2 Chronicles 4

Fòyn Sòlomòn ɨ faytɨ ɨ̀fwo vzɨ̀ a ka wu na ghɨ a ndô Fɨyini

¹Fòyn Sòlomòn nɨ̀n læ meyn faytɨ àbaŋ ifu nɨ̀ ìdyayni kɨ dyefɨ̀ chem ndû ntàmsɨ̀ bulamòʼ ghaʼ chem ndû kɨmɨ ntàmsɨ̀ bulamòʼ, njetɨ̂ chem ntàmsɨ̀ kæ̀ nɨ̀ àbeʼa. ²Wù n-faytɨ meyn afo a mu a ghaʼnɨ-a nɨ̀ ìdyani ghɨ toŋtɨ̂ na jvâ ìghaʼnɨ kɨ sœ̂ chem ntàmsɨ̀ kæ̀ nɨ̀ àbeʼa, njetɨ̂ chwô ntàmsɨ̀ bò, ma ghɨ fèʼ jɨ̀ŋ kàli a à na ghɨ ntàmsɨ̀ njvàsɨ̀ tal nɨ̀ àbeʼa. ³Wù læ meyn nyòʼtɨ̀ ɨ kal nɨ̀ ɨ̀wuyn afo a mu nâ ki mbaŋi sɨ̀ bò nɨ̀ ɨ̀nfyèʼsɨ̀ ɨ nyamsɨ mbòloʼ sɨ lûmnɨ̀sɨ̀.

⁴Afo a mu nâ kì nâ n-ti atû ɨ̀nfyèʼsɨ nyamsɨ mbòloʼ jvàsɨ bò, ɨ̀twal ɨ ki ndûsɨ̀ nɨ̀ àbâs ikuè-à, ɨ̀twal ɨ ki ndûsɨ̀ nɨ̀ àbâs kì a ɨchfɨ̂ iyvɨ-i nɨn sal ateyn, ɨ̀twal ɨ ki ndûsɨ̀ nɨ̀ àbâs itsɨyna ɨlvɨ ɨ ki ndûsɨ̀ nɨ̀ àbâs kì a ɨchfɨ̂ iyvɨ i nɨn sœ ateyn kɨ̀mɨ ɨ̀twal. Ànkùyn ateyna nà chɨ̂yntɨ̀ ghɨ kɨ isas i afo a mu nâ ghè. ⁵Ɨchfɨ̂ afo a mu nâ kì nà n-ghɨ ta àmbùs, mu ɨ ghɨ ateyn chem ndû litàsɨ̀ nkam mɨ̀vɨm ntufa njvàsɨ̀ ntufa.

⁶Wu n-faytɨ meyn ɨ̀kfaŋ ìvɨm ta ka ghɨ na sû ɨ̀fwo ateyn ɨ tom ɨ̀twâyn abàs ɨkœ ɨtwo ɨ tom ɨlvɨ abàs ɨkœ nɨ̂n kœ̀ ɨchfɨ ndô nɨ̀ Bôbo Fɨyini. Ghɨ nà n-sû ɨ̀fwo vzɨ̀ a ghɨ n-we tɨfutɨ nyoʼnɨtɨ ateyn mɨtì ngàŋsɨ ndô Fɨyinisɨ̀ ɨ sû ɨ̀wuyn aŋena nɨ̀ mu mzɨ̀ afo a mu afî a ghɨ n-toŋtɨ na jvâ ìghanɨ tî.

⁷Wù n-læ meyn faytɨ ɨ̀fwo vzɨ̀ a ghɨ n-tomtɨ lâmsɨ̀ atû àteyn ìvɨm nɨ̀ àso ɨkwo abaŋnɨ-a, kɨ̀ ighel ta isaʼ nɨn dyêyn. Wu n-tòmtɨ ɨ̀twâyn abàs itsɨyn ɨ tomtɨ kɨmɨ ɨ̀twâyn abàs ikuè.

⁸Wù n-faytɨ meyn ɨ̀bwaŋ ìvɨm ɨ tomtɨ a ndô Fɨyini. Wu n-tomtɨ ɨ̀twâyn ɨkœ ɨtwo ɨ tomtɨ ɨ̀twâyn ɨkœ nɨ̂n kœ̀. Wu n-faytɨ meyn kɨmɨ ɨ̀kfaŋ ɨvɨ nɨ̀ àso ɨkwo abaŋnɨ-a. Ɨkfaŋ nâ weyn nà ghɨ ɨ̀kfaŋ vzɨ̀ a ghɨ nà we mɨluŋ mɨ̀ tɨ̀fu ateyn mɨsì-a.

⁹Wù n-bàʼlɨ meyn ɨ̀we ngàŋsɨ ndô Fɨyini antêynɨ̀, ɨ baʼlɨ kɨmɨ ɨ̀we ɨ ghaʼnɨ abe ɨ we àchfɨ̂ ateyna ma wù lom nɨ̀ ìdyayni. ¹⁰Fòyn Sòlomòn nɨ̀n lêm meyn àfo a mu kì a n-ghɨ toŋtɨ na jvâ ìghaʼnɨ tì abàs itsɨyn abàs ghè a ɨchfɨ̂ iyvɨ-i nɨn sal ateyn.

