2 Chronicles 26

Fòyn Uzìyà ɨ saʼ Judà

¹Ghelɨ Judà nô ghɨ̀ jɨ̀m nɨn læ meyn yisi Uzìyà sɨ a fòyn wu ghɨ bèŋsɨ̀ njvàsɨ̀ ntufa alèʼ nɨ̀ bò ŋweyn. ²A nà ghɨ ta Amàzayà kfɨ, Uzìyà ɨ ghal ɨ fsɨ ntèʼ Elàt ɨ kasi bàʼlɨ̀ ɨ fu sɨ̂ Judà.

³Uzìyà nà n-ghɨ bèŋsɨ̀ njvàsɨ̀ ntufa ghɨ yisi ŋweyn sɨ a fòyn, wu nà saʼ a Jèlusalèm sɨ a bèŋsɨ̀ mɨ̀vɨm ɨ̀n tâyn njvàsɨ̀ bò. Nà ŋweyn nà n-ghɨ Jèkolìyà ma wù lù a Jèlusalèm. ⁴Wu nà n-jelɨ̀ avɨ nɨ̀ bò ŋweyn nî kɨ àwo kì a Bôbo nɨn kɨŋ. ⁵Wu nà n-koʼsɨ̂ Bôbo Fɨyini ɨtuʼ ta Zèkàliyà nà n-tebtɨ ŋweyn sɨ nà fayn fayn Fɨyini. A nà ghɨ ta wù yvɨ̀nɨ Bôbo Fɨyini wu boysɨ ŋweyn.

⁶Uzìyà nɨn læ meyn seʼ iwoŋ ɨ nù ghelɨ Fìlisìyà ɨ bɨ̀ytɨ̀ mbàyn ntèʼ Gâd nɨ̀ ntèʼ Jabnè kɨ̀mi nɨ̀ ntèʼ Ashdòd. Wu n-nì tî ɨ kasi bàʼlɨ̀ ntèʼsɨ a ngùŋ Ashdòd ɨ bàʼlɨ kɨmɨ ɨ̀lwêʼ ɨlvɨ a Fìlisìyà. ⁷Fɨyini fɨ̀ nɨn gamtɨ meyn Uzìyà wu tɨm yɨ ghelɨ Fìlisìyà nɨ̀ ghelɨ Alàb ghì a ghɨ nà n-chi a Gul Bâl kɨ̀mɨ nɨ̀ ghelɨ Meyùn. ⁸Ghelɨ Amòn nɨn gvi meyn fu ɨfwo sɨ̂ Uzayà, ghɨ kya ŋweyn ndû chem a Ijìb bòm ta ɨfôyn ŋweyn nà n-to.

⁹Uzayà nɨn baʼlɨ meyn nchisɨ a Jèlusalèm. Wù n-bàʼlɨ ɨchfɨ mbàyn ghè a wu n-ghɨ ibvɨ i mbàyn nɨ̀ ɨ̀chfɨ mbàyn vzɨ̂ a wu n-ghɨ ibal ɨ bàʼlɨ kɨmɨ alèʼ ghè a mbàyn ngol ateyn. ¹⁰Wù n-læ meyn bàʼlɨ kɨmɨ nchìsɨ a nse iyum ɨ tɨm tɨbɨ tɨ mu kɨ̀ sɨ idvɨ̀ bòm ta wu nà n-kelɨ nyamsɨ mbòloʼ kɨ̀ sɨ idvɨ̀ isas i kfɨyn nɨ̀ ìbal i. Wu nà n-kelɨ ghelɨ ghɨ felɨnɨ a ŋweyn a gvêynsɨ̀ nɨ̀ gveynsɨ mɨtam mɨ̀ gɨ̀lêbsɨ̀. Gveynsɨ ateynsɨ nà n-ghɨ a kfɨynsɨ ghɨ kɨmɨ ibal nse àteyn ɨ jofà.

¹¹Uzayà nà n-kelɨ sugèyʼsɨ̀ kɨ̀ sɨ idvɨ̀ ma sɨ faytɨ meyn yèʼi sɨ tɨm iwoŋ, gvɨ̂tɨ̀ sɨ seʼ iwoŋ nô mɨ ɨlvɨ gha inòyn inòyn. Akôyn a sugèyʼsɨ̀ nâ kèyn nà n-lêm Jeyèl ɨ wul ɨ vzɨ̀ a wu n-nyâʼ sɨ̂ fòyn ŋêyn Maseyà a tisɨ̂ Hànànayà. Hànànayà nà n-ghɨ wul ɨ̀ mòʼ antêynɨ̀ nɨ̀ ghelɨ ghɨ tisɨnɨ a ntoʼ. ¹²A nà n-tisɨ̂ ghelɨ nkamsɨ̀ bò nɨ̀ ghelɨ ighɨ ntufa tisɨ̂ sugèyʼsɨ ateyn. ¹³Ghelɨ ghɨ tisɨnɨ nâ ghèyn nà n-chɨ̂yntɨ̀ tisɨ̂ sugèyʼsɨ̀ nkamsɨ̀ tal nɨ̀ sugèyʼsɨ̀ nsòmbo nɨ̀ sugèyʼsɨ̀ ighɨ ì tal a ghɨ ghelɨ ma ghɨ yeʼi meyn sɨ nù iwoŋ to sɨ gàmtɨ fòyn sɨ nu mbàynɨ̀sɨ ŋweyn. ¹⁴Uzayà nɨn fu meyn ɨ̀fwo iwòŋ sɨ̂ sugèyʼsɨ ŋweynsɨ, a ghɨ nkyàsɨ̀ nɨ̀ àwoŋa nɨ̀ ɨ̀fol iwòŋ nɨ̀ ndzɨsɨ iwòŋsɨ nɨ̀ mɨ̀nchaʼ baʼsɨ̂ nɨ̀ ngòʼsɨ̀ nɨ̀ mɨ̀ngòʼtɨ̀. ¹⁵Uzayà nɨn baʼlɨ meyn ɨ̀lwêʼ ɨwuyn mbàyn Jèlusalèm sɨ nà kɨŋtɨ sugèyʼ sìsɨ̀ a sɨ nà n-tɨm suʼsɨ nɨ̀ mɨ̀nchya nɨ̀ ngòʼsɨ ghaʼlɨnɨsɨ atû nchi nô mɨ ɨlwèʼ ghè a mbàyn ngolɨ ateyn. Ɨlwêʼ nâ wèyn nɨn bàʼlɨ ghelɨ, faytɨ̂ kya ìfêl. Ghɨ nà n-kya ŋweyn nô mɨ wo bòm ta Bôbo Fɨyini nɨn gamtɨ meyn ŋweyn a dzɨ i kaynɨ wu nà sɨ kelɨ àdyaʼ nô sɨ a ŋaŋ.

