Daniel 6

Ghɨ màʼ Danìyèl ibɨ i bzɨ̀kemsɨ.

¹Dalìyùs nɨ̀n læ koʼ ɨfôyn a Babilòn ɨ choʼnɨ sɨ choʼtɨ ghelɨ ghɨ tisɨnɨ ivɨ nɨ̀ ghelɨ mɨ̀vɨm ɨ̀m bò ta ka àŋena saʼ ilaʼ. ²Wù n-choʼtɨ meyn ghelɨ ghɨ li ghɨ̀ tal, Danìyèl ɨ ghɨ wul ɨ̀mòʼ antêynɨ̀ nɨ̀ àŋena, na àŋena na ghɨ ɨ̀tu sɨ̂ ghelɨ nâ ghèyn, kinî ìfêl i àŋena ta ka nô mɨ ghà na ndû kɨ a jûŋ. ³Wu n-choʼtɨ tî, àŋena felɨ kɨ sɨ a fɨ̂lèʼnɨ̀ fɨ ɨlvɨ têyn, fòyn ɨ yeyn na Danìyèl nɨ̀n felɨ̀ ìfêl i juŋì chwô ghelɨ ghɨ li ghì ghɨ̀ bò baʼsɨ̂ nɨ̀ ghelɨ ghɨ tisɨnɨ ghì nô ghɨ̀ jɨ̀m. Fòyn ɨ nà sɨ baʼtɨ̂ sɨ lem ŋweyn na wù na ghɨ àtu sɨ̂ ghelɨ ghɨ felɨnɨ nô ghɨ̀ jɨ̀m ilaʼ nâ ghè. ⁴Ghelɨ ghɨ tisɨnɨ ghɨ li ghì ghɨ̀ bò nɨ̀ ghelɨ ghì a ghɨ n-tisɨ ɨbyâs ilaʼ ɨ yeyn tî ɨ nà sɨ kɨŋ ìwo sɨ koʼsɨ atu nɨ̀ Danìyèl bòm dzɨ zɨ̀ a wù n-fêl ateyn ilaʼ nâ ghè, mɨtì ɨ faŋ tɨ̀ yeyn iwo sɨ gham ŋweyn ateyn. Àŋena nɨn yeyn meyn na Danìyèl lum nî nô mɨ ghà kɨ àtì-ati, felɨ̀ kɨ ta isaʼi nɨn dyêyn, ghelɨ ɨ samsɨ̂ ŋweyn. ⁵Ghelɨ nâ ghèyn ɨ kæ be kɨ sɨ a àŋena ngeŋsɨ na, “Ghesɨ̀nà kàʼ ghɨ bû yèyn nô ìwo i bzɨ-i sɨ gham ŋweyn ateyn a bu kɨ ìwo kûm ìsaʼ i Fɨyini fìfɨ̀ a wù n-koʼsɨ.”

⁶Àŋena nɨn bè tî ɨ chɨ̀yntɨ̀ ɨ ndu yeyn fòyn Dalìyùs ɨ bè sɨ̂ ŋweyn na, “Mɨ̀chi myâ dyebtɨ a Mbæ̀! ⁷Ghès ɨtu ɨ ghelɨ ghɨ tisɨnɨ nɨ̀ ghelɨ ghì a ghɨ n-tisɨ ɨbyâs ilaʼ ɨ ghaʼlɨnɨ nɨ ɨghî a ghɨ n-tisɨ ɨbyâs ilaʼ ɨtwelâ nɨ̀ ghɨ̀bo ntèʼ baʼsɨ̂ nɨ̀ ghelɨ ghì a ghɨ n-tebtɨ fòyn yeyn meyn na yi n-jôf a Mbæ̀ na wà chwosɨ isaʼ na ka wùl nɨ̂n jèm sɨ̂ fɨyini fɨ lûfɨ̀ antêynɨ̀ mɨ̀chi mɨ̀vɨm ɨ̀n tal a bu kɨ sɨ̂ và, ma à kæ mòm mɨ ndà, a ghɨ maʼ ŋweyn ibɨ i bzɨ̀kemsɨ. ⁸Chwòsɨ isaʼ ateyn lvɨ̂yn a Mbæ̀ ɨ tom awu na à n-ghɨ ìsaʼ i Midìyà nɨ̀ Besìyà ma wùl kàʼ wu bû fì kfɨ̀nɨ.” ⁹Àŋena nɨ̂n bè tî, fòyn Dalìyùs ɨ chwòsɨ̀ ìsaʼ ateyn ɨ tom awu ateyn.

