyn àwo ɨchfɨ̀ ɨyumnɨ kì a wu n-læ nì a Ijìb sɨ̂ fòyn Ijìb baʼsɨ̂ nɨ̀ ghelɨ ŋweyn nô ghɨ̀ jɨ̀m. ⁴Ka yi n-læ̀ lèsɨ̀ ìwo zɨ̀ a wu n-læ mòm sɨ̂ sugèyʼsɨ Ijìbsɨ̀ nɨ̀ nyamsɨ kfaŋ nɨ̀ àŋenasɨ, baʼsɨ̂ nɨ̀ mɨ̀nchaʼ mɨ̀ ìwòŋ nɨ̀ àŋena. Yi n-yeyn meyn kɨmɨ ta wu n-læ nì sugèyʼsɨ Ijìbsɨ̀ ɨ leŋ a jvâ ì baŋnɨ ɨtuʼ ghê a àŋena nà n-nyɨŋ a yi ibàm Bôbo Fɨyini ɨ mèsi kɨ mesi àŋena. ⁵Yi n-kya na à n-bu læ yeyn woyn ghi ta Bôbo Fɨyini tòʼnɨ̀ nɨ̀ zɨ̀ kɨ̀ sɨ zɨtɨ̀ a nse iyum sɨ gvì sɨ chem afêyn. ⁶Yi n-kya ìwo zɨ̀ a wu n-læ mòm sɨ̂ Datàn ŋêyn Abilàm, ɨ woyn Elìyàb vzɨ̀ a à nà n-ghɨ wul ɨ̀ Lubèn tì. Yi n-kya ta Bôbo Fɨyini nɨn læ nì, nse ɨ kaʼa ɨ yema ɨ mzɨ̀ àŋena, nɨ̀ ghelɨ ndo nɨ̀ àŋena nô ghɨ̀ jɨ̀m, baʼsɨ̂ nɨ̀ mɨ̀two mɨ̀ àŋena nɨ̀ nyamsɨ àŋenasɨ nô sɨ̀ jɨ̀m. ⁷À n-læ yeyn zɨ awo ɨchfɨ̀ ɨyumnɨ nâ kèynà a Bôbo Fɨyini nɨn læ ni nô à jɨ̀m.”

⁸“Yì na yvɨnɨ læ̂ tɨ̀saʼ tìtɨ̀ a mɨ n-fu sɨ̂ zɨ̀ layn ta ka yì keli adyaʼ sɨ ghal sɨ fsɨ ilaʼ zɨ̀ a yi n-dyâŋ ndû ateyn a injɨyn i Jodàn. ⁹Yì na yvɨnɨ̂ tɨ̀saʼ nâ tèyntɨ̀ ta ka mɨ̀chi mzɨ̂ dyebtɨ a ilaʼ nâ ghè a Bôbo nɨn læ chfɨ̀nɨ sɨ̂ ghɨ̀bo ghi na wù læ̀ fu sɨ̂ àŋena nɨ̀ woyn àŋena. À n-ghɨ ìlaʼ jofà, ɨfwo ɨ yɨnɨ ɨ koʼ ateyn nô a jûŋ. ¹⁰Ilaʼ nâ yèynì a yi n-ndû ateyn tèyn nɨn ghɨ wi ta ilaʼ i Ijìb zɨ̀ a yì lù ateyn. Yi nà n-tôʼ ɨ̀fwo afu, yi nà ndû sfɨ̂ytɨ̀ sfɨytɨ mu ateyn jæ ta ka wu lema. ¹¹Mɨtì ilaʼ zɨ̀ a yi n-dyâŋ sɨ lì a injɨyn i Jodàn nɨn ghɨ ìlaʼ, kelɨ kfɨynsɨ, kelɨ mɨ̀foŋlɨ, iyvɨ i suʼî ateyn, yi kelɨ mu. ¹²Yi n-ndû ilaʼ a ghɨ ìlaʼ Bôbo Fɨyini ɨ Fɨyini fifɨ tôʼnɨ̀ nɨ̀ ìnyeyni kɨ mɨlvɨ ɨ̀n jɨ̀m a bêŋ.”