¹⁶Uzayà nɨn læ keli adyaʼ nô mɨ ɨlvɨ gha ɨ nà sɨ ghaŋsɨ̂ ɨ̀wuyn, iwo ateyni ɨ nà ghɨ nzɨ̀tɨ ìfe nɨ̀ ŋweyn/wu zɨ̀tɨ sɨ fe. Wù n-læ meyn nì mbɨ asɨ nɨ̀ Bôbo Fɨyini Fɨyini fɨ ŋweynfɨ ta wù læ zɨ a ndo nɨ̀ Bôbo Fɨyini sɨ nyoʼ ileŋ atû àbaŋ ghè a ghɨ nyoʼ ileŋ ateyn. ¹⁷Wu n-nì tî, Azalìyà ɨ ngàŋ ndô Fɨyini ŋêyn ngàŋsɨ ndô Fɨyini sɨ lisɨ ɨ jùmtɨ̀ ɨ zɨ a ŋweyn ibàm. Àŋena nà n-kelɨ àtem ato-a. ¹⁸Àŋena nɨn ndu meyn ɨ bè sɨ̂ ŋweyn na, wù n-kelɨ wi adyaʼ sɨ nà nyoʼ ileŋ sɨ̂ Bôbo Fɨyini, a ghɨ ìfêl i ngàŋsɨ ndô Fɨyini ɨ woyn Alòyn ghì a ghɨ lèm meyn àŋena sɨ a nyɨŋ.

¹⁹À nà n-ghɨ tì, Uzayà ɨ ti baʼsɨ̂ abaŋ ghè a ghɨ n-nyôʼ ileŋ ateyn a ndo nɨ̀ Bôbo Fɨyini nɨ̀ àfo kì a ghɨ nyoʼ ileŋ ateyn a ŋweyn awu. Wu nà sɨ nyòʼsɨ̀ ɨ̀toŋ sɨ̂ ngàŋsɨ ndô Fɨyini nô mɨ ɨlvɨ gha ànsàsi-à ɨ ku ŋweyn ɨchfɨ atu. ²⁰Azalìyà ŋêyn ngàŋsɨ ndô Fɨyini sisɨ̀ ɨ ki yeyn ɨchfɨ̂ atu nɨ̀ ŋweyn, ɨ nà sɨ chɨyn na wù yaŋsɨ fvɨ̀ nô ŋweyn fvɨ bòm ta wu n-læ meyn yeyn na Bôbo Fɨyini maʼ meyn ìkoʼi a ŋweyn ɨwùyn.

²¹À ti ta fòyn Uzayà nɨn læ nà chi nɨ̀ ànsàsì-à nô ta ka wù læ̂ jèlɨ̀ kfɨ, chî kɨ a ndo ŋêyn nì nyɨŋ layn wi ta isaʼi nɨn dyêyn. Wu nà n-kaʼ wu bû fì zɨ a ndo nɨ̀ Bôbo Fɨyini nɨ̀ àwo kì a wu nà n-kelɨ sɨ nà ni-a. Wâyn ŋweyn Jotàm ɨ nà sɨ tisɨ̂ ntoʼ, saʼ ìlaʼ ateyn.

²²Awo a li-a kì a fòyn Uzayà nɨn læ nì kɨ̀ a n-zɨ̀tɨ sɨ chem a ngòʼsɨ nɨn ghɨ ma Isayà ɨ nfèʼtɨ̀ ì ghaʼnɨ nɨn nyaʼ meyn lèm. Isayà nà n-ghɨ wâyn Amòs. ²³À nà n-ghɨ ta Uzayà kfɨ, ghɨ gvɨ̀mì ŋêyn ghɨ̀bo ŋweyn a ngvɨ̀misɨ ntoʼ, mɨtì a ghɨ wi a ngvɨ̀misɨ tɨ̂fòyn bòm ta wu nà n-kelɨ ànsàsì. Wâyn ŋweyn Jotàm/Jotàm ɨ wâyn ŋweyn ɨ koʼ ɨfôyn.