Amos 2
1Bobo Fɨyini bè na, "Ghelɨ Muwab ɨ ni meyn mbɨ sɨ̀ tal, ghɨ bê tì ma àŋena nì sɨ kaè. Ma ghɨ wi sɨ faŋ bula ma dyêyn ɨ̀toŋ ɨ baŋnɨ nɨ mà sɨ̂ aŋena. Aŋena ti meyn mòm ìwo, yi bem kɨ tèyn ɨ̀ zue fòyn Edom ɨ̀ lì ɨ̀vɨf ɨ ŋweyn ɨ̀ nyòʼ nyoʼ, wu fɨ ɨ̀ kètɨ̀. 2Ma na bê na, mɨ n-boŋ nyôʼ Muwab. Mbàyn ighaʼnɨ zɨ̀ a ghɨ tɨm na yì na kɨ̂ŋtɨ̀ Kiliyot ɨ nì fɨ mèsì kɨ̀ mesi 3Mɨ n-zuetɨ̂ ghelɨ ghì a ghɨ n-saʼ Muwab ɨ̀ fì zue nô fòyn àŋena. À tàŋi Bobo Fɨyini. 4Bobo Fɨyini bè na, Ghelɨ Juda ni meyn mbɨ sɨ̀ tal, ghɨ bê tì ma àŋena nì sɨ̀ kaè. Aŋena chas meyn ìsaʼ i Bobo Fɨyini ɨ̀ leʼ na àŋena nɨn yvɨ wi iwo zɨ̀ a wù bè na àŋena na ni-à. Mɨ̀yìnì mzɨ̀ a ghɨ̀bo àŋena nɨ̀n lae nà koʼsɨ-à jɨŋsɨ meyn àŋena, àŋena lê dzɨ. 5Ma na bê na, mɨ n-nyôʼ Juda, a mbàyn ighaʼnɨ zɨ̀ a ghɨ tɨm na yì na kɨ̂ŋtɨ̀ Jelusalem fɨ mèsì kɨ̀ mesi. 6Bobo Fɨyini bè na, Ghelɨ Isɨlae ni meyn mbɨ sɨ̀ tal, ghɨ bê ti ma àŋena nì sɨ̀ kaè, ma ghɨ wi sɨ faŋ bula ma dyêyn ɨtoŋ ɨ baŋnɨ nɨ̀ mà sɨ̂ àŋena. Ghelɨ àtì-ati nɨn sesɨ wo sɨ laʼ ikwo i àŋena, ghelɨ ghɨ to ɨ nà lì àŋena beyʼlɨ kɨ sɨ a nkfɨ ɨ̀kwo na àŋena na fêl sɨ ɨkòs (footnote pair of sandals). 7Ghelɨ ghɨ to kasɨ meyn ghelɨ ghɨ bolɨ kɨ̀ nô sɨ a abɨ̀l ɨ̀ nà jeylɨ̀ kɨ àŋena nɨ̀ ɨ̀vzɨ. Aŋena bu tìmi nà saʼ nsaʼ wùl ɨbol a dzɨ̂ àti ati. Bò wàyn ŋêyn wàyn nɨn lî wayn wi ta wù n-fel akôs sɨ̂ àŋena, ghɨ nà chɨ̂yntɨ̀ chî kɨ nɨ̀ ŋweyn ghɨ̀jɨ̀m. 8Aŋena nɨn ndu sɨ chi ɨlweʼ ghè a àŋena nɨn jem mɨ̀yìnì mɨ̀ àŋena ateyn, ghɨ nà zɨ̂sɨ̀ ɨ̀lwêʼ ɨchinɨ nâ vzɨ nɨ̀ dzɨsɨ ma ghɨ ghàytɨ sfɨ kɨ̀ sɨ̂ ghelɨ anfɨf ghì a ghɨ sam mɨkwo sɨ̂ àŋena ɨ̀ nà wo sɨ làʼ. Aŋena nɨn ndu a alèʼ ghè a àŋena nɨn koʼsɨ Fɨyini fi àŋena ateyn, ghɨ nà nyvɨ mɨ̀lûʼ ma ghɨ ghaytɨ̂ sfɨ kɨ sɨ̂ ghelɨ ta ghɨ sam mɨkwo sɨ̀ àŋena ɨ̀ nà wo sɨ làʼ. 9Ghelɨ Isɨlae nɨn kya wì ma, lêsɨ̀ sɨ̀ nà kya na mɨ n-lae meyn zuetɨ ghelɨ Amo tèyn nô wùl sɨ ateyn ɨ faŋtɨ faŋ kɨ bòm àŋena, a ghɨ tì ghelɨ Amo nâ ghì ɨ dyêblɨ̀ kɨ tèyn ta ɨkâʼ mɨ̀ seda, to kɨ tèyn ta ɨkâʼ mɨ̀ Ôk. 10Mɨ n-lae fvɨ̀sɨ zɨ sɨ ilaʼ i Ijìb ɨ li jèl nɨ̀ zɨ̀ ɨ toynɨ a nse iyum sɨ a bèŋsɨ̀ mɨ̀vɨm ɨ̀n kaè jae na mà gvi fu ilaʼ i Amo yèynì sɨ̂ zɨ̀ 11Mɨ n-lae meyn choʼtɨ woyn ghɨlûmnɨ nɨ̀ zɨ̀ ghɨli ɨ lem sɨ a nfeʼtɨ̀sɨ̀ ɨ choʼtɨ ghɨli, àŋena fu ngeŋsɨ àŋena sɨ̂ mà ɨ lèm na ghɨ na lum felɨ̀ kɨ sɨ̂ mà. Mà wàm wam a ghelɨ Isɨlae? À tàŋi Bobo Fɨyini. 12Yi ni meyn ghelɨ nâ ghèyn a ghɨ n-lae màʼ ngeŋsɨ sɨ mà ɨ kasî nà nyvɨ mɨ̀lûʼ ɨ̀ fì kàyn na ka nfèʼtɨ̀ semsɨ fî làʼì ntum yem. 13Yì na kya na mɨ n-màʼ zɨ̀ a nse ɨ gvàsɨ̀ zɨ̀ a yì na dzɨ̂nɨ̀ kɨ tèyn ta mɨtù ɨlvɨ ta mɨ̀ bèyʼì asaŋ kɨ̀ dvɨ̂ nô sɨ a ŋaŋ 14Wùl sɨ̂ zɨ̀ ɨ nì leʼ wi, nô mɨ ɨlvɨ ta wù n-kya sɨ nyɨŋ. Ghelɨ adyàʼ ɨ nì wo àdyaʼ sɨ lèʼ, a nô mɨ sugyèʼsɨ̀ wo sɨ gyàmtɨ ngeŋsɨ àŋena. 15Sugyeʼ sîsɨ̀ a sɨ n-nû nɨ̀ mɨ̀nchyâ ɨ nì bu kelî wì sɨ nù. Ghelɨ ghì a ghɨ n-kya avɨ a inyiŋ ɨ nì bolɨ-a, a nô ighî a n-nû atû nyamsɨ kfaŋ faŋ tɨ̀ fì tɨ̀ kèli na ghɨ n-nleʼ ndû wo a. 16A laè nà ghɨ achi nâ ghè, a nô mɨ sugyeʼ sîsɨ a sɨ to chwò maʼ ɨfwo ighòŋ ɨ̀ lèʼnɨ. À tàŋi Bobo Fɨyini.