2 Chronicles 20

Judà ɨ nù ghelɨ Edòm./Mowàb nɨ̀ Amòn

¹À n-læ meyn nà ghɨ achi a li-a, sugèyʼsɨ Mowàb nɨ̀ ɨ sɨ Amònsɨ̀ baʼsɨ̂ nɨ̀ ghelɨ ghì a ghɨ ntôʼ àŋena ɨ chɨyntɨ̀ ɨ gvì sɨ nu Jèhoshafàt.

²Ghelɨ ghɨ li i gvi bè sɨ̂ Jèhoshafàt na, “Anôyn a sugèyʼsɨ̀ a li-a ma kɨ lù a Edòm injɨyn i jvâ i ghaʼnɨ nɨn gvî sɨ nu vâ, kɨ sɨ ghɨ a Hazazon Tamàl. ³Ghɨ n-bè tî, Jèhoshafàt ɨ nà sɨ fâyn nô sɨ a ŋaŋ ɨ jèm na Bôbo Fɨyini tisɨ ŋweyn. Wu fi bè sɨ̂ ghelɨ Judà nô ghɨ̀ jɨ̀m na ka wùl nɨn yɨ afo. ⁴Ghelɨ Judà ɨ gvì ɨ yvɨ̀ŋtɨ̀ kɨ ntèʼ sɨ̀ jɨ̀m sɨ loyn igâmtɨ̀ sɨ̂ Bôbo Fɨyini.

⁵A nà ghɨ ta àŋena yvɨ̀ŋtɨ̀ ɨwe ndô Fɨyini a Jèlusalèm, Jèhoshafàt ɨ làlì ɨ timi asɨ nɨ̀ ghelɨ Judà. ⁶Wu n-timi tî, ɨ jèm sɨ̂ Bôbo Fɨyini ɨ bè na,

Bôbo Fɨyini ɨ Fɨyini fɨ ghɨ̀bo ghesɨ, wà n-ghɨ Fɨyini fìfɨ̀ a fɨ n-ghɨ iyvɨ. Wà n-saʼ tɨ̀laʼ tɨ mzɨ tɨ̀ jɨ̀m. Wà n-to-a, fî kelɨ àdyaʼ ma wùl ɨ̀ kàʼ wu bû to chwò và. ⁷Wà n-ghɨ Fɨyini feyfɨ. Wà n-læ meyn sàŋ ghelɨ ghì a àŋena nà n-kelɨ ilaʼ yèynì ɨ fu ilaʼ ateyn sɨ̂ ghelɨ Isìlæ̀ ɨ woyn Abɨ̀làhâm ɨ wul ìjel nɨ̀ và na àŋena keli samoʼ. ⁸Àŋena chi meyn ilaʼ nâ ghàyn ɨ̀ bàʼlɨ̀ ndo sɨ nà koʼsɨ vâ ateyn bê na, ⁹‘Iwo i bzɨ-i kæ gàyn sɨ̂ ghès kèsa à n-ghɨ ìwoŋ ma à n-ghɨ ìkoʼi ma à kù jeŋ a, a ghèsɨ̀ timi asɨ a ndo nâ ghàyn a wà n-ghɨ ateyn ɨ dzɨ̀ sɨ̂ và a wà yvɨ ɨ̀ gàmtɨ̀ ghès.’

¹⁰Yeyn iwo zɨ̀ a ghelɨ Amòn nɨ̀ ghelɨ Mowàb kɨ̀mɨ nɨ̀ ghelɨ Edòn nɨn ni-a ma wà læ meyn tuynsɨ na ka ghɨ̀bo ghesɨ zɨ ilaʼ nɨ̀ àŋena ɨtuʼ ta àŋena nɨn fvɨ̀ sɨ a Ijìb. Àŋena faŋ tɨ̀ bèbsɨ àŋena. ¹¹Àŋena sɨ sâŋ fvɨsɨ̀ ghès ilaʼ afêyn a wà n-læ fu sɨ̂ ghès na à na kelɨ kɨ nô ghès. À ti ilâʼ zɨ̀ a àŋena nɨn làʼ ghes ateyn? ¹²Fɨyini feyfɨ ni ngeʼ sɨ̂ àŋena bòm ta ghès nɨn kelɨ wi adyaʼ sɨ nu anôyn a sugèyʼsɨ̀ kèyn a kɨ kèʼ ghes têyn. Ghès nɨn kelɨ wi iwo sɨ nì mɨtì samsɨ̂ kɨ và.”