¹³“Yì na yvɨnɨ̂ læ̂ tɨ̀saʼ tìtɨ̀ a mà fù sɨ̂ zɨ̀ layn, kôŋ Bôbo Fɨyini ɨ Fɨyini fifɨ, felɨ̀ sɨ̂ ŋweyn kɨ nɨ̀ àtem à ki-a à jɨ̀mà./Yì kæ nà yvɨnɨ̂ tɨ̀saʼ tìtɨ̀ a mà fù sɨ̂ zɨ̀ layn, kôŋ Bôbo Fɨyini ɨ Fɨyini fifɨ, felɨ̀ sɨ̂ ŋweyn kɨ nɨ̀ àtem à ki-a à jɨ̀mà, ¹⁴(Yì kæ sɨ nà yvɨnɨ̂ tɨ̀saʼ tɨ ateyn), a Bôbo Fɨyini ni, a iyvɨ i na suʼî kɨ ɨlvɨ ghê a yi n-kelɨ sɨ nà suʼi ateyn, ɨfwo ɨ yɨnɨ nɨ̀ zɨ̀ ɨ faytɨ̂ koʼa, mɨ̀tam mzɨ̂ ɨ faytɨ̂ kolâ, yi kelɨ mɨlûʼ nɨ̀ mɨ̀vɨ̂l. ¹⁵Yì kæ nà yvɨnɨ tɨsaʼ tɨ Bôbo Fɨyini, a wù ni a ɨyol na faytɨ̂ koʼ ɨtwaʼ, nyam sisɨ yɨ-a, nô zɨ̀ ɨ kelɨ ɨ̀fwo ɨ yɨnɨ kɨ̀ sɨ idvɨ̀.”

¹⁶“Yì na toʼnɨ̀-à, ka ghɨ n-lɨ̀sɨ zɨ̀ yì kasi nà koʼsɨ̂ mɨyini ɨ̂n lì felɨ̀ sɨ̂ ɨ̀mêyn. ¹⁷Yì kæ nà koʼsɨ mɨyini ɨ̀n lì, nô mɨ ta ilaʼ ateyn i nɨn kelɨ nse ì jùŋ, a Bôbo Fɨyini nyoʼsɨ ɨtoŋ sɨ̂ zɨ̀, ɨ̀ faŋ tɨ̀ fì tɨ̀ sùʼsɨ iyvɨ, a ɨfwo ɨ yɨnɨ na bu koʼ wi ateyn, a yì kfɨtɨ ilaʼ i juŋì nâ ghàyn a Bôbo Fɨyini nɨn fu sɨ̂ zɨ̀ têyn. ¹⁸Yi n-kelɨ sɨ nà bêtɨ̀ kɨ betɨ tɨsaʼ nâ tèyntɨ̀ a mɨ n-fu sɨ̂ zɨ̀ layn tèyn. Yì nyaʼ tɨsaʼ tɨ ateyn ɨbyàs ɨfwo ɨ̀ chfɨŋ ayi akœ ɨ̀ bàysɨ ɨlvɨ a yi achfɨ̀ atu ta ka yì læ̂ faŋ tɨ̀ lèsɨ̀. ¹⁹Yì na yeʼî tɨ̀saʼ nâ tèyntɨ sɨ̂ woyn ghi, nô mɨ ɨlvɨ ta yi nduʼ a ndo kèsa yi n-jelɨ̀ a dzɨ. Yì na nyìŋì mɨ ɨkuyn, yi nà bêtɨ̀ kɨ betɨ, ɨ̀ làlì, yi nà bêtɨ̀ kɨ betɨ. ²⁰Yì nyaʼ tɨsaʼ tɨ ateyn a yi achfɨ̀ a ndosɨ, ɨ̀ nyàʼ achfɨ̀ a mbàynsɨ̀ nɨ̀ zɨ̀, ²¹ta ka mɨ̀chi mzɨ̂ dyebtɨ ilaʼ afu, a nô mɨ̀chi mɨ̀ woyn ghi læ̂ boŋ dyèbtɨ̀ ilaʼ nâ ghàyn a Bôbo Fɨyini, ɨ Fɨyini fifɨ, nɨn læ chfɨ̀nɨ sɨ̂ ghɨ̀bo ghi têyn. Yì kæ yvɨnɨ Bôbo Fɨyini, a ilaʼ ateyn i faŋ kɨ̀ sɨ a yi ilaʼ, nô ta ka ghɨ̀ læ̂ ghɨ̀.”

