1 Samuel 28

¹À n-læ nà ghɨ ɨtuʼ nâ ghè, ghelɨ Fìlisìyà ɨ yvɨ̀ŋtɨ̀ ghelɨ iwoŋ nɨ̀ àŋena sɨ nu ghelɨ Isìlæ̀. Akìsh ɨ bè sɨ̂ Devìt na, “Wa kya na zɨ̂ ghelɨ iwoŋ nɨ̀ và nɨn n-gvì-à a ghesɨ̀nà chɨyntɨ sèʼ iwoŋ.” ²Devìt ɨ bè na, “Yi n-ghɨ a jûŋ wa n-yeyn nɨ̀ ìsɨ ì zæ iwo zɨ̀ a wul ɨ̀ felɨnɨ nɨ̀ và kàʼ a wù ni.” Akìsh ɨ bè na, “Wà taŋi meyn kɨ̀ nô a jûŋ. Mɨ n-lèm và a wà na chì mà kɨ̀ mɨlvɨ ɨ̀n jɨ̀m.

Sôl ɨ taŋi sɨ̂ nkfɨ nse Samwèl

³A nà n-ghɨ tì ma Samwèl kfɨ meyn ghɨ gvɨmì ŋweyn a ŋweyn a ntèʼ a Lamà ɨ̀ dzɨ̀ ŋweyn. A ghɨ tì ma Sôl nɨ̀n saŋ meyn fvɨ̀sɨ̀ ghelɨ mɨnyaʼ nɨ̀ ghelɨ ghɨ fɨyntɨnɨ sɨ a Isìlæ̀. ⁴Ghelɨ Fìlisìyà ɨ yvɨ̀ŋtɨ̀ ɨ gvi kini àlêʼ a ntèʼ Shunèm ɨ bɨ̀ ateyn. Sôl ɨ yvɨ̀ŋtɨ̀ ghelɨ iwòŋ nɨ̀ Isìlæ̀ ɨ kini àlêʼ a ntèʼ Gilbùwa ɨ bɨ̀ ateyn. ⁵À nà n-ghɨ ta Sôl yèyn ghelɨ iwoŋ nɨ̀ Fìlisìyà ifayn ì ɨ ku ŋweyn wu kfɨ sayn, ⁶ɨ bɨf iwo zɨ̀ sɨ̂ Bôbo a wù kàʼ a wù ni. Mɨtì Bôbo faŋ tɨ̀ bè iwo sɨ̂ ŋweyn a jem kèsa ɨfwo ghè a ngàŋsɨ ndô Fɨyini sɨ ni sɨ ghal ɨlvɨ ta ghɨ n-bɨf iwo sɨ̂ Fɨyini fɨ ghɨ toŋtɨ̂ na ulîm ɨ faŋ mɨ tɨ bè sɨ toynɨ a nfèʼtɨ̀ sɨ ghaʼnɨsɨ. ⁷Sôl ɨ kæ be sɨ̂ nchìsɨ ntoʼsɨ na, “Yì kɨŋ wul ɨ wi sɨ̂ mà ta wù kàʼ a wù taŋi sɨ̂ nkfɨ nse ta ka mà ndu bɨf iwo zɨ̀ a mà kàʼ a mà ni. Àŋena bè na, “Ɨlvɨ̀ nɨn ghɨ a ntèʼ Endò.”

⁸Sôl ɨ bɨ̀l asɨ a ghêl ɨ màʼ ɨ̀fwo ta ka wùl na yeyn kelî wì ŋweyn ɨ ni lù nɨ̀ntuʼ ŋêyn ghelɨ ghɨ̀bò ɨ ndu yeyn wul ɨ wi àteyn. Àŋena ndù tì wu bè na, “Mɨ n-kɨŋ na wà kini ɨ̀ jàŋ àyvɨs a nkfɨ nse zɨ̀ a ka mà toŋtɨ izɨyn i ŋweyn.”

⁹Mɨtì wul ɨ wi àteyn ɨ bè sɨ̂ ŋweyn na, “Wà n-faytɨ̂ kya na Sôl saŋ meyn fvɨ̀sɨ̀ nô mɨ ndà ta wu n-taŋi sɨ̂ nkfɨsɨ nse sɨ ilaʼ afêyn, nɨ̀ ɨghî a ghɨ n-fsɨ adyaʼ sɨ̂ ɨyvɨsɨ sɨ nà feʼtɨ̀ awo kì a kɨ læ̀ jæ gàyn. Bòm ghà ta wa n-benà atam na mà kfɨ ateyn a?

¹⁰Sôl ɨ chfɨ̀nɨ̀ ŋweyn izɨyn nɨ̀ Bôbo ɨ bè na, “Mɨ n-bê sɨ̂ và samoʼ sɨ izɨyn nɨ̀ Fɨyini fìfɨ̀ a fɨ n-chi na, wùl nɨn fu wi ngeʼ sɨ̂ và bòm ìwo nâ yèynì.”

¹¹Wùl ɨ wi àteyn ɨ bɨf na, “Mà jaŋ nda sɨ̂ và a?” Sôl ɨ bè na, “Jaŋ Samwèl.”

