2 Chronicles 1

Sòlomòn ɨ jèm na Fɨyini fɨ̀ fu itof sɨ̂ ŋweyn

¹Fòyn Sòlomòn ɨ wâyn Devìt nɨn læ meyn baʼtɨ ɨfôyn ŋweyn a Isìlæ̀ wu nà to-a bom ta Bôbo Fɨyini ɨ Fɨyini fɨ ŋweyn nà n-ghɨ ŋêyn ŋweyn, ɨ fu adyaʼ a bemnɨ-a sɨ̂ ŋweyn.

²Sòlomòn nɨ̀n jaŋtɨ meyn ghelɨ Isìlæ̀ nô ghɨ̀ jɨ̀m ɨ taŋi sɨ̂ àŋena. Wu n-taŋi sɨ̂ ɨ̀tu sugèyʼsɨ̀ vzɨ̀ a wu n-tisɨ inôyn i sugèyʼsɨ̀ nkam, nɨ̀ ɨvzɨ̂ a wu n-tisɨ inôyn i sugèyʼsɨ̀ ɨvɨ, nɨ̀ ghelɨ ghɨ saʼnɨ baʼsɨ̂ nɨ̀ ghelɨ ghɨ tisɨnɨ a Isìlæ̀ nô ghɨ̀ jɨ̀m kɨ̀mɨ nɨ̀ ghelɨ ghì a ghɨ n-tisɨ asas a ndosɨ. ³Sòlomòn ŋêyn ghelɨ nâ ghèyn nô ghɨ̀ jɨ̀m ɨ lù ɨ koʼ alèʼ ghè a ghɨ nà koʼsɨ Bôbo Fɨyini ateyn a Gibìyòn. Fɨndo fɨ Bôbo fɨyini fɨ nà ghɨ alèʼ nâ ghè ma à læ baʼlɨ Mosìs ɨ wul ɨ̀ felɨnɨ nɨ̀ Bôbo Fɨyini a nse iyum. ⁴À nà n-ghɨ tì ma Devìt li meyn àntayntayn a mɨ̂kàyn nɨ̀ Fɨyini fɨ sɨ a Kiliyat Jelìm ɨ̀ ndù nɨ̀ ànkeyna alèʼ ghè a wu n-fàytɨ sɨ lèm ateyn a Jèlusalèm. ⁵Mɨtì abaŋ ifu kì a Bèzalèl ɨ wâyn Yulì ɨ wâyn Hûl nɨ̀n læ faytɨ nɨ̀ ìdyayni nà n-ghɨ a Gibìyòn ɨchfɨ fɨndo nɨ̀ Bôbo Fɨyini. Sòlomòn ŋêyn ghelɨ ghɨli ghì ɨ kæ ndù sɨ koʼsɨ Bôbo Fɨyini afu. ⁶Aŋena nɨn ndù tî fòyn Sòlomòn ɨ fvɨ ndù asɨ abaŋ ghè a ghɨ faytɨ nɨ̀ ìdyayni tî ɨ fu nyamsɨ nkam sɨ a ifu i nyoʼnɨ-i atû àbaŋ nâ ghè.

⁷A ni nà ghɨ nɨ̀ntuʼ achi nâ ghè Fɨyini fɨ ɨ fvɨ̀ ikèʼ nɨ̀ fòyn Sòlomòn ɨ bè sɨ̂ ŋweyn na, “Bɨf nô mɨ ghà sɨ̂ mà ta wà n-kɨŋ, mà fu sɨ̂ và.”

⁸Fòyn Sòlomòn ɨ bè sɨ̂ Fɨyini fɨ na, “Wà dyeyn meyn àtem ajuŋà nɨ̀ và sɨ̂ bò wom ɨ Devìt, ɨ̀ nì ma lî àlêʼ a ŋweyn sɨ a fòyn. ⁹Mɨ n-jêm lvîyn a Bôbo Fɨyini na wa luynsɨ ichfɨ̂nɨ̀ zɨ̀ a wà n-læ chfɨ̀nɨ sɨ̂ bò wom Devìt./Wà luynsɨ meyn ìchfɨ̂nɨ̀ zɨ̀ a wà n-læ chfɨ̀nɨ sɨ̂ bò wom Devìt a Bôbo. Wà nî meyn ma na ghɨ fòyn sɨ̂ ghelɨ ghɨ dvɨ̂ kɨ ta asese a mbæ̀ jvà. ¹⁰Mɨ n-chwotɨ̂ na wà fu itof sɨ̂ mà ta ka mà keli sɨ saʼ ghelɨ ghèyn a ghɨ dvɨ̂ têyn.”

