2 Chronicles 31
Hèzèkayà ɨ kasi baʼtɨ àwo kûm ìkoʼsɨ i Bôbo
1A nà n-ghɨ ta ghɨ yɨ mèsì ayɨ i yaʼsɨ, ghelɨ Isìlæ̀ ghì a ghɨ nà n-ghɨ a Jèlusalèm ɨ fvɨ̀ ɨ jèlɨ̀ ntèʼsɨ Judà ɨ bɨ̀ytɨ̀/zuelɨ ngòʼ sìsɨ̀ a sɨ nà n-ghɨ ɨlwèʼ ɨ mɨyìnì ɨ kòs ɨ̀tôʼ vzɨ̀ a Ashelà, ɨ Fɨyini fɨ kifɨ nɨn ti atu àteyn. Àŋena nɨn bebsɨ meyn ɨ̀lwêʼ vzɨ̀ a ghɨ nà n-koʼsɨ nɨ̀ ɨ̀bwaŋ ateyn a Judà nɨ̀ Eflèm nɨ̀ Mànasè kɨ ɨ̀ jɨ̀m. Àŋena nɨn bebsɨ mèsi, ɨ kfa sɨ a àŋena ntèʼsɨ ɨ ndù a àŋena mɨbè.
2Fòyn Hèzèkayà nɨn choʼtɨ meyn ngàŋsɨ ndô Fɨyini nɨ̀ ghelɨ Levì na àŋena na tisɨ̂ ìnôyn i ghêl nô mɨ̀ ɨ̀kfà ɨ tisɨ̂ kɨ ta ifêl i ŋweyni nɨn ghɨ ta ngàŋ ndô Fɨyini kèsa ta wul ɨ̀ ndo nɨ̀ Levì. Àŋena nà n-nyôʼ tɨ̀fu tɨ nyoʼnɨtɨ, fu tɨ̀fu sɨ nà chi nɨ̀ mbôynɨ̀, fêʼtɨ̀ ìwo i Fɨyini, fu àyòŋnɨ̀ fî yem njàŋsɨ̀ koʼsɨ̂ Bôbo ɨchfɨ mbàyn ndo nɨ̀ Fɨyini fɨ. 3Fòyn Hèzèkayà nɨn fu meyn nyam ìfu ì nyoʼnɨ zɨ̀ a ghɨ nà n-fu nɨ̀ bɨsì bɨsì nɨ̀ ɨzɨ̂ a ghɨ n-fu aleŋ ɨlvɨ ikfa ma wù fvɨ̀sɨ̀ antêynɨ̀ nyamsɨ nɨ̀ ŋweyn, ɨ fu kɨmɨ ɨ sîsɨ̀ a ghɨ n-nyôʼ achi ɨtuʼ ilaʼ, nɨ̀ ɨ sîsɨ̀ a ghɨ n-fu ɨchfɨ njoŋ ifɨ nɨ̀ ɨ sîsɨ̀ a ghɨ n-fu a mɨchi mɨ̀ àyɨ ɨ̀n lì kɨ̀ ighel ta ghɨ n-læ nyàʼ a ŋwàʼlɨ̀ ìsaʼ nɨ̀ Bôbo Fɨyini. 4Wu n-læ meyn be kɨmɨ sɨ̂ ghelɨ ghì a ghɨ n-chi a Jèlusalèm na àŋena na gvî nɨ̀ ɨ̀fwo vzɨ̀ a isaʼi nɨn dyêyn na à n-kelɨ ngàŋsɨ ndô Fɨyini nɨ̀ ɨvzɨ̂ a à n-kelɨ ghelɨ ndo nɨ̀ Levì ta ka àŋena fu ngeŋsɨ àŋena nà nî ìwo zɨ̀ a isaʼi Bôbo Fɨyini nɨn bê. 5Ghelɨ Isìlæ̀ nɨn yvɨ iwo ateyn mɨlvɨ gha ifu i mɨtam mɨ̀ àsɨ nɨ̀ àŋena, nɨ̀ mɨ̀lùʼ mɨ̀ àsɨ, nɨ̀ mɨ̀vɨl ɨ̂n fɨ baʼsɨ̂ nô mɨ nɨ̀ ghà vzɨ̂ a kɨ nkoʼ a gvêyn. Àŋena nɨn fu ifu nâ yèynì ghêʼnɨ̀ wì ɨfwo ateyn dvɨ-a, a ghɨ àfo àmòʼ àmòʼ antêynɨ̀ ɨ̀fwo ìvɨm ìvɨm. 6Ghɨ̀lûnɨ̀ ghì a ghɨ nà n-chi a ntèʼsɨ Judà a ghɨ ghelɨ Isìlæ̀ ma ghɨ kàlì abàs ikuè ma ghelɨ Judà nɨn fu meyn nyam mbòloʼ ì moʼ ìmòʼ antêynɨ̀ nyamsɨ mbòloʼ ìvɨm nɨ̀ bzɨ ì moʼ ìmòʼ antêynɨ̀ bzɨsɨ ìvɨm nɨ̀ ifu i afo àmòʼ ɨfwo ghè a wu n-ghɨ sɨ a nyɨŋ sɨ̂ Bôbo Fɨyini ɨ Fɨyini fɨ àŋena fɨ. Ghɨ n-læ fu ɨfwo ateyn ghɨ yvɨ̀ŋtɨ̀ a ntuʼsɨ a ntuʼsɨ. 