2 Chronicles 24

Jòwâsh ɨ faytɨ ndo Fɨyini

¹Jòwâsh nà n-ghɨ bèŋsɨ̀ nsòmbo ghɨ yisi ŋweyn sɨ a fòyn wu saʼ a Jèlusalèm sɨ a bèŋsɨ̀ mɨ̀vɨm ɨ̀n kæ̀. Nà Jòwâsh nà n-ghɨ Zibìyà ma wù lù a Beshebà. ²Jòwâsh nɨn læ nà nî àwo kì a Bôbo Fɨyini nà n-kôŋ/kɨŋ ɨtuʼ ta Jèhòyadà ɨ ngàŋ ndô Fɨyini nà n-bu chi. ³Jèhòyadà nɨn ndu ghɨ̀ki ghɨ̀ bò sɨ̂ fòyn Jòwâsh, àŋena bzɨ woyn ghɨlûmnɨ̀ nɨ̀ ghɨ̀ki sɨ̂ ŋweyn.

⁴Jòwâs nɨn læ saʼ chem aleŋ a li-a ɨ choʼnɨ sɨ faytɨ ndô Bôbo Fɨyini, ⁵ɨ kæ jàŋtɨ ngàŋsɨ ndô Fɨyini nɨ̀ ghelɨ ndo nɨ̀ Levì ɨ bè sɨ̂ àŋena na, àŋena ndu a ntèʼsɨ Judà ɨ̀ fsɨ̀tɨ mɨ̀kwo mzɨ̀ a ghelɨ Judà nɨn fu a bêŋ sɨ faytɨ ndô Fɨyini ɨ Fɨyini fifɨ.

⁶Fòyn ɨ kæ jaŋ Jèhòyadà, atu a ngàŋsɨ ndô Fɨyini sɨ bɨf sɨ̂ ŋweyn na bòm ghà ta wu n-faŋ tɨ̀ bè na ghelɨ ndo nɨ̀ Levì ndu fsɨ̀tɨ mɨ̀kwo mzɨ̀ a ghelɨ Judà nɨ̀ ghelɨ Jèlusalèm nɨn kelɨ sɨ fu ta Mosìs ɨ wul ɨ̀ felɨnɨ nɨ̀ Fɨyini fɨ nɨ̀ nchɨ̀yntɨ ghelɨ Isìlæ̀ nɨn læ bè na ghɨ na fu-a sɨ nà faytɨ fɨ̀ndo fɨ Bôbo Fɨyini.

⁷Njùmtɨ̀ sɨ ibam nɨ̀ Atalìyàsɨ̀ ɨ wul ɨ wi ɨbɨ vzɨ̀ ti meyn kòlɨ̀ ndô Bôbo Fɨyini a bêŋsɨ chwonɨsɨ nà lî nô mɨ ɨ̀fwo ɨ laynɨ koʼsɨ̂ Bâl ateyn.

⁸Fòyn ɨ bè na ghɨ faytɨ àntayntayn ɨ̀ tom ɨchfɨ mbàyn ndô Fɨyini, ⁹ɨ jaŋ làʼì sɨ̂ ghelɨ Judà nɨ̀ ɨghɨ Jèlusalèm na àŋena gvi fu tâks/ifu zɨ̀ sɨ̂ Bôbo a Mosìs ɨ wul ɨ̀ felɨnɨ nɨ̀ Fɨyini fɨ nɨn bè na àŋena fu a nse iyum. ¹⁰Ghelɨ ghɨ tisɨnɨ nô ghɨ̀ jɨ̀m nɨ̀ ghelɨ ghɨ li ghì nô ghɨ̀ jɨ̀m ɨ gvì nɨ̀ ìfu-i àŋena ɨ we antayntayn nâ ghè nô ta ka kɨ luyn. ¹¹Ghelɨ ndo nɨ̀ Levì nà n-beʼì ndû nɨ̀ ànkeyna sɨ̂ chyeʼsɨ a ntoʼ nô mɨ ɨlvɨ gha ta kɨ luyn, a wul ɨ̀ vzɨ̀ a wù n-kûmtɨ̀ sɨ̂ fòyn a ntoʼ ŋêyn wùl ɨ̀ vzɨ̀ a wu n-kûmtɨ̀ sɨ̂ ngàŋ ndô Fɨyini ì ngaŋtɨnɨ fvɨsɨ nô mɨ ghà ateyn ɨ̀ kàsi ndù lèm àntayntayn ateyn alèʼ ghè a kɨ nà n-ghɨ ateyn. Àŋena nà n-nî tèyn kɨ̀ mɨchi ɨ̀n jɨ̀m. ¹²Fòyn Jòwâsh ŋêyn Jèhòyadà ɨ ngàŋ ndô Fɨyini nɨn læ fsɨtɨ mɨkwo nâ mèyn ɨ fu sɨ̂ ɨ̀tu ɨ ghelɨ ghì a ghɨ nà n-faytɨ ndô Fɨyini. Àŋena fsɨ ɨkwo ateyn ɨ yuyntɨ ghelɨ ghì a ghɨ n-bâʼlɨ̀ nɨ̀ ghelɨ ghì a ghɨ mbayn ɨfwo na àŋean faytɨ ndô Fɨyini ateyn.