¹⁰A nà ghɨ ta Danìyèl kèli na fòyn nyaʼ meyn ìsaʼ ateyn ɨ̀ tom awu, wu koʼ a lûm ndo nɨ̀ ŋweyn iyvɨ, ɨ nguʼ alvɨ ɨ nà jemà kɨ ta wù lum jêm ki ndûsɨ̀ nɨ̀ Jèlusalèm wundùsɨ̀ ɨ ghɨ àzɨ̀-azɨ. Wù nà n-jêm ìngal ì tal achi, fu àyòŋnɨ̀ sɨ̂ Fɨyini fɨ. ¹¹Ghelɨ ghɨ felɨnɨ ghì ɨ ndu yeyn ta Danìyèl nɨ̀n jêm, loyn ìgâmtɨ̀ sɨ̂ Fɨyini fɨ. ¹²Àŋena nɨn yeyn tî, ɨ ndù a ntoʼ ɨ bè sɨ̂ fòyn na, “Mbæ̀, ba wà ti meyn chwòsɨ̀ ìsaʼ na ka wùl nɨ̂n jèm sɨ̂ fɨyini fɨ lûfɨ̀ kèsa sɨ̂ wùl, a bu kɨ sɨ̂ và antêynɨ̀ mɨ̀chi mɨ̀vɨm ɨ̀n tal, na wùl kæ mòm, a ghɨ maʼ ŋweyn ibɨ i bzɨkemsɨ a?”

Fòyn ɨ bèynsɨ̀ ɨ bè sɨ̂ àŋena na, “Isaʼ ateyn i bu ghɨ kɨ tì, a ghɨ ìsaʼ sɨ̂ ghelɨ Midìyà nɨ̀ ɨ ghɨ Besìyà ma wùl kàʼ wu bû kfɨ̀nɨ.”

¹³Àŋena kæ be sɨ̂ fòyn na, “Danìyèl ɨ wul ɨ̀mòʼ antêynɨ̀ nɨ̀ ghelɨ Judà ghì a ghɨ tî ghàytɨ ɨtwaʼ iwòŋ tî, nɨn yvɨnɨ̂ wì vâ a Mbæ̀, yvɨnɨ̂ wì isaʼ zɨ̀ a wà tî chwòsɨ̀. Wù bu jêm kɨ sɨ̂ Fɨyini fɨ ŋweynfɨ ìngal ì tal achi. ¹⁴Fòyn ɨ yvɨ iwo ateyn yi fu ngeʼ sɨ̂ ŋweyn nô sɨ a ŋaŋ wu nà kɨŋ dzɨ sɨ gàmtɨ Danìyèl, ɨ faŋ ɨ nà mômsɨ̀ kɨ momsɨ ɨchfɨ-iyvɨ i nî sœ.

¹⁵Mɨtì mbàynɨ̀sɨ Danìyèl sìsɨ̀ ɨ fi ndu yeyn fòyn ɨ bè sɨ̂ ŋweyn na, “Mbæ̀! Wà n-kya na à n-ghɨ a Medès nɨ̀ Besìyà fòyn ɨ chwôsɨ̀ ìsaʼ, wùl ɨ bu kfɨnɨ̂ wì.”

¹⁶Fòyn ɨ kæ bè na ghɨ ndu lì gvì nɨ̀ Danìyèl ɨ̀ màʼ ibɨ i bzɨkemsɨ. Ghɨ ndu li gvì, wu bè sɨ̂ Danìyèl na, “Mɨ n-jêm na Fɨyini fya fifɨ̀ a wà n-koʼsɨ mɨlvɨ ɨ̀n jɨ̀m tì bœsɨ vâ.”

¹⁷Ghɨ n-læ meyn màʼ Danìyèl ɨ chɨl ɨchfɨ̂ ibɨ nâ vzɨ̀ nɨ̀ ngòʼ, fòyn ɨ chwæ̀ nɨ̀ nchwæ ŋweyn nɨ̀ ɨ yî ghelɨ ghɨ felɨnɨ nɨ̀ ŋweyn na ka wùl nî nyàʼtɨ fvɨ̀sɨ̀ Danìyèl. ¹⁸Fòyn nɨn chwæ tî ɨ kasi ndù a ntoʼ ɨ leʼ na wu n-yɨ wi afo ɨ faŋ tɨ̀ bìmi na wùl ɨ̀ ni iwo i li ta ka yi ni a wù na saŋlɨ-à, ɨ chi bula mbuni koʼ a ŋweyn isɨ.

