2 Chronicles 29

Hèzèkayà ɨ saʼ Judà

¹Hèzèkayà nɨn læ se sɨ koʼ fòyn a Judà ghɨ bèŋsɨ̀ mɨ̀vɨm ɨ̀n bò njvàsɨ̀ tâyn ɨ saʼ a Jèlusalèm sɨ a bèŋsɨ̀ mɨ̀vɨm ɨ̀n bò njvàsɨ̀ bulamòʼ. Nà ŋweyn nà n-ghɨ Abijà ɨ wâyn Zèkàliyà. ²Wu n-læ nà nî kɨ àwo kì a bò ŋweyn Devìt nà n-nî kɨ jôf sɨ̂ Bôbo Fɨyini.

³A nà ghɨ a njoŋ ɨ yî àsɨ a bêŋ ɨ yî àsɨ ta Hèzèkayà nɨn zɨ̀tɨ sɨ saʼ/ta Hèzèkayà nɨn koʼ ɨfôyn, wu choʼtɨ àchfɨ̂ a ndo nɨ̀ Bôbo Fɨyini ɨ kasi faytɨ ⁴Wu n-læ meyn yvɨ̀ŋtɨ̀ ngàŋsɨ ndô Fɨyini nɨ̀ ghelɨ ndo nɨ̀ Levì ɨwe a ndo nɨ̀ Bôbo Fɨyini abàs ghè a ɨchfɨ̂ iyvɨ nɨn sœ ateyn. ⁵Wu n-yvɨ̀ŋtɨ tî ɨ bè sɨ̂ àŋena na, “Yì yvɨtɨ a ghelɨ Levì, yi n-kelɨ sɨ lem ngêŋsɨ nɨ̀ ìlayni ta isaʼi nɨn dyêyn sɨ lem kɨmɨ ndô Bôbo Fɨyini ɨ Fɨyini fɨ ghɨ̀bo ghi nɨ̀ ìlayni ta isaʼi nɨn ndyêyn, sɨ fvɨ̀sɨ nô mɨ ghà ateyn ta kɨ n-layn wi ta isaʼi nɨn kɨŋ. ⁶Ghɨ̀bo ghesɨ̀nà tî nà yvɨnɨ̂ wì Bôbo Fɨyini ɨ Fɨyini fɨ ghesɨ̀nà fɨ ɨ nì mbɨ sɨ̂ ŋweyn ɨ nà bu fì jûmtɨ̀ wì ŋweyn/koʼsɨ̂ wì ŋweyn. Àŋena nɨn beyn meyn jɨm sɨ̂ Bôbo Fɨyini ɨ nà bu zɨ̂ wì a ŋweyn a ndo. ⁷Àŋena nɨn fo meyn àchfɨ̂ a ndô Fɨyini ɨ dyàyn lâmsɨ̀ sɨ nà lum balî kɨ bali mɨchi ɨ̀n jɨ̀m. Àŋena nɨn bu læ nà fî nyôʼ ìleŋ kèsa sɨ nyoʼ ifu a ndo nɨ̀ Fɨyini fɨ sɨ̂ Bôbo Fɨyini. ⁸À ti iwo zɨ̀ a ɨtoŋ Bôbo Fɨyini nɨn yaf sɨ̂ ghelɨ Judà nɨ̀ ghelɨ Jèlusalèm nô sɨ a ŋaŋ, wu nì ìwo sɨ̂ àŋena nô mɨ ndà ɨ nà wêsɨ̀ zɨ̀ fî kayn na à n-gâyn ghà sɨ̂ àŋena kɨ̀ ta yi n-ki yeyn. ⁹A nì ìwo nâ yèynì na ghɨ zuetɨ ghɨ̀bo ghesɨ̀nà iwòŋ, ghàytɨ woyn ghesɨ̀nà nɨ̀ ghɨ̀ki ghesɨ̀nà lù nɨ̀ àŋena. ¹⁰Mɨ n-kfàʼtɨ/baʼtɨ sɨ yɨ mɨkâyn ghesɨ̀ Bôbo Fɨyini ɨ Fɨyini fɨ Isìlæ̀ ta ka wu faŋ tɨ̀ fì tɨ̀ nyòʼsɨ̀ ɨtoŋ sɨ̂ ghesɨ̀nà. ¹¹Ka yì na buʼlɨ-à a woyn ghem bòm tà Bôbo Fɨyini choʼ meyn zɨ̀ na yì na felɨ̀ a ŋweyn asɨ, tisɨ̂ ghelɨ ghɨ koʼsɨ̂ ŋweyn fu tɨ̀fu sɨ̂ ŋweyn nyôʼ ìleŋ.”