¹¹Fɨyini fɨ ɨ bè sɨ̂ fòyn Sòlomòn na, “Wà bû bɨf ighaʼ, ɨ̀ faŋ tɨ̀ bè na mà ni ghɨ na ngvɨmlɨ̂ và, ɨ̀ faŋtɨ̀ bè na mà ni mbàynɨ̀ shyasɨ kfɨtɨ, kèsa sɨ bɨf ichi idya-ì mɨtì ɨ loyn itof sɨ nà tisɨ ghelɨ̀ ghem ghì a mà lèm vâ sɨ a fòyn na wà na saʼ a. ¹²Mɨ n-fu ìtof zɨ̀ sɨ̂ và a wà bɨf, ɨ̀ fì nì a ghɨ na ngvɨmlɨ̂ và, fu ighaʼ sɨ̂ và bula ma timi fù sɨ̂ fòyn ɨ̀lvɨ̀ a wa asɨ, ghɨ wi sɨ læ̀ sɨ fu sɨ̂ fòyn ɨlvɨ̀ a wù læ̀ koʼ ibàm.” ¹³Fòyn Sòlomòn ɨ kæ lù sɨ alèʼ ikoʼsɨ ɨchfɨ fɨndo nɨ̀ Bôbo a Gibìyòn sɨ ndù a Jèlusalèm. Wu n-ndù tî, ɨ nà saʼ ghelɨ Isìlæ̀.

¹⁴Wù n-yuyn meyn mɨ̀nchaʼ mɨ̀ ìwòŋ nɨ̀ nyamsɨ kfaŋsɨ kɨ̀ sɨ a idvɨ̀. Wù nà n-kelɨ mɨ̀nchaʼ mɨ̀ ìwòŋ nkam nɨ̀ mɨnchaʼ iwòŋ ighɨ ìkæ̀, kelɨ nyamsɨ kfaŋ nkam njvàsɨ̀ bò, ɨ lèm nyamsɨ lisɨ nɨ̀ mɨ̀nchaʼ a ntèʼsɨ ghê a ghɨ nà lem mɨ̀nchaʼ mɨ̀ ìwoŋ ateyn ɨ lem mɨ̀nchaʼ mɨ̀ ìwòŋ ɨ̀nlì nɨ̀ nyamsɨ a ŋweyn a ngùŋ a Jèlusalèm. ¹⁵À nà ghɨ ta fòyn Sòlomòn nà nsaʼ Isìlæ̀ aso ɨkwo a fɨfâ nɨn a baŋnɨ-a ɨ nà dvɨ̂ kɨ ta ngòʼsɨ̀ a Jèlusalèm, ɨ̀nkâʼ mɨ̀ sedà ɨ dvɨ̂ kɨ ta ɨnkâʼ mɨ̀ fîgsɨ̀ a isas i kfɨynsɨ a Judà. ¹⁶Nyamsɨ kfaŋ nɨ̀ fòyn Sòlomònsɨ̀ na n-lû a Ijìb, lû a Sìlisìyà. À nà ndû yuyn ghelɨ mbêyʼlɨ̀ nɨ̀ fòyn. ¹⁷Àŋena nà n-yuyn fɨ̀nchaʼ fɨ iwòŋ a Ijìb sɨ aso ɨkwo a fɨfâ, kɨ dɨlɨ̀ chem ndù kilùsɨ̀ nsòmbo, yuyn nyam kfaŋ sɨ aso ɨkwo a fɨfâ kɨ dɨlɨ chem ndù kilùsɨ̀ bò. Aŋena nà yuyn tì kasi beyʼlɨ̂ sɨ̂ tɨfoyntɨ Hît nɨ̀ ɨtɨ Alàmtɨ̀ nô tɨ̀ jɨ̀m.