¹²A nà ghɨ ta wùl ɨ wi àteyn yèyn Samwèl, ɨ byal ɨ dzɨ̀ nô nɨ̀ gyà ì to ɨ bè sɨ̂ Sôl na, “Bòm ghà ta wà lɨ̀sɨ ma a? À n-ghɨ và Sôl.”

¹³Fòyn ɨ bè sɨ̂ ŋweyn na, “Ka n-fàyn, fèʼtɨ sɨ̂ mà na wà yèyn gha. Wul ɨ̀wi àteyn ɨ bè na, “Mà yèyn afo kɨ fvɨ̂ koʼ gvî a nse ghɨ ta nkfɨ nse.

¹⁴Sôl ɨ bɨf sɨ̂ ŋweyn na, “Kɨ n-kêʼ ti-a? Wu bè sɨ̂ ŋweyn na, “Kɨ n-kêʼ ta advɨyn a wûl ɨ lûmnɨ̀ ma wù maʼ meyn dàla. Sôl ɨ keli na à n-ghɨ Samwèl nô mɨ ɨlvɨ gha ɨ suʼi nyìŋì a nse àkfɨ̀-akfɨ.

¹⁵Samwèl ɨ bɨf sɨ̂ Sôl na, “Bòm ghà ta wà n-jâŋ tâysɨ̀ ma na mà kasi gvì afêyn a?”

Sôl ɨ bè na, “Ngeʼ ìghaʼnɨ koli meyn mà. Ghelɨ Fìlisìyà nɨ nû mà, ma Fɨyini fɨ kenɨ meyn mà. Wù bu fì bêynsɨ̀ wì ma toynɨ̂ a Nfèʼtɨ̀ sɨ ghaʼnɨsɨ nɨ̀ jemsɨ ta wù tî nà bêynsɨ̀ sɨ asɨ. Ma na sɨ jâŋ và na wà feʼtɨ iwo zɨ̀ a ka mà ni.”

¹⁶Samwèl ɨ bɨf nâ, “Wà n-kya kɨ nô tèyn na Bôbo kenɨ meyn và nà sɨ ghɨ mbàynɨ̀ zyâ, nà sɨ kɨŋ na mà tebtɨ ti vâ lvɨyn a? ¹⁷Bôbo nì kɨ̀ iwo zɨ̀ a wu n-læ bè sɨ̂ và toynɨ̂ a ma. Bôbo jɨf meyn fsɨ̀ ɨfôyn sɨ và ɨ̀ fù kɨ̀mɨ sɨ̂ waynà vâ Devìt. ¹⁸Wù nì tèyn bòm ta wà n-bu læ yvɨnɨ ŋweyn, sɨ zuetɨ ghelɨ Amalèk nô ghɨ̀ jɨ̀m. ¹⁹Bôbo nɨn fu ghelɨ Isìlæ̀ baʼsɨ̂ nɨ̀ và ɨwu nɨ̀ ghelɨ Fìlisìyà. À læ̀ na ghɨ a libɨs a zɨ̂ woyn ghya gvi bàʼsɨ sɨ̂ mà ilaʼ i nkfɨsɨ nse. Bôbo nɨn fu kɨmɨ ghelɨ ndo ìwoŋ nɨ̀ Isìlæ̀ ɨwu nɨ̀ ghelɨ Fìlisìyà.

²⁰Sôl ɨ yvɨ mesi gvì nɨ̀ àwo kì a Samwèl tàŋi, ɨ kfɨ sayn ɨ fe àtèl-atel bòm ta wu nà n-ghɨ ma wu n-yìsi kɨ sɨ a jêŋ ɨ kfa chi.

²¹Wùl ɨ wi vzɨ̀ ɨ kɨŋtɨ baʼsɨ sɨ̂ ŋweyn ɨ yeyn na ifayni ku meyn ŋweyn nô sɨ a ŋaŋ ɨ bè sɨ̂ ŋweyn na, “Mà nì kɨ iwo zɨ̀ a wà nì bè na mà ni a bô. Ma ni meyn bɨmi sɨ kfɨ kɨ̀ sɨ nì iwo zɨ̀ a wà nì bè na mà ni. ²²Mɨ n-chwotɨ̂ và, visi mà gvi nɨ̀ àfo a wà yɨ tònɨ làlì nà ndû sɨ a wa alèʼ.”

²³Sôl ɨ tuynsɨ ɨ bè na, “Mɨ n-yɨ wi.” Mɨtì ghelɨ ŋweyn ɨ chɨ̀yntɨ̀ ŋêyn wul ɨ wi àteyn ɨ chwotɨ na wù yɨ, wu bɨmi ɨ làlì sɨ a nse ɨ duʼì ɨkuyn.

²⁴Wùl ɨ wi àteyn nà n-kelɨ àchôʼ a nyâm, wu nyaŋsɨ sɨ faytɨ, ɨ lì ɨ̀nkfɨ̂ŋ ɨ faytɨ àbayn a kfaŋ bula fɨ̀shɨ̀k ateyn, ²⁵ɨ tom ɨfwo yɨnɨ ateyn asɨ nɨ̀ Sôl ŋêyn ghelɨ ŋweyn, àŋena yɨ. Àŋena yɨ tî ɨ lu kɨ nɨ̀ntuʼ achi nâ ghè.