¹¹Wù n-faytɨ meyn ntòynsɨ̀ nɨ̀ fɨsɨ àtì-ati baʼsɨ̂ nɨ̀ ɨ̀kfaŋ vzɨ̀ a ka ghɨ nà wê mɨluŋ mɨ̀ tɨfu ateyn ghɨ nà mɨsì-à. Hulàm nɨ̀n læ meyn mèsi ifêl zɨ̀ a wu n-chfɨ̀nɨ sɨ̂ fòyn Sòlomòn sɨ nì /na wu ni a ndô Fɨyini:

¹²Hulàm nɨ̀n fàytɨ ɨtôʼ ɨ̀ bwò nɨ̀ ɨ̀tu ateyn wu ghɨ ta ɨbyalì, ɨ faytɨ nchaʼsɨ sisɨ̀ a ghɨ nyòtɨ̀ ateyn, ¹³ɨ faytɨ ɨ̀fwo wu fɨsɨ̂ mɨtam mɨ̀ bòmenglanèt ighɨ ì kæ̀ mbaŋi sɨ̀ bò sɨ nyòtɨ ɨtu ɨtòʼ vzɨ̀ a wu n-ghɨ ta ɨbyalì tì ateyn. ¹⁴Wù n-faytɨ meyn ɨ̀kfaŋ ɨ ghaʼlɨnɨ ɨ faytɨ ɨ̀fwo vzɨ̀ a ka ghɨ na tomtɨ̂ ɨ̀kfaŋ atû àteyn, ¹⁵wu n-faytɨ ɨ̀fyeʼsɨ̀ nyamsɨ mbòloʼ sɨlûmnɨ̀sɨ̀ njvàsɨ̀ bò ɨ faytɨ kɨmɨ àfo a mu a ghaʼnɨ-a kì a ghɨ toŋtɨ na jvâ ìghaʼnɨ tî ɨ tom atû ateyn. ¹⁶Wu n-faytɨ meyn ntòynsɨ̀ nɨ̀ fɨsɨ àtì-ati sɨ, kɨmɨ nɨ̀ ɨ̀ntwàs vzɨ̀ a ghɨ n-chuʼ njwò ateyn baʼsɨ̂ nô mɨ nɨ̀ ghà ta ghɨ fêlɨ̀ nɨn ɨ̀ŋweyn a ndô Fɨyini.

Ɨfwo nâ wèyn a Hulàm nɨn læ faytɨ nô ɨ̀jɨ̀m na fòyn Sòlomòn lem a ndô Bôbo Fɨyini nà n-ghɨ ma ghɨ faytɨ nɨ̀ ìdyayni ɨ̀ fàytɨ tsɨ̀sɨ. ¹⁷Fòyn Sòlomòn nɨ̀n læ bè ghɨ buŋsɨ ìdyayn ateyn ɨ̀ nà sfɨs a tɨbɨtɨ achaʼ a ntòynsɨ̀ a nse, ibal a i Jodàn ighami i sukòt nɨ̀ Zaletàn. ¹⁸Ɨfwo nâ wèyn a fòyn Sòlomòn nɨn læ bè ghɨ faytɨ nà n-dvɨ̂ kɨ tèyn ma ghɨ kàʼ ghɨ bû kèli na idyayn zɨ̀ a ghɨ chɨ̀yntɨ̀ fàytɨ ɨfwo nâ wèyn ateyn nɨn dɨlɨ̀ chem ti-a.

¹⁹Fòyn Sòlomòn nɨ̀n faytɨ meyn ɨ̀fwo vzɨ̀ a wu nà n-ghɨ a ndô nɨ̀ Bôbo Fɨyini.

Wù n-faytɨ meyn àbaŋ ifu nɨ̀ àso ɨkwo a baŋnɨ-a, ɨ faytɨ àbaŋ kì a ghɨ n-tom abayn alaynɨ-a atû ateyn. ²⁰Wù n-faytɨ meyn ɨ̀fwo vzɨ̀ a ghɨ n-tomtɨ lâmsɨ atû àteyn nɨ̀ àso ɨkwo a baŋnɨ-a kɨ kelɨ wi ilɨŋ, ɨ faytɨ kɨmɨ lâm sìsɨ̀ a sɨ n-ti atû àteyn ta ka ghɨ na nyòʼ alèʼ ghè a kɨ layn gòʼsɨ̀ a ndô Fɨyini kɨ̀ ighel ta isaʼi nɨn dyèyn, ²¹ɨ faytɨ ɨ̀fwo wu n-ghɨ tèyn ta àmbùs baʼsɨ̂ nɨ̀ ɨ̀nfal ɨvɨ̀sɨ nɨ̀ àso ɨkwo a baŋnɨ-a kɨ kelɨ wi ilɨŋ. ²²Wù n-faytɨ meyn kɨmɨ àfo kì a ghɨ bâʼ lisì abvɨ ateyn a kfɨ̀sɨ lâm nɨ̀ ɨ̀kfaŋ vzɨ̀ a ghɨ we ɨfwo musɨ ateyn ghɨ nà mɨsi-a baʼsɨ̂ nɨ̀ ɨ̀kfaŋ vzɨ̀ a ghɨ n-nyôʼ ileŋʼ nɨ̀ ɨvɨ̂ a ghɨ n-myêl ɨkfêtɨ̀ ɨvɨ̀s ateyn. Wù n-læ faytɨ ɨfwo nâ wèyn nô ɨ̀ jɨ̀m kɨ nɨ̀ àso ɨkwo a baŋnɨ-a kɨ kelɨ wi ilɨŋ. Wu n-faytɨ achfɨ̂ a ndosɨ kì a kɨ zɨ alèʼ alaynɨ-a nɨ̀ achfɨ̂ kì a kɨ zɨ a ndô Fɨyini kɨmɨ nɨ̀ àso ɨkwo abaŋnɨ-a.