¹³Ghɨ̀lûmnɨ Judà nô ghɨ̀ jɨ̀m nɨn ghɨ̀ki àŋena baʼsɨ̂ nɨ̀ woyn àŋena ghɨ̀ jɨ̀m ɨ nà timi kɨ afu asɨ nɨ̀ Bôbo Fɨyini.

¹⁴Àŋena nà n-ti tì, ayvɨs a Bôbo Fɨyini-à ɨ gvì sɨ̂ Jàhazìyèl ɨ wul ɨ̀ ndo nɨ̀ Levì wu ti kɨmɨ anòyn nâ ghè. Jahazìyèl nà n-ghɨ wâyn Zèkàliyà, Zèkàliyà ɨ ghɨ wâyn Bènayà, Bènayà ɨ ghɨ wâyn Jehì, Jeyì ɨ ghɨ wâyn Màtanìyà ma wù fvɨ̀ isas i ndo nɨ̀ Asaf.

¹⁵Kɨ læ gvì tî, wu bè sɨ̂ fòyn Jàhazìyèl ŋêyn ghelɨ Judà nô ghɨ̀ jɨ̀m baʼsɨ̂ nɨ̀ ɨghî a ghɨ n-chi a Jèlusalèm na Bôbo Fɨyini be sɨ̂ zɨ̀ na ka yi n-fàyn ànôyn a sugèyʼsɨ̀ kèyn, ka iwuyn ì zɨ-i nɨn bòli bòm ta a n-nù wì zɨ, a nù Bôbo Fɨyini a yi alèʼ. ¹⁶À læ nà ghɨ a libɨs, yi fvɨ̀ ɨ kalì a dzɨ ta yì n-koʼ chwò a kfɨ̂yn Ziz ta ka zɨ̂ àŋena koynɨ, àŋena koʼ koʼ alèʼ ghè a ibal zɨ̀ a yi n-fu ighami sɨ̂ nse iyum/a nse iyum gòʼsɨ̀ ateyn. ¹⁷Yi n-nû wì iwòŋ nâ ghàyn, yì timi asɨ iwòŋ nà to kɨ to a ka yì yeyn dzɨ zɨ̀ a Bôbo nɨn bœ̀sɨ̀ zɨ ateyn, a ghelɨ Judà nɨ̀ ɨghî a ghɨ n-chi a Jèlusalèm. Ka yi n-fàyn, ka iwuyn ìzɨ-i nɨn bòli, yì fvɨ kèʼ àŋena a libɨs. Bôbo Fɨyini nɨn ghɨ zɨ̂ àŋena a moʼ.

¹⁸Wu n-taŋi tî, fòyn Jèhoshafàt ɨ kgvɨmtɨ a nse ɨ kfɨsɨ ìkêʼ i ŋweyn a nse baʼsɨ̂ nɨ̀ ghelɨ Jèlusalèm nɨ̀ ɨghɨ Judà ghɨ li nô ghɨ̀ jɨ̀m na koʼsɨ̂ Bôbo Fɨyini. ¹⁹Ghelɨ ndo nɨ̀ Levì ghɨ li a ghɨ woyn Kohàt nɨ̀ ɨ ghɨ Kolàt ɨ làlì ɨ timi ɨ nà yem njàŋsɨ̀ nɨ̀ gyasɨ tosɨ koʼsɨ̂ Bôbo Fɨyini.