²²“Yì kæ nà faytɨ̂ yvɨnɨ̂ tɨ̀saʼ nâ tèyntɨ̀ a mà fù sɨ̂ zɨ̀ têyn, kôŋ Bôbo Fɨyini ɨ Fɨyini fifɨ, jelɨ̀ kɨ ta wù n-kɨŋ, yeʼtɨ̂ kɨ ɨwùyn nɨ̀ ŋweyn, ²³a Bôbo Fɨyini saŋ fvɨ̀sɨ̀ tɨ̀laʼ nâ tèyntɨ̀ a yi asɨ nô tɨ̀ jɨ̀m nô mɨ ta tɨ n-to chwò zɨ, fî dvɨ̂ chwô zɨ̀. ²⁴Yì læ̀ nà tom àvɨ nô mɨ ilaʼ ì kà, a nà sɨ kelɨ kɨ zɨ̀. Ilaʼ ì zɨ-i læ̀ nà zɨ̂tɨ̀ a nse iyum, abàs itsɨyn, koʼ ndû chem a jvâ Yuflèt, dyâŋ chem a jvâ ìghaʼnɨ a Mèdìtèlenìyà. ²⁵Nô ìlaʼ i li nɨn ghɨ wi a yi kàʼ a yi læ̂ tɨm yɨ̀ zɨ. Bôbo Fɨyini ɨ Fɨyini fifɨ nɨn nì-à a nô mɨ ghelɨ ilaʼ ì kà læ̂ nà yeyn zɨ̀ ghɨ nà chɨŋtɨ̂ faynà.”

Fɨyini fɨ faŋ tɨ̀ bòysɨ zɨ a fɨ te zɨ

²⁶Mosìs nɨn læ meyn bè sɨ̂ ghelɨ Isìlæ̀ na, “A n-choʼnɨ̂ kɨ zɨ̀ layn na Fɨyini fɨ nɨn boysɨ̂ bòysɨ zɨ ma Fɨ n-te te a. ²⁷Yì kæ sɨ lèm tɨsaʼ tɨ Bôbo Fɨyini ɨ Fɨyini fifɨ tèyntɨ̀ a mɨ n-fu sɨ̂ zɨ̀ layn tèyn, a wù boysɨ zɨ. ²⁸Ma yì kæ faŋ tɨ̀ lèm tɨsaʼ tɨ ateyn, ɨ̀ kàsi nà koʼsɨ̂ mɨyini ɨ̂n lì bula yi timi nà kya, a wù te zɨ. ²⁹Bôbo Fɨyini ɨ Fɨyini fifɨ lî zɨ nɨ̀ zɨ̀ ilaʼ nâ ghàyn ɨ̀ bòysɨ zɨ̀, ghelɨ ghɨ li koʼ ɨ nà jâŋ fêʼtɨ̀ àwo a juŋà nɨ̀ Bôbo Fɨyini a kfɨ̂yn Gelizɨ̀m, ghɨli koʼ nà fêʼtɨ̀ ndòyn Fɨyini a kfɨ̂yn Ebàl. ³⁰Kfɨyn nâ sèynsɨ̀ sɨ̀ bò nɨn ghɨ a injɨyn i jvâ Jodàn, ilaʼ i Kenàn, abàs ghè a ɨchfɨ-iyvɨ i nɨn sœ ateyn, a ngùŋ ɨ̀nkàʼ mɨ̀ Molè, baʼsɨ̂ a ntèʼ Gilgàl. ³¹Ɨlvɨ kfeyn meyn ta ka yì dyaŋ jvâ Jodàn ɨ̀ zɨ ilaʼ ghè a Bôbo Fɨyini ɨ Fɨyini fifɨ nɨn kɨŋ sɨ fu sɨ̂ zɨ̀. Yi zɨ ɨ̀ se sɨ chi afu, ³²yi nà tôʼnɨ̀ sɨ lem tɨ̀saʼ tèyntɨ̀ a mɨ n-fu sɨ̂ zɨ̀ layn tèyn nô tɨ̀ jɨ̀m.”