¹²Wu n-taŋi tî, ghelɨ ndo nɨ̀ Levì nâ ghèyn ɨ nà sɨ felɨ̀-à.

A nà n-ghɨ Mahàt ɨ wâyn Amàsây ŋêyn Jowèl ɨ wâyn Azalìyà isas i ndo nɨ̀ Kohàt a ghɨ Kîsh ɨ wâyn Abdì nɨ̀ Azalìyà ɨ wâyn Zimàb nɨ̀ Edèn ɨ wâyn Jowà ɨ wâyn Zimàb nɨ̀ Edèn ɨ wâyn Jowà isas i ndo nɨ̀ Geshòn.

¹³A nà n-ghɨ Shimlì ŋêyn Jeyèl ɨchfɨ ndo nɨ̀ Elizafàn nɨ̀ Zèkàliyà ŋêyn Màtànayà isas i ndo nɨ̀ Asàf, ¹⁴a ghɨ Jehìyèl ŋêyn Shemè isas i ndo nɨ̀ Hemàn kɨ̀mɨ nɨ̀ Shèmayà ŋêyn Uzìyèl isas i ndo nɨ̀ Jedutùn.

¹⁵Ghelɨ nâ ghèyn nɨn læ meyn yvɨ̀ŋtɨ̀ woynà àŋena ɨ lèm ngeŋsɨ àŋena nɨ̀ ìlayni, ɨ zɨ nà lêm ndô Bôbo Fɨyini nɨ̀ ìlayni ta isaʼi nɨn dyêyn kɨ̀ ighel ta fòyn nɨ̂n bè. Àŋena nà n-nî nô mɨ ghà kɨ̀ ta tɨsaʼ tɨ Bôbo Fɨyini nà n-bê. ¹⁶Ngàŋsɨ ndô Fɨyinisɨ nɨn zɨ meyn a ndô Fɨyini sɨ lem nɨ̀ ìlayni ɨ fvɨ̀sɨ̀ nô mɨ ghà ta kɨ nà n-layn wi ta isaʼi nɨn dyêyn wi. Àŋena nɨn fvɨ̀sɨ tî, ɨ chɨ̀yntɨ bèʼì ɨ̀fwo ateyn ɨ ndu nɨ̀ ɨ̀ŋweyn afoŋlɨ a Kidlòn. ¹⁷Àŋena nɨn zɨ̀tɨ sɨ lem ndô Fɨyini nɨ̀ ìlayni achi a kɨ asɨ-a a bêŋ ɨ yî àsɨ, a se sɨ nà ghɨ a mɨchi nfama a njoŋ nâ ghè, àŋena nà ghɨ ma ghɨ ndu meyn chem abùʼ a ndo ghè a kɨ n-zɨ ndû a ndo nɨ̀ Bôbo Fɨyini. Àŋena nɨn fi meyn lì mɨ̀chi nfama ɨ lèm ndô Bôbo Fɨyini nɨ̀ ìlayni. Yi ti n-dyêyn na ifêl ateyni nɨn læ lì mɨchi ìvɨm njvàsɨ̀ ntufa.

¹⁸Ghelɨ ndo nɨ̀ Levì ɨ kæ be sɨ̂ fòyn Hèzèkayà na ghèsɨ lem meyn ndô Fɨyini nô ì jɨ̀m nɨ̀ ìlayni nɨ̀ àbaŋ ifu-a nɨ̀ ɨ̀fwo ateyn nô ɨ̀ jɨ̀m baʼsɨ̂ nɨ̀ ɨ̀bwâŋ vzɨ̀ a ghɨ n-lem abaŋ a laynɨ-a atû àteyn nɨ̀ ɨ̀fwo ateyn nô ɨ̀ jɨ̀m. ¹⁹Ghèsɨ kasi meyn gvì nɨ̀ ɨ̀fwo vzɨ̀ nô ɨ̀ jɨ̀m a fòyn Ahàz nɨn læ fvɨ̀sɨ sɨ a ndo nɨ̀ Bôbo Fɨyini ɨtuʼ ta wu nà n-yvɨnɨ wi Bôbo Fɨyini ɨ̀ lèm nɨ̀ ìlayni. Ɨfwo ateyn nɨn ghɨ asɨ abaŋ ifu nô ɨ̀ jɨ̀m.

