1 Samuel 30

Devìt ɨ tɨm yɨ ghelɨ Amalèk

¹Devìt ŋêyn ghelɨ ŋweyn nɨ̀n jelɨ meyn sɨ a mɨchi ɨ̀n bò a nà ghɨ a mɨ̂chi ɨ̀n tal àŋena chem a Ziklàk. À nà n-ghɨ tì ma ghelɨ iwoŋ nɨ̀ Amalèk zɨ meyn ɨ̀ sàs ilaʼ i Negèf, ɨ̀ fì nù ghelɨ Ziklàk ɨ̀ nyòʼ ìlaʼ ateyn nô ì jɨ̀m. ²Àŋena nɨ̀n ghaytɨ meyn ghɨ̀kì nɨ̀ woynda baʼsɨ̂ nɨ̀ ghɨ̀lema nô mɨ nɨ̀ nda ɨ̀lvì a ntèʼ afu. Àŋena bu læ zue nô wul ɨ̀mòʼ ateyn mɨtì ɨ li lù nɨ̀ àŋena sɨ ɨkòs.

³A nà ghɨ ta Devìt ŋêyn ghelɨ ŋweyn gvì meyn chèm a ntèʼ Ziklàk àŋena yeyn ma ghɨ nyoʼ meyn ntèʼ àŋena, lì lu nɨ̀ ghɨ̀ki nɨ̀ woyn àŋena nô ghɨ̀ jɨ̀m sɨ ɨkòs. ⁴Devìt ŋêyn ghelɨ ŋweyn ɨ yeyn tî ɨ bɨ̀sà nɨ̀ ìdzɨ-i ɨ dzɨ̀ nô sɨ a ŋaŋ têyn ɨ boli nô fɨ̀dyaʼnɨ̂ fɨ nà bu ghɨ wi sɨ dzɨ̀. ⁵À nà n-ghɨ tì ma ghɨ li meyn kɨ̀mɨ ghɨ̀ki Devìt ghɨ̀bò a ghɨ Ahinòm ɨ wâyn wùl ɨ̀ Jeslèl, nɨ̀ Abigèl ɨ wî nkfɨ Nabàl a Kamèl. ⁶Iwo ateyn i ɨ fu ngeʼ sɨ̂ Devìt nô sɨ a ŋaŋ bòm ta ɨtoŋ ghelɨ ŋweyn nà n-sɨ ghɨ ma wu baŋ meyn bòm woyn nɨ̀ ghɨ̀ki àŋena, àŋena na bê na ghɨ n-tɨmlɨ zue ŋweyn nɨ̀ ngòʼsɨ̀. Mɨtì Bôbo Fɨyini ɨ fu atem ato-a sɨ̂ Devìt.

⁷Devìt ɨ bè sɨ̂ Abìyatà ɨ ngàŋ ndô Fɨyini ɨ wâyn Ahimelèk na, “Li gvi nɨ̀ àfo kì a ghɨ n-se sɨ bɨf iwo sɨ̂ Fɨyini fɨ ghɨ ghal tî.” Abìyata ɨ gvì nɨ̀ ànkeyna ɨ fu sɨ̂ ŋweyn. ⁸Devìt ɨ bɨf sɨ̂ Bôbo Fɨyini na, “Mà nyɨŋ ibam nɨ̀ ghelɨ ghèyn a ghɨ gvì lì lù nɨ̀ ghelɨ̀ ghes têyn a?”

“A mà ti nyɨŋ a mà koli àŋena a?” Bôbo bè na, “Nyɨŋ ibam nɨ̀ àŋena. Wa n-kolî àŋena ɨ̀ ghal fsɨ ghelɨ ghya nâ ghì.”

⁹Devìt ŋêyn ghelɨ ŋweyn ghì ighɨ ntufa ɨ lù ɨ jel kɨ têyn ɨ ndu chem afoŋlɨ a Besò ghelɨ iwòŋ ghɨli ɨ faŋ afu. ¹⁰Ghelɨ nɨn faŋ ighɨ ì bò ma ghɨ bolɨ meyn nà ghɨ ma ghɨ kàʼ ghɨ bû fì dyàŋ àfoŋlɨ. Mɨtì Devìt ŋêyn ghelɨ ighɨ ì kæ̀ ɨ faŋ nà ndû kɨ ibàm nɨ̀ ghelɨ ghì a ghɨ n-lì ghelɨ àŋena tî.