²⁰Ɨtuʼ ɨ bɨs layn, ghelɨ iwòŋ nɨ̀ Judà ɨ fvɨ nà ndû a nse iyum a Tekowà. A nà ghɨ ta àŋena lù, Jèhoshafàt ɨ timi ɨ bè na, “Yì yvɨtɨ a ghelɨ Jèlusalèm nɨ̀ ɨ ghɨ Judà! Yì sàmsɨ Bôbo Fɨyini a wù ni a yì na to iwòŋ ɨ̀ bɨ̀mi ìwo zɨ̀ a nfèʼtɨ̀ ì ghaʼnɨ bè a yì tɨm yɨ.”

²¹A nà ghɨ ta wù tàŋi ŋêyn Sugèyʼsɨ Judàsɨ̀, Jèhoshafàt ɨ chwotɨ na ghɨ yem njàŋsɨ̀ kòʼsɨ Bôbo Fɨyini bòm ta wù n-ghɨ Fɨyini fɨ laynɨfɨ. Àŋena na yem bè na,

“Yì na fu àyòŋnɨ̀ sɨ̂ Bôbo Fɨyini,

ikôŋ i mɨ̂kàyn nɨ̀ ŋweyn faŋ meyn kɨ̀ samoʼ.

²²Àŋena nɨn zɨ̀tɨ sɨ yem njàŋsɨ̀ sɨ koʼsɨ Bôbo Fɨyini, ifâyn i bemnɨ-i ɨ ku àŋena ghɨ tɨm yɨ àŋena. ²³Sugèyʼsɨ Mowàbsɨ̀ nɨ̀ ɨsɨ Amònsɨ̀ ɨ kasi nà nû sugèyʼsɨ Edòmsɨ̀ ɨ zuetɨ àŋena nô ghɨ̀ jɨ̀m. A nà ghɨ ta àŋena zuètɨ mèsi sugèyʼsɨ Edòm, àŋena nà sɨ zuetɨ̂ ngeŋsɨ àŋenasɨ.

²⁴A nà ghɨ ta sugèyʼsɨ Judà gvì chem alèʼ a ngaŋtɨnɨ-a a nse iyum ɨ ki ndùsɨ̀ nɨ̀ àlêʼ kì a anôyn a sugèyʼsɨ nà n-ghɨ ateyn, ɨ yeyn kɨ tɨgvɨyn tɨ ghêl tɨ nyɨŋ a nse bula wùl ɨ̀ moʼ leʼ sɨ ateyn. ²⁵Fòyn Jèhoshafàt ŋêyn sugèyʼsɨ ŋweynsɨ ɨ ndù sɨ bèʼi ɨ fwo iwòŋ ɨ yeyn tɨgvɨyn tɨ àŋena nɨ̀ ɨ̀fwo ɨjûŋ kɨ̀ sɨ idvɨ̀ nɨ̀ ɨ̀fwo ɨkwo ɨtwo ma àŋena kàʼ ghɨ bû lì mèsì. Àŋena nɨn læ lì mɨchi ɨ̀n tal sɨ yvɨ̀ŋtɨ ɨfwo ateyn ɨ̀ jɨ̀m. ²⁶A nà ghɨ a mɨchi ɨ̀n kæ̀, àŋena chɨ̀yntɨ̀ ibal i Bèlakà ɨ nà yem njàŋsɨ̀ koʼsɨ̂ Bôbo Fɨyini. À ti iwo zɨ̀ a ghɨ n-toŋtɨ alêʼ nâ kì na ibal i Bèlakà ma à ti ibal i boysɨ sɨ chem layn.