²⁰Àŋena nɨn bè tî, ɨtuʼ ɨ bɨs ɨ layn, fòyn Hèzèkayà ɨ yvɨ̀ŋtɨ̀ chyeʼsɨ a ntèʼ ŋêyn àŋena ɨ koʼ a ndo nɨ̀ Bôbo Fɨyini. ²¹Àŋena nɨn se sɨ ndù ɨ lì mbàŋsɨ̀ nsòmbo nɨ̀ ɨ̀ywaʼ nsòmbo nɨ̀ woyn njɨ̀ sɨlûmnɨ̀sɨ̀ nsòmbo nɨ̀ tɨ̀feftɨ nsòmbo sɨ ifu na Bôbo Fɨyini lesɨ fù mbɨsɨ ghelɨ Judà nɨ̀ mbɨsɨ ghelɨ ntoʼ nɨ̀ àwo a bɨ-a kì a ghɨ n-nî a ndo nɨ̀ Bôbo. Fòyn ɨ bè sɨ̂ ngàŋsɨ ndô Fɨyini ma à ti woyn Alòyn na àŋena nyoʼ ifu ateyn atû àbaŋ sɨ̂ Bôbo Fɨyini. ²²Ngàŋsɨ ndô Fɨyini ɨ kæ sɨ mbòŋsɨ ateyn sɨ li mɨluŋ mɨ̀ àteyn sɨ mɨ̀sì atû àbaŋ ifu, ɨ sɨ kɨmɨ ɨ̀ywaʼ ɨ mɨ̀sì mɨ̀luŋ mɨ̀ àteyn abaŋ ifu, ɨ kæ sɨ woyn njɨ̀ sɨlûmnɨ̀sɨ̀ ɨ mɨ̀si kɨmɨ mɨ̀luŋ mɨ̀ àteyn atû àbaŋ. ²³Tɨfef tìtɨ̀ a ghɨ n-sɨ ɨ fu sɨ luynsɨ ilêsɨ̀ ifu ateyn asɨ nɨ̀ fòyn ŋêyn ghelɨ Judà, àŋena lèm ɨ̀wu àŋena atu àteyn. ²⁴Ngàŋsɨ ndô Fɨyini ɨ kæ sɨ tɨfef tɨ ateyn sɨ fu/lem mɨluŋ mɨ̀ àteyn atû àbaŋ ifu sɨ a ifu na Bôbo Fɨyini lesɨ fù mbɨsɨ ghelɨ Isìlæ̀. Fòyn nà n-ghɨ tì ma wù be meyn na ghɨ fu ifu i nyoʼnɨ-i nɨ̀ ìfu-i sɨ lèsɨ̀ sɨ fu mbɨsɨ sɨ alèʼ nɨ̀ ghelɨ Isìlæ̀ nô ghɨ̀ jɨ̀m.

²⁵Fòyn Hèzèkayà nɨn lem meyn ngàŋsɨ ndô Fɨyini a ndo nɨ̀ Bôbo Fɨyini, àŋena ɨ ghɨ nɨ̀ tɨ̀luŋtɨ nɨ̀ nchùmsɨ nɨ̀ tɨ̀soŋtɨ ɨwu. Aŋena nà n-ghɨ kɨ a dzɨ ghê a Devìt ŋêyn wùl ɨ̀ vzɨ̀ a wu nà n-yeyn awo fêʼtɨ̀ sɨ̂ fòyn Gâd kɨ̀mɨ nɨ̀ Natàn ɨ nfèʼtɨ̀ ì ghaʼnɨ nɨn bè ta Bôbo nɨn læ bè sɨ̂ àŋena. ²⁶Ghelɨ ndo nɨ̀ Levì ɨ kæ timi ɨ nà gvɨtɨ-à nɨ̀ ɨ̀fwo ɨ buʼnɨ nɨ̀ Devìt nɨ̀ ngàŋsɨ ndô Fɨyini, sɨ ghɨ kɨmɨ nɨ̀ tɨ̀soŋtɨ àŋenatɨ.

²⁷Hèzèkayà ɨ kæ bè na ngàŋsɨ ndô Fɨyini sɨ ifu i nyoʼnɨ-i ɨ̀ bàʼtɨ atû àbaŋ ifu. A nà ghɨ ta ghɨ zɨ̀tɨ sɨ nyòʼ ifu ateyn, ghelɨ ɨ nà sɨ yem njàŋsɨ̀ koʼsɨ̂ Bôbo Fɨyini toŋ tɨ̀soŋ buʼ ɨ̀fwo ɨ buʼnɨ nɨ̀ Devìt ɨ fòyn Isìlæ̀ kɨ tɨ̀nki tɨ̀ jɨ̀m. ²⁸Nchɨ̀yntɨ ghelɨ nô ghɨ̀ jɨ̀m ɨ nà ngvɨmtɨ̂ a nse koʼsɨ̂ Bôbo Fɨyini, ghelɨ ghì a ghɨ n-yem njàŋsɨ̀ ɨ yem kɨ yem toŋ tɨ̀sòŋ nô ta ka ifu ateyni nî fɨ mèsì.

