Daniel 12

Awo kì a kɨ læ̀ nà gâyn a ngòʼsɨ mbzɨ

¹Nchì Fɨyini zɨ̀ a yì màʼ ndzɨsɨ fɨfâsɨ̀ nɨn be meyn na, “Ɨlvɨ læ̀ kfeyn a, a Maykèl ɨ nchì Fɨyini i ngaŋtɨnɨ zɨ̀ a yì n-chi ghelɨ̀ ghya gvi. Ɨlvɨ nâ wèyn læ̀ nà ghɨ ɨ̀lvɨ ngeʼ i bemnɨ bula wùl ɨ̀ timi yeyn kɨ̀ sɨ zɨ̀tɨ̀ ɨtuʼ nɨ̀ ghɨ̀bo ghesɨ. Mɨtì à læ̀ nà ghɨ ɨlvɨ nâ ghàyn a ghelɨ̀ ghya ghì a ghɨ nyàʼ azɨyn a àŋena a ŋwàʼlɨ̀ ìbœ̀ bœ. ²Ghelɨ ghɨ dvɨnɨ ghì a ghɨ kfɨtɨ læ̀ kasî lalì sɨ ikfɨ. Ghɨli læ̀ lalì-à nà kelɨ ìchi zɨ̀ a yi fàŋ meyn samoʼ mɨtì a ghɨli lali nɨ̀ ìwumi i ɨ̀ ndù kɨ̀ ibebsɨ. ³Ghelɨ ghɨ tisɨnɨ ghɨ tofɨnɨ læ̀ nà ŋwâʼ ta ibayn zɨ̀ a yi n-bayn iyvɨ, a ghelɨ ghì a ghɨ ti nà yeʼi ghelɨ nɨ̀ dzɨsɨ àtì-atisɨ na bayn ta mɨnjêyn nô ta ka ghɨ̀ læ̂ ghɨ̀. ⁴Chɨytɨ ŋwàʼlɨ̀ àteyn a Danìyèl ɨ chwæ̀ sɨ chem a ngòʼsɨ. Ndvɨ̀ ghèl læ̀ nà koʼ kɨ tèyn kalì-à, kɨŋ sɨ keli iwo zɨ̀ a yi n-gâyn.”

⁵Nchì Fɨyini nâ zɨ̀ nɨn taŋi tî, ma se sɨ ki ɨ yeyn nchìsɨ Fɨyini sɨ lisɨ sɨ̀ bò ɨ ti a mbæ̀ jvà, ì lì ɨ ti injɨyn i yeynì, ìlì ɨ ti injɨyn i zɨ-i. ⁶Nchì Fɨyini ì lì ɨ bɨf sɨ̂ ìlì zɨ̂ a yì màʼ ndzɨsɨ fɨfâsɨ̀ ti a mbæ̀ jvà abàs ikuè na, “Awo a kaynɨ-a nâ kèynà læ̀ gâyn ɨtuʼ gha sɨ luynsɨ ichfɨ̂nɨ̀ nâ yèynì a?”

⁷Nchì Fɨyini zɨ̀ a yì màʼ ndzɨsɨ fɨfâsɨ̀ ti a mbæ jvà abàs ikuè ɨ làysɨ̀ ɨ̀wu ŋweyn iyvɨ, ma yvɨ ta wù chfɨ̀nɨ̀ izɨyn nɨ̀ Fɨyini fìfɨ̀ a fɨ fàŋ meyn samoʼ na, “À na ghɨ ibàm i bêŋsɨ̀ tal nɨ̀ àbeʼa. Fɨyini fɨ læ̀ fsɨ ghelɨ ŋweyn sɨ awu nɨ̀ ghelɨ ghì a ghɨ n-choʼ avɨ a àŋena, a awo nâ kèynà mæ.”

⁸Mɨ n-yvɨ meyn ìwo zɨ̀ a wù bè mɨtì ɨ faŋ tɨ̀ kèli na yi n-dyêyn na gha a, ɨ kæ bɨf sɨ̂ ŋweyn na, “Bôbo, ngòʼsɨ ìwo nâ yèyn læ̀ nà ghɨ ti-a?”

⁹Nchì Fɨyini nâ zɨ̀ ɨ bèynsɨ̀ ɨ bè sɨ̂ mà na, “Ka n-fù ngeʼ sɨ̂ ngêŋ zyâ a Danìyèl. Ghɨ leytɨ meyn àwo ateyn a ɨ̀ chwæ̀ sɨ chem a ngòʼsɨ. ¹⁰Ghelɨ ghɨ dvɨnɨ læ̀ toynɨ̂ antêynɨ̀ àwo nâ ghàyn ɨ̀ nà layn ta isaʼi nɨn dyêyn, kelɨ wi nseʼi. Mɨtì a ghelɨ awo a bɨ-a faŋ nà nî ndû kɨ nɨ̀ àwo a bɨ-a. Nô wùl àwo a bɨ-a læ̀ nà kya wi na à n-gâyn ghà a, mɨti ghelɨ ghɨ tofɨnɨ kya àwo kì a kɨ n-gâyn.”

¹¹Mɨ̀chi læ̀ chwô nkam nɨ̀ mɨ̀chi ighɨ ì bò nɨ̀ mɨ̀chi mɨ̀vɨm bulamòʼ kɨ̀ sɨ zɨ̀tɨ̀ achi ghè a ghɨ n-tùynsɨ na ka ghɨ na fì fu tɨ̀fu tìtɨ̀ a ghɨ nà n-fu kɨ mɨchi ɨ̀n jɨ̀m, ɨ lèm ànfèʼsɨ̀ achaʼnɨnɨ-a kì a ndô Fɨyini a kɨ n-gvî nɨ̀ ngèʼ tì. ¹²Njùŋ nɨ̀n ghɨ sɨ̂ wùl ɨ̀ vzɨ̀ a wù n-yeʼtɨ kɨ ɨwuyn nɨ̀ Fɨyini fɨ sɨ chem ta ka mɨ̀chi nkam, nɨ̀ mɨ̀chi ighɨ ì tal nɨ̀ mɨ̀chi mɨ̀vɨm ɨ̀n tal njvàsɨ̀ tâyn chwo.”

¹³“Wa yeʼtɨ̂ kɨ ɨwùyn nɨ̀ Fɨyini fɨ a Danìyèl nô ta ka wà læ̂ kfɨ. Wa læ̀ kfɨ-a mɨtì a à na ghɨ a ngòʼsɨ mbzɨ a wà lali sɨ ikfɨ ɨ̀ fsɨ ɨmwaʼtɨ vâ.”