Amos 9

¹Mɨ n-læ meyn yeyn Bobo, wu ti a ngùŋ abaŋ ifu a ndô Fɨyini. Wu bè na,

“Kfɨ̀yn nô mɨ àtu atòʼ àkà ta kɨ n-tôʼtɨ̀ ndô Fɨyini taka isas ɨ ndo Fɨ̀yini nâ yèyn nèʼa. Leŋ kòytɨ ɨtôʼ nâ wèyn, wu felɨ atu nɨ̀ ghelɨ nô ghɨ̀jɨ̀m. Wu n-felɨ̂ atu nɨ̀ àŋena ɨ̀ zuètɨ ghɨli, a ghɨli seʼ ɨtwaʼ iwòŋ, a mà ndu zuètɨ̂ mèsɨ àŋena afu. Wùl sɨ ateyn nɨn leʼ wi nô ìmòʼ. Aŋena nɨn kfɨtɨ̂ kɨ ghɨ̀jɨ̀m. ²Aŋena kæ tɨm mɨ ìbɨ ɨ̀ zɨ lèytɨ̀ ilàʼ ɨ kfɨsɨ nse, a ma ndu ghal kɨ ghal àŋena nô mɨ afu. Aŋena kae lèʼ koʼ lèytɨ nô mɨ iyvɨ, a mà koʼ sùʼsɨ àŋena. ³Aŋena kæ koʼ lèytɨ̀ atû Kfɨyn Kamel, a ma kɨŋ ndù nɨ̀ aŋena afu ɨ̀ ghàytɨ. Aŋena kæ zɨ lèytɨ mɨ isas i jvâ i ghaʼnɨ, a mà be, a ni a nyam jvà lumlɨ àŋena. ⁴Ghɨ kæ gvì ghàytɨ àŋena ɨ lì ndù nɨ̀ àŋena ilaʼ atum, a mà be a ghɨ zuetɨ àŋena afu. Ma lêm meyn kɨ̀ nô sɨ ikàyntɨ̀ na mɨ n-zuetɨ̂ àŋena. Mɨ n-gâmtɨ̀ wi àŋena.”

⁵Bobo Fɨyini ɨ Bò ɨdwàʼ ɨ̀jɨ̀m nɨn kûm nse, a ɨlwêʼ ɨ nèʼà kɨ ɨ̀jɨ̀m. Wu n-kûm nse, a nô mɨ nda dzɨ̀. Wù n-kumà, a nô mbzɨ ìjɨ̀m nà selâ kɨ tèyn ta Jvâ Nâyl a Ijìb. ⁶Bobo Fɨyini nɨ̀n ghɨ ɨvzɨ̂ a wù bàʼlɨ̀ ntòʼ ŋweyn iyvɨ ɨ̀ kàlì we isas ateyn a nse. A n-ghɨ kɨ nô ŋweyn Bobo Fɨyini.

“ ⁷Bobo Fɨ̀yini bè na, Mɨ n-ki zɨ̀ ghelɨ Isɨlæ yi ghɨ kɨmɨ ta ghelɨ Kush sɨ̂ mà. Mɨ n-læ fvɨ̀sɨ zɨ sɨ a Ijib kɨmɨ ta mɨ̂ n-læ fvɨ̀sɨ ghelɨ Fìlisya sɨ a Klit, kɨmɨ ighel ta mɨ n-læ fvɨ̀sɨ ghelɨ Siliya sɨ a Kîl. ⁸A n-ghɨ mà Bobo Fɨyini fîfɨ a fɨ ngàŋtɨ chwò. Mɨ n-ki yeyn kɨ yeyn awo abɨ-a kì a ghɨ n-nî ilaʼ i Isɨlæ, ghɨ sɨ chyeʼsɨ ilaʼ ateyn sɨ atû nse afêyn, nô mɨ ta woyn Jakob ghɨli nì faŋ. ⁹Mɨ nì be-à, a ghɨ si woyn Isɨlæ kɨ̀ nô ta ghɨ sî abayn nɨ nchɨ̀kàleʼ. Mɨ nì chɨ̂yntɨ̀ àŋena bàʼsɨ nɨ̀ ghelɨ tɨ̂laʼ tɨ mbzɨ tɨlitɨ ɨ̀ sì fvɨ̀sɨ ghelɨ ghì a ghɨ n-kfeynɨ wi ta n-kɨŋ ɨ nô ghɨ̀jɨ̀m. ¹⁰Ghɨ nì zuetɨ̂ ghelɨ awo abɨ-a ghì a ghɨ n-ghɨ a ma antêynɨ ghelɨ ɨtwaʼ iwòŋ. Mɨ n-bê àŋena ghì a ghɨ n-bê na, ‘Fɨyini fɨ̀ kàʼ fɨ bû vìsi na ngeʼ baʼsɨ sɨ̂ ghesɨ̀nà nô sakos.