¹¹Àŋena se sɨ ndù ɨ yeyn wul ɨ̀ Ijìb ɨ̀lvì wu ghɨ a gvêyn. Ghɨ lì ɨ gvì nɨ̀ ŋweyn sɨ̂ Devìt. Àŋena fu mu wu nyvɨ ɨ fu ɨfwo ɨ yɨnɨ wu yɨ. ¹²Àŋena nɨn fu meyn kɨmɨ àbayn a li-a ma ghɨ fàytɨ nɨ̀ mɨ̀tam mɨ̀ figsɨ̀ baʼsɨ̂ nɨ̀ ntuʼsɨ lesìns sɨ̀ bòsɨ, wu yɨ ɨwuyn ŋweyn ɨ tonɨ bòm ta a nà n-ghɨ tì bula wù yɨ afo, bula wù nyvɨ nô mɨ mu sɨ a mɨ̂chi ɨ̀n tal.

¹³Devìt ɨ bɨf sɨ̂ ŋweyn na, “Wà n-ghɨ wul ɨ̀ felɨnɨ nɨ̀ ndà, ma wà lù nô wo?”

Wu bè na, “Mɨ n-ghɨ wul ɨ̀ Ijìb, felɨ̀ sɨ̂ wùl ɨ̀ Amalèk. À n-ghɨ mɨchi ɨ̀n tal layn ta bò ìfèl nɨ̀ mà leʼ vìsi mà ta mà zɨ̀tɨ̀ sɨ koʼi. ¹⁴Mà tî se sɨ zɨ̀tɨ̀ ikoʼi ma ghesɨ zɨ meyn nù Negèf zɨ̀ a ghelɨ Kelèt nɨn chi ateyn fì nù Judà kɨ̀mɨ nɨ̀ àbâs a Negèf kì a isas i ndo nɨ̀ Kalèb ì nɨn chi ateyn. À tî nyòʼ ghès ntèʼ Ziklàk.”

¹⁵Devìt ɨ bɨf sɨ̂ ŋweyn na, “Wà kàʼ a wà li ma a ghesɨ̀và ndu alèʼ ghè a ghelɨ nâ ghèyn nɨn ghɨ ateyn a?”

Wu bè na, “Chfɨ̀nɨ sɨ̂ mà sɨ izɨyn nɨ̀ Fɨyini fɨ na wa n-zue wi ma ɨ̀ faŋ tɨ̀ fù ma sɨ̂ bò ìfèl nɨ̀ mà. Wà kæ sɨ chfɨ̀nɨ̀ a mà ndu dyèyn àŋena sɨ̂ và.”

¹⁶Wu lì Devìt ŋêyn ŋweyn ndù alèʼ ghè a ghelɨ Amalèk nâ ghi nà n-ghɨ ateyn. À nà n-ghɨ tì ma àŋena gwosɨ meyn kɨ̀ alêʼ ateyn à jɨ̀m nà yɨ-a, nyvɨ-a fî saŋlɨ̂ bòm ɨ̀fwo vzɨ̀ a àŋena nà n-ghɨ ma ghɨ beʼi meyn a Fìlisìyà nɨ̀ Judà. ¹⁷Ɨtuʼ nà bɨsɨ layn gvî kɨ tèyn, Devìt ɨ zɨ̀tɨ̀ sɨ nu àŋena ɨ nu kɨ têyn ɨtuʼ ni nà jɨ ndu-à ankùmtɨ̀ achi, wu bu nû kɨ nu. Nô wùl ɨ̀ mòʼ nɨn bu læ leʼ a àŋena antêynɨ̀ abu kɨ woyn ghɨ lûmnɨ̀ ghɨli ighɨ ì kæ̀ ta ghɨ n-læ koʼ atû kàmelsɨ̀ ɨ nyɨŋ leʼnɨ. ¹⁸Devìt nɨn kasi meyn fsɨtɨ nô mɨ ghà ta ghelɨ Amalèk ghì nɨn læ lì, baʼsɨ̂ nɨ̀ ghɨ̀ki ŋweyn ghì ghɨ̀bò. ¹⁹Nô àfo a nɨn bu læ lè. Devìt nɨ̀n kasi meyn fsɨtɨ ghɨ̀lema nɨ̀ woynda ɨ ghɨki nɨ̀ woyn ghɨ lûmnɨ̀ baʼsɨ̂ nɨ̀ ɨ̀fwo vzɨ̀ a àŋena nɨn læ li lu nɨ̀ ŋweyn nô ɨ̀ jɨ̀m. ²⁰Wù n-ghal meyn fsɨ kɨmɨ bzɨsɨ njɨ̀ nɨ̀ bzɨsɨ ndoŋsɨ. Ghelɨ ŋweyn ɨ nà leŋ kfâ nɨ̀ nseynsɨ asɨ a nyâmsɨ̀ nɨ̀ ŋweyn sɨ lisɨ. Àŋena nà n-leŋ ndû tì bê na, “À n-ghɨ sæsɨ iwòŋ nɨ̀ Devìt tèyn.”