7Àŋena nɨn zɨ̀tɨ sɨ fu ɨfwo nâ wèyn a njoŋsɨ̀ tal ɨ mèsì a njoŋsɨ nsòmbo. 8A nà n-ghɨ ta Hèzèkayà ŋêyn ghelɨ ghɨ tisɨnɨ nɨ̀ ŋweyn gvì yeyn ɨfwo nâ wèyn a ntuʼsɨ àŋena bemsɨ Bôbo Fɨyini ɨ boysɨ ghelɨ ŋweyn.
9Hèzèkayà ɨ bɨf sɨ̂ ngàŋsɨ ndô Fɨyini nɨ̀ ghelɨ ndo nɨ̀ Levì na ɨfwo wèyn lù wo? 10Wu n-bɨf tî Azalìyà ɨ ngàŋ ndô Fɨyini i ngaŋtɨnɨ a ghɨ wâyn Zadòk ɨ bèynsɨ̀ ɨ bè na nô ta ghɨ zɨ̀tɨ̀ sɨ gvi nɨ̀ ìfu i àŋena a ndo nɨ̀ Bôbo Fɨyini ghès nɨn kelɨ ɨ̀fwo ɨ yɨnɨ sɨ yɨ kfeyn kɨ ta ghès nɨn kôŋ, wu bɨsɨ-à dvɨ-à bòm ta Fɨyini fɨ bòysɨ meyn ghelɨ ŋweyn.
11Hèzèkayà ɨ bè na ghɨ baʼlɨ ɨlwêʼ vzɨ̀ a ghɨ n-lêm ɨfwo ateyn a ndo nɨ̀ Bôbo Fɨyini, ghɨ bàʼlɨ̀, 12ɨ lèm ìfu afo à moʼ àmòʼ nɨ̀ ìfu i sɨ a nyɨŋ sɨ̂ Bôbo Fɨyini ateyn, kɨ̀ ighel ta ghɨ n-bè. Ghɨ n-læ lèm ɨfwo ateyn ɨ choʼ Kònànayà ɨ wul ɨ̀ ndo nɨ̀ Levì na wù na tisɨ̂ àwo kûm ɨ̀fwo ateyn, ɨ lèm wâynà ŋweyn Shimè na wù na ghɨ ànkùmtɨ̀ a ŋweyn. 13Ghelɨ ghì a ghɨ n-kini ɨfwo ateyn isas i saʼ nɨ̀ àŋena nà n-ghɨ Jehìyèl nɨ̀ Azàzayà nɨ̀ Nahàt nɨ̀ Asahèl nɨ̀ Jelimòt nɨ̀ Jozabàt nɨ̀ Elìyèl nɨ̀ Ismakìyà nɨ̀ Mahàt kɨ̀mɨ nɨ̀ Bènanayà.
14Kolè ɨ wâyn Imnà ɨ wul ɨ̀ Levì vzɨ̀ a wu nà n-chi ɨchfɨ mbàyn ghè a wu nà n-ghɨ abàs ghè a ɨchfɨ iyvɨ i nɨn sal ateyn nà n-tisɨ̂ ìfu zɨ̀ a wùl nɨ̀n nchoʼnɨ sɨ fu sɨ a ŋweyn a ngeŋ sɨ̂ Fɨyini fɨ. Wu nà n-gwôtɨ̀ ìfu ateyni kɨ̀mɨ nɨ̀ ìfu-i sɨ a nyɨŋ zɨ̀ a ghɨ n-fu sɨ̂ Bôbo. 15A nà n-ghɨ a ntèʼ sɨ lisɨ ghê a ngàŋsɨ ndô Fɨyinisɨ nà n-chi ateyn, Edèn nɨ̀ Mìnìyamìn nɨ̀ Jeshùwà nɨ̀ Shèmayà nɨ̀ Amalìyà kɨ̀mɨ nɨ̀ Shèkànayà nà n-gâmtɨ̀ ŋweyn nɨ̀ àtem a àŋena à jɨ̀mà sɨ gwòtɨ ɨfwo ateyn.