¹⁹Ɨtuʼ ɨ ni nà layn gvî kɨ tèyn, fòyn ɨ nyàŋsɨ ndù ɨchfɨ ibɨ i bzɨkemsɨ nâ ghè. ²⁰À nà n-ghɨ ta fòyn ndù bàʼsɨ ɨchfɨ ibɨ nâ ghè, wu koynsɨ ɨ byal ɨ jàŋ Danìyèl ɨ bè na, “Danìyèl, wùl ɨ̀ felɨnɨ nɨ̀ Fɨyini fìfɨ̀ a fɨ n-chi, Fɨyini fya fìfɨ̀ a wà n-koʼsɨ mɨlvɨ ɨ̀n jɨ̀m ti meyn fsɨ̀ vâ sɨ awu nɨ̀ bzɨ̀kemsɨ a?”

²¹Danìyèl ɨ bèynsɨ̀ ɨ bè na, “Chi faŋ a Mbæ̀! ²²Fɨyini femfɨ ti meyn tum nchì ŋweyn yì gvî bɨ̀ytɨ àchfɨ̂ a bzɨ̀kemsɨ, sɨ faŋ tɨ̀ lèmsɨ ma bòm ta ma bû jas iwo sɨ̂ Fɨyini fɨ, bula ma timi nì ìwo i bzɨ-i sɨ̂ và a Mbæ̀.”

²³Fòyn nɨn saŋlɨ meyn nô sɨ a ŋaŋ ɨ bè na ghɨ fvɨsɨ Danìyèl sɨ ibɨ i bzɨ̀kemsɨ nâ ghè. Ghɨ n-læ fvɨ̀sɨ̀ ŋweyn sɨ ibɨ afu, alemtɨ a ɨ ghɨ wi a ŋweyn ɨwùyn, bòm ta wu nà n-samsɨ kɨ Fɨyini fɨ ŋweyn.

²⁴Fòyn ɨ bè na ghɨ ghaytɨ ghelɨ ghì a ghɨ n-kòʼsɨ iwo atu nɨ̀ Danìyèl tì ŋêyn ghɨ̀ki àŋena baʼsɨ̂ nɨ̀ woyn ɨ̀ màʼ ibɨ i bzɨkemsɨ. Ghɨ n-læ maʼ àŋena, àŋena nà bu duʼ tɨ chem antêynɨ̀ ìbɨ̀ ma bzɨ̀kemsɨ saytɨ meyn àŋena baʼsɨ̂ kɨ nɨ̀ ɨ̀vɨf ɨ.

²⁵Fòyn Dalìyùs ɨ kæ nyaʼ ŋwàʼlɨ sɨ̂ ghelɨ tɨlaʼ tɨ̀ jɨ̀m nɨ̀ ghelɨ ɨbyàs ilaʼ baʼsɨ̂ nɨ̀ ɨghî a ghɨ n-taŋi nô mɨ ìtaŋi ilaʼ ì kà ɨ̀ bè na,

“Mɨ n-jêm na yì na lèm àwu nô mɨ a gha yi nà n-ndû kɨ nɨ̀ àsɨ-a.”

²⁶“Ma chwosɨ meyn ìsaʼ na nô ghelɨ ghɨ̀ jɨ̀m kɨ̀ tɨghaŋ tɨ̀ jɨ̀m ilaʼ afêyn nɨn kelɨ sɨ nà fayn Fɨyini fìfɨ̀ a Danìyèl nɨn koʼsɨ, fî ngvɨmlɨ̂ ɨ̀nfeynfɨ.”

“À n-ghɨ Fɨyini fìfɨ̀ a fɨ n-chi,

ghɨ sɨ nà lum saʼ kɨ saʼ.

Ɨfôyn ŋweyn læ̀ mæ̂ wì.

Adyaʼ a ŋweyn a faŋ meyn kɨ̀ samoʼ.

²⁷Wù n-fvɨsɨ̀ ghelɨ sɨ a ngeʼ, bœ̂sɨ̀ àŋena.

Wù n-nî àwo a kaynɨ-a nɨ̀ àwo ɨchfɨ̀ ɨ yumnɨ-a iyvɨ, nî a nse.

Wù fsɨ meyn Danìyèl sɨ ɨwu nɨ̀ bzɨ̀kemsɨ.”

²⁸À ti ta Danìyèl nɨn læ nà lem awu nô mɨ a gha yi nà n-ndû kɨ nɨ̀ àsɨ-a ɨtuʼ ghê a fòyn Dalìyùs nà n-saʼ kɨ̀mɨ nɨ̀ ɨtuʼ vzɨ̀ a fòyn Saylùs ɨ wul ɨ̀ Besìyà nà n-saʼ.