2 Kings 20

Ikoʼi i bemnɨ-i ɨ ku fòyn Hèzèkayà

¹À n-læ nà ghɨ a mɨchi nâ ghè, ikoʼi i bemnɨ-i i li ɨ ku fòyn Hèzèkayà wu nà ndû sɨ kfɨ. Nfèʼtɨ̀ i ghaʼnɨ ɨ Isayà ɨ wâyn Amòz ɨ ndù sɨ mùtɨ ŋweyn ɨ bè na, Bôbo Fɨyini bè na, “Tef ikfɨ ì zæ bòm ta wa n-to wi, wa n-kfɨ-a.”

²Hèzèkayà ɨ bèynsɨ̀ ɨ̀wuyn ɨ nà ki ndù nɨ̀ ìbam i ɨkuyn i ɨ jèm ɨ bè sɨ̂ Bôbo Fɨyini na, ³“Bôbo Fɨyini, ka wa n-lèsɨ̀ na ma ti meyn nà yvɨnɨ̂ và, fèlɨ̀ sɨ̂ và kɨ nɨ̀ àtem à kema à jɨ̀mà nî kɨ àwo kì a kɨ n-ghɨ àtì-ati asɨ nɨ̀ và.” Wu n-jèm tî ɨ dzɨ̀ nô sɨ a ŋaŋ.

⁴Isayà ɨ lù ɨ nà bu duʼ tɨ̀ fvɨ̀ sɨ mèsì ɨwe ntoʼ Bôbo Fɨyini ɨ bè sɨ̂ ŋweyn na, ⁵“Kasi ɨ ndu bè sɨ̂ Hèzèkayà ɨ wul ɨ vzɨ̀ a wù n-tisɨ ghelɨ̀ ghem na, ‘Bôbo Fɨyini, ɨ Fɨyini fɨ bòbò vâ Devìt bè na, ma yvɨ meyn ìjêm ì zæ, mɨ n-chuʼ và. À læ̀ na ghɨ ɨlvɨ a chwò a libɨs a wà koʼ a ndô Fɨyini kɨ̀ nô sɨ a wa ngeŋ. ⁶Mɨ n-kfeynsɨ̂ bèŋsɨ̀ njvàsɨ̀ tâyn a mɨchi nɨ̀ và. Mɨ nì fvɨsɨ̀ và ɨ̀ fvɨ̀sɨ̀ ntèʼ yêyn sɨ a awu nɨ̀ fòyn Asilìyà. Mɨ nì kɨ̂ŋtɨ̀ ntèʼ yèyn bòm wul ɨ vzɨ̀ a mɨ n-ghɨ ɨ̀ŋweyn, ɨ̀ kɨ̀ŋtɨ̀ bòm wùl ɨ̀ felɨnɨ nɨ̀ mà Devìt.’”

⁷Isayà ɨ kæ bè sɨ̂ ghelɨ ghɨ felɨnɨ nɨ̀ fòyn na ghɨ ndu kœ̀tɨ̀ gvì nɨ̀ fîksɨ̀ ɨ̀ gvà. Àŋena ndu kœ̀tɨ̀ ɨ gvà ɨ yoʼtɨ a fɨmɨ afî a fɨ n-koʼ Hèzèkayà wu to.

⁸À nà n-ghɨ tì ma Hèzèkayà bɨfɨ meyn sɨ̂ Isayà na, “A n-dyêyn ghà na Bôbo Fɨyini nɨn chuʼ mà a mà koʼ a ŋweyn a ndo ɨlvɨ a chwo libɨs a?”

⁹Isayà ɨ bèynsɨ̀ ɨ bè na, “Ɨyêyn nɨn ghɨ nchwæ sɨ dyèyn na Bôbo Fɨyini nɨn nì ìwo zɨ̀ a wù chfɨ̀nɨ̀: Wà n-kɨŋ na Bôbo Fɨyini ni alɨŋsɨ a chue-à yaʼi mbaŋisɨ ìvɨm ndù asɨ ma kɨ yaʼi gvì ibàm a?”

¹⁰Hèzèkayà ɨ bè na, “Yi n-boynɨ̂ kɨ tèyn ta alɨŋsɨ a chue-a yaʼi mbaŋisɨ ìvɨm ndù asɨ, kwo ni kɨ yaʼi gvì dzɨ a ibàm.”

¹¹Nfèʼtɨ̀ Isayà ɨ jèm, Bôbo Fɨyini ɨ nì alɨŋsɨ a chuê ateyn a ɨ kasi ibàm ɨ koʼ mbaŋisɨ ìvɨm ichfɨ ndo nɨ̀ fòyn Ahàz.

Fòyn Babilòn ɨ tum ghelɨ sɨ̂ Hèzèkayà.