16Àŋena nɨn gwòtɨ ɨfwo ateyn sɨ̂ ghɨ̀lûnɨ̀ ghî a ghɨ nà n-ghɨ bèŋsɨ̀ tal sɨ ndù asɨ kɨ̀ ta ghɨ n-nyàʼ azɨyn a àŋena asas a ndo asas a ndosɨ. Ghɨ n-fu meyn nô mɨ ndà ta wù n-ndû a ndo nɨ̀ Bôbo Fɨyini mɨchi ɨ̀n jɨ̀m sɨ ni ifêl zɨ̀ a ghɨ n-fu sɨ̂ ŋweyn na wù na felɨ̀-à, kɨ̀ ighel ta wù n-kelɨ sɨ fèl, wu felɨ̀ chem kɨ a ŋweyn a leŋ. 17Ghɨ n-læ meyn gwòtɨ̀ ɨ̀fwo ateyn sɨ̂ ngàŋsɨ ndô Fɨyini sìsɨ a ghɨ nyàʼ azɨyn a àŋena kɨ̀ asas a ndosɨ asas a ndosɨ kɨ̀mɨ nɨ̀ ghelɨ ndo nɨ̀ Levì ghì a ghɨ n-ghɨ bèŋsɨ̀ mɨ̀vɨm ɨ̀n bò sɨ ndù asɨ kɨ̀ ta ifêl i wul ì nà n-ghɨ a ŋweyn aleŋ. 18Àŋena nɨn fu meyn ɨ̀fwo nô mɨ sɨ̂ ndà vzɨ̀ a izɨyn i ŋweyni nà n-ghɨ ma ghɨ nyaʼ meyn kɨ̀ asas a ndosɨ asas a ndosɨ kèsa a nà n-ghɨ woyn ghɨ bolɨ ma ghɨki ma woyn ghɨlûmnɨ̀ ma woyn ghɨ̂kì-a nɨ̀ ghelɨ ghɨ̀ jɨ̀m. Ghɨ n-læ fu bòm ta àŋena nɨn læ meyn lèm ngeŋsɨ àŋena nɨ̀ ìlayni ta isaʼi nɨn dyêyn nɨ̀ àtem a àŋena à jɨ̀mà.
19Hèzèkayà nɨn toŋtɨ meyn àzɨyn a ghelɨ̀ na àŋena na gwòtɨ̀ ɨ̀fwo sɨ̂ ngàŋsɨ ndô Fɨyini ɨ woyn Alòyn ghì a ghɨ nà n-chi a gvêynsɨ̀ kèsa chî nô mɨ a ntèʼ ì kà. Ghelɨ nâ gheyn nà n-gwôtɨ̀ ɨ̀fwo sɨ̂ ghɨ̀lûmnɨ̀ ghɨ̀ jɨ̀m, gwôtɨ̀ kɨmɨ sɨ̂ ghelɨ ghɨ̀ jɨ̀m ta ghɨ n-læ nyàʼ azɨyn a àŋena anòyn nɨ̀ ghelɨ Levì ɨntweŋ ndo ɨntweŋ ndo. 20À ti iwo zɨ̀ a Hèzèkayà nɨn læ nì nɨ̀ àtem a ŋweyn à jɨ̀mà kɨ̀ Judà ì jɨ̀m a ghɨ ìwo jofà fî fom sɨ̂ Bôbo Fɨyini ɨ Fɨyini fɨ ŋweynfɨ. 21Wu nà n-ghalɨ nô mɨ ghà sɨ fèl a ndo nɨ̀ Bôbo Fɨyini kèsa wù n-nî ìwo ta isaʼi nɨn bê, wu nà jemà nî kɨ nɨ̀ àtem a ŋweyn à jɨ̀mà. À ti iwo zɨ̀ a wu nà ndû kɨ nɨ̀ àsɨ-a.