Ghɨ læ̀ kasî tisî Isɨlæ̂

¹¹Bobo Fɨyini bè na, Achi-a nɨn gvi-à taka ma kasî tìsɨ ìlaʼ i fòyn David nô mɨ ta yi fe lvɨ̀yn tèyn. Mɨ nì kasî fêyntɨ̀ ɨ̀bûʼ vzɨ̀ a wu n-ghɨ ateyn ɨ kàsi tìsɨ àŋena. Mɨ nì kasî bâʼlɨ̀ ìlaʼ ateyn, a yi na ghɨ kɨ ta yi n-læ nà ghɨ sɨ asɨ. ¹²Ghelɨ Isɨlæ læ̀ sfɨ mesì abeʼ a nsê Edom kî a kɨ n-læ faŋ nɨ̀ tɨ̀laʼ tɨ mbzɨ tìtɨ̀ a mɨ n-læ nà kelɨ-a. A n-taŋî mà Bobo vzɨ̀ a wu nì nî a iwo nâ yèynì gayn.

¹³Bobo Fɨyini bè na, Mɨ̀chi nɨ̀n koʼ gvi-à taka ghɨ na tôʼ àsaŋ, ghɨ bû fì keli ɨlvɨ sɨ kfi bòm dzɨ zɨ̀ a kɨ nyàŋsɨ kòʼ ateyn. Ghɨ læ̀ nà tôʼ gɨ̀lêbsɨ̀, ghɨ nà kelɨ wi ɨ̀lvɨ sɨ koè sɨ faytɨ mɨlûʼ ateyn bòm dzɨ zɨ̀ a sɨ nyàŋsɨ̀ bàŋ ateyn. Mɨ̀lûʼ ɨnfɨ læ̀ na kuŋ kɨ ta jvasɨ atû kfɨysi sɨ ghalɨnɨsɨ, kalì kɨ ta jvasɨ atû kfɨyn sɨ lælɨnɨsɨ. ¹⁴Ma læ̀ kasî lî gvî nɨ̀ ghelɨ̀ ghem a ilàʼ ghè a mɨ n-læ fu sɨ̂ àŋena A àŋena kasî bàʼlɨ̀ ntèʼsɨ àŋena sìsɨ̀ a ghɨ n-læ bebsɨ ɨ̀ nà chî ateyn. Aŋena læ kasî tôʼ ɨ̀nkâʼ mɨ̀ ɨ̀ntàm nà nyvɨ mɨ̀lûʼ mzɨ̀ a mɨ̀ n-fvɨ̂ ateyn. Aŋena læ̀ nà felɨ̀ gveynsɨ yɨ ɨ̀fwo vzɨ̀ a àŋena nɨn n-tôʼ ateyn. ¹⁵Mà læ̀ tôʼ Isɨlæ a nse alèʼ ghè a mɨ n-læ fu sɨ̂ àŋena, a afo a læ̂ faŋ tɨ̀ fì tɨ̀ choʼ àŋena. A n-taŋî mà, Bobo Fɨyini.