¹³Ghelɨ ghì a ghɨ nà n-tisɨ ifêl ateyni nà n-felɨ̀ nô nɨ̀ àdyaʼa, ifêl ateyni ɨ nà ndû kɨ nô a jûŋ a àŋena ɨwu. Àŋena nɨn kasi meyn bàʼlɨ̀ ndô Bôbo Fɨyini kɨ̀ ta yi nà n-ghɨ, fî to-a. ¹⁴A nà ghɨ ta àŋena fàytɨ mèsì ndô Bôbo Fɨyini, àŋena gvì nɨ̀ ɨ̀kwo vzɨ̀ a wu bɨ̀sɨ ɨ fu sɨ̂ fòyn ŋêyn Jèhòyadà, àŋena ɨ lì ɨ̀kwo ateyn ghɨ faytɨ ɨ̀fwo ɨlvɨ a ndo nɨ̀ Bôbo têyn ta ɨfwo vzɨ̀ a ghɨ n-se sɨ koʼsɨ Bôbo ghɨ nà wê ɨ̀fwo ateyn, nyôʼ ìfu kɨ̀mɨ nɨ̀ ɨ̀kfaŋ ɨlvɨ ma ghɨ faytɨ nɨ̀ àso ɨkwo a baŋnɨ-a nɨ̀ a fɨfâ.

¹⁵Jèhòyadà nɨn læ lema ɨ chem bèŋ ɨvɨ nɨ̀ bèŋsɨ̀ mɨ̀vɨm ɨ̀n tal, ¹⁶ghɨ gvɨ̀mì ŋweyn a ngvɨ̀misɨ nɨ̀ tɨ̀foyntɨ̀ a ntèʼ nɨ̀ Devìt bòm àwo a jûŋ kì a wù n-læ nì sɨ̂ Bôbo Fɨyini ɨ ni kɨmɨ a ndo nɨ̀ ɨ̀nfeynfɨ.

Jòwâsh ɨ nì àwo a bɨ-a

¹⁷À nà n-ghɨ ta Jèhòyadà kfɨ, chyeʼsɨ Judàsɨ̀ ɨ gvi beyn fòyn Jòwâsh ɨ chwotɨ ŋweyn na wù yvɨtɨ iwo zɨ̀ a àŋena nɨn bê. ¹⁸A nà ghɨ ta wù yvɨ̀tɨ, àŋena ɨ nà bu fi ndû wì a ndo nɨ̀ Bôbo Fɨyini ɨ Fɨyini fɨ ghɨ̀bo àŋena, ɨ nà koʼsɨ̂ mɨ̀yìnì mɨ̀ Ashelà nɨ̀ mìyìnì ɨ̀n lì. Ɨtoŋ Bôbo Fɨyini nɨn læ meyn yaf nô sɨ a ŋaŋ sɨ̂ ghelɨ Judà nɨ̀ ghelɨ Jèlusalèm bòm mbɨ nâ yèyn a àŋena nɨn nì. ¹⁹Bôbo Fɨyini ɨ tum nfèʼtɨ̀sɨ ghaʼnɨsɨ na sɨ gvi tàŋi sɨ̂ àŋena, àŋena kasi gvì sɨ̂ Bôbo mɨtì ghelɨ ateyn ɨ tuynsɨ.