²⁷Sugèyʼsɨ Jèlusalèm nɨ̀ ɨsɨ Judà sɨ lisɨ nɨn kfa meyn nɨ̀ ìsaŋlɨ-i, Jèhoshafàt ɨ tisɨ àŋena. Àŋena nà saŋlɨ-à bòm ta Bôbo Fɨyini ni meyn àŋena tɨm yɨ mbàynɨ̀sɨ àŋena. ²⁸Àŋena nà kfâ a Jèlusalèm buʼ tɨ̀luŋ, toŋ ndoŋsɨ nɨ̀ tɨ̀soŋtɨ ɨ ndu zɨ a ndo nɨ̀ Bôbo Fɨyini.

²⁹Ghelɨ tɨlaʼ tìtɨ̀ a àŋena nɨn yvɨ dzɨ zɨ̀ a Bôbo Fɨyini nɨn tɨm yɨ mbàynɨ̀sɨ ghelɨ Isìlæ̀ ateyn ɨ nà sɨ fàyn Fɨyini. ³⁰A nà ghɨ ta Jèhoshafàt nà n-saʼ ilaʼ i ŋweyni, ɨ nà chî nɨ̀n mbôynɨ̀ ɨbwàs ɨ̀ jɨ̀m bòm ta Fɨyini fɨ ŋweynfɨ nà n-kɨ̂ŋtɨ̀ ŋweyn.

³¹Jèhoshafàt ɨ wâyn Azubà ɨ wâyn wâyn Shilhì nɨn læ se sɨ koʼ ɨfôyn, ghɨ bèŋsɨ̀ mɨ̀vɨm ɨ̀n tal njvàsɨ̀ bò ɨ saʼ sɨ a bèŋ mɨ̀vɨm ɨ̀n bò njvàsɨ̀ tâyn chî a Jèlusalèm. ³²Jèhoshafàt nɨn læ nà nî kɨ ta bò ŋweyn Asà nɨn læ nà nî, ɨ faŋ tɨ̀ kfɨ̀nɨ. ³³Mɨtì wù n-bu læ bebsɨ ɨlwêʼ vzɨ̀ a ghɨ nà n-koʼsɨ mɨ̀yìnì ateyn, a ghɨ tì bula ghelɨ Judà samsɨ Bôbo Fɨyini ɨ Fɨyini fɨ ghɨ̀bo àŋena nɨ̀ àtem a àŋena à jɨ̀mà.

³⁴Awo a li-a kì a kɨ n-læ gàyn ɨtuʼ ta Jèhoshafàt nà n-saʼ a n-zɨ̀tɨ sɨ chem a ngòʼsɨ nɨn ghɨ ma ghɨ nyaʼ meyn a ŋwàʼlɨ̀sɨ̀ nɨ̀ Jehù ɨ wâyn Hànanì.

³⁵À n-læ meyn nà ghɨ achi a li-a, Jèhoshafàt ɨ fòyn Judà ɨ ndu chɨ̀ytɨ̀ Ahàzayà ɨ fòyn Isìlæ̀ ta wu nà n-nî awo a bɨ-a. ³⁶Wu n-læ meyn chɨ̀yntɨ̀ ŋweyn ŋêyn ŋweyn ɨ faytɨ ngùʼsɨ nô sɨ idvɨ̀ sɨ nà beʼi ghelɨ mbêyʼlɨ̀ zɨ̂ a jvâ ito nô a ndyèyn. Wu n-læ bàʼlɨ mèsi a Eziyon Gebà. ³⁷A nà ghɨ ta Jèhoshafàt ŋêyn Ahàzayà bàʼlɨ̀ mèsì ngùʼsɨ, Elìzà ɨ wâyn Dodavahù ɨ bè ìwo zɨ̀ a Bôbo bè sɨ̂ Jèhoshafàt. Wu n-bè na bòm ta wà chɨ̀yntɨ̀ zɨ̂ Ahàzayà, Bôbo Fɨyini nɨn bebsɨ̂ ìfêl ìzæ. À tì ta ngùʼsɨ ateynsɨ nɨn bu læ timi zɨ a jvâ ì ghaʼnɨ.