²¹Devìt ɨ se sɨ kfa ɨ gvi chem afoŋlɨ a Besò alèʼ ghè a ghelɨ ghì ighɨ ì bò tî dùʼì ateyn ta ghɨ bol. Ghelɨ ateyn ɨ fvɨ̀ sɨ koynɨ nɨ̀ Devìt ŋêyn ghelɨ ghɨli ghì. Devìt ɨ gvi baʼsɨ ɨ faytɨ toŋtɨ àŋena. ²²Ghelɨ mɨtem ɨ̀mbɨ̂ nô ghɨ̀ jɨ̀m ta àŋena nà n-ghɨ ŋêyn ghɨ̀ Devìt ɨ bè na, “Ka ghesɨ̀nà nɨn fu afo sɨ̂ àŋena antêynɨ̀ sæsɨ iwòŋ afêyn a ghesɨ̀nà kàsi fsɨ̀tɨ têyn bòm ta ghesɨ̀nà nɨ̀ àŋena bû tî sèʼ amoʼ. Nô mɨ ndà gvi lì wî ŋweyn nɨ̀ woyn ŋweyn lù ɨ̀ nà kfâ.”

²³Devìt ɨ bè na, “Ɨ̀ngaŋ a woynà ghem, ghesɨ̀nà kàʼ ghɨ bû nà mɨ ghelɨ nɨ̀ ɨ̀fwo ma à fù Bôbo sɨ̂ ghesɨ̀nà. Wù gamtɨ meyn ɨ̀ nì ghesɨ̀nà tɨm yɨ mbàynɨ̀ sɨ ghesɨ̀nà. ²⁴Wùl kàʼ wu bû bɨ̀mi ìwo nâ yèynì a yi n-bê têyn. Wùl vzɨ̀ a wù tî faŋ a ngùŋ ɨ̀fwo iwòŋ nɨn ghɨ kɨ ighel ta wul vzɨ̀ a wù tî seʼ iwòŋ. Nô mɨ ndà nɨn kelî kɨ ighel.” ²⁵Devìt ɨ taŋi tì ɨ lèm ìwo ateyn sɨ isaʼ sɨ̂ ghelɨ Isìlæ̀ sɨ zɨtɨ kɨ achi nâ ghè sɨ chem layn.

²⁶A nà n-ghɨ ta Devìt kfa ɨ̀ chèm a Ziklàk, wu lì sæsɨ iwòŋ sɨ lisɨ ɨ tum na ghɨ ndu fù sɨ̂ chyeʼsɨ Judà sìsɨ̀ a sɨ nà n-ghɨ suynsɨ ŋweyn ɨ̀ bè sɨ̂ àŋena na, “À ti sæsɨ iwòŋ sìsɨ̀ a sɨ lù sɨ̂ mbàynɨ̀sɨ Bôbo.”

²⁷Wu n-tum ɨfwo ateyn sɨ̂ chyeʼsɨ a Betèl nɨ̀ Lamot Negèf nɨ̀ Jatì, ²⁸ɨ fi tum sɨ̂ chyeʼsɨ Alò nɨ̀ ɨ sɨ Sifmòtsɨ̀ kɨ̀mɨ nɨ̀ Eshtemò, ²⁹nɨ̀ ɨ sɨ Lakàlsɨ̀ nɨ ɨ sɨ ntèʼsɨ Jelamèl nɨ̀ Kên, ³⁰nɨ ɨ sɨ Homàsɨ̀ nɨ̀ Bo Ashàn nɨ̀ Atàk, ³¹nɨ̀ ɨ sɨ Heblònsɨ̀ baʼsɨ̂ nɨ chyeʼsɨ ɨlwèʼ ghè a Devìt ŋêyn ghelɨ ŋweyn nɨ̀n tèynɨ ateyn nô ɨ̀ jɨ̀m.