²⁰Bôbo Fɨyini ɨ kæ tum ayvɨs a ŋweyna kɨ gvì ɨ luynsɨ Zèkàliyà ɨ wâyn Jèhòyadà ɨ ngàŋ ndô Fɨyini. Wu kæ timi asɨ nɨ̀ ghelɨ ateyn sɨ bè sɨ̂ àŋena na bòm ghà ta yi n-yvɨnɨ wì Bôbo Fɨyini a? Yì na kelɨ wi iboysɨ i ŋweyni.”

²¹Wu n-bè tî, chyeʼsɨ ɨ kwo baʼtɨ sɨ zue Zèkàliyà ɨ fòyn ɨ bè na ghɨ tɨmlɨ zuè ŋweyn ɨwe ndo nɨ̀ Bôbo Fɨyini. ²²Fòyn Jòwâsh nɨ̀n bu læ kfàʼtɨ njùŋ zɨ̀ a Jèhòyadà ɨ bò Zàkàliyà nɨn læ nì sɨ̂ ŋweyn, ɨ kwo zue wâyn ŋweyn. Zèkàliyà nɨn se sɨ kfɨ ɨ chwotɨ na Bôbo Fɨyini yeyn iwo yèynì a yì nì, ɨ sɨ̀sɨ̀ ìkfɨ ì yemi.

²³A nà ghɨ achi a li-a ta bèŋ chfɨ̀, sugèyʼsɨ Alàmsɨ̀ ɨ kèʼ Jòwâsh ɨ nu bebsɨ Judà nɨ̀ Jèlusalèm ɨ zuetɨ ghelɨ ghɨ tisɨnɨ nô ghɨ̀ jɨ̀m ɨ bèʼì ɨ̀fwo ɨ tsɨynsɨ sɨ̂ fòyn àŋena a Dàmaskùs. ²⁴Ghelɨ Alàm nɨ̀n læ nù ghelɨ Judà kɨ nɨ̀ sugèyʼsɨ̀ sɨ læ̂ kɨ tèyn, Bôbo ɨ gàmtɨ̀ àŋena, àŋena ɨ tɨm yɨ ghelɨ Judà nɨ̀ sugèyʼ sɨ dvɨnɨsɨ. Ngeʼ nâ yèyn nɨn læ koli ghelɨ Judà bòm ta àŋena nɨn læ fvɨ̀sɨ Bôbo Fɨyini ɨ Fɨyini fɨ ghɨ̀bo àŋena wu fu ngeʼ nâ yèyn sɨ̂ àŋena. ²⁵Ghelɨ Alàm nɨn se sɨ lù ma àŋena lemsɨ meyn fòyn Jòwâsh nô sɨ a ŋaŋ. Chyeʼsɨ ntoʼ nɨ̀ ŋweynsɨ ɨ baʼtɨ sɨ zue ŋweyn bòm ta wù ti meyn zuè wâyn Jèhòyadà ɨ ngàŋ ndô Fɨyini. Àŋena nɨn zue meyn ŋweyn a ŋweyn ɨkuyn ghɨ gvɨ̀mì ŋweyn a ntèʼ Devìt mɨtì a ghɨ wi a ngvɨ̀misɨ tɨ̂fòyn.

²⁶Ghelɨ ghì a ghɨ n-læ baʼtɨ sɨ zue ŋweyn nà n-ghɨ Zabàd ɨ wâyn Shèmayà ɨ wul ɨ̀ wî Amòn nɨ̀ Jèhozabàd ɨ wâyn wùl ɨ wî Mowàb. ²⁷Awo kì a ghɨ nyàʼ kùm woyn fòyn Jòwâsh nɨ̀ a kî a kɨ n-kûm ŋweyn kɨ̀mɨ nɨ̀ àkôyn ɨfwo kì a ghɨ n-læ faytɨ ndô Fɨyini ateyn nɨn ghɨ a ŋwàʼlɨ̀ afî a ghɨ nyàʼ awo a tɨ̂fòyn ateyn. Wâyn ŋweyn Amàzayà nɨn yɨ meyn àchɨ a ŋweyn.