2 Kings 8

Elishà ŋêyn fòyn ɨ gàmtɨ̀ wul ɨ wî Shunèm

¹À n-læ nà ghɨ ta Elishà làysɨ̀ wayn wul ɨ wî Shunèm sɨ ikfɨ, ɨ bè sɨ̂ sɨ̂ wùl ɨ wi àteyn na, “Zɨ̂ ghelɨ ndo nɨ̀ và lu ndù chìtɨ nô mɨ wo ta yì kàʼ a yì ndu. Bôbo Fɨyini choʼnɨ meyn na jèŋ nɨn ku ìlaʼ yèynì sɨ a bèŋsɨ̀ nsòmbo.” ²Wùl ɨ wi nâ wèyn nɨ̀n nî meyn kɨ ta Elishà ɨ wul ɨ̀ Fɨyini nɨ̂n bè. Wù n-li meyn ghelɨ ndo nɨ̀ ŋweyn ŋêyn àŋena ɨ ndu chi a Fìlisìyà sɨ a bèŋsɨ̀ nsòmbo.

³A nà ghɨ ibàm i bêŋsɨ̀ nsòmbo, wu kasi kfa sɨ a Fìlisìyà ɨ ndu dzɨ̀ sɨ̂ fòyn na wù gamtɨ yì kasi kèli ndô zɨ bàʼsɨ nɨ̀ gvèyn. ⁴Wùl ɨ wi àteyn nɨn læ se sɨ ndù, fòyn ɨ taŋî ŋêyn Gèhazì ɨ wul ɨ̀ felɨnɨ nɨ̀ Elishà. Fòyn nɨ̀n bê meyn sɨ̂ Gèhazì na, “Fèʼtɨ awo a kaynɨ-a kì sɨ̂ mà nô à jɨ̀m a Elishà ɨ wul ɨ̀ Fɨyini nì.” ⁵Gèhazì ɨ zɨ̀tɨ̀ sɨ feʼtɨ sɨ̂ fòyn ta Elishà tî nì wùl ɨ̀ kasi làlì sɨ ikfɨ. Wu nà n-taŋî tì, wùl ɨ wi vzɨ̀ a Elishà tî nì wâyn lûmnɨ̀ nɨ̀ ŋweyn kasi làlì sɨ ikfɨ ɨ zɨ̂ gvî sɨ chwotɨ na fòyn gamtɨ wù kasi kèli ndô ŋweyn nɨ̀ gvèyn ŋweyn.

Gèhazì ɨ bè sɨ̂ fòyn na, “Mbæ̀, ɨwêyn nɨn ghɨ wul ɨ wi vzɨ̀ a bò ìfèl nɨ̀ mà tî làysɨ̀ wayn ɨ lûmnɨ̀ nɨ̀ ŋweyn sɨ ikfɨ, ɨwêyn ɨ ghɨ wâyn ŋweyn nâ vzɨ̀.” ⁶Fòyn ɨ bɨf iwo zɨ̀ a yi tî gàyn, wùl ɨ wi àteyn ɨ fèʼtɨ̀.

Fòyn ɨ kæ choʼ wul ɨ̀ felɨnɨ nɨ̀ ŋweyn na wù ki iwo kûm ngeʼ wùl ɨ wi nâ vzɨ̀. Wu n-bè sɨ̂ ŋweyn na, “Kasi fu nô mɨ ghà vzɨ̂ a wùl ɨ wi wèyn tî nà kelɨ-a nɨ̀ ɨ̀kwo vzɨ̀ a wu fvɨ̀ a ŋweyn a gvêyn sɨ zɨ̀tɨ̀ achi ghè a wu n-læ lù sɨ a ilaʼ afêyn sɨ koʼ sɨ chem lvɨ̂yn.”

Hazèl ɨ zue Ben-Hadàd

⁷Elishà nɨn læ meyn ndù a Dàmaskùs, Ben-hadàd ɨ fòyn Alàm ɨ koʼi-à. Ghɨ fèʼtɨ̀ sɨ̂ fòyn na Elishà ɨ wùl ɨ̀ Fɨyini gvi meyn a Dàmaskùs. ⁸Fòyn ɨ bè sɨ̂ Hazèl na, “Lì ifu ɨ ndù nɨ̀ ìnyeyni sɨ̂ Elishà ɨ wul ɨ̀ Fɨyini nâ vzɨ̀. Wà ndû wa bè na wù bɨf sɨ̂ Bôbo Fɨyini na, ‘A mɨ ti n-làlì sɨ ɨkuyn ikoʼi afêyn a?’”

⁹Hazèl ɨ se sɨ ndù ɨ beʼi ɨ̀fwo atû kàmêlsɨ̀ mɨ̀vɨm ɨ̀n kæ̀ a ghɨ ɨ̀fwo ɨ jûŋ vzɨ̀ a wu n-ghɨ a Dàmaskùs. Wu n-ndù ɨ zɨ ɨ timi asɨ nɨ̀ Elishà ɨ bè na, “Ben-Hadàd ɨ wul ɨ̀ felɨnɨ nɨ̀ và ɨ fòyn Alàm tùm ma na mà gvi bɨ̀f sɨ̂ và na a wu ti n-làlì sɨ ɨkuyn ikoʼi nɨ̀ ŋweyn a?”

¹⁰Elishà ɨ bèynsɨ̀ ɨ bè na, “Ndu bè sɨ̂ ŋweyn na, ‘Samoʼ wa n-to a.’ Mɨtì Bôbo Fɨyini dyeyn meyn sɨ̂ mà na wu n-kfɨ-a.” ¹¹Wu n-taŋi tî ɨ nà sɨ dûŋ ki Hazèl kɨ̀ isɨ, wu nà sɨ wulɨ-à. Wu n-se sɨ wul ɨ tî, Elishà ɨ wùl ɨ̀ Fɨyini ɨ zɨ̀tɨ̀ ɨ nà sɨ dzɨ-à.

¹²Hazèl ɨ bɨf sɨ̂ ŋweyn na, “Wà n-dzɨ̂ ghà a bô?”

Elishà ɨ bè na, “Mɨ n-dzɨ̂ bòm ta mɨ n-kya ngeʼ zɨ̀ a ka wà fu sɨ̂ ghelɨ Isìlæ̀. Wa nì nyôʼ ntèʼsɨ àŋena sìsɨ̀ a ghɨ bàʼlɨ̀ mbàynsɨ̀ jɨ̀ŋ kal ɨ̀ zuètɨ ngvâʼ wùl nɨ̀ àŋena iwòŋ, ɨ̀ lì woyn àŋena màʼ a nse gvàsɨ̀ ɨ̀tu àŋena, ɨ̀ ghàytɨ ghɨ̀ na woyn mɨ̂lɨ̀ ɨ̀ zuètɨ bàʼsɨ kɨ nɨ̀ woyn ghì a ghɨ n-ghɨ a àŋena mɨ̂lɨ̀.”

¹³Hazèl ɨ bèynsɨ̀ ɨ bè na, “A bɨ̂ kùkù ta ma ɨ wul ɨ̀ felɨnɨ nɨ̀ và ti kàʼ a wù mom ìnkì iwo yi bem tèyn a?”

Elishà ɨ bè na, “Bôbo Fɨyini dyêyn meyn sɨ̂ mà na wa n-koʼ ɨ̀fôyn a Alàm.”

¹⁴Wu n-bè tî Hazèl ɨ lù ɨ kasi ndu yeyn bò ìfèl nɨ̀ ŋweyn. Ben-hadàd bɨf sɨ̂ ŋweyn na Elishà nì bè na gha sɨ̂ ŋweyn a, wu bè na, “Wù nì bè sɨ̂ mà na wa n-to.” ¹⁵Ɨtuʼ layn Hazèl ɨ lì tawùlà ɨ chfɨ̀ a mu ɨ chɨl ikêʼ i fòyn ateyn wu kfɨ, Hazèl ɨ lì àlêʼ a ŋweyn sɨ a fòyn.

Jèholàm ɨ koʼ ɨfôyn a Judà

¹⁶À nà n-ghɨ ta Jolàm ɨ wâyn Ahàb sàʼ Isìlæ̀ sɨ a bèŋsɨ̀ tâyn, Jèhoshafàt ɨ wâyn Jèholàm ɨ koʼ ɨfôyn a judà. ¹⁷Jèholàm nɨn læ koʼ ɨfôyn a Judà, ghɨ bèŋ mɨ̀vɨm ɨ̀n tal nɨ̀ bèŋsɨ̀ bò ɨ saʼ Jèlusalèm sɨ a bèŋsɨ̀ nfama. ¹⁸Wu n-saʼ kɨ ta tɨfôyn tɨ Isìlæ̀tɨ nà n-saʼ, nî àwo a bɨ-a kɨ̀ ta fòyn Ahàb bòm ta wu ndù wâyn ŋweyn sɨ a wi. Wù n-ni meyn mbɨ asɨ nɨ̀ Bôbo Fɨyini. ¹⁹Mɨtì Bôbo Fɨyini ɨ nà kôŋ wì sɨ bebsɨ Judà bòm wul ɨ̀ fèlɨnɨ nɨ̀ ŋweyn Devìt. Bôbo Fɨyini nà n-ghɨ ma wù læ meyn yɨ mɨkâyn ŋêyn Devìt ɨ chfɨ̀nɨ̀ na à læ̀ nà lum saʼ kɨ wâyn ŋweyn saʼ Judà nô ta ka ghɨ̀ læ̂ ghɨ̀.

²⁰À nà n-ghɨ ta Jèholàm nɨ̀n saʼ Judà, ghelɨ Edòm ɨ to nɨ̀ àtu a sɨ̂ ghelɨ Judà ɨ choʼ lèm fòyn àŋena. ²¹Fòyn Jèholàm ɨ kæ ndù a Zayì nɨ̀ mɨ̀nchaʼ mɨ̀ ìwòŋ nɨ̀ ŋweyn nô ɨ̀n jɨ̀m. Àŋena nɨn ndù tî, ghelɨ Edòm ɨ gèmtɨ̀ àŋena, a ni nà ghɨ nɨ̀ntuʼ, àŋena sòlì ɨ leʼ. ²²Ghelɨ Edòm nɨn to nɨ̀ àtu a sɨ̂ ghelɨ Judà sɨ koʼ sɨ chem layn. Ghelɨ Libnà nɨn to meyn kɨmɨ nɨ̀ àtu a sɨ̂ ghelɨ Judà ɨtuʼ nâ ghè.

²³Awo a li-a kì a kɨ n-læ gàyn ɨtuʼ ta Jèholàm nɨn saʼ nɨ̀ àwo kì a wù n-læ nì nô à jɨ̀m nɨn ghɨ ma ghɨ nyaʼ meyn a ŋwàʼlɨ̀ mɨ̂tɨtɨ̂ nɨ̀ tɨ̀fôyn tɨ Judàtɨ̀.

²⁴Jeholàm nɨn læ kfɨ ɨ kfa ndu yeyn ghɨ̀bo ŋweyn, ghɨ gvɨ̀mì a ntèʼ nɨ̀ Devìt. Wâyn ŋweyn Ahazìyà ɨ koʼ ɨfôyn.

Ahazìyà ɨ koʼ ɨfôyn a Judà

²⁵À nà n-ghɨ ta Jolàm ɨ wâyn Ahàb ɨ fòyn Isìlæ̀ saʼ Isìlæ̀ sɨ a bèŋsɨ̀ njvàsɨ̀ bò, Ahazìyà ɨ wâyn Jèholàm ɨ koʼ ɨfôyn a Judà. ²⁶Ahazìyà nɨn læ koʼ ɨfôyn a Judà ghɨ bèŋsɨ̀ mɨ̀vɨm ɨ̀m bò njvàsɨ̀ bò, ɨ saʼ Judà sɨ a bèŋ ìmòʼ, chî a Jèlusalèm. Nà Ahazìyà nà n-ghɨ Atalìyà ɨ wâyn wâyn Omlì ɨ fòyn Isìlæ̀. ²⁷Ahazìyà nɨn læ li kɨ avɨ̀ nɨ̀ ghelɨ ndo nɨ̀ Ahàb ɨ nì mbɨ asɨ nɨ̀ Bôbo Fɨyini kɨ̀ ighel ta ghelɨ ndo nɨ̀ Ahàb nɨn læ ni bòm ta wù nà n-ghɨ ma wù ndu meyn wâyn fòyn Ahàb sɨ a wi.

²⁸Ahazìyà ŋêyn Jolàm ɨ wâyn Ahàb nɨn seʼ meyn sɨ nu Hazìyèl ɨ fòyn Alàm a Lamot Gilèd, ghelɨ Alàm ɨ tɨm lemsɨ Jolàm. ²⁹Wu kasi ndù a Jezlèl na ghɨ chuʼ ɨlwemtɨ vzɨ̀ a ghɨ n-lemsɨ ŋweyn iwòŋ a Lamòt.

Ahazìyà ɨ wâyn Jèholàm ɨ fòyn Judà ɨ ndù afu sɨ toŋtɨ ŋweyn ta ghɨ tî lèmsɨ̀ ŋweyn.