²⁹Ifu i nyoʼnɨ-i nâ yèynì nɨn fɨ mèsi mɨ ɨlvɨ gha, fòyn nɨ̀ ghelɨ ghì a ŋêyn àŋena nà n-ghɨ amoʼ ɨ tɨm alvɨ a nse ɨ koʼsɨ Bôbo Fɨyini. ³⁰Fòyn Hèzèkayà ŋêyn ghelɨ ghɨ tisɨnɨ ɨ bè sɨ̂ ghelɨ ndo nɨ̀ Levì na àŋena na yem njàŋsɨ ta Devìt ŋêyn Asàf isɨ i baynɨ-i nɨn læ nyàʼ. Àŋena ɨ kæ sɨ nà yem njàŋsɨ̀ nɨ̀ ìsaŋlɨ-i ɨ chfɨŋsɨ ɨ̀tu a nse ɨ nà koʼsɨ̂ Bôbo Fɨyini.

³¹Hèzèkayà ɨ kæ bè na yi lem meyn ngeŋsɨ sɨ a nyɨŋ sɨ̂ Bôbo Fɨyini, yì na gvî nɨ̀ tɨ̀fu tìtɨ̀ a ghɨ n-sɨ nɨ ɨtîtɨ̀ a ghɨ fù sɨ a àyòŋnɨ̀ a ndo nɨ̀ Bôbo Fɨyini. Ghelɨ ɨ kæ gvi nɨ̀ tɨ̀fu tɨ ateyn. Ghelɨ ghì nô ghɨ̀ jɨ̀m a mɨ̀tem mɨ̀ àŋena nà n-saŋlɨ ɨ gvi nɨ̀ tɨ̀tu tɨ nyoʼnɨtɨ.

³²Ghelɨ nâ ghèyn nɨn læ chɨ̀yntɨ ɨ fu mbòŋsɨ̀ mɨ̀vɨm nsòmbo nɨ̀ ɨ̀ywaʼ ɨvɨ kɨ̀mɨ nɨ̀ woyn njɨ̀sɨ̀ ghɨlûmnɨ̀ ighɨ ì bò sɨ ifu i nyoʼnɨ-i sɨ̂ Bôbo Fɨyini. ³³Nyam sìsɨ̀ a ghɨ n-læ lèm sɨ a nyɨŋ sɨ sɨ sɨ̂ Bôbo Fɨyini nà n-chɨ̂yntɨ̀ ghɨ mbòŋsɨ̀ ighɨ ntufa nɨ̀ bzɨsɨ nkamsɨ̀ tal. ³⁴Ngàŋsɨ ndô Fɨyinisɨ nà n-dvɨ̂ wì sɨ baʼtɨ sɨ mèsi nyamsɨ ifu nâ sèynsɨ̀, woynà àŋena ɨ ghelɨ ndo nɨ̀ Levì ɨ nà gâmtɨ̀ àŋena nô ta ka ifêl ateyni mæ, ghɨ lem ngàŋsɨ ndô Fɨyini sɨ lisɨ nɨ̀ ìlayni. À nà n-ghɨ tì, ghelɨ ndo nɨ̀ Levì ɨ nî kɨ ta ghɨ bè sɨ nà lêm ilayn achi ghè isaʼi nɨn dyêyn chwô ngàŋsɨ ndô Fɨyini. ³⁵Tɨfu tɨ nyoʼnɨtɨ nà n-ghɨ nô sɨ idvɨ̀ baʼsɨ̂ nɨ̀ ìso i nyâm sìsɨ̀ a ghɨ n-læ fu ifu sɨ nà chi nɨ̀ mbôynɨ̀ kɨ̀mɨ nɨ̀ ìfu i nyvɨnɨ-i zɨ̀ a ghɨ n-nî ghɨ fu baʼsɨ̂ nɨ̀ ìfu i nyoʼnɨ-i.

Ghɨ n-læ fu têyn, ghelɨ ɨ kæ zɨ̀tɨ̀ ɨ nà sɨ kasî koʼsɨ̂ Bôbo Fɨyini a ŋweyn a ndo. ³⁶Hèzèkayà ŋêyn ghelɨ Judà nô ghɨ̀ jɨ̀m ɨ nà saŋlɨ-à kûm ìwo zɨ̀ a Fɨyini fɨ nì sɨ̂ ghelɨ ŋweyn bòm ta yi n-gayn kɨ sɨ ɨlvɨ.