2 Kings 24

⁵Awo a li-a kì a kɨ n-læ gàyn ta Jèhòyakìm nɨ̀n saʼ Judà nɨ̀ àwo kì a wù n-læ ni nô à jɨ̀m nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ fɨ̀fôyn tɨ Judàtɨ̀. ⁶Jèhòyakìm nɨn læ kfɨ ɨ kfa ndu yeyn ghɨ̀bo ŋweyn, wâyn ŋweyn Jèhòyachìn ɨ koʼ ɨfôyn.

⁷Fòyn Ijìb nɨn bu læ fi fvɨ̀ ilaʼ i ŋweyn sɨ seʼ sɨ nù iwoŋ bòm ta fòyn Babilòn nà n-ghɨ ma wù tɨm meyn yɨ̀ ɨ̀ lì ìlaʼ i ŋweyn nô ì jɨ̀m nà saʼ a, zɨ̂tɨ̀ kɨ a Ɨfyayn Ijìb sɨ ndù sɨ chem a jvâ Yuflèt.

Jèhòyachìn ɨ koʼ ɨfôyn a Judà

⁸Jèhòyachìn nɨn læ koʼ ɨfôyn a Judà ghɨ bèŋsɨ̀ njvàsɨ̀ nfama ɨ saʼ sɨ a njoŋ sɨ̀ tal chî a Jèlusalèm. Izɨyn i nà ŋweyni nà n-ghɨ Nèhushtà ɨ wâyn Elnatàn ɨ wul ɨ̀ Jèlusalèm. ⁹Wù n-læ meyn nì mbɨ asɨ nɨ̀ Bôbo Fɨyini kɨ̀ ta bò ŋweyn nɨn læ nì.

¹⁰À nà n-ghɨ ɨtuʼ ta fòyn Jèhòyachìn nɨn saʼ Judà, sugèyʼsɨ Nèbùkànezà ɨ fòyn Babilòn ɨ ndù sɨ nu Jèlusalèm ɨ gèmtɨ̀ ntèʼ àteyn. ¹¹À nà n-ghɨ ta àŋena nɨn gêmtɨ̀ ntèʼ Jèlusalèm, Nebùkànezà nɨ̀ ngêŋ ŋweyn ɨ koʼ afu. ¹²Jèhòyachìn ɨ fòyn Judà ŋêyn nà ŋweyn nɨ̀ nchìsɨ ŋweynsɨ nɨ̀ chyeʼsɨ ŋweynsɨ baʼsɨ̂ nɨ̀ sugèyʼsɨ ŋweynsɨ ɨ fvɨ ndu fu ngeŋsɨ àŋena sɨ̂ fòyn Babilòn.

À nà n-ghɨ a bèŋsɨ̀ nfama ta Nèbùkànezà nɨn saʼ Babilòn, wu ghal ɨ fò Jèhòyachìn a ndô nchaʼ. ¹³Nèbùkanezà nɨ̀n li meyn ɨ̀fwo ɨ jûŋ vzɨ̀ a wu nà n-ghɨ a ndo nɨ̀ Bôbo Fɨyini nô ɨ̀ jɨ̀m nɨ̀ ɨvzɨ̂ a wu nà n-ghɨ a ntoʼ ɨ ndù nɨ̀ ɨ̀ŋweyn a Babilòn. Wù n-li meyn lu kɨmɨ nɨ̀ ɨ̀fwo vzɨ̀ nô ɨ̀ jɨ̀m a fòyn Sòlomòn nɨn læ faytɨ nɨ̀ aso ɨkwo a baŋnɨ-a ɨ lèm a ndo nɨ̀ Bôbo Fɨyini kɨ̀ ighel ta Bôbo Fɨyini nɨn læ bè. ¹⁴Wu n-læ meyn ghaytɨ ɨ lù nɨ̀ ghelɨ Jèlusalèm nô ghɨ̀ jɨ̀m ma à ti nchìsɨ ntoʼ nɨ̀ sugèyʼsɨ̀ nɨ̀ ghelɨ ghì a ghɨ n-kya sɨ fèl ɨfwo nɨ̀ ɨ̀wu nô ghɨ̀ jɨ̀m nɨ̀ ɨghî a ghɨ ntsɨ alâm. Wù n-læ chɨ̀yntɨ̀ ghaytɨ ɨ lù nɨ̀ ghelɨ nkamsɨ ìvɨm a faŋ kɨ ghelɨ ànfɨf a ntèʼ nâ ghè.

¹⁵Nèbùkànezà nɨ̂n ghal meyn ɨ ndù nɨ̀ Jèhòyachìn a Babilòn. Wu n-ghal meyn ɨ lu kɨmɨ nɨ̀ nàfòyn nɨ̀ ghɨ̀ki ntoʼ nɨ̀ ghelɨ ghɨ felɨnɨ nɨ̀ ghelɨ ghɨ tisɨnɨ ghì a ghɨ nà n-ghɨ a Jèlusalèm ɨ ndù nɨ̀ àŋena a Babilòn. ¹⁶Fòyn Babilòn nɨn ghaytɨ meyn ndu kɨmɨ nɨ̀ sugèyʼsɨ Jèlusalèmsɨ̀ nô sɨ̀ jɨ̀m a Babilòn. Sɨ nà n-chɨ̂yntɨ̀ ghɨ nkamsɨ nsòmbo, to kfeynɨ̂ sɨ nù iwoŋ baʼsɨ̂ nɨ̀ ghelɨ ghì a ghɨ n-kya sɨ fèl ɨfwo nɨ̀ ɨ̀wu nkam nɨ̀ ɨghî a ghɨ ntsɨ alâm. ¹⁷Nèbùkànezà nɨn su meyn Jèhòyachìn ɨ lèm Màtànayà ɨ wâyn nà bò Jèhòyachìn sɨ a fòyn ɨ kfɨnɨ ìzɨyn i ŋweyni ɨ fu Zèdèkayà.

Zèdèkayà ɨ koʼ ɨfôyn a Judà.

¹⁸Zèdèkayà nɨn læ koʼ ɨfôyn a Judà ghɨ bèŋsɨ̀ mɨ̀vɨm ɨ̀m bò . Wù n-læ saʼ sɨ a bèŋ chî a Jèlusalèm. Iziyn i nà ŋweyni nà n-ghɨ Hàmutàl ɨ wâyn Jèlìmayà ɨ wul ɨ̀ Libnà. ¹⁹Wù n-ni meyn mbɨ asɨ nɨ̀ Bôbo Fɨyini kɨ̀ ta bò ŋweyn Jèhòyakìm nɨn læ nì. ²⁰Bôbo Fɨyini nɨn beyn meyn jɨm sɨ̂ ghelɨ Jèlusalèm ŋêyn ghelɨ Judà nô ghɨ̀ jɨ̀m ɨ sàŋ àŋena sɨ a ŋweyn asɨ bòm ta wù n-nyoʼsɨ meyn ɨ̀toŋ sɨ̂ àŋena.

Ghɨ bebsɨ Jèlusalèm

Zèdèkayà nɨn læ meyn dyèyn àtu a tonɨ-a sɨ̂ fòyn Babilòn.