¹²À nà n-ghɨ a mɨchi nâ ghè, Melodak-Baladàn ɨ wâyn Baladàn ɨ fòyn Babilòn ɨ tum ŋwàʼlɨ̀ nɨ̀ ɨ̀fwo sɨ̂ fòyn Hèzèkayà. À nà n-ghɨ tì ma wù yvɨ meyn na Hèzèkayà nɨn koʼi à. ¹³Hèzèkayà ɨ fsɨsɨ àŋena ɨ dyèyntɨ kal nɨ̀ ɨ̀fwo vzɨ̀ nô ɨ̀ jɨ̀m a wu nà n-ghɨ ɨlwèʼ ghè a ghɨ n-lêm ɨfwo ateyn a ntoʼ. Ɨfwo ateyn nà n-ghɨ àso ɨkwo a fɨfâ nɨ̀ àso ɨkwo a baŋnɨ-a nɨ̀ ɨ̀fwo ɨ lɨmtɨnɨ nɨ̀ mɨ̀vɨ̂l ɨ̀n jùŋ nɨ̀ ɨ̀fwo iwòŋ baʼsɨ̂ nô mɨ nɨ̀ ghà vzɨ̂ a kɨ nà n-ghɨ ɨlwèʼ ghè a ghɨ nà n-lêm ighaʼ ateyn. Hèzèkayà nɨn læ meyn dyèyn nô mɨ ghà a ŋweyn ilaʼ kèsa a ŋweyn a ntoʼ sɨ̂ àŋena.

¹⁴Isayà ɨ nfèʼtɨ̀ ì ghaʼnɨ ɨ ndu yeyn fòyn Hèzèkayà ɨ bɨf sɨ̂ ŋweyn na, “Ghelɨ ghèyn lù wo? Àŋena gvì bè na gha sɨ̂ và a?”

Hèzèkayà ɨ bèynsɨ̀ ɨ bè na, “Àŋena lù nô a ndyèyn a Babilòn.”

¹⁵Nfèʼtɨ̀ Isayà ɨ bɨf na, “Àŋena nì yèyn gha a wa ntoʼ a?” Hèzèkayà ɨ bèynsɨ̀ ɨ bè na, “Àŋena ni meyn yèyn nô mɨ ghà a ma ntoʼ. Ma dyêyn meyn ìghaʼ ì yemi sɨ àŋena nô ì jɨ̀m.”

¹⁶Isayà ɨ kæ be sɨ̂ Hèzèkayà na, “Yvɨ iwo zɨ̀ a Bôbo Fɨyini bè: ¹⁷Wa kya samoʼ na mɨ̀chi nɨn koʼ gvi-à ta ka ghɨ li lù nô mɨ nɨ̀ ghà a wa ntoʼ. Ghɨ nì lî baʼsɨ̂ nô mɨ nɨ̀ ghà ta ghɨ̀bo gha tî lèm koʼ sɨ chem lvɨ̂yn ɨ̀ ndù nɨ̀ ɨ̀ŋweyn a Babilòn. Ghɨ n-lì-à ɨ̀ faŋ tɨ̀ vìsi nô àfo, à bè Bôbo Fɨyini. ¹⁸Ghɨ nì lî ndû nɨ̀ woyn ghɨ lûmnɨ̀ nɨ̀ và ghɨ li a Babilòn, ɨ woyn ma à bzɨ kɨ̀ nô và ɨ̀ wùmsɨ àŋena a àŋena na felɨ̀ àkôs sɨ̂ fòyn Babilòn.”

¹⁹Hèzèkayà ɨ bèynsɨ̀ ɨ bè na, “Iwo nâ yèynì a Bôbo Fɨyini tum wà gvî bè sɨ̂ mà nɨn jofà.” Hèzèkayà nɨn læ bè tî bòm ta wù n-læ kfàʼtɨ kɨ sɨ a ŋweyn a ngeŋ na, “Mbôynɨ̀ na ghɨ a mɨchi ghè a mɨ n-saʼ, a nô ìwo i bzɨ-i faŋ tɨ̀ gayn sɨ̂ wùl.”

²⁰Awo a li-a kì a kɨ n-læ gàyn ta fòyn Hèzèkayà nà n-saʼ nɨ̀ tɨ̀woŋ tìtɨ̀ a sugèyʼ sɨ ŋweynsɨ nɨn læ tɨm yɨ nɨ̀ jvà zɨ̀ a wù n-læ kuʼ ɨ bɨ̀sɨ̀, mû ɨ zɨ a ntèʼ nɨn ghɨ ma ghɨ nyaʼ meyn a ŋwàʼlɨ̀ mɨ̀tɨtɨ̂ nɨ̀ tɨ̀fôyn tɨ Judàtɨ̀. ²¹Hèzèkayà nɨn læ kfɨ ɨ kfa ndu yeyn ghɨ̀bo ŋweyn, wâyn ŋweyn Mànasè ɨ koʼ ɨfôyn.