Amos 5

¹Woyn Isɨlæ, yì yvɨtɨ læ̂ mà yem jàŋ ikfɨ yèyn sɨ̂ zɨ̀. ²(poetry) Isɨlæ nɨ̀n ghɨ waynda ngòyn ma wù fe meyn a nse, bu fî ghɨ wi sɨ læ̀ sɨ làlì! À n-nyɨŋ ŋweyn a nse tèyn, kɨ̀ nô a àŋena ilaʼ, wùl ɨ ghɨ wi sɨ làysɨ ŋweyn. ³Bobo Fɨyini fîfɨ̀ a fɨ n-saʼ samoʼ (a fɨ ngaŋtɨ chwò) bè na, ̀̀Ntèʼ nɨn ghɨ a Isɨlæ, ghɨ sɨ tum ghelɨ a asɨ iwoŋ nkam, na à kasi kfa kɨ̀ ghelɨ ɨvɨ wèʼa. Ntèʼ nɨn ghɨ a Ɨsɨlae ghɨ sɨ tum ghelɨ asɨ iwoŋ ɨvɨ weʼa na à kasi kfa kɨ̀ ghelɨ ɨ̀vɨm. ̀̀ ⁴Bobo Fɨyini bè sɨ̂ ghelɨ Isɨlae na, Yì kɨŋ gvì nɨ̀ mà a ka yì boe. ⁵Ka wùl nɨ̂n lù nà ndu a Beshiba sɨ koʼsɨ ma afu. Ka wùl nɨ̂n ndù a Betel bê na yi ndu sɨ kɨŋ ma afu. Iwo i nɨn ghɨ wi Betel. Ka wùl nɨ̂n ndù a nteʼ Gilgal (sɨ koʼsɨ mɨyini mɨ̀ ànkaŋ mzɨ̀ afu). Ghɨ n-gvi ghaytɨ̂ ndû nɨ̀ ghelɨ Gilgal ilaʼ atum. ⁶Yì kasî gvì sɨ̂ Bobo Fɨyini a ka yì faŋ tɨ̀ kfɨ̀tɨ. Yì kae leʼ na yi n-gvî wì sɨ̂ Bobo, a wù suʼi kɨ̀ atu nɨ̀ zɨ̀ ghelɨ Isɨlae tèyn tɨ ɨvɨs. Yi na kya na ɨvɨs ɨ Bobo nâ wèyn nɨn ghɨ sɨ nyoʼ zɨ ghelɨ Betel, wùl bû fì lɨ̀msɨ. ⁷Zɨ ghêyn a yi n-ngvɨynɨ nɨ̀ ìsaʼi tèyn, nî na ghelɨ na dzɨ-a. Yi n-lî ìwo i wûl, yi ghɨ àtì ati, bêynsɨ̀ kɨ âtvɨŋatvɨŋ. Ngeʼ nɨn kolî zɨ̀, bem kɨ teyn. ⁸(poetry) Yì na kya na mà Bobo Fɨyini nɨ̀n chi-à. A n-lae faytɨ ma ɨ faytɨ mɨnjêyn nô ɨ̀njɨ̀m. A n-baynsɨ̂ ma chue, a jɨsɨ mà ɨtuʼ. A n-ghɨ mà vzɨ̂ a mɨ n-sef mu mɨ̀ jvà ighaʼnɨ, sfɨs atû nse. Izɨyn ì yemi nɨn ghɨ Bobo Fɨyini. ⁹Mɨ n-lî wul àdyàʼ sɨ bebsɨ, ma bebsɨ̂ kɨ isɨ ɨ ɨlvɨ. ¹⁰(para) Yi n-bâyn ghelɨ ghì a ghɨ n-timi alèʼ a nsaʼ ghɨ nà taŋî kɨ samoʼ, ɨ ghelɨ ghì a ghɨ n-bâyn n-saʼ ànkaŋ ¹¹Yi n-yèʼtɨ̂ gheli ànfɨf, kâyn na àŋena na kfî asaŋ, ghɨ làʼ tâks sɨ̂ zɨ̀ nɨ ali-a. Yì na kya na yi faytɨ meyn chuyn ngòsɨ̀ ɨ̀ bàʼlɨ ndosɨ jûŋsɨ̀, mɨtì ghɨ wi sɨ chi ateyn. Yi toʼ meyn ɨ̀nkâʼ mɨ̀ ɨ̀ntàm mɨ̀ koʼ nà yvɨ̂tɨ̀ jôf kɨ tèyn, mɨtì ghɨ wi sɨ nyvɨ mɨluʼ ma mɨ fvɨ̀ ɨntam nâ ghè. ¹²Mɨ n-kya na yi ni meyn mbɨsɨ, sɨ bem kɨ tèyn, kya na yi mom meyn awo abɨ-a, kɨ dvɨ̂ tèyn. Yi n-sfɨ mɨ̀kwo mɨ̀ ghelɨ ibàm, gviynɨ̂ awo sɨ̂ àŋena, chòʼ avɨ a ghelɨ ghɨjûŋ fî tâmtɨ na ka ghɨ na saʼ saʼsɨ ghêl a dzɨ̂ àtì. ¹³Mɨ n-yeyna yi kêʼ sɨ̂ zɨ na yi n-jôf sɨ chimi kɨ chimi kûm awo nâ kèynà. ¹⁴Yì na kɨŋ njùŋ a ghɨ wi mbɨ, taka yi faŋ tɨ̀ kfɨ̀tɨ. Yi kae nà nî kɨ tèyn, a Bobo Fɨyini ɨ bò ɨdwaʼ ɨ̀jɨ̀m na ghɨ kɨnô zɨ̂ àŋena samoʼ ta yi n-bê. ¹⁵Yì na bayn mbɨ, kôŋ njùŋ. Yì na saʼ nsaʼsɨ ghêl a dzɨ̂ àtɨ̀ ati. Lvɨfɨli a Bobo koynsɨ isuyn sɨ̂ zɨ̀ ghì a yì bu chi ilaʼ afeyn. ¹⁶Bobo Fɨyini fɨ̂fɨ a fɨ ngàŋtɨ chwò bè na, Ghelɨ læ̀ nà jêlɨ̀ chwô a dzɨsɨ a ntèʼ, luŋlɨ̂ dzɨ-à, ndû timî nômɨ afàf a ka dzɨ-a. Ghelɨ ghì a ghɨ n-lâʼ laʼ na ghɨ na dzɨ̂ tɨkfɨ læ̀ nà dzɨ-à. Ghɨ læ̀ laʼì nômɨ ghelɨ ghì a ghɨ n-felɨ̀ gveynsɨ na ghɨ na boŋ dzɨ-à. ¹⁷A læ̀ nà ghɨ nòmɨ a gveyn mɨ̀tàm î kà ghɨ yvɨ ta ghelɨ nɨn byalɨ dzɨ̂, a ghɨ bòmta mà tòynɨ chwò a yi a antêynɨ̀. A n-taŋî (mà) Bobo Fɨyini. ¹⁸Ngeʼ ighaʼnɨ læ̀ nà ghɨ sɨ̂ zɨ̀ ghî a yi nduʼ ki na achi a Bobo Fɨyini à gvi. Yi n-ki nô na àchi a Bobo nâ kì gvi yì ni gha nɨ̀ ànkeyna a? Achi ateyn a læ̀ nà ghɨ wi achi a saŋlɨnɨ-a, à læ̀ nà ghɨ achi a ngeʼ i kaynɨ. ¹⁹A læ̀ nà ghɨ achi nâ ghè, a ngeʼ ateyn na fɨsɨ ɨzɨ̂ a wùl kèli ɨlvɨ ta wù sesɨ leʼ nyamàbo ɨ̀ fì ndu zɨ ɨchvɨ̀ nɨ̀ ngvɨm. Yi læ̀ nà kêʼ na wùl leʼ zɨ a ndo ɨ nà lem ndû nɨ̀ awo a ŋweyna ɨwùyn ndo, mbam lum kɨ̀ lum. ²⁰A læ̀ na ghɨ achi (a ngeʼ) nɨ̀ Bobo Fɨyini, a à na ghɨ kɨ àbe afɨmnɨ-a. Ibayn i læ̀ nà ghɨ wi nô sɨ akos. ²²(para) Bobo Fɨyini bè na, Yì læ̀ gvî nɨ̀ ifu i nyoʼnɨ i baʼsɨ̂ nɨ̀ ifu i asaŋi sɨ̂ mà, a mà leʼ na mɨ sfɨ wi. Wùl læ̀ yɨsɨ̂ nyam na yì ghàʼ wù gvɨ fù sɨ̂ mà, mɨtì gvi fu a mà leʼ na mɨ n-sfɨ wi. ²³Yi chimi moŋ, ka yì fî yòysɨ̀ ɨ̀tuŋlɨ̂ wom bê na yi n-yem njàŋsɨ̀. Mɨ n-kôŋ wì sɨ nà yvɨ tɨluŋ tɨ̀tɨ̀ a yi n-buʼ tî. ²⁴Nchînɨ̀ sɨ àtì ati nɨ̀ zɨ̀ sɨ nɨn kelɨ sɨ̀ nà kwo kalì kɨ mɨlvɨ̂ ɨ̀njɨ̀m tèyn ta jva. Nchɨ̂nɨ̀ sɨ àtì ati nɨ̀ zɨ̀ nɨn kelɨ sɨ nà fvɨ̂ kɨ mɨlvɨ ɨ̀njɨ̀m ta jva, yi lum yum wi. ²⁵Ghelɨ Isɨlæ, yi n-bû læ chi bèŋ sɨ̀ mɨ̀vɨm ɨ̀n tâyn a nse ɨ yum ɨ læ fu tɨfutɨ sɨ̂ mà ²⁶Yi n-koʼsɨ̂ Sikùt, ma àti fɨ̀yini fîfɨ̀ a yi n-lî sɨ a yi a fòyn, beʼì chwô nɨ̀ ànfêʼsɨ̀ ateyna, koʼsɨ̂ kɨmɨ Kìyun, ma àti fòyn mɨ̂njèyn nɨ̀ zɨ̀, beʼì chwô nɨ̀ ànfêʼsɨ̀ ateyna. ²⁷Bòm tèyn, ma na bê na, mɨ ni-à, a ghɨ li zɨ ɨ̀ ndu lèm ilaʼ atum, injɨyn i Damaskus. A n-taŋi mà Bobo Fɨyini ɨ bò ɨdwaʼ ɨ